ʻEkesōtosi 19–20; 24; 31–34

Naʻe akonaki ʻa Palesiteni Lāsolo M. Nalesoni ʻo pehē: “ʻI he Fuakava Motuʻá, ko e foʻi lea faka-Hepelū ne liliu mei ai e makehé ko e segullah, ʻa ia ʻoku ʻuhinga ia ko e ʻkoloa mahuʻinga,’ pe ʻmataʻikoloa.’ … Ko hono ʻiloʻi ko ia kitautolu ʻe he kau tamaioʻeiki ʻa e ʻEikí ko ʻene kakai makehé, ʻoku kau ia ʻi he fakahīkihiki māʻolunga tahá” (“Children of the Covenant,” Ensign, May 1995, 34). ʻOku liliu fēfē ʻe he ngaahi lea ʻa Palesiteni Nalesoní ʻa e anga hoʻo mahino ki he ʻEkesōtosi 19:3–6? Kuo fakahā fēfē ʻe he ʻEikí ʻokú Ne mataʻikoloa ʻaki koe?

Naʻe fakahā ʻe he ʻEikí kia Mōsese naʻe fiemaʻu ke mateuteu ʻa e fānau ʻa ʻIsilelí kimuʻa pea nau toki lava ʻo “fakafetaulaki atu ki he ʻOtuá” (ʻEkesōtosi 19:10–11, 17) mo tauhi ha fuakava mo Ia (vakai, ʻEkesōtosi 19:5). ʻOkú ke teuteu fēfē ki ha ngaahi aʻusia fakalaumālie, kau ai ʻa e sākalamēnití mo e ngaahi ouau ʻo e temipalé? Te ke lava fēfē ʻo tokoniʻi e niʻihi kehé ke nau mateuteú? Ko e hā e meʻa ʻokú ke ako ʻo kau ki he mateuteú mei he Luke 6:12–13; ʻĪnosi 1:2–6; ʻAlamā 17:2–3?

Lolotonga e fakataha mai ʻa e kau ʻIsilelí ki he moʻunga Sainaí, naʻa nau fanongo ki he leʻo ʻo e ʻOtuá ʻokú Ne foaki mai e Fekau ʻe Hongofulú (vakai, Teutalōnome 4:12–13). Ko hono moʻoní, ʻoku ʻikai ko e ngaahi fekau pē ʻeni ʻa e ʻOtuá—ʻoku ʻi ai mo ha ngaahi fekau lahi kehe ʻi he folofolá. Ko ia ʻi hoʻo lau ʻa e ʻEkesōtosi 20:1–17, ʻeke pē kiate koe ʻa e ʻuhinga naʻe fakamamafaʻi ai ʻe he ʻOtuá ʻa e ngaahi fekau ko ʻeni ʻe hongofulú. Ko ha sīpinga ʻeni ʻo ha tēpile te ke lava ʻo fakaʻaongaʻi ʻi hoʻo fakalaulauloto ki hono mahuʻinga ʻo e Ngaahi Fekau ʻe Hongofulú ʻi hoʻo moʻuí:

• ʻOku tokoniʻi fēfē koe ʻe hono tauhi ʻo e ngaahi fekau ko ʻeni ʻe hongofulú ke ke tauhi ai ʻa e ongo fekau lalahi ʻe ua naʻe ʻomai ʻe Sīsū ʻi he Mātiu 22:34–40?

• Ko e hā ha ngaahi meʻa ʻe ala ʻahiʻahiʻi koe ke ke fakamuʻomuʻa ia ʻi he ʻOtuá? Ko e hā ha ngaahi tāpuaki kuó ke mamata ai ʻi hono fakamuʻomuʻa ʻo e ʻOtuá?

• Ko e hā haʻo tali ki ha taha ʻokú ne pehē naʻe ʻomi ʻa e Ngaahi Fekau ʻe Hongofulú ʻi he kuonga muʻá pea ʻoku ʻikai toe ʻi ai hano ʻaonga ʻi he ʻahó ni? Ko e hā ha ngaahi sīpinga mei hoʻo moʻuí te ke vahevahe ko ha konga hoʻo talí? ʻOku tokoni fēfē ʻa e himi “ʻOku Kei Ngangatu” (Ngaahi Himí, fika 59) ki hoʻo fakamatalaʻi e ngaahi fekau ʻa e ʻOtuá ki he niʻihi kehé?

• Kuo fakahoko fēfē ʻe he ʻEikí ʻa e talaʻofa ʻi he ʻEkesōtosi 20:6 ʻi hoʻo moʻuí?

Vakai foki, “Ko e Fekau Lahí—ʻOfa ki he ʻEikí,” ʻi he Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni (2014), 43–51; Dallin H. Oaks, “ʻIkai mo ha ʻOtua Kehe,” Liahona, Nōvema 2013, 72–75; Ngaahi Tefitó mo e Ngaahi Fehuʻí, “Ngaahi Fekaú,” Gospel Library.

ʻI hoʻo lau ʻa e ʻEkesōtosi 24:3–8, fakakaukau ki he ngaahi fuakava kuó ke fai mo e ʻOtuá. Neongo naʻe kau ʻi he fuakava ʻa ʻIsilelí ha ngaahi ouau ʻoku kehe mei he meʻa ʻoku fiemaʻu ʻe he ʻOtuá ʻi he ʻaho ní, ka te ke lava ʻo fakatokangaʻi ha ngaahi faitatau. Hangē ko ʻení, ʻoku ʻasi ʻi he veesi 4, 5, mo e 8 ha ʻōlita, feilaulauʻi ʻo e fanga monumanú, mo e toto. Ko e hā e meʻa ʻoku lava ke fakafofongaʻi ʻe he ngaahi meʻá ni, pea ʻoku nau fekauʻaki fēfē mo hoʻo ngaahi fuakavá?

Feinga ke ke fakakaukau ʻokú ke ʻi he feituʻu ʻo e kakai ʻIsilelí—ʻokú ke ʻi he toafá, pea kuo ʻalu ʻa Mōsese ʻi ha ʻaho ʻe 40, pea ʻoku hanganaki atu ke ke fepaki mo e kau Kēnaní ʻi he fonua ʻo e talaʻofá (vakai, ʻEkesōtosi 32:1–8). ʻOkú ke pehē ko e hā ne fiemaʻu ai ʻe he kau ʻIsilelí ha tamapua koulá? Ko e hā ha meʻa ʻokú ne ueʻi fakalaumālie koe fekauʻaki mo e tautapa ʻa Mōsese ki he ʻEikí ʻi he ʻEkesōtosi 33:11–17?

Neongo naʻe mamafa e angahala ʻa e kau ʻIsilelí, ʻoku kau ʻi he talanoa ko ʻení ha pōpoaki ʻo e angaʻofa mo e fakamolemole ʻa e ʻOtuá. Ko e hā e meʻa ʻoku akoʻi atu kiate koe ʻe he ʻEkesōtosi 34:1–10 ʻo kau ki he Fakamoʻuí? (vakai, ʻEkesōtosi 32:30–32; Mōsaia 14:4–8; 15:9; Tokāteline mo e Ngaahi Fuakava 45:3–5).

Naʻe fakamatala ʻe Palesiteni Lāsolo M. Nalesoni: “ʻI hoku ngaahi taʻu kei talavou angé, naʻá ku ʻilo ai ki ha ngāue ʻa ha kakai kehe naʻa nau fakatahaʻi ha ngaahi lisi ʻo e ngaahi meʻa ke fai pea mo ha ngaahi meʻa ke ʻoua ʻe fai ʻi he Sāpaté. Naʻá ku toki ako kimui ange mei he folofolá ʻoku hoko ʻeku tōʻonga mo ʻeku fakakaukau ʻi he Sāpaté ko ha fakaʻilonga ʻi hoku vā mo ʻeku Tamai Hēvaní [vakai, ʻEkesōtosi 31:13; ʻIsikeli 20:12, 20]. ʻI he mahino ko iá, ʻoku ʻikai ke u toe fiemaʻu ʻa e ngaahi lisi ʻo e meʻa ke fai pe taʻe faí. Ko e taimi kuo pau ai ke u fai ha fili pe tuʻutuʻuni pe ʻoku taau ʻa e ʻekitivitī ko iá pe ʻikai mo e Sāpaté, ʻoku ou fehuʻi pē kiate au, ʻKo e hā ʻa e fakaʻilonga ʻoku ou fie foaki ki he ʻOtuá?’ Naʻe ʻai ʻe he fehuʻí ni ke mahino ʻaupito ʻeku ngaahi fili kau ki he ʻaho Sāpaté” (“ʻOku Fakafiefia ʻa e ʻAho Sāpaté,” Liahona, Mē 2015, 130). Fakalaulauloto ki he fakaʻilonga ʻokú ke loto ke ʻoange ki he ʻOtuá ʻi hoʻo tauhi ʻa e Sāpaté.

ʻI he taimi naʻe hifo mai ai ʻa Mōsese mei he moʻungá, naʻá ne ʻomi e fono kuo ʻosi hiki he ongo maka lafalafá. Naʻe tolongi ʻe Mōsese ʻa e ongo maká, hili hono ʻilo naʻe maumauʻi ʻe he kau ʻIsilelí ʻenau fuakavá (vakai, ʻEkesōtosi 31:18; 32:19). Kimui angé, naʻe fekau ʻe he ʻOtuá kia Mōsese ke toe ngaohi ha ongo maka lafalafa pea ʻohake ia ki he moʻungá (vakai, ʻEkesōtosi 34:1–4). ʻOku fakamahinoʻi mai ʻe he Liliu ʻa Siosefa Sāmitá: ʻEkesōtosi 34:1–2 (ʻi he Fakahinohino ki he Ngaahi Folofolá) naʻe kau ʻi he ʻuluaki maká e ngaahi ouau ʻa e ʻOtuá ʻo e “lakanga toputapú,” pe ko e Lakanga Taulaʻeiki Faka-Melekisētekí. Naʻe kau ʻi he maka hono uá ʻa e “fono ʻo e ngaahi fekau fakatuʻasinó.” Ko ha fono māʻulalo ange ia ʻoku tokangaʻi ʻe ha “lakanga fakataulaʻeiki māʻulalo ange” (vakai, Tokāteline mo e Ngaahi Fuakava 84:17–27), ʻa ia naʻe fakataumuʻa ke teuteuʻi ʻa e kakai ʻIsilelí ki ha fono mo ha lakanga fakataulaʻeiki māʻolunga ange koeʻuhi ke nau lava ʻo hū ki he ʻao ʻo e ʻOtuá.

• Te ke lava fēfē ʻo ʻai e ako kau ki he Fekau ʻe Hongofulú ko ha meʻa fakafiefia ki hoʻo fānaú? ʻI hoʻomou lau fakataha ʻa e ʻEkesōtosi 20:3–17, tuku ke tokoni atu hoʻo fānaú ke ʻilo pe tā ha fakatātā ke ne fakafofongaʻi ʻa e Fekau takitaha ʻe Hongofulú. ʻE lava leva ke taufetongi hoʻo fānaú ʻi hono fili ha fakatātā pea talanoa ki he founga te nau lava ai ʻo moʻui ʻaki ʻa e fekau ko iá. Mou fevahevaheʻaki ʻa e founga ʻoku mou maʻu ai ʻa e fiefiá ʻi hono moʻui ʻaki ʻa e fekau ko iá.

• Te mou lava foki ʻo hivaʻi ha foʻi hiva hangē ko e “Tauhi ʻa e Ngaahi Fekaú” (Tohi Hiva ʻa e Fānaú, 68). Tokoniʻi hoʻo fānaú ke nau kumi ha ngaahi foʻi lea ʻi he hivá ʻokú ne akoʻi kiate kinautolu e ʻuhinga ʻoku finangalo ai e ʻOtuá ke tau tauhi ʻEne ngaahi fekaú.

• Tokoniʻi ke ako ʻe hoʻo fānaú ʻa e kupuʻi lea ko e “Fakaʻapaʻapa ki hoʻo tamaí mo hoʻo faʻeé” (ʻEkesōtosi 20:12). Mahalo te ke loto ke fakamatalaʻi ange ko e “fakaʻapaʻapa” ki ha tahá ʻe lava ke ʻuhinga ia ke fakaʻapaʻapaʻi ia pe ʻai ke ne fiefia. Ko e hā e meʻa naʻe fai ʻe Sīsū ke fakaʻapaʻapaʻi ai ʻEne faʻē fakamatelié mo ʻEne Tamai Hēvaní? (vakai, Luke 2:48–51; Sione 19:26–27). Mahalo ʻe lava ke taufetongi hoʻo fānaú ʻi hono fakatātaaʻi e ngaahi meʻa te nau lava ʻo fai ke fakaʻapaʻapaʻi ai ʻenau mātuʻá, lolotonga iá ʻe mateʻi ʻe he toenga ʻo e fānaú ʻa e meʻa ʻoku nau faí.

• Mahalo ʻe fiefia hoʻo fānaú ke sio ki ha ngaahi sīpinga ʻo ha ngaahi fakaʻilonga—hangē ko ha ngaahi fakaʻilonga hala pe ngaahi fakaʻilonga ʻi ha fale. Ko e hā e taumuʻa ʻo e ngaahi fakaʻilongá? ʻE lava ke kumi ʻe hoʻo fānaú ʻa e foʻi lea ko e “fakaʻilonga” ʻi he ʻEkesōtosi 31:13, 16–17. Ko e hā e meʻa naʻe folofola e ʻEikí ko ha fakaʻilonga ʻiate kitautolu mo Iá? Fevahevaheʻaki e ngaahi founga te mou feinga ai mo homou fāmilí ke fakahaaʻi hoʻo ʻofa ki he ʻEikí ʻi he Sāpaté.

• Fakakaukau ke fakaʻaongaʻi ʻa e “Mōsese ʻi he Moʻunga Sainaí” (ʻi he Ngaahi Talanoa ʻo e Fuakava Motuʻá, 77–82) ke tokoni ki hoʻo fānaú ke nau ako e talanoa ʻi he ʻEkesōtosi 32:1–8, 19–24. Ko e hā e ʻuhinga naʻe hala ai e moihū ʻa e kakai ʻIsilelí ki ha tā tongitongi kae ʻikai ko e ʻOtuá?

  

  2:55

• Mahalo ʻe fakafiefia ke faʻu ha hala ʻi he falikí (pe kumi ha hala ofi ki homou ʻapí) ke fakatātaaʻi ʻaki e ngaahi lea ko ʻeni mei he ʻEkesōtosi 32:8: “Kuo nau afe leva mei he halá.” Lolotonga e fononga ʻi he halá, ʻe lava ke talanoa hoʻo fānaú ʻo kau ki he ngaahi ʻahiʻahi ʻoku tau fehangahangai mo ia ke tau afe mei he ʻOtuá. Ko e hā e meʻa ʻokú ne tokoniʻi kitautolu ke tau nofo ʻi he hala ʻo e ʻOtuá—pea foki ki ai kapau kuo tau hē? (vakai, ʻEkesōtosi 34:6–7).