Jacob 5–7

Tungod kay ang pasumbingay sa mga kahoy nga oliba taas ug medyo komplikado, mahimong ganahan ka nga kauban nga magtrabaho isip usa ka klase sa paghimo og daklit nga overview bahin sa pasumbingay. Pananglitan, mahimo ka nga magdrowing sa nag-unang mga elemento sa pasumbingay diha sa pisara o maghimo og time line sa mga panghitabo (alang sa usa ka ehemplo, tan-awa ang diagram sa katapusan niining outline). Ang mga sakop sa klase mahimong modugang og mga pakisayran sa kasulatan o mga paghulagway sa gidrowing ug hisguti kon unsa kaha ang gipasabut sa mga simbolo, sama sa maayo ug ihalas nga mga kahoy nga oliba, ang Ginoo sa ubasan, ang sulugoon, ug ang maayo ug dautan nga bunga. Atol niining panaghisgutan, ribyuha ang mga bersikulo 61–75, nga naghulagway sa buhat sa Ginoo sa atong panahon. Giunsa man nato sa pagserbisyo diha sa ubasan sa Ginoo? Sa unsang paagi nga kining mga bersikulo adunay kalabutan sa buhat nga atong gihimo?

Ang mga pulong nga “Ginoo sa ubasan” makahatag og kahupayan alang sa mga ginikanan sa nahisalaag nga mga anak. Pananglitan, unsay gisugyot sa Jacob 5:41, 46–47 kon unsay gibati sa atong Amahan sa Langit mahitungod sa Iyang mga anak nga nahisalaag? Giunsa Niya pagsulay sa pagluwas kanila? (tan-awa sa mga bersikulo 61–75).

Ang Jacob 5:61–75 nagtudlo nga ang Ginoo nag-ugmad kauban sa Iyang mga sulugoon diha sa Iyang ubasan. Ang mga sakop sa klase mahimong mobasa niining mga bersikulo diha sa ginagmay nga mga grupo ug maghisgot sa mga kasinatian nga nagpakita kanila nga ang Ginoo nagtrabaho uban sa Iyang mga sulugoon sa pagpadayon sa Iyang buhat. Unsa nga dugang nga mga ideya ang madugang sa mga sakop sa klase gikan sa mensahe ni Presidente Henry B. Eyring nga “Ang Ginoo Mangulo sa Iyang Simbahan”? (Liahona, Nob. 2017, 81–84).

Ang Dali, Sunod Kanako—Alang sa mga Indibidwal ug mga Pamilya nagdapit kanato sa pagsiksik sa Jacob 6:3–5 alang sa mga mensahe nga gustong hatagan og gibug-aton ni Jacob ug dayon sa pagpangita niadtong mga mensahe diha sa pasumbingay sa mga kahoy nga oliba (tan-awa sa Jacob 5). Tingali ang mga sakop sa klase makabenepisyo sa pagkadungog gikan niadtong nagbuhat niining kalihokan o gikan sa pagbuhat niining kalihokan isip usa ka klase. Mahimo nilang ilista diha sa pisara ang mga kamatuoran sa ebanghelyo nga ilang makit-an Jacob 6. Dayon, ubos sa matag kamatuoran, mahimo nilang ilista ang mga bersikulo gikan sa pasumbingay diha sa Jacob 5 nga nagpadangat niana nga mensahe. Sa unsang paagi nga nakita sa mga sakop sa klase kining sama nga mga mensahe nga gipakita diha sa ilang kaugalingong kinabuhi?

Usa ka kahulugan sa pulong nga magmatinud-anon [cleave] mao ang lig-on, mabinantayon, ug walay pagkapaling nga pagsunod sa usa ka butang. Mahimo nimong ipaambit ngadto sa klase kini nga kahulugan ug ipangutana kon unsa nga mga ideya ang nahatag niini ngadto kanila mahitungod sa Jacob 6:5.

Kasagaran kanato nakasinati og pagsupak sa atong pagtuo sama sa nasagubangan ni Jacob sa dihang nahimamat niya si Sherem. Usa ka paagi aron matabangan ang mga sakop sa klase nga maandam alang sa ingon nga pagsupak mao ang pagpasiksik kanila sa Jacob 7:1–23 alang sa mga baruganan nga nakatabang kang Jacob nga magpabiling matinud-anon. Unsa ang ubang mga ehemplo sa pagpabiling matinud-anon sa atong pagtuo ang mahimo natong mapaambit—gikan sa mga kasulatan, sa atong family history, o sa atong kaugalingong kinabuhi? Tingali adunay mga mensahe gikan sa mga lider sa Simbahan nga nakatabang kanato sa dihang nagtinguha ang uban sa pag-uyog kanato gikan sa atong hugot nga pagtuo (tan-awa, pananglitan sa, Quentin L. Cook, “Maisug diha sa Pagpamatuod ni Jesus,” Liahona, Nob. 2016, 40–43). Awhaga ang mga sakop sa klase sa pagpaambit og mga mensahe nga ilang nakit-an nga makatabang.

7:16

Sa dihang si Jacob gikomprontar ni Sherem, naglaum si Sherem sa pag-uyog kang Jacob gikan sa iyang hugot nga pagtuo, apan ang pagtuo ni Jacob dili matarug (tan-awa sa Jacob 7:5). Ang mga sakop sa klase mahimong malingaw nga idrama ang inter-aksyon tali ni Jacob ug Sherem, gamit ang Jacob 7:1–23 isip basihan nga istorya. Unsa ang atong makat-unan gikan niining mga bersikulo mahitungod sa mga taktika ug mga pagtulun-an niadtong kinsa mosupak sa buhat sa Dios? Unsa ang atong makat-unan gikan ni Jacob kon unsaon nga mahimong mas dili matarug sa atong pagtuo?

Ang mga Nephite nagpuyo ubos sa kanunay nga pagpanghulga sa pag-ataki gikan sa mga Lamanite. Bisan kon dili kita magsagubang sa inadlaw-adlaw nga pagpanghulga sa pisikal nga pakiggubat, unsa nga espiritwal nga mga peligro ang atong gisagubang? Unsa ang atong makat-unan gikan sa tubag sa mga Nephite sa ilang sitwasyon, nga gihulagway diha sa Jacob 7:24–25? Mahimong ganahan ka nga mokanta o mobasa ug dayon maghisgot sa mga himno sa Simbahan nga magamit sa mga gubat isip sambingay, sama sa “Onward, Christian Soldiers” o “Behold! A Royal Army” (Hymns, mga nu. 246, 251).