Koht ketin kupwurki en mahseniong uhk

Ngehno kin kahluwa iuk ong Sahm Nanleng oh Sises Krais. Met wia pwukoah kesempwal ehu en Ngehn Sarawi. E pil pahn kamarainih iuk en koluhla oh idawehn Sises Krais pwe ken kak alehdi kapai kan en Sapwellime Tomwpen dihpo. Ni ahmw pahn koluhla, Ngehno pahn kamwakeleiukada oh seweseiuk en wekila.

Ngehn Sarawi kin lokaiahng ahmw madamadau oh mohngiong. Kaweid kan en Ngehno kak kohdo nan ahmw madamadau ni soangen mwohmw tohto—sang ni kamarain en madamadau, mehn kapar akan, wehweh mwahu, oh ketemen en palingehn kan. Ngehn Sarawi kak lokaiahng ahmw mohngiong ni pepehm mwahu en nsenamwahu, eimah, meleilei, limpoak, popohl, aktikitik, kaping, oh kanengamah.

“Alehda Ngehn Sarawio.” Mahsen pwukat sansaldahr ansou me ke kasarawihong en wiahla towe mehlel en Sapwellimen Krais Mwomwohdiso. Ia mwomwen ahmw pahn alehdi Ngehn Sarawi? Sang ni peikiong padahk kan en Sises Krais. Ih me wia kehlepomw. Idawehn ih kin lukehdo Ngehn Sarawi nan ahmw mour.

Rahpaki Semomw Nanleng ni kapakap. Kapakap ong Ih ni ngidingid. Kalahngan kihong Ih pwehki kapai tohto kan me pein Ihr ketkihong uhkehr. Ehukihong Ih duwen ahmw popohl kan, kapwunod kan, oh kalelapak kan. Ahneki meleilei oh rong Sapwellime pasapeng kan, me kakete kohdo ni pepehm en meleilei, madamadau kan, de kaweid kan en wia mehkot.

Rong kepitien Koht nan pwuhk sarawi kan. Pwuhk Sarawi kan wia Sapwellimen Koht mahsen ong uhk! Esehla sang mahsen pwukat rahn koaros pwe ken diarada Kepitie oh pehm Sapwellime limpoak. Ni ahmw pahn wadawad, medemedewe mwahu dahme e songosong en padahkihong uhk, oh ntingiedi kapehm kan me kin kohdo. Kaiahneh kinuhk wadek pwuhk sarawi kan rahn koaros—ahpw mehlel Pwuken Mormon—erein ahmw mour.

Kapwaiada kapehm kan en Ngehno me ke kin alehdi. Ma mie madamadau de kapehm en wia mehkot mwahu me pahn kapaiada emen, wia! Soahng koaros me mwahu kin kohsang rehn Koht. Kasalehiong Sahm Nanleng me E kak koapwoaroapwoarki me ke pahn kapwaiada kaweid kan sang Ih.

Ngehn Sarawio pahn kansenamwahuih oh kaweid uhk. E dehdehki eh wia soun Kaloalamwahu. E pahn seweseiuk nan ansou apwal kan. E pahn seweseiuk en ese dahme ke pahn nda oh wia. Sang ni Sapwellime Kaweid, ke pahn kak ese wekpeseng en me pwung oh sapwung. E kak seweseiuk en diar dahme mwahu rehn mehteikan oh pein kowe. Ngehno pil kak kaparkinuhk ma mie kahpwal. E pahn kaweid uhk kolahng Sises Krais oh dohla sang dihp.

Ke kak alehdi kapai kan en palingehn. Kapai tohto Koht kin ketkihong Sapwellime seri kan sang Sapwellime Ngehno. Ekei me sansaldahr nan pwuhk sarawi kan iangahki kaudiahl, kamehlele Sises Krais, padahk, kak kasawihada, oh eripit. Kapakap pwehn kalelapak rehn Sahm Nanleng duwen kisakis en ngehno kan me E ketkihonguhkehr, ia mwomwen ahmw kak kalaudehla, oh ia mwomwen Ah kupwurki ken doadoahngki pwehn kapaiada mehteikan.