Genesis 1–2; Moises 2–3; Abraham 4–5

Bagama’t hindi natin alam ang lahat kung paano nilikha ang mundo, kawili-wiling pansinin kung ano ang napili ng Diyos na ihayag tungkol sa Paglikha. Ano ang itinuturo sa iyo ng Diyos tungkol dito sa Genesis 1:1–25; Moises 2:1–25; at Abraham 4:1–25? Bakit Niya nais na malaman mo ang mga bagay na ito? Habang pinagninilayan mo ang mga salaysay na ito, maaari mo ring isipin ang itinuturo nito sa iyo tungkol sa Ama sa Langit, kay Jesucristo, sa mundo, at sa iyong sarili.

Para mapagyaman ang iyong pag-aaral, isiping basahin ang mga talatang ito habang napapaligiran ka ng mga likha ng Diyos o habang nakikinig ka sa isang awiting tulad ng “O Bawat Nilalang ng Diyos” (Mga Himno, blg. 34). Makakakita ka ng mga larawan ng Kanyang mga likha na magpapadama sa iyo ng pagpipitagan sa Lumikha. Isiping ibahagi ang mga larawang ito, pati na ang iyong patotoo, sa iba.

Tingnan din sa Doktrina at mga Tipan 101:32–34.

Habang binabasa mo ang Genesis 1:26–27; Moises 2:26–27; at Abraham 4:26–27, pagnilayan kung ano ang ibig sabihin ng malikha sa “larawan” o ayon sa “wangis” ng Diyos, lalaki at babae. Bakit mahalaga sa iyo na malaman ang mga katotohanang ito sa mga talatang ito? Halimbawa, paano nakakaapekto ang mga katotohanang ito sa paraan ng pagtingin mo sa iyong sarili, sa iba, at sa Diyos? Paano ka matutulungan ng mga ito kapag may negatibong damdamin ka tungkol sa iyong sarili?

Para matulungan kang pag-isipan ang mga tanong na ito, subukang kumpletuhin ang isang pangungusap na tulad nito: “Dahil alam ko na ako ay nilikha sa larawan ng Diyos, pinipili kong …” Maaaring makatulong na rebyuhin ang “Ang inyong katawan ay sagrado” sa Para sa Lakas ng mga Kabataan: Isang Gabay sa Pagpili (mga pahina 22–29). Isiping pumili ng isang bagay na gagawin mo para ipakita sa Diyos na alam mo na ang iyong katawan ay sagrado.

Sa video na “Pinakadakilang Nilikha ng Diyos” (Gospel Library), pinatotohanan ni Pangulong Russell M. Nelson ang mahimalang katawan ng tao. Habang pinanonood mo ang video na ito, itanong sa iyong sarili, “Ano ang nais ng Ama sa Langit na madama ko tungkol sa aking katawan?” Paano ito naiiba sa mga mensaheng maaari mong marinig mula sa iba?

2:47

Maaaring sabihin ng ilang tao na ang malikha sa larawan ng Diyos ay nangangahulugan na lahat ng ating iniisip, nadarama, at hangarin ay Kanyang inaaprubahan at hindi natin kailangan (o hindi natin makakaya) na magpakabuti. Ano ang masasabi mo tungkol diyan? Anong mga kabatiran ang natatamo mo mula sa Mosias 3:19 at Eter 12:27?

Tingnan din sa Russell M. Nelson, “Ang Inyong Katawan: Isang Kagila-gilalas na Kaloob na Dapat Pahalagahan,” Liahona, Ago. 2019, 50–55.

“Sina Adan at Eva ay pinag-isang dibdib sa kasal para sa panahon at sa buong kawalang-hanggan sa pamamagitan ng kapangyarihan ng walang-hanggang priesthood” (Russell M. Nelson, “Lessons from Eve,” Ensign, Nob. 1987, 87). Pagnilayan ito habang binabasa mo ang Genesis 1:27–28; 2:18–25; Moises 3:18, 21–25; at Abraham 5:14–19. Paano mo maituturing ang kasal nang may kabanalan na naibigay rito ng Diyos?

Tingnan din sa 1 Corinto 11:11; “Ang Mag-anak: Isang Pagpapahayag sa Mundo,” Gospel Library.

Ano ang sinasabi sa Genesis 1:28; Moises 2:28; at Abraham 4:28 tungkol sa ating responsibilidad sa mga likha ng Diyos? Ano ang idinaragdag ng Doktrina at mga Tipan 59:16–21 at 104:13–18 sa iyong pang-unawa?

Tingnan din sa Gérald Caussé, “Ang Ating Tungkuling Pangalagaan ang Mundo,” Liahona, Nob. 2022, 57–59; Mga Paksa at mga Tanong, “Environmental Stewardship and Conservation,” Gospel Library.

Ginawang banal ng Diyos ang araw ng Sabbath, at inuutusan Niya tayo na panatilihin itong banal. Habang binabasa mo ang Genesis 2:2–3; Moises 3:2–3; at Abraham 5:2–3, isipin kung paano naging “pinagpala” sa iyo ang Sabbath.

Tingnan din sa Doktrina at mga Tipan 59:9–13; “The Sabbath Is a Delight” (video), Gospel Library.

0:50

• Gaano katagal ang Paglikha?

• Ano ang pananaw ng Simbahan sa ebolusyon?

• Nilikha ba talaga si Eva mula sa tadyang ni Adan?

Iklik para makita ang iba pa.

• Paano mo magagawang masaya para sa iyong mga anak ang pag-aaral tungkol sa Paglikha? Maaari mo silang isama sa labas para maghanap ng mga uri ng mga bagay na ginawa sa bawat panahon ng Paglikha. Maaari ding tingnan ng iyong mga anak ang mga larawan ng mga bagay na nilikha ni Jesus (tingnan sa “Ang Paglikha ng Mundo” sa Mga Kuwento sa Lumang Tipan, 8–12). Pagkatapos ay maaari ninyong pag-usapan ng iyong mga anak ang nadarama ninyo tungkol kay Jesucristo matapos basahin ang tungkol sa Paglikha.

• Isiping sama-samang kantahin ang isang awitin tungkol sa magandang mundo natin, tulad ng “Ako ay Mahal ng Ama sa Langit” (Aklat ng mga Awit Pambata, 16–17). Maaari sigurong magdagdag sa awitin ang iyong mga anak ng iba pang mga bagay na nilikha ng Diyos na nagpapadama sa kanila ng Kanyang pagmamahal.

• Ang iyong mga anak ay maaaring magkaroon ng diwa ng pagpipitagan at paggalang sa katawan nila at ng iba kapag nalaman nila na lahat tayo ay nilikha sa larawan ng Diyos. Para maipaunawa sa kanila ang kahulugan nito, maaari mong hayaang tingnan ng iyong mga anak ang sarili nila sa isang salamin o retrato habang binabasa mo ang Moises 2:26–27 sa kanila. Maaari mo ring ipakita sa kanila kung paano madalas na “makamukha” ng mga sanggol na hayop ang kanilang mga magulang (tingnan ang larawan sa outline na ito, halimbawa). Maaaring humantong ito sa pag-uusap kung bakit mahalaga sa inyo ang malaman na kayo ay nilikha sa larawan ng inyong Ama sa Langit.

  

• Maaaring masiyahan kayo ng iyong mga anak na magdrowing ng katawan ng tao at gupitin ang mga drowing para gawing puzzle ang mga ito. Habang binubuo ng iyong mga anak ang kanilang mga puzzle, maaari nilang pag-usapan ang mga paraan na maipapakita nila sa Ama sa Langit na nagpapasalamat sila para sa kanilang katawan.

• Habang binabasa mo ang Moises 3:2–3, hilingin sa iyong mga anak na pakinggan kung ano ang ginawa ng Diyos sa ikapitong araw. Tulungan ang iyong mga anak na hanapin o idrowing ang mga larawan ng mga bagay na maaari nilang gawin sa araw ng Linggo para gawin itong isang banal na araw at naiiba sa ibang mga araw. Ibahagi sa isa’t isa kung bakit mahalaga sa inyo na panatilihing banal ang araw ng Sabbath.

• Tulungan ang mga bata na isadula ang pagpapaliwanag sa isang kaibigan kung bakit nila pinipiling gawin ang mga bagay-bagay sa araw ng Linggo na nagpapakita ng paggalang sa Ama sa Langit at kay Jesus. Imungkahi na gamitin nila ang Genesis 2:2–3 sa kanilang mga paliwanag. Paano nagpapakita ng ating pagmamahal sa Ama sa Langit at kay Jesucristo ang pagpapanatiling banal ng araw ng Sabbath?