Katak im Bujen ko 6–9

• Elōn̄ men ko ippān Irooj n̄an an katakin kōj kōn revelesōn ko an juon armej make ilo jekjōn kein, im komaron̄ jab maron̄ in katakin aolepān ilo juon ien kūlaaj. Emaron̄ jipan̄ n̄an kōjepel kūlaaj eo n̄an 3 doulul ko im kajjitōk ippān kajjojo doulul ko n̄an pukot Jekjōn 6, 8, ak 9, kappukot uwaak ko n̄an kajjitōk ko āinwōt kein: Ewi wāween an Jetōb Kwojarjar eo kōnono n̄an kōj? Ewi wāween ad maron̄ kile revelesōn n̄an kōj make? Ewi wāween ad ōepooj kōj make n̄an bōk revelesōn ? Innām juon armej jān kajjojo doulul ko remaron̄ kwaļo̧k ippān kūlaaj eo ilo in ta eo doulul eo aer eaar lo. Komaron̄ barāinwōt rojan̄ ro uwaan kūlaaj n̄an kwaļo̧k jeļa ko aer make ippān aer jeļā kile revelesōn̄ ko n̄an er make. N̄an waanjon̄o̧k, ewōr ke jabdewōt ilo Katak im Bujen ko 6:22–24 me ej kakeememej kōj kōn jeļā ko em̧ōj ad bōk?

• Kōnono kake revelesōn ko an juon make emaron̄ jab kam̧ōņōņōik ro ilo kūlaaj eo am̧ im rej jar n̄an bōk tōl bōtaab rejjab en̄jaake aer bōk tōl. Emaron̄ jipan̄ n̄an aer jelā bwe Oliver Cowdery ekar pen n̄ane ilo ejja en̄jaake kein wōt ke ekar jab maron̄ pidodo an ukook āinwōt an kar kōjatdikdik. Bōlen komaron̄ karuwaineneik ro uwaan kūlaaj eo n̄an kappukot katakin eo an Irooj n̄an Oliver ilo jekjōn 9. Ta ennaan ko ilo jekjōn in remaron̄ jipan̄ juon eo ej en̄jaake ke Irooj ejjab uwaake jar ko an? Enaan ko ilo ”Kein Jipan̄ ko jet” remaron̄ barāinwōt jipan̄.

  

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko e ba jeje waanjon̄o̧k ko an naan ko āinwōt ikdeelel ilo jekjōn ko 6–7. Bōlen ro uwaan kūlaaj eo remaron̄ in kwaļo̧k ta eo raar ekkatak jān katak eo, ak komaron̄ kōm̧m̧ane juon ikkure ippān doon āinwōt juon kūlaaj. Ta m̧akūtkūt ko ad kajjojo raan ej katakin kōj kōn ikdeelel ko ad? Ewi wāween an Irooj jipan̄ kōj ukōt ikdeelel ko ad?

• Etke jet iien jej ”mijak … n̄an kōm̧m̧an em̧m̧an”? (eoon 33). Bōlen ro uwaan kūlaaj remaron̄ ba jejjo un ko rekkar, ippānļok ļōm̧ņak ko jān Katak im Bujen ko 6:29–37 me ej leļo̧k n̄an er peran n̄an kajjieon̄.

• N̄an jinoe juon kōmeļeļe kōn wāween an Jisōs Kraist jipan̄ kōj “jab pere, jab mijak.” (eoon 36), komaron̄ kajjitōk ippān ro uwaan kūlaaj eo n̄an jeje ioon m̧ottan peba ko jet men ko armej remaron̄ mijak. (Elder Ronald A. Rasband ekar letok jet waanjon̄o̧k ko ilo katak eo an “Jab Leln̄o̧ņ” [Ensign ak Liaona, Nob. 2018, 18].) Innem komaron̄ riiti n̄an er jejjo iaan peba kein im kōmeļeļeik wāween an Rilo̧mo̧o̧r eo im kajoor in pinmuur eo An ej jipan̄ kōj n̄e jej mijak.. Katak im Bujen ko 6:29–37 ewōr ie jet meļeļe ko (lale barāinwōt 1 Jon 4:18). Ta meļeļe in n̄an ”reitok n̄an Eō ilo ļōmņak otemjeļo̧k”? (eoon 36). Ewi wāween an menin pedped ioon an Rilo̧mo̧o̧r eo jipan̄ kōj n̄e jej ioon bere im mijak?

”Ilo mour e ao em̧ōj ao jeļā bwe jet iien ijjab bōk uwaak n̄an juon jar kōnke Anij ejelā ke ijjab pojak. N̄e ej uwaak, ekke wōt an ‘jidik ijin, im jidik ijuweeo [2 Nipai 28:30] kōnke ede in me imaron̄ maron̄e ak jon̄an eo ipojak n̄an kōm̧m̧ane” (Robert D. Hales, ”Waiting upon the Lord: Thy Will Be Done,” Ensign ak Liaona, Nob. 2011, 73).

“Ta eo kwōj kōm̧m̧ane n̄e em̧ōj am kapojak ilo tiljōk, kar jar ilo kijejeto, kar kōttar juon ien ekkar n̄an juon uwaak, im ļakkaj jab en̄jaake juon uwaak? Kwomaron̄ kōņaan kwaļo̧k kam̧oolol n̄e ewaļok menin, bwe ej juon kein kam̧ool ke kwōj lōke E. N̄e kwōj mour erreo im kālet ko am̧ rej juon wōt ippān katak ko an Rilo̧mo̧o̧r eo im kwōj aikuj n̄an jerbal, wōnm̧aanļo̧k ilo lōke. … N̄e kwōj mour jim̧we im m̧akūtkūt kōn lōke, Anij eban kōtļo̧k am̧ wōnm̧aanļo̧k wōt ilo ejjeļok kakkōl n̄e em̧ōj am kōm̧m̧ane kālet eo ebōd” (Richard G. Scott, “Using the Supernal Gift of Prayer,” Ensign ak Liaona, Māe 2007, 10).