Katak im Bujen ko 29

• Juon wāween n̄an kōketak ekkatak ilo kapijuknen eo ej n̄an kalōk ioon m̧akūtkūt ko loi ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. N̄an waanjon̄ok, komaron̄ kōllaajraki ioon boot eo m̧ōttan ko an karōk in lo̧mo̧o̧r eo, āinwōt mour eo m̧okta, Kōm̧anm̧an eo, Pinmuur eo an Jisōs Kraist, im ko eierļo̧k. Ro uwaan kūlaaj eo remaron̄ kwaļo̧k ta eo raar ekkatak jān Katak im Bujen ko 29 kōn m̧ōttan kein an karōk eo. Em̧ool komaron̄ kōm̧m̧an bwe ren kwaļo̧k ta eo renaaj kar katakin jān jekjōn in n̄an juon eo me ejjab jeļā kōn karōk eo an Anij.

• N̄an jipan̄ ro uwaan kūlaaj eo meļeļe etke Jisōs Kraist ej aiin armej ro An, komaron̄ kūr er n̄an riiti eoon 1–8 im ekōnono kōn kajjitōk ko kōn aiin, āinwōt: Elmen ad kar en̄jake an Kraist aiin im kōjparok kōj, āinwōt juon lolo ej aiin im kōjparok jojo ko nejin? Elmen ad aiin doon n̄an Rilo̧mo̧o̧r eo? (lale, n̄an waanjon̄ok eoon 2). Ro uwaan kūlaaj eo remaron̄ kwaļo̧k elmen aer kar jeraam̧m̧an jān aintok doon im kabun̄jar ippān ro jet uwaan Kabun̄ in.

  

• N̄an jipan̄ ro uwaan kūlaaj eo ļōmņak kōn eddo eo aer n̄an jipan̄ Jemedwōj Ilan̄ aiintok ajri ro Nejin, komaron̄ kwaļo̧k naan ko an Būreejtōn Russell M. Nelson ilo “Kein Jipan̄ ko Jet.” Ak komaron̄ kwaļo̧k pija in alooj eo “A Witness of God” (ChurchofJesusChrist.org). Ta eo jej ekkatak kōn aiintok doon eo jān ennaan kein? Elmen an ennaan kein kapenļo̧k ta eo Irooj ej ba ilo Katak im Bujen ko 29:1–8?

• Jet iaan iien ko ilo raan-ko āliktata kar kōmeļeļeik ilo Katak im Bujen ko 29:14–21 remaron̄ in kainepata n̄an jet ro uwaan. Kōtļo̧k bwe ren kwaļo̧k elmen aer en̄jake. Etke Irooj eaar kakkōļ kōj kōn men kein? Ta jipan̄ ko rem̧ool jej ekkatak kōn Rilo̧mo̧o̧r eo im aintok doon eo jān eoon 1–8? Elmen an aiintok doon eo jipan̄ kōj reim̧aanļo̧k n̄an m̧akūtkūt kein kōn tōmak ijello̧kin mijak? Āinwōt m̧ōttan ekōnono eo am̧, komaron̄ al juon al in jar kōn aiintok doon, āinwōt “Israel, Israel, God Is Calling” (Hymns, nō. 7), im ekōnono kōn ta eo al eo ej katakin kōn aiintok doon eo an Israel.

• Em̧ool jekdo̧o̧n n̄e jet kien ko remaron̄ in āinwōt ilo mour in, aolep kien ko rej ilo jetōb n̄an Irooj. N̄an meļeļe m̧ool in, ro uwaan kūlaaj eo remaron̄ riit ippān doon eoon 34–35 im kōllaajrake jet kien ko ioon boot eo, ippānļo̧k pedped in katak ilo jetōb im kōjeraam̧m̧an ko reiokļo̧k kajjojo iaer. Remaron̄ kwaļo̧k waanjon̄ok ko kōn mour ko aer ak jān jeje ko rekwojarjar me rekar jipan̄ er lo piktokin ilo jetōb an kien ko an Anij. Elmen an m̧akūtkūt in jelet wāween ad lale kien ko?

Būreejtōn Russell M. Nelson eaar kwaļo̧k:

“Em̧ool erkein rej raan ko āliktata, im Irooj ej kōm̧ōkajļo̧k jerbal eo An n̄an aiintok Israel. Aiintok jab in ej men eo eaorōk tata ej bōk jikin ioon laļ rainin. Ejjeļo̧k bar jabdewōt keidi ilo kilepān, ejjeļo̧k jabdewōt keidi ilo aorōk in, ejjeļo̧k jabdewōt keidi ilo bōtata. Im eļan̄n̄e kwoj kāālet n̄an, eļan̄n̄e kwoj kōņaan, komaron̄ in juon m̧ōttan eo ekilep. Komaron̄ erom juon m̧ōttan juon men ekilep, juon men eļaptata, juon m̧ōttan bōtata!

“N̄e jej kōnono kōn aiintok eo, jej ba kōn m̧ool in eaorōk: kajjojo ajri ro nejin Jemedwōj Ilan̄, jim̧or ilo rejet ko an rōn̄ōl eo, rej aikuj in ron̄ ennaan eo an gospel eo an Jisōs Kraist ekar kōjepļaaktok. Rej kāālet kōn er make eļan̄n̄e rej kōņaan jeļā eļapļo̧k. …

“Jemedwōj Ilan̄ eaar kepooj elōn̄ iaan jetōb ro Nejin routiej—bōlen, imaron̄ in ba, kumi eo An rem̧m̧an tata—n̄an m̧ōttan in āliktata. Jetōb ko raorōk—rikkure ro remōkade tata—ro rebun̄bun̄—rej kom̧!” (“Hope of Israel” [worldwide devotional for youth, June 3, 2018], ChurchofJesusChrist.org).