Katak im Bujen Ko 71–75

• Em̧ōj ad ke en̄jake mijak im ikūmkūm kōn ad jojomar e tōmak ko ad? Bōlen komaron̄ kajjitōk ippān ro uwaan kūlaaj eo n̄an je ioon bo̧o̧t eo naan ko ak enaan ko an jentōj ko me rej lo ilo Katak im Bujen Ko 71 me ej kōmeļeļeik wāween an Irooj kar kajjitōk ippān Josep im Sidney n̄an jelm̧ae kanana ko an Ezra Booth im ro jet. Ro uwaan kūlaaj eo remaron̄ kōmeļeļeik ilo kurup jiddik ko ta meļeļein kōmeļeļe kein n̄an kōj rainin. Etke eaorōk bwe jej jerbal “ekkar n̄an m̧ōttan eo an Jetōb” me Irooj ej letok n̄an kōj? (eoon 1).

  Emaron̄ barāinwōt jipan̄ n̄an alooje pijaan alooje eo “Everyday Example: When Beliefs Are Questioned” (ChurchofJesusChrist.org). Ro uwaan kūlaaj eo remaron̄ kappukot wāween ko me m̧ool ko ilo jekjen 71 rej kwaļo̧k ilo pija in alooj in. Bōlen remaron̄ barāinwōt kwaļo̧k jet waanjon̄ak ko kōn wāween an Rilo̧mo̧o̧r kar jelm̧ae rikanana ro (n̄an waajon̄ak, lale Matu 22:15–22; 26:59–64; Jon 10:37–38).

• Ewi wāween an kōmeļeļe ko an Irooj n̄an Newel K. Whitney, ke kar kūr e n̄an erom̧ juon bisop ilo Kirtland, maron̄ jipan̄ ro kwoj katakin er kam̧m̧oolol kōn bisop ro me em̧ōj kūr er n̄an jerbal n̄an er? Komaron̄ kajjitōk ippān ro uwaan kūlaaj eo n̄an kappukot ilo Katak im Bujen Ko 72:8–16, kappukot jet iaan eddo ko an Bisop Whitney innem keidi n̄an eddo ko an bisop ro rainin (lale kōmeļeļe eo an Būreejtōn Gordon B. Hinckley kōn eddo ko an juon bisop ilo “Kein Jipan̄ ko Jet” ak pijaan alooj ko me ej ekkeijel, “The Office of Bishop” [ChurchofJesusChrist.org]). Bōlen ro uwaan kūlaaj eo remaron̄ kwaļo̧k wāween aer kar jeraam̧m̧an jān jipan̄ an juon bisop. Ta eo jemaron̄ kōm̧m̧ane n̄an lukkuun rejtake bisop ro ad?

  

• Irooj ekar ba n̄an Josep Smith im Sidney Rigdon n̄an kwaļo̧k gospel eo “toun wōt an ekkar” (Katak im Bujen Ko 73:4) ilo aer barāinwōt jerbale ukook eo an Baibōļ eo. Bōlen ro uwaan kūlaaj eo remaron̄ kwaļo̧k jet iaan wāween ko me rej loi “rekkar” ”—ak rem̧ool—n̄an kwaļo̧k gospel eo ilubwiljin eddo ko aer make. Remaron̄ lo jet kapilōk ko rejipan̄ ilo ennaan eo an Elder Dieter F. Uchtdorf “Jerbal In Mijenede: Kwaļo̧k Ta eo Kwoj Lukkuun Tōmak im En̄jake” (Ensign ak Liaona, Māe 2019, 15–18).

• Kōmeļeļe ko an Irooj n̄an jejjo elder ro kōn wāween kwaļo̧k gospel eo emaron̄ im̧we ro uwaan kūlaaj eo n̄an kwaļo̧k gospel eo eļapļo̧k ilo tiljek. Komaron̄ je ioon bo̧o̧t eo Jerbal kōn Ami Kajoor im kajjitōk ippān ro uwaan kūlaaj eo n̄an kōllaajrak naan ko im jentōj ko me rej itok n̄an kōļmenļo̧kjeņ n̄e rej ļōmņāk kōn juon armej eo me ej jerbal kōn aolepān an kajoor ilo an kwaļo̧k gospel eo. Remaron̄ barāinwōt kōmeļeļeik ta meļeļein n̄an “pād wōt” ak “jowan” n̄an kwaļo̧k gospel eo. Ta eo Katak im Bujen Ko 75:2–16 ej katakin kōj kōn wāween an Rilo̧mo̧o̧r rie ro jet me rej jerbal n̄an E ilo tiljek?

Būreejtōn Gordon B. Hinckley ekar katakin:

“Ij ineek ilo buruō juon kam̧m̧oolol em̧ūlaļ kōn bisop ro. Eļap aō kam̧m̧oolol kōn revelesōn eo jān eo Ekajoor kōn opij in kar ejaake im ej jerbal. …

“… Jej kōtmene bwe kom̧ en jerbal āinwōt juon high priest eo ej tōl ward eo, juon rikapilōklōk n̄an armej ro, juon rijojomar im rijipan̄ n̄an ro rej pād ilo būrabōļōm, juon kaenōm̧m̧an n̄an ro rej burom̧ōj, juon rikabwe n̄an ro rej aikuj. Jej kōtmene kom̧ n̄an jerbal āinwōt juon rilale im rikōjparok an katak ko me rej katakin ilo ward eo am̧, kōn karbōb an katak ko, n̄an kobrak elōn̄ opij ko me remenin aikuj. …

“… Kwoj lale bwe ejjeļo̧k en kwōle ak ejjeļo̧k aer nuknuk ak m̧weer. Kwoj aikuj jeļā kōn jekjek ko an aolep ioon ro me kwoj tōl.

Kwoj aikuj juon rikaenōm̧m̧an im juon ritōl n̄an armej ro am̧. Kōjem eo am̧ ej aikuj peļļak iien otemjej n̄an jabdewōt ro me rej jan̄ kōn en̄taan. Kwoj aikuj pojak iien otemjej n̄an kōmeraik eddo ko aer. Kwoj aikuj jipan̄ er ilo iakwe jekdoon ro rikōm̧m̧an bōd” (“The Shepherds of the Flock,” Ensign, May 1999, 52–53).