ʻEkesōtosi 14–18

ʻI hoʻo lau ʻa e ʻEkesōtosi 14:1–10, fakakaukau ki he faʻahinga ongo naʻe maʻu ʻe he kau ʻIsilelí ʻi heʻenau mamata ki he fakaofi mai ʻa e kau tau ʻa Feló. Mahalo te ke ongoʻi ʻokú ke fiemaʻu ha mana ke ke ikunaʻi ha pole faingataʻa ʻokú ke fepaki mo ia. Ko e hā e meʻa ʻokú ke maʻu ʻi he ʻEkesōtosi 14:13–31 ʻe lava ke ne ueʻi fakalaumālie koe ke ke fekumi ki he mālohi ʻo e ʻOtuá ʻi hoʻo moʻuí? Fakalaulauloto ki he founga kuó ke mamata ai ki Hono mālohí ʻi he kuohilí. Ko e hā ha meʻa kuó ke ako fekauʻaki mo Ia mei he ngaahi aʻusia ko ʻení?

Ko e ʻEkesōtosi 15:1–19 ko ha hiva fakafetaʻi ia naʻe hivaʻi ʻe he kakai ʻIsilelí hili hono fakamavaeuaʻi ʻe he ʻEikí ʻa e Tahi Kulokulá. Ko e fē ha ngaahi kupuʻi lea ʻi he foʻi hivá ni ʻokú ke pehē ʻoku mahuʻingamālie tahá? Mahalo pē ʻoku ʻi ai ha himi ʻokú ke ongoʻi ʻokú ke fie hivaʻi ʻi he taimi kuo fai ai ʻe he ʻEikí ha meʻa fakaofo maʻau, hangē ko e “Huhuʻi ʻo ʻIsilelí” (Ngaahi Himí, fika 5). Fakakaukau ke hivaʻi pe fanongo ki ai ko ha konga ʻo hoʻo moihū ʻi he ʻaho ní.

Vakai foki, Tokāteline mo e Ngaahi Fuakava 8:2–3.

ʻE lava ke tokoni atu hoʻo laukonga fekauʻaki mo e fononga ʻa ʻIsilelí ke ke fakakaukau ai ki he ngaahi meʻa ʻi hoʻo moʻuí naʻe ngali “kona” ʻo hangē ko e ngaahi vai ʻo Malá (vakai, ʻEkesōtosi 15:23–27). Kuo ngaohi fēfē ʻe he ʻEikí ha ngaahi meʻa ʻoku kona ʻi hoʻo moʻuí ke melié? Ko e hā e mahuʻinga ʻo e ngaahi aʻusiá ni ʻi hoʻo moʻuí?

Te ke fakatokangaʻi ha ngaahi sīpinga lahi ange ʻo e ngaahi aʻusia fakamamahi ʻa e kakai ʻIsilelí ʻi he ʻEkesōtosi 16 mo e 17. ʻOku fakatauele ke fakaangaʻi ʻenau lāungá pe hanú, ka ʻi hoʻo laukongá, fakakaukau angé pe kuó ke fai nai ha meʻa tatau. Ko e hā ha meʻa ʻokú ke ako mei he ngaahi aʻusia ʻa e kakai ʻIsilelí ʻe lava ʻo tokoni ke fakasiʻisiʻi ai hoʻo lāungá kae falala ange ki he ʻOtuá? Ko e hā e meʻa ʻoku akoʻi atu ʻe he ngaahi veesi ko ʻení fekauʻaki mo e ʻOtuá?

Vakai foki, 1 Nīfai 2:11–12.

Koeʻuhí he ʻoku fiemaʻu ke tau kai kotoa, ʻoku faʻa fakatatau ʻe he ʻEikí ʻa e ngaahi meʻa fakalaumālié ki he meʻakaí. Kumi ʻEne ngaahi lēsoni fakalaumālié ʻi he ngaahi aʻusia ʻa e kakai ʻIsilelí mo e maná ʻi he ʻEkesōtosi 16. Hangē ko ʻení, ko e hā e meʻa ʻokú ke maʻu ʻi he ngaahi fakahinohino ʻa e ʻEikí ʻi he ʻEkesōtosi 16:16, 19, 22–26 ʻoku fekauʻaki ia mo hoʻo meʻakai fakalaumālié?

Ke ʻiloʻi ha ngaahi lēsoni kehe ʻe ala finangalo ʻa e ʻEikí ke ke ako mei he mana ko ʻení, fakalaulauloto ki ha ngaahi fehuʻi hangē ko ʻení:

• Ko e hā ha meʻa ʻoku foaki mai ʻe he ʻEikí kiate au ʻoku hangē ko e mana fakaʻaho naʻá Ne foaki ki he kakai ʻIsilelí?

• Ko e hā ha meʻa ʻe lava ke u fai ʻa ia ʻoku tatau mo hono tānaki ʻo e maná?

Te ke lava ʻo maʻu ha ngaahi fakakaukau lahi ange ʻi ha taha pe lahi ange ʻo e ngaahi vitiō ko ʻení: “Meʻakai Fakaʻahó: Sīpingá,” “Meʻakai Fakaʻahó: Meʻa ke Aʻusiá,” mo e “Meʻakai Fakaʻahó: Liliu” (Gospel Library).

2:37

2:59

2:48

Fakakaukau ki ha ngaahi meʻa kehe, makehe mei he kaí, ʻokú ke fai ʻi he ʻaho kotoa pē. Ko e hā e ʻuhinga ʻoku fiemaʻu ai ke fai fakaʻaho ha ngaahi meʻa pau kae lava ke ola leleí? Ko e hā ha meʻa ʻokú ke ongoʻi ʻoku ueʻi koe ke fai ke maʻu ai ha ngaahi aʻusia fakalaumālie fakaʻaho?

Vakai foki, Dieter F. Uchtdorf, “Fakafoki Fakaʻaho,” Liahona, Nōvema 2021, 77–79; “Daily Restoration” (vitiō), Gospel Library.

5:27

Fakakaukau ki he Fakamoʻuí ʻi hoʻo lau ʻa e ʻEkesōtosi 17:1–7. ʻOku hoko fēfē ʻa Sīsū Kalaisi ko ha maka kiate koé? (vakai, Saame 62:6–7; Hilamani 5:12). ʻOkú Ne hoko fēfē ʻo hangē ko e vaí? (vakai, Sione 4:10–14; 1 Kolinitō 10:1–4; 1 Nīfai 11:25).

Mahalo ʻe ʻi ai ha ngaahi taimi ʻi hoʻo moʻuí te ke lava ʻo ongoʻi tatau mo Mōsesé—ʻi he taimi ʻoku fakafalala atu ai e niʻihi kehé kiate koé, ka ʻokú ke ongoʻi ʻoku “mamafa [ho] nimá” (ʻEkesōtosi 17:12). ʻE ʻi ai ha ngaahi taimi, mahalo te ke hangē pē ko ʻĒlone, Hua, mo Seteloó, ʻo poupouʻi ʻa Mōsesé. Fokotuʻu koe ki he tuʻunga ʻo e kakai takitaha ko ʻení ʻi hoʻo lau ʻa e ʻEkesōtosi 17:8–16; 18:13–26, pea sio ki he meʻa ʻoku akoʻi atu ʻe he ʻEikí kiate koe fekauʻaki mo ʻEne ngāué.

Vakai foki, Mōsaia 4:27; 18:8–9.

• ʻI he taimi naʻe fakamavaeuaʻi ai ʻe he ʻEikí ʻa e Tahi Kulokulá, naʻe mamata ʻa Mōsese mo e kakai ʻIsilelí ki Hono mālohí. Tuku ke tokoni atu hoʻo fānaú ke mou fakakaukau ki ha founga fakafiefia ke toe fakamanatu ai ʻa e talanoa mei he ʻEkesōtosi 14:5–22 (see also “Ko e Laka Atú” ʻi he Ngaahi Talanoa ʻo e Fuakava Motuʻá, 70–74). Mahalo te ke lava ʻo fokotuʻu ha ʻū sea pe sipi kafu pea “fakamavahevaheʻi” kinautolu ʻo hangē ko e Tahi Kulokulá. Hili ia pea te mou lava ʻo fevahevaheʻaki ki he founga kuó ke mamata ai ki he mālohi ʻo e ʻOtuá ʻi hoʻomou moʻuí.

  

  2:54

• Ko e hā e meʻa ʻoku tānaki mai ʻe he Tokāteline mo e Ngaahi Fuakava 8:2–3 ki heʻetau mahino ki he talanoa ʻi he ʻEkesōtosi 14? Talanoa ki ha taimi naʻá ke aʻusia ai hano fakahā atu ʻe he Laumālie Māʻoniʻoní ki hoʻo fakakaukaú pe lotó ha meʻa, pea fakaafeʻi e fānaú ke nau talanoa ki heʻenau ngaahi aʻusiá. Te mou lava foki ʻo hivaʻi ha foʻi hiva fekauʻaki mo e Laumālie Māʻoniʻoní, hangē ko e “ʻOku Taki ʻa e Laumālié” (Ngaahi Himi, fika 73).

• Mahalo te ke lava mo hoʻo fānaú ʻo inu ha meʻa melie mo ha meʻa ʻoku kona lolotonga hoʻomou ako fakataha ʻa e ʻEkesōtosi 15:22–25. Kuo ngaohi fēfē ʻe he Fakamoʻuí ʻa e ngaahi aʻusia “kona” ʻi heʻetau moʻuí ke “melié”?

• ʻI hoʻo lau mo hoʻo fānaú ʻa e ʻEkesōtosi 15:23–25; 16:14–15; 17:1–6, tuku ke nau tokoni atu ke kumi ha ngaahi meʻa ke tokoni ki hono fai ʻo e talanoa takitaha—hangē ko ha vaʻa ʻakau (ke fakamoʻui ʻa e vai ʻi Malá), ko ha foʻi hina pe kulo (ke fakafonu ʻaki ʻa e maná), mo ha foʻi maka (ki he vai ʻi Hōlepí). ‘Oku fakamanatu fēfē mai ʻe he ngaahi talanoá ni ʻa e meʻa ʻoku fai ʻe Sīsū Kalaisi maʻatautolú? Mahalo te mou lau ʻa e Mātiu 7:24–27; Sione 4:10–14; 6:29–35, 48–51; Hilamani 5:12; Tokāteline mo e Fuakava 20:77, 79 ko ha konga hoʻomou fealeaʻakí.

• ʻI hoʻo lau ʻa e ʻEkesōtosi 17:8–16, te ke lava ʻo fakaafeʻi ha taha ʻo e fānaú ke hiki hono nimá ke māʻolunga ʻi he ʻataá. ʻI he taimi ʻoku helaʻia ai ʻa e kiʻi tamasiʻí, ʻe lava ke tokoni ʻa e fānau kehé, ʻo hangē ko e founga naʻe tokoni ai ʻa ʻĒlone mo Hua kia Mōsesé. Ko e hā e meʻa ʻoku akoʻi mai ʻe he talanoa ko ʻení fekauʻaki mo e founga te tau lava ai ʻo tokoni ke lavameʻa e puleʻanga ʻo e ʻOtuá? Te ke lava foki ʻo lau ʻa e ʻEkesōtosi 18:13–26 pea talanoa ki he ngaahi fatongia mamafa ʻo e kakai ʻoku ngāue ʻi ho uōtí. Ko e hā ha meʻa te tau lava ʻo fai he ʻahó ni ke tokoni ai ki hotau kau taki ʻi he Siasí, ʻo hangē pē ko hono tokoniʻi ʻe ʻĒlone mo Hua ʻa e palōfita ko Mōsesé?