Katak im Bujen Ko 67–70

• Meļeļe kōn kadkad in bwebwenato in Katak im Bujen Ko 67 emaron̄ lukkuun jipan̄ n̄an juon kōmeļeļe kōn jekjen in. Bōlen juon uwaan kūlaaj eo emaron̄ letok ilo tukaduin jekjek ko me rekar tōl n̄an revelesōn in (lale Katak im Bujen Ko 67, jekjen taitōļ; Rikwojarjar ro, 1:140–43). Eļan̄n̄e jen kar pād ilo kweilo̧k eo ijo kar kōmeļeļe n̄an bōk lōn̄tak revelesōn ko,, ta un ko me jemaron̄ leļo̧k n̄an ļōmņak eo? Ta eo jemaron̄ ba n̄an armej eo ro me rekar abōņōņō kōn jab wānōk ilo kajin eo an Josep Smith? Ta eo jekjen 67 ej katakin kōj kōn rikanaan ro im revelesōn? Ro uwaan kūlaaj eo emaron̄ bar kwaļo̧k wāween aer kar ekkatak kōn er make bwe revelesōn kein rem̧ool.

• N̄an jipan̄ ro uwaan kūlaaj eo kōmeļeļeik Katak im Bujen Ko 68:1–6, komaron̄ kajjitōk ippāer n̄an riiti eoon kein ilo kurup jidik ko im kwaļo̧k n̄an ro jet m̧ool ko rej ekkatak kōn katak ko an rikarejeran Irooj. Kajjitōk ippān kurup ko n̄an kwaļo̧k n̄an doon wāween aer jeļā katak ko kar katakin ilo eoon 4 rem̧ool. Ro uwaan kūlaaj eo remaron̄ en̄jake n̄e rej kōnono ak kar katakin āinwōt “kōm̧akūtkūt er jān Jetōb Kwōjarjar” (eoon 3) im wāween an Irooj kar pād ippāer im jutak iturier (lale eoon 6).

• Eļan̄n̄e kokōņaan kōmeļeļe wāween an eoon kein iookļo̧k katak ko an rikarejaran Irooj ilo kweilo̧k eo eļap, ennaan eo an Elder Jeffrey R. Holland ilo “Kein Jipan̄ ko Jet” emaron̄ lukkuun jipan̄. Ro uwaan kūlaaj eo remaron̄ barāinwōt kwaļo̧k jet enaan ko jān kweilo̧k eo eļap ej kab jem̧ļo̧kļo̧k me ekar kōkajoorļo̧k tōmak ko aer ilo katak ko rem̧ool ko loi ilo eoon kein.

• Elōn̄ ke pāāren ilo kūlaaj eo am̧—ak ro renaaj erom̧ pāāren ilju im jekļaj? Bōlen renaaj kar jeraam̧m̧an jān aer kōnono kōn kapilōk an Irooj n̄an pāāren ro ilo jekjen 68. N̄an waanjon̄ak, bōlen jet pāāren ilo kūlaaj eo remaron̄ kar bōk juon pedped in katak jān eoon ko 25–28 im kōnono kake wāween aer kajjieon̄ katakin men kein n̄an ajri ro (eoon ko 29–31 rebarāinwōt wōr pedped ko reaorōk ie). Ak ro uwaan kūlaaj eo remaron̄ kōnono kōn wāween an pāāren ro aer kar katakin er pedped ko an gospel eo.

  Etke m̧ōko rej jikin ko rem̧m̧an tata n̄an ajri ro n̄an ekkatak gospel eo? Ta eo jemaron̄ ba n̄an pāāren ro me rej en̄jake an jabwe ak obrak kōn eddo ko n̄an katakin ajri ro nejier?

  

• Irooj ekar kalikkar em̧m̧aan ribōk eddo ioon revelesōn ko n̄an bōki n̄an Missouri im loloorjake bwe ren publish. Ilo wāween ta eo jemaron̄ lo kōj make āinwōt juon ribōk eddo ioon revelesōn ko? Ta katak ko jet jān jekjen in kōn bōk eddo emaron̄ iooktok kōj?

Elder Jeffrey R. Holland ekar kwaļo̧k wāween an pedped in katak in katakin ilo Katak im Bujen Ko 68:4 iookļo̧k kweilo̧k eo eļap: “Ij kajjitōk ippāmi bwe kom̧ en ļōmņak kōn raan ko im̧aan ejjab n̄an ennaan ko wōt me kokar ron̄ ak barāiwōt kōn kabūlōn̄lōn̄ eo ejeņoļo̧k me kweilo̧k eo eļap e make ej—ta eo kōj Armej ro Rekwojarjar ilo Raan ko Āliktata rej tōmak kweilo̧k rōt kein n̄an im ta eo me jej kūr aolepān laļ in n̄an ron̄jake im alooje. Jej kam̧ool n̄an aolep laļ, aelōn̄, kajin, im armej bwe Anij ejjab mour wōt ak barāinwōt Ej kōnono, bwe ilo iien ko ad im ilo raan ko ad kapilōk eo kokar ron̄ ej, ium̧win tōl eo an Jetōb Kwojarjar, ‘ankilaan Irooj, … naan eo an Irooj, … ainikien Irooj, im kajoor eo an Anij n̄an lo̧mo̧o̧r’ [Katak im Bujen Ko 68:4]” (“An Ensign to the Nations,” Ensign ak Liahona, May 2011, 111).