Katak im Bujen Ko 81–83

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko kajjitōk ko elmakoti n̄an kejo̧kļo̧kjeņ kōn Katak im Bujen Ko 81:5. Men kein remaron̄ bar kōm̧m̧an kajjitōk ko rem̧m̧an n̄an kūlaaj eo am̧. Barāinwōt ļōmņak n̄an kwaļo̧k en̄jake eo am̧ make n̄e kwoj “m̧ōjņo̧” ilo elōn̄ wāween im n̄e jipan̄ an juon ekar kōketak im kōkajoorļo̧k eok. Ro uwaan kūlaaj eo ewōr aer make en̄jake āinwōt in n̄an kwaļo̧k. Komaron̄ barāinwōt alooje pija in alooj eo “Works of God” (ChurchofJesusChrist.org) n̄an im̧we ro uwaan kūlaaj eo n̄an jipan̄ doon. Komaron̄ barāinwōt kwaļo̧k ennaan eo an Būreejtōn M. Russell Ballard ilo “Kein Jipan̄ ko Jet.”

• Ļōmņak n̄an kajjitōk ippān ro uwaan kūlaaj eo n̄an ekkatak, Katak im Bujen Ko 82:18-19, kappukot pedped ko me rejipan̄ er meļeļe un ko im kōjeram̧m̧an ko itok jān jerbal n̄an ro jet. Innem kōtļo̧k bwe ren kwaļo̧k ta eo rekar ekkatak. Komaron̄ barāinwōt kōjo̧ pijaan alooj eo “Teachings of Thomas S. Monson: Rescuing Those in Need” (ChurchofJesusChrist.org). Ewi wāween an kar membōr ro ilo ward eo an Bisop mour kōn ta eo eoon 18–19 ej katakin?

• N̄an jipan̄ ro uwaan kūlaaj eo meļeļe jem̧jerā eo ikōtaan ikdeleel n̄an pokake im kōjeram̧m̧an ko an Anij me kar kallim̧ur kaki, komaron̄ riit Katak im Bujen Ko 1:37–38; 82:10; 130:20–21 ippān doon ak ilo kurup jiddik ko. Ta eo eoon kein rej katakin kōj kōn Irooj? Bōlen ro uwaan kūlaaj eo remaron̄ kōlaajrake naan ko me rej kōmeļeļeik m̧wilin, pedped ioon eoon kein.

• Ālkin riiti, eoon 10, ro uwaan kūlaaj eo remaron̄ kōnono kōn ta eo Irooj ekar kallim̧uri kōj im wāween an Irooj kar kōjparok kallim̧ur ko An. Bwebwenato eo jān Sister Virginia H. Pearce kar lo ilo “Kein Jipan̄ Ko Jet” emaron̄ jipan̄ ro uwaan kūlaaj eo lo bwe Irooj ej kōjeraam̧m̧an kōj ekkar n̄an mālōtlōt eo An make, ejjab aolep iien ilo wāween eo me jekōņaan ak jej kōtmene.

• Ta eo jej ekkatak jān Katak im Bujen Ko 82:8–10 kōn etke Jemedwōj Ilan̄ ej letok n̄an kōj kien ko? Bōlen ro uwaan kūlaaj eo remaron̄ lo ļōmņak ko ilo eoon kein n̄an kōjerbal n̄an jipan̄ juon eo m̧ōttaer ak juon ajri eo ej ļōmņak bwe kien ko rej bōk anemkwōj (bar alooje pija in alooj eo “Blessed and Happy Are Those Who Keep the Commandments of God,” ChurchofJesusChrist.org). Ak remaron̄ kwaļo̧k en̄jake ko aer me rekar katakin er n̄an lo bwe kien ko rej kōjeraam̧m̧an.

Būreejtōn M. Russell Ballard ekar ba:

“Ilo ad kaļoor, elōn̄ ad kajjitōk ko, n̄ūrbōktak ko, im ijjitōn̄ ko. Mekarta, jet m̧akūtkūt ko raikuj iien otemjej pedped ioon ad uwaan Kabun̄ in. ‘Kōn menin,’ Irooj ej kean̄, ‘kwōn niknik; jutak ilo opij eo me Iaar jitōn̄ n̄an eok; rie ro reban, kotak lōn̄ļo̧k pā ko rej allitoto, im kōkajoor bukwe ko rem̧ōjņo̧’ [Katak im Bujen Ko 81:5; kar kobaiktok italics].

“En̄in ej jerbal eo an Kabun̄ in! En̄in ej kabun̄ eo erreo! En̄in ej gospel eo ilo nememe eo an em̧ool n̄e jej jipan̄, ļōn̄aj, im kōkajoorļo̧k ro rej aikuj ilo jetōb im kanniōk! Kōm̧m̧ane menin emenin aikuj n̄an kōj bwe jen loļo̧k er im n̄an jipan̄ er [lale Jemes 1:27], bwe naan in kam̧ool ko aer kōn tōmak ilo Jemedwōj Ilan̄ im Jisōs Kraist im Pinmuur eo An enaaj dim ilo buruōer” (“Menin Letok ko Raorōk jān Anij,” Ensign ak Liaona, Māe 2018, 11).

Sister Virginia H. Pearce, kar juon membōr eo m̧okta ilo Būreejtōnji eo Eutiej an Jiron̄ ro, ekar ba kōn juon kōrā eo ekar inepata kōn an ajri ro nejin jebwābwe. Ekar kōm̧m̧ane juon an kōttōpar n̄an kakutkut an etal n̄an tampeļ im ekar lukkuun en̄jake ke Irooj enaaj kile kaarmājet in eaorōk ilo an ukot m̧wilin ajri ro nejin. Kōrā eo ekar kwaļo̧k:

“Ālkin jon̄oul iiō in ikutkut pād ilo tampeļ im ikutkut in jar, iburomōj in ba bwe kālet eo an ajri ro nejū rekar jab oktak. …

“Ak ikar oktak. N̄a ij juon kōrā oktak.… Em̧ōj aō kōm̧m̧an jon̄an iien ko aō im ikar maron̄ kōttar Irooj. Kōtmene ko aō em̧ōj aer oktak. Ijjeļo̧kin kōtmene bwe ajri ro ren oktak, ij kōtmene an ekutkut tūriam̧o an Irooj im ij obrak kōn kam̧m̧oolol kōn er. … Irooj ej jerbal ilo wāween ko rekwabilōn̄lōn̄, im ikar lukkuun obrak kōn aenōm̧m̧an eo ej eļļā jān jeļā otemjej” (in “Prayer: A Small and Simple Thing,” At the Pulpit [2017], 288–89).