2 Nephi 31–33

• Tingali makabenepisyo ang imong klase nga makita kon sa unsang paagi nga ang hugot nga pagtuo, paghinulsol, bunyag, ang gasa sa Espiritu Santo, ug paglahutay hangtud sa katapusan adunay kalabutan sa usag usa ug sa Pag-ula ni Jesukristo. Sa pagbuhat niini, mahimong magdrowing ka og usa ka agianan diha sa pisara ug dapita ang mga sakop sa klase sa pagsulat diha sa agianan og pipila ka baruganan nga makita sa 2 Nephi 31. Ang matag sakop sa klase mahimong mopili og usa niining mga baruganan ug mosiksik sa 2 Nephi 31–32 aron makakita og butang nga gitudlo ni Nephi mahitungod niini. Mahimo dayon silang mopaambit sa usag usa sa unsay ilang nakit-an ug hisgutan kon sa unsang paagi kini makatabang kanila aron mas masabtan ang mga baruganan. Sa unsang paagi nga ang pagsunod niining mga baruganan makadala sa mga panalangin sa Pag-ula ni Jesukristo sa atong kinabuhi?

• Unsaon man nimo pagsugod og panaghisgutan bahin sa yano nga paghulagway ni Nephi sa “ang agianan” ngadto sa kaluwasan? (2 Nephi 31:21). Tingali mahimo nimong hangyuon ang mga sakop sa klase kon unsay ilang isulti kon sila adunay 60 segundos lamang sa pagpasabut kon unsay kinahanglan gayud nga buhaton sa usa ka tawo aron makadawat og kaluwasan. Dayon ang mga sakop sa klase mahimong mobasa sa daklit sa 2 Nephi 31–32, nga mangita sa mga pamahayag nga mahimong makatabang. Unsa ang atong makat-unan gikan niining mga bersikulo mahitungod sa mahinungdanong tahas sa Manluluwas sa atong kaluwasan? Ang mga pamahayag diha sa “Dugang nga mga Kapanguhaan” mahimong makatabang niining panaghisgutan.

• Usahay atong makita ang mga baruganan sa ebanghelyo isip managlahi ug magkabulag, apan sa tinuod lang aduna kini kalabutan sa usag usa. Aron matabangan ang mga sakop sa klase nga makita kon sa unsang paagi nga ang mga baruganan diha sa 2 Nephi 31 konektado, dapita ang mga sakop sa klase, sa tinagsa-tagsa o sa ginagmay nga mga grupo, sa pagbasa sa mga bersikulo 4–21 ug paghimo og usa ka diagram nga nagpakita kon sa unsang paagi nga ang hugot nga pagtuo diha ni Kristo, paghinulsol, bunyag, ang gasa sa Espiritu Santo, ug paglahutay hangtud sa katapusan nagtinabangay, adunay kalabutan sa usag usa, ug uban pa. Awhaga sila nga mahimong mamugnaon. Samtang mopaambit sila sa ilang mga diagram ngadto sa klase, hangyoa sila sa pagpaambit kon unsay ilang nakat-unan mahitungod niining mga baruganan. Sa unsang paagi nato kini mahimong kabahin sa atong inadlaw-adlaw nga pagpakabuhi?

• Nasabtan ba sa mga sakop sa klase kon unsay buot ipasabut sa molahutay hangtud sa katapusan? Ania ang usa ka kalihokan nga mahimong makatabang. Isulat diha sa pisara ang Unsaon nako pagkahibalo nga nagalahutay ko hangtud sa katapusan? Dayon dapita ang mga sakop sa klase sa pagsiksik sa 2 Nephi 31:15–20 aron makakita og posible nga mga tubag niining pangutana. Hangyoa ang mga sakop sa klase sa pagsulat diha sa pisara og bisan unsa nga pulong nga makatabang o mga pulong nga ilang makita. Nganong ang paglahutay hangtud sa katapusan mahinungdanon man nga bahin sa doktrina ni Kristo? Mahimo usab nimong ipaambit ang pamahayag ni Elder Dieter F. Uchtdorf diha sa “Dugang nga mga Kapanguhaan” o ang pamahayag mahitungod sa paglahutay hangtud sa katapusan sa pahina 6 sa Isangyaw ang Akong Ebanghelyo.

• Nakaila ba ang mga sakop sa klase og usa ka tawo kinsa ehemplo sa paglahutay hangtud sa katapusan? Unsay nakatabang niining tawhana nga “mopadayon sa unahan uban ang pagkamakanunayon kang Kristo”? (bersikulo 20). Ikonsiderar ang pagpaambit og mga istorya bahin sa ubang mga tawo nga nahisgutan diha sa mga kasulatan kinsa milahutay hangtud sa katapusan.

• Diha sa 2 Nephi 32, namulong si Nephi sa usa ka gikabalak-an nga iyang nabantayan sa iyang mga tawo mahitungod sa paggamit sa doktrina ni Kristo. Mahimo nimong dapiton ang mga sakop sa klase sa pagpangita niining gikabalak-an diha sa 2 Nephi 32:1 ug dayon basaha ang tubag ni Nephi sa 2 Nephi 32:2–6. Unsaon man sa mga sakop sa klase sa pagpamahayag og usab diha sa kaugalingon nilang mga pulong kon unsay gitudlo ni Nephi? Unsa ang mga nasinati sa mga sakop sa klase sa dihang ang Espiritu Santo o ang mga pulong ni Kristo mipakita kanila kon unsay kinahanglan nilang buhaton?

• Naglaum si Nephi nga ang iyang mga pulong moagni kanato “sa pagbuhat og matarung [ug] sa pagtuo diha [kang Kristo]” (2 Nephi 33:4). Unsa nga mga tudling o mga istorya gikan sa 1 ug 2 Nephi ang nakapaagni kanato sa pagbuhat og maayo ug sa pagtuo diha kang Kristo? Ikonsiderar ang pagpangita og pipila ka himno nga makanta sa imong klase o mapaminaw nga makasuporta niining mga mensahe.

Si Elder Jeffrey R. Holland nagtudlo: “Ang ‘doktrina ni Kristo’ sigun sa gitudlo ni Nephi diha sa iyang tiningub nga pakigpulong nag-focus sa hugot nga pagtuo diha ni Ginoong Jesukristo, paghinulsol, bunyag pinaagi sa pagpaunlod, pagdawat sa gasa sa Espiritu Santo, ug paglahutay hangtud sa katapusan. Wala kini mosulay, diha niini nga pamahayag, sa pag-apil sa tibuok plano sa kaluwasan, tanang mga hiyas sa Kristohanong kinabuhi, o sa mga ganti nga naghulat kanato sa nagkalahing mga ang-ang sa langitnong himaya. Wala kini maglakip, diha niini nga pamahayag, sa mga katungdanan sa priesthood, sa mga ordinansa sa templo, o daghan pang tinuod nga mga doktrina. Kining tanan importante, apan sigun sa gigamit diha sa Basahon ni Mormon, ‘ang doktrina ni Kristo’ yano ug direkta. Nag-focus lang gayud kini sa unang mga baruganan sa ebanghelyo, lakip sa pagpahayag sa pag-awhag nga molahutay, magmakanunayon, magpadayon. Sa pagkatinuod, diha kini sa pagkaklaro ug pagkayano sa ‘doktrina ni Kristo’ nga makita ang epekto niini” (Christ and the New Covenant: The Messianic Message of the Book of Mormon [1997], 49–50).

Si Elder D. Todd Christofferson miingon: “Mohangyo ko sa tanan … sa pagpangita pinaagi sa pag-ampo ug pagtuon sa kasulatan sa [usa ka] saksi sa pagkabalaan sa Pag-ula, ug Pagkabanhaw ni Jesukristo. Dawata ang Iyang doktrina pinaagi sa paghinulsol, pagpabunyag, pagdawat sa gasa sa Espiritu Santo, ug sa tibuok ninyong kinabuhi magsunod sa mga balaod ug pakigsaad sa ebanghelyo ni Jesukristo” (“Ang Doktrina ni Kristo,” Liahona,  Mayo 2012,89).

Si Elder Dieter F. Uchtdorf mipasabut:

“Sa bata pa ako, ang ‘paglahutay sa katapusan’ nagpasabut gayud ngari kanako nga ako kinahanglan maninguha pag-ayo nga magpabilin nga magmata hangtud sa pagkahuman sa among mga miting sa Simbahan. Unya isip usa ka tin-edyer … ako kining gipahisama ngadto sa batan-ong pagsabut sa mga paningkamot sa atong minahal nga mga tigulang nga mga miyembro sa paglahutay hangtud sa katapusan sa ilang mga kinabuhi. …

“… Ang paglahutay hangtud sa katapusan dili kay usa lamang ka matang sa pag-uyon sa malisud nga mga kahimtang sa kinabuhi o ‘magpabilin lamang diha.’ Ang ato usa ka aktibo nga relihiyon, motabang sa mga anak sa Dios subay sa pig-ot ug higpit nga dalan aron pagpalambo sa ilang hingpit nga potensyal niini nga kinabuhi ug mobalik ngadto Kaniya unya sa umaabut. Makita gikan niini nga panglantaw, ang paglahutay sa katapusan mabayawon ug mahimayaon, dili subo ug ngitngit. Kini usa ka malipayon nga relihiyon, usa sa paglaum, kalig-on, ug kalingkawasan. …

“Ang paglahutay sa katapusan nagpasabut og ‘pailub diha sa mga maayong buhat’ (Mga Taga-Roma 2:7), andam sa paghupot sa mga sugo (tan-awa sa 2 Nephi 31:10), ug nagbuhat sa buluhaton sa pagkamatarung (tan-awa sa D&P 59:23)” (“Wala Ba Kita’y Rason nga Maglipay?” Liahona, Nob. 2007, 20).