Ol Tingting bilong Mekim Gut Moa Lainim long Haus na long Sios

Ol skripsa em tok bilong God, olsem na, askim Em long helpim yu long save gut long ol.

Olgeta samting i tokaut long Krais (lukim 2 Nifai 11:4; Moses 6:63), olsem na tingim long makim ol ves i tokaut long Krais, mekim yumi laikim Em moa, na lainim yumi rot bilong bihainim Em. Sampela taim, ol i tokaut stret long ol tok tru bilong Krais na gospel bilong Em, na sampela taim ol i kamap olsem eksampel o stori. Askim yu yet, “Wanem ol toktru bilong oltaim i stap long ol dispela ves? Ol dispela toktru i lainim mi wanem long Sevia?”

Harim gut ol tingting bilong yu na ol samting yu pilim, maski sapos ol dispela samting i no wankain long ol samting yu ritim. Nogut ol dispela tingting em ol samting Papa long Heven i laik yu bai lainim.

I gat planti rot bilong raitim ol tingting i kamap long yu taim yu ritim ol tok. Kain olsem, nogut yu painim wanpela tok, na wanpela liklik hap tok insait long tok bilong God we i givim yu gutpela tingting. Yu ken makim ol na raitim ol tingting bilong yu long ol buk tambu bilong yu. Yu ken putim long sait wanpela buk bilong raitim ol gutpela tingting, ol gutpela samting yu pilim, na ol samting Spirit i tokim yu long mekim.

Taim yu toktok long sampela gutpela tingting yu kisim taim yu rit, em gutpela rot bilong skulim ol narapela, na em mekim yu save gut moa long wanem samting yu ritim long en. Toktok long ol samting yu lainim wantaim famili na ol poro bilong yu, na askim ol long mekim wankain samting.

Yu skelim ol stori na ol tokskul yu ritim i wankain long laip bilong yu olsem wanem. Kain olsem, yu ken askim yu yet, “Wanem samting i kamap long mi i wankain olsem samting mi ritim?”

Taim yu ritim tok bilong God, i bai gat planti ol askim bai kamap long tingting bilong yu. Ol dispela askim i ken toktok long ol samting yu ritim o long laip bilong yu. Skelim ol dispela askim, na painim ol ansa taim yu stadim ol skripsa.

Long kisim moa tingting long ol ves yu ritim, yusim ol liklik tok i stap aninit, Topical Guide, Bible Dictionary, Guide to the Scriptures, na ol narapela helpim.

Yu ken painim ol gutpela tingting bilong wanpela ves taim yu luksave long wanem samting em toktok long en, kain olsem ples dispela samting i kamap. Taim yu save long sindaun na bilip bilong husat God i toktok long ol, yu bai save gut long as tru tru bilong dispela tok.

Ritim wanem samting ol profet na aposel bilong las de i skulim yumi long ol toktok insait long tok bilong God.

Taim yu stadim tok bilong God, em mas noken givim gutpela tingting tasol, em mas stiaim yumi long senisim stap bilong yumi. Putim iau long wanem Spirit i tokim yu long ritim, na bihainim ol dispela tingting.

Ol sampela singsing lotu na bilong ol pikinini i i stap insait long Kam, Bihainim Mi. Yusim ol musik long bringim Spirit i kam, na long strongim bilip na testimoni bilong yu long ol tok tru bilong gospel.

Makim wanpela sapta na ves we i dia tumas long yu, famili bilong yu, o klas bilong yu, na ritim na tok dispela sapta na ves olgeta taim, o mekim wanpela pilai bilong helpim yu putim dispela sapta na ves long tingting bilong yu.

Painim sampela samting i wankain long ol samting yu ritim long wanpela sapta na ves. Skelim, ol dispela samting i wankain long ol tokskul insait long tok bilong God olsem wanem?

Ritim ol sampela ves, bihain droim wanpela samting i olsem samting yu ritim long en. O, yu ken painim wanpela piksa insait long Gospel Art Book o long narapela hap long Gospel Library. Yu ken kisim wanpela piksa i soim samting yu lainim long en.

Bihain long yupela i ritim wanpela stori, yu ken askim ol famili o memba bilong klas long mekim drama bilong dispela stori. Bihain, yupela i toktok long dispela stori i wankain long ol samting i kamap long yu olsem wanem.

Sapos yu gat ol memba bilong famili husat i no laik ritim tok bilong God wantaim wantaim olgeta memba bilong famili, yu ken painim ol narapela rot bilong helpim ol. Olsem eksample, yu inap long toktok long ol tok tru bilong oltaim long rot yu save toktok wantaim ol narapela, long rot we i no strong tumas, o nogat? Pasin bilong ritim tok bilong God em i no wankain long olgeta famili. Sampela pikinini bai laik long ritim tok bilong God ol yet. Yu mas beten na bihainim ol samting Spirit i tok yu mas mekim.