Katak im Bujen Ko 63

• N̄an jinoe juon kōmeļeļe kōn katak ko me kar katakin ilo, Katak im Bujen Ko 63:7–12, emaron̄ jipan̄ n̄an etale jejjo waanjon̄ak ko ilo jeje ko rekwojarjar kōn armej ro rekar kam̧oole kōkaļļe ko ak menin būlōn̄ ko. Bōlen ro uwaan kūlaaj eo remaron̄ ļōmņak kōn waanjon̄ak ko in armej ro me tōmak ko aer rekar kajoorļo̧k kōn juon kōkaļļe (lale, n̄an waanjon̄ak, Luk 1:5–20, 59–64) ak armej ro me rekar ebbweer jekdoon ālkin aer kam̧ool e juon kōkaļļe (lale, n̄an waanjon̄ak, 1 Nipai 3:27–31; Alma 30:43–56). Ro uwaan kūlaaj eo remaron̄ kiō kōjerbal ta eo rekar ekkatak kake ilo Katak im Bujen Ko 63:7–12 n̄an kōmeļeļeik oktak ko kōn kōkaļļe ko. Ak komaron̄ etale eoon ko ilo jeje ko rekwojarjar kōn kōkaļļe ko, āinwōt ro me em̧ōj laajraki ium̧win “Kōkaļļe” ilo Unin Tōl n̄an Jeje ko Rekwojarjar (scriptures.ChurchofJesusChrist.org). Ewi wāween ad maron̄ lukkuun jeļā ke jejjab kappukot ak pedped ioon kōkaļļe āinwōt juon pedped in tōmak eo ad?

• Men̄e elōn̄ iaan Katak im Bujen Ko 63:13–16 rej kwaļo̧k kōn ļōn̄, pedped ko me kar katakin remaron̄ aorōk n̄an jabdewōt kakkure ko ikkijeen kien erreo. Ļōmņak n̄an kajjitōk ippān ro uwaan kūlaaj eo n̄an lali ajāllik ko me kar kōmeļeļeik ilo Katak im Bujen Ko 63:13–16. Remaron̄ kar kōm̧m̧ane “kakkōl” (eoon 15) ak kōkaļļe in kauwōtata ko me rej kakkōļ kōn ajāllik ko. Remaron̄ bar kōmeļeļe kōn ta eo rej ļōmņake kōn meļeļein ajāllik kein. N̄an waanjon̄ak, etke kakkure kien erreo ej tōl n̄an ekajet ej itok ioon juon armej “āinwōt juon aujiid” (eoon 15)? Etke Irooj ej kapilōk kōj n̄an “ukeļo̧k m̧ōkaj” (eoon 15) kōn jerawiwi ilo m̧ōm̧ in kanniōk? (lale Sister Linda S. Reeves’s enaan ilo “Kein Jipan̄ Ko Jet”).

• Riiti Katak im Bujen Ko 63:16 emaron̄ tōl n̄an juon kōmeļeļe kōn an ajedeed kareleel kōn pija ko renana ilo jukjukin pād ko ad. Ewi wāween an kakkōļ ko ilo eoon 16 iookļo̧k būrabōļōm in? (Men̄e revelesōn in ej iookļo̧k em̧m̧aan ro rej mejkaiieik kōrā ro, kakkōl kein rej n̄an aolep.) Ta eo jemaron̄ kōm̧m̧ane n̄an kejparok kōj make im ro rejitōnbōro ippād jān pija ko renana? Ro uwaan kūlaaj remaron̄ kōņaan leļo̧k rojan̄ n̄an doon. Website eo AddressingPornography.ChurchofJesusChrist.org emaron̄ letok kōjatdikdik im jipan̄ n̄an jabdewōt ro me rej apan̄ kōn pija ko renana.

  

• Kwe im kūļaaj eo am̧ kom̧ maron̄ kōmeļeļeik Katak im Bujen Ko 63:58–64 āinwōt juon kakkōl ņae ba pata etan Irooj, im jet iaan kein jipan̄ ko ilo Gospel Topics article ium̧win naan in “Kanijnij” (topics.ChurchofJesusChrist.org) emaron̄ kam̧ūlaļļo̧k kōmeļeļe in. Komaron̄ bar jipan̄ ro uwaan kūlaaj eo mour kōn eoon kein ilo dāpakpakin. N̄an waanjon̄ak, komaron̄ kōmeļeļeik ta eo naan in “ejjeļo̧k aer maron̄” (eoon 62) kobaiktok n̄an jeļā eo ad kōn eoon eo. Ro uwaan kūlaaj eo remaron̄ bar kōllaajrak men ko jet rekwojarjar me rej itok “jān ijo eutiej,” ak jān Anij. Ta meļeļein n̄an kōnono kōn men kein “ilo kōjparok”? (eoon 64).

Sister Linda S. Reeves, kar membōr eo m̧okta ilo Būreejtōnji eo Eutiej an Kōrā, ekar katakin:

“Ijjab jeļā jabdewōt men eo enaaj kōkarbabe kōj bwe Jetōb Kwojarjar eo en erom̧ eo mōttad aolep iien epaakeļo̧k wānōk. …

“N̄e jej alooj, riit, ak jabdewōt en̄jake ko repād ilaļin jon̄o̧k ko an Jemedwōj Ilan̄, rej kōm̧ōjņo̧ik kōj. Mekarta jon̄an iiō eo ad, eļan̄n̄e ta eo jej kalimjōkļo̧k,, riit, ron̄jake, ak kālet n̄an kōm̧m̧ane men eo ejjab ekkar n̄an jon̄o̧k eo an Irooj ilo N̄an Kōkajoorļo̧k Jodikdik ro, kune, potake, joļo̧k nam̧ōjļo̧k, im kabbokļo̧k kōjem eo. …

“… Ij tōmak bwe elan̄n̄e jenaaj keememej kajjojo iien n̄an kōm̧m̧an jabdewōt men kōn m̧weilaļ in iakwe eo an Jemedwōj Ilan̄ im ad Rilo̧mo̧o̧r n̄an kōj, jenaaj lukkuun ikdeleel n̄an kōm̧m̧an jabdewōt men n̄an bar jepļaak n̄an im̧aan mejāer bar juon alen, jepooļ jān iakwe eo Aer ejjeļo̧k jem̧ļo̧kin.” (“Erreo kōn Kōjeraam̧m̧an ko Ad Kar Kallim̧ur Kaki,” Ensign ak Liaona, Nob. 2015, 10–11).