Mateo 26; Marcos 14; Lucas 22; Juan 18

Gupgopem ti pakaammo ni Jesus a panangyam-ammo iti sakramento. Mabalinmo nga usaren ti “Kapitulo 49: Ti Umuna a Sakramento,” Dagiti Estoria iti Baro a Tulag,124–26, wenno ti katupagna a video (LDS.org). Kitaen met iti video a “Sakramento” (LDS.org). Tulongam dagiti ubbing a makaawat a laglagipentayo ni Jesus kabayatan ti sakramento.

Saludsudem dagiti ubbing no ammoda ti pannakabagi ti tinapay ken danum. Ilawlawag a dagitoy nga emblema ket makatulong kadatayo a lagipen a ni Jesus ket natay para kadatayo ken nagungar manipud kadagiti natay. Ipakita iti piraso ti tinapay ken maysa a baso ti danum bayat ti panangtulongmo kadagiti a mangikabesa iti pagsasao a “Panglaglagip [Kaniak]” (Lucas 22:19).

Kiddawen kadagiti ubbing nga agkidemda ken mangpanunot iti maysa a tao nga ay-ayatenda, ket kalpasanna awisem ida nga ibagada kenka ti maipapan iti dayta a tao. Kiddawem kadakuada nga agkidemda manen, panunoten ti Mangisalakan, ken kalpasanna ibinglayda dagiti banag nga ammoda a maipapan Kenkuana. Allukoyem ida a panunoten ti maipapan ken Jesus kabayatan ti sakramento iti linawas.

Awisem dagiti ubbing a mangiparangarang no ania ti maaramida a mangipalagip ken ni Jesus ken nadayaw kabayatan iti sacramento.

Tulongam dagiti ubbing a mangaramid iti bokleta a nadeskribir iti daytoy a panid aktibidad itay a lawas. Mangisingasing a usarenda daytoy tapno makatulong kadakuada a mangpanunot maipapan ken Jesus kabayatan ti sakramento.

Tulongam dagiti ubbing a sukisoken dagiti sumagmamano a magasin ti Simbaan para dagiti ladawan ni Jesus ken mangaramid iti collage a mabalinda a kitaen iti kabayatan ti miting ti sakramento.

Awisem dagiti ubbing a mangpanunnot iti tiempo a nalidlidayanda wenno nasaktanda. No maitutop, awisem dagiti sumagmamano nga ubbing a mangibinglay. Ipakita ti ladawan iti balabala ita a lawas iti Umayka, Surotennak—Para kadagiti Indibidual ken Pamilia. Ilawlawag a ni Jesus, iti sumagmamano a wagas a saantayo unay a maawatan, nakariknanna iti saem ken liday a iti tunggal maysa kadatayo ket nariknan. Kaipapananna daytoy ket makatulong Isuna kadatayo no makariknatayo ti liday, sakit, wenno upay.

Kantaen ti “Mariknak ti Ayat ti Mangisalakanko,” Pagkantaan dagiti Ubbing, 74–75, kadua kadagiti ubbing. Awisem ida a mangibinglay kadagiti wagas a nariknada ti ayat ti Mangisalakan.

Awisem dagiti ubbing nga agsisinnublatda nga agbasa dagiti bersikulo iti Marcos 14:22–24 (kitaen iti Patarus ti Joseph Smith, Marcos 14:20–24 [iti apendise ti Biblia]) ken Doktrina ken Katulagan 20:75–79. Ania dagiti balikas ken kapanunotan a kapada iti dua a sasao?

Saludsudem kadagiti ubbing no ania ti aramidda tapno makatulong kadakuada a mangpanunot maipapan ken Jesus kabayatan ti sakramento. Tulongam ida a mangbirok kadagiti nasantuan a kasuratan wenno balikas manipud kadagiti himno ti sakramento a maba;inda a basaen kabayatan ti sakramento, ken kalpasanna ilistada iti maysa a kard a mabalin a pagbasaran kadagiti ubbing iti sumaruno a tiempo nga mangipaay iti sakramento. Kantaen ti sumagmamano kadagitoy a kanta kadagiti ubbing (kitaen iti Himno, nu.169–97).

Isurat dagiti kangrunaan a ragup ti balikas manipud kadagiti kararag ti sakramento iti pisara, ken tulongam dagiti ubbing a mangikabesa kadagitoy. Ania ti kaipapanan dagitoy a ragup ti balikas? Apay nga agyamantayo a mapabarotayo dagiti katulagan ti panagbunyag iti tunggal lawas?

Awisem ti maysa nga Aaronic Priesthood holder a mangibaga kadagiti ubbing maipapan iti padasna a mangisagana, panangbendision, wenno panangiwaras iti sakramento. Ania ti makatulong kenkuana nga aramiden daytoy? Ania ti mariknana bayat ti panagaramidna daytoy? Kasano a ti tinapay ken danum ket mangipalagip kenkuana ti Mangisalakan?

Saludsodem dagiti ubbing a nabuniaganen nga ibinglayda no ania ti malagipda maipapan iti panagbuniagda. Kasano ti nariknada? Ania dagiti katulagan nga inaramidda? Kitaen iti Mosiah 18:8–10 Ibagam kadakuada a iti tunggal lawas a makiranudtayo iti sakramento, mabalin a kas iti panagpabuniag manen—mabalin a mapakawantayo kadagiti basoltayo, ken pabaruentayo dagiti katulagantayo.

Awisem dagiti ubbing a basaen ti Mateo 26:36–42, nga agsapsapul kadagiti balikas wenno sasao a mangideskribir no kasano ti narikna ni Jesus iti Getsemani. Ania ti napadpadasan ni Jesus a pakaigapuan a nariknanna daytoy? Mangted kadagiti ubbing iti gundaway a mangibinglay kadagiti riknada maipapan ken Jesus ken yi sakripisiona para kadatayo.

Awisem dagiti ubbing a mangibinglay iti tiempo idi nalidayda ken agsakitda. Saludsudem kadakuada no adda ammoda a nakarikna iti kastoy met a banag. Ilawlawag a iti Getsemani, ni Jesus ket nakarikna iti saem ken liday a narikna iti amin a tao. Inaramidna daytoy tapno Isu ti mangliwliwa kadatayo no kasapulantayo daytoy (kitaen iti Alma 7:11–12).

Mangtedka iti maysa nga ubing iti bassit a kayo nga at-atidog ti kaakabana iti ruangan ti kuarto iti klase, ken kiddawen kenkuana a iggamanna dayoty iti paidda ken padasena a lumabas iti ruangan Ilawlawag a ti bassit a kayo mangibagi kadagiti basoltayo, a manglapped kadatayo manipud iti iseserrek iti pagarian ti Dios. Ikkaten ti bassit a kayo tapno mangiparangarang a ni Jesus imbaklayna dagiti basoltayo tapno mabalin a mapakawantayo no agbabawitayo.

Mangikabesa kadua dagiti ubbing ti sasao a “Saan a ti pagayatak, no di ket ti pagayatam, ti maaramid” (Lucas 22:42) ken paglilinnawagan no ania ti kaipapananna daytoy. Ania ti maaramidtayo tapno agtulnog ti pagayatan ti Nailangitan nga Ama?

Tulongam dagiti ubbing a lasinen dagiti sumagmamano a bilin a nangtungpalda. Saludsodem: Ania dagiti bendision a maawatmo babaen ti panagtungpal iti Nailangitan Nga Ama, uray no narigat? Awisem ida a mangibinglay kadagiti napadasanda ken pamaneknekda.

Isalaysay ti estoria iti Lucas 22:41–43 kadagiti ubbing (nalabit babaen ti panangusar “Kapitulo 51: Agsagsagaba ni Jesus iti Minuyongan ti Getsemani,”Dagiti Estoria iti Baro a Tulag, 129–32, wenno ti katugna a video iti LDS.org). Ilawlawag a idi nagkararag ni Jesus, ti Nailangitan Nga Ama nangibaon iti anghel a mangpapigsa Kenkuana. Asino ti babaonen ti Nailangitan Nga Ama a mangpapigsa kadatayo?

Ipakita ti imahen iti anghel a mangliwliwa ken ni Cristo iti balabala ita nga lawas iti Umayka, Surotennak—Para kadagiti Indibidual ken Pamilia, ken mangibinglay iti maysa a padas a nariknam nga pinapigsaka ti Nailangitan Nga Ama.