Jacob 5–7

Ang mga pasumbingay mao ang mga istorya nga nagtudlo og espirituhanon nga mga kamatuoran pinaagi sa mga simbolo. Sa pasumbingay sa mga kahoy nga oliba, pananglitan, ang ubasan nagrepresentar sa kalibutan, ang maayo nga kahoy nga oliba nagrepresentar sa Israel (kadtong kinsa nakahimo og mga pakigsaad sa Dios), ug ang ihalas nga mga kahoy nga oliba nagrepresentar sa hentil nga mga nasud (kadtong kinsa wala makahimo og mga pakigsaad sa Dios).

Samtang magtuon ka sa pasumbingay sa Jacob 5, pangitaa ang dugang nga mga simbolo ug palandunga unsay gipasabut niini. Pananglitan, unsa kaha ang girepresentar sa maayo nga bunga? Unsa ang gisimbolo sa dili maayo nga bunga?

Sa dili pa ikaw magsugod sa imong pagtuon sa pasumbingay sa mga kahoy nga oliba sa Jacob 5, tingali makatabang ang pagribyu sa Jacob 4:10–18 aron makahibalo ngano nga si Jacob mibati nga nadasig sa pagpakigbahin niini nga pasumbingay uban sa iyang katawhan. Sa Jacob 6:3–5, makakita ka og pipila ka dugang nga mensahe nga gusto nga hatagan og gibug-aton ni Jacob; pangitaa kini nga mga mensahe diha sa pasumbingay. Unsa nga mga mensahe ang imong nakita alang sa imong kaugalingon sa Jacob 5?

Ang Jacob 5 usa ka taas nga kapitulo—ang pinakataas sa Basahon ni Mormon. Tingali makatabang ang pagbahin niini ngadto sa mosunod nga mga seksyon, nga naghulagway sa mga panahon sa kasaysayan sa kalibutan:

Mga bersikulo 3–14:Ang pagkatibulaag sa Israel sa wala pa ang panahon ni Kristo

Mga bersikulo 15–28:Ang pangalagad ni Kristo ug sa mga Apostoles

Mga bersikulo 29–49:Ang Dakong Apostasiya

Mga bersikulo 50–76:Ang pagpundok sa Israel sa ulahing mga adlaw

Mga bersikulo 76–77:Ang Milenyum ug ang katapusan sa kalibutan

Alang sa dugang nga mga panabut mahitungod sa pasumbingay, tan-awa ang diagram nga nag-uban niini nga outline.

Ang “uban nga mga sulugoon” (Jacob 5:70) kinsa gitawag ngadto sa ubasan sa Ginoo naglakip sa mga tawo nga sama kanimo—isip mga miyembro sa Simbahan, kitang tanan responsable sa pagtabang sa Dios sa pagpundok sa Iyang mga anak. Unsa nga mga baruganan ang inyong nakita sa Jacob 5, ilabi na sa mga bersikulo 61–62 ug 70–75, mahitungod sa pagtrabaho diha sa ubasan sa Ginoo? Unsay imong gibati Kaniya nga mitawag kanimo sa pag-alagad diha sa Iyang ubasan? Unsa nga mga kasinatian ang imong nasinati samtang miapil ka sa Iyang buhat?

Tan-awa usab sa “Missionary Work,” Gospel Topics, topics.ChurchofJesusChrist.org; “Old Testament Olive Vineyard,” “Help the Church Grow” (videos, ChurchofJesusChrist.org).

6:58

7:16

Ang kasinatian sa mga Nephite uban ni Sherem sa kasagaran nasubli karon: adunay makinaadmanon, larino nga mga tawo nga mosulay sa paglaglag sa imong pagtuo. Apan si Jacob “dili matarug” (Jacob 7:5). Unsay reaksyon ni Jacob sa dihang ang iyang pagtuo giataki? Unsay imong nakat-unan gikan sa iyang mga tubag? Unsay imong mahimo karon sa pag-andam alang sa mga panahon kon ang imong pagtuo mahagit?

Tan-awa usab sa “Answering Gospel Questions,” Gospel Topics, topics.ChurchofJesusChrist.org; Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 6–9.

Ang pipila ka pamilya nakakita nga makatabang ang pagdrowing sa mga simbolo gikan sa pasumbingay sa mga kahoy nga oliba samtang sila magbasa niini. Ang imong pamilya mahimong malingaw niana nga paagi, o adunay laing paagi nga ikaw makatabang sa mga sakop sa pamilya paghanduraw sa mga simbolo sa pasumbingay. Tingali mahimo nimong markahan ang usa ka dapit sa lamesa o salog sa pagrepresentar sa ubasan (o sa kalibutan) ug ihulagway ang ihalas nga kahoy nga oliba (o ang balay ni Israel) gamit ang usa ka butang, sama sa usa ka puzzle, nga mahimong mabahin-bahin (sa pagrepresentar sa nagkatibulaag nga Israel) ug dayon pundukon pag-usab (sa pagrepresentar sa pagpundok sa Israel). Unsa ang gitudlo niini nga pasumbingay kanato mahitungod sa Ginoo? mahitungod sa Iyang mga sulugoon?

Samtang magbasa ka sa “katapusan nga higayon” nga ang Ginoo nag-ugmad sa Iyang ubasan, unsa ang nakapadasig nimo ug sa imong pamilya sa pag-alagad sa Ginoo “uban sa imong kusog”? (Jacob 5:71). Mahimo nimong dapiton ang mga sakop sa pamilya nga himoong personal ang bersikulo 75 pinaagi sa pagdugang sa ilang mga ngalan ngadto niini nga bersikulo—pananglitan, “Bulahan ikaw [ngalan].” Tingali makapaambit sila og mga kasinatian diin mibati sila og kalipay sa pag-alagad sa Ginoo sa ubasan, pananglitan pinaagi sa pagpakigbahin sa ebanghelyo, pag-alagad diha sa templo, o pagpalig-on sa mga miyembro sa Simbahan. (Tan-awa usab sa M. Russell Ballard, “Ibutang ang Inyong Pagsalig diha sa Ginoo,” Liahona, Nob. 2013, 43–45.)

Sa unsa nga paagi nga gipakita sa Ginoo ang iyang kalooy ngari kanato? Unsay buot ipasabut sa pulong “magmatinud-anon” niini nga mga bersikulo? Sa unsa nga paagi nga ang Ginoo magmatinud-anon ngari kanato? Unsaon nato nga magmatinud-anon ngadto Kaniya?

Unsay atong makat-unan gikan niini nga mga bersikulo mahitungod kon giunsa sa mga tawo pagpahisalaag ang uban? Unsaon nato sa pagsunod sa ehemplo ni Jacob ug magmakanunayon sa atong pagtuo kang Kristo?