Katak im Bujen ko 20:22

• Ro uwaan kūlaaj eo remaron̄ jeraam̧m̧an jān ekkatak men ko reier wōt juon ikōtaan Kabun̄ eo an Jisōs Kraist im Armej ro Rekwojarjar ilo Raan-ko Āliktata im Kabun̄ eo me Kraist eaar kajutake etto. Komaron̄ jin̄aiki ioon boot eo juon jaat emen kaļōm̧ kōkaļleik Katak, Kain̄i ko, Mālim an Priesthood eo, im Rikanaan ro. Komaron̄ kwaļo̧k eoon in jipan̄ kein kōn Kabun̄ eo an Kraist etto: Matu 16:15–19; Jon 7:16–17; Epesōs 2:19–22; 3 Nipai 11:23–26; Moronai 4–5. Ro uwaan kūlaaj remaron̄ kile ta eo eoon ko rej katakin kōn Kabun̄ eo an Kraist im je eoon in jipan̄ ko ilo kaļōm̧ ko rejejjet ilo boot eo. (Jet eoon in jipan̄ remaron̄ in jerbal n̄an elōn̄ļo̧k jān juon kaļōm̧) Remaron̄ kōm̧m̧an ejja āinwōt n̄an eoon in jipan̄ kein kōn Kabun̄ eo an Kraist kar kōjepļaaktok: Katak im Bujen ko 20:17–25, 60, 72–79; 21:1–2. Ta eo kwaar ekkatak kōn Jepļaaktok eo an Kabun̄ eo an Kraist jān keidi in?

• Leļo̧k n̄an ro uwaan kūlaaj eo iien n̄an ekkatak men ko aikuji n̄an peptaij kar kōmeļeļeik ilo Katak im Bujen ko 20:37, im kajjitōk ippāer n̄an kejekļo̧kjeņ kōn kajjitōk ko āinwōt kein: Elmen an men kein aikuji jipan̄ kōj m̧aanjabpopo n̄an peptaij tok n̄an lowaan Kabun̄ eo an Irooj? Ta meļele in bōk iood etan Kraist? (lale Mosaia 5:5–12). Ta eo ej jipan̄ kwe dāpij wōt “pen in bōro n̄an jerbal n̄an [Jisōs Kraist] n̄an jem̧ļo̧k in”?

• Ta eo jekjōk 22 ej katakin kōn peptaij? Kajjitōk ippān ro uwaan kulaaj eo n̄an pijaikļok an wōr juon m̧ōttaer eo ekar m̧ōj an peptaij ilo bar juon kabun̄. Remaron̄ riiti jekjōn in n̄an pukōt kapilōk eo n̄an jipan̄ eo m̧ōttaer meļeļe etke peptaij n̄an Kabun̄ eo kar kōjepļaaktok an Rilo̧mo̧o̧r eo ej menin aikuj. Ro uwaan kūlaaj eo remaron̄ ikkure-in waanjon̄ak kōn jekjek in āinwōt juon kūlaaj ak ilo ruo iaan.

• Riiti Katak im Bujen ko 20:75–79 ippān doon, im kūr ro uwaan kūlaaj eo n̄an ļōmņake ta eo eoon kein rej katakin kōn Rilo̧mo̧o̧r eo im kajoor eo An ilo mour ko ad. Ta naan ko im eoon ko me renwōt aorōk n̄e jej riiti jar ko an kwojkwoj eo ilo wāween in? Etke eaorōk n̄an bōk m̧ōttan kwojkwoj eo kajjojo wiik?

  

• Kōmeļeļe eo kōn jerbal ko an priesthood ilo Katak im Bujen ko 20:38–60 emaron̄ jipan̄ ro uwaan kūlaaj eo am̧ kōļapļo̧k meļeļe eo aer kōn jerbal in jipan̄ eo an priesthood eo. Bōlen komaron̄ kūr er n̄an pijaikļo̧k bwe eo m̧ōttaer ak uwaan baam̧le eo ejjab to ekar peptaij epojak in tōn ekkapit n̄an juon opiij ilo priesthood eo. Elmen aer maron̄ kōjerbal eoon kein n̄an jipan̄ e meļeļe jerbal ko an? Ta waanjon̄ok ko remaron̄ kwaļo̧ki n̄an jipan̄ e meļeļe kilen kakūrm̧ool jerbal ko maron̄ jipan̄ e eromļo̧k āinwōt Jisōs Kraist? Bōlen remaron̄ ikkure-in waanjon̄ake ekōnono in.

  Ilo kakkobaba, elmen aer maron̄ kōjerbal eoon kein n̄an jipan̄ juon sister eo ej kab m̧ōj an peptaij maron̄ lo an bōk kūņaan ilo jerbal eo kar kōmeļeļeik ijin? (Ennaan ko ilo “Kein Jipan̄ ko Jet” emaron̄ jipan̄.)

• Katak im Bujen ko 21 epād ie ennaan ko rekajoor kōn ļoor rikanaan eo an Irooj. N̄an jipan̄ ro uwaan kūlaaj eo kejekļo̧kjeņ im ekōnono kōn ennaan kein, kajjitōk ippāer n̄an etale eoon 4–7 kōn juon naan rej kōņaan bwe en em̧m̧alo̧k aer meļeļe im n̄an je naan eo ioon boot eo. Kālet jet iaan naan ko, im ekōnono kake āinwōt juon kūlaaj ta eo emaron̄ meļeļeier. Ta naan kein rej katakin kōj kōn ļoor rikanaan eo an Irooj?

“Em̧m̧aan ro rej ekkapit n̄an opiij ko an priesthood eo, ilo an jim̧or kōrā ro im em̧m̧aan ro ruwainene n̄an en̄jake kajoor eo im kōjeraam̧m̧an ko an priesthood eo ilo mour ko aer. …

“… [Kōrā ro] rej kwaļo̧k im jar ilo jarlepju ko, kabwijer elōn̄ jerbal in tōl im jerbal in jipan̄, bōk kūņaer ilo ko̧o̧njeļ ko an priesthood eo ilo jon̄ok ko an ijo jokwe ie im ijōko reutiej, im jerbal ilo mijen ko rej itok itak im kwaļo̧k naan aolepān laļ in. Ilo wāween in im wāween ko jet, kōrā ro rej kōjerbal mālim eo an priesthood eo em̧ool men̄e rejjab ekkapit n̄an opiij eo an priesthood eo. …

“… Ilo kūr ko an ritōl in kabun̄, kain̄i ko an tampeļ, kadkad ko an baam̧le, im jab koļap, jerbal in karejar an kajjojo, kōrā im em̧m̧aan in Armej ro Rekwojarjar ilo Raan-ko Āliktata rej jerbal kōn kajoor im mālim an priesthood eo. Em̧m̧aan im kōrā rein rej aeran doon ilo kadedeļo̧k jerbal eo an Anij kōn kajoor eo An ej juon m̧ōttan aorōk n̄an gospel eo an Jisōs Kraist” (Gospel Topics, “Joseph Smith’s Teachings about Priesthood, Temple, Women,” topics.ChurchofJesusChrist.org).