Yusim Kam, Bihainim Mi—Bilong Haus na Sios

Kam, Bihainim Mi em bilong olgeta husat i laik lainim tok bilong God—long em yet, olsem wanpela famili, o insait long ol klas bilong Sios. Sapos yu no bin stdim ol skripsa olgeta taim bipo, dispea risos inap helpim yu long stat. Sapos yu gat gutpela pasin bilong stadim skripsa, dispela risos inap helpim yu long gat moa ekspiriens.

Nambawan ples long lainim gospel em long hom. Ol tisa bilong yu long sios i ken sapotim yu, na yu ken kisim helpim long ol narapela memba bilong wod. Long stap strong long spirit, yu wantaim famili bilong yu i mas kisim gutpela kaikai bilong wanwan de i kam long “dispela gutpela tok bilong God” (Moronai 6:4; lukim tu Russell M. Nelson, “Opening Remarks,” Liahona, Nov. 2018, 6–8).

Yusim dispela risos long kisim helpim bilong yu. Wan wan hap bilong dispela buk i toktok long ol tok tru bilong oltaim, insait long Olpela Testamen. I gat ol sampela ol aidia na ektiviti bilong helpim yu stadim ol skripsa long yu yet, wantaim famili o ol poro bilong yu. Taim yu stadi, bihainim gaidens bilong Spirit long painim ol toktru bilong oltaim i gat mining long yu. Lukluk na painim ol toksave i kam long God bilong yu, na bihainim ol promting yu kisim.

Kam, Bihainim Mi—Bilong Haus na Sios em buk bilong yusim insait long Praimeri, Sande Skul bilong ol yangpela na ol bikpela lain, ol klas bilong ol Yangpela Meri, na miting bilong kwarum bilong Prishud bilong Aronik. Sapos yu tisa long wanpela ol dispela, yu mas yusim ol samting i stap long dispela buk long taim yu ritim tok bilong God na taim yu redi long skulim klas bilong yu. Stat long ol ekspiriens bilong yu yet long ol skripsa. Nambawan pasin bilong redi em taim yu ritim tok bilong God na askim Holi Spirit long givim yu gutpela tingting. Painim ol tok tru bilong oltaim, bilong helpim yu long kamap moa olsem Papa long Heven na Jisas Krais. Kam, Bihainim Mi i ken helpim yu luksave long ol tok tru na save gut moa long tok bilong God.

Tingim olsem taim yu lainim gutnius, em i mas kamap samting bilong haus na em i mas stap wankain olsem Sios i lainim yumi. Nambawan wok yu mas mekim, em yu mas strongim na stiaim ol manmeri yu save skulim ol long lainim na bihainim gutnius long haus bilong ol yet. Noken wari long skulim ol long ol bikpela samting insait long klas. Yu ken givim ol taim bilong toktok long wanem samting i kamap long, tingting bilong ol, na ol askim ol i gat taim ol ritim tok bilong God long haus. Askim ol long toktok long ol tok tru bilong oltaim ol i painim. Dispela em i bikpela samting yu mas mekim, moa long yu skulim ol long olgeta samting.

Wanpela bikpela as bilong yumi bung long ol klas Sande Skul, em long strongim na stiaim wanpela narapela taim yumi traim long bihainim Jisas Krais. Wanpela isipela rot bilong mekim dispela, em yu ken askim ol olsem “Holi Spirit i skulim yupela long wanem samting, taim yupela ritim tok bilong God?” Ol bekim bilong dispela askim i ken kirapim ol gutpela toktok bilong strongim bilip long Jisas Krais na gutnius bilong Em.

Bihain yu ken askim ol long toktok long ol tingting bilong rit na skelim insait long Kam, Bihainim Mi. Kain olsem, nogut wanpela tingting insait long dispela buk i tok long ritim Isaiah 53, long painim ol toktok we i toktok long wok bilong Jisas Krais. Yu ken askim ol memba bilong klas long toktok long ol tingting o wanem ol pilim, we ol dispela tok i givim long ol. O yu ken givim sampela taim long ol long ol ritim dispela ves olsem klas.

Taim ol kwarum bilong Aronik Prishud na ol klas bilong ol Yangpela Meri i bung long ol Sande, as bilong kibung bilong ol i narakain liklik long klas bilong Sande Skul. Ol i save bung long helpim wanpela narapela long lainim gospel bilong Jisas Krais. Na tu, ol i save bung tu long toktok long mekim wok bilong God i kisim bek ol manmeri, na eksaltesen (lukim General Handbook, 1.2). Ol i save mekim dispela wantaim daireksen bilong klas na kwarum presiidensi.

Long dispela as, taim kibung bilong wanwan kwarum o klas i stat, wanpela memba bilong kwarum o klas presidensi i mas go pas long toktok bilong wok bilong bihainim gospel , helpim ol manmeri, autim tok long ol narapela, o mekim wok bilong tempel na famili histri.

Bihain long dispela taim bilong kaunsel wantaim, wanpela tisa bai go pas long klas o kwarum long lainim gospel wantaim. Ol lida (ol bikman o bikmeri) o ol memba bilong klas o kwarum i ken kisim dispela wok bilong skulim ol narapela. Klas o kwarum presidensi bai toktok wantaim ol lida, na makim ol lain bilong mekim dispela wok.

Husat bai skulim ol narapela i mas redim em yet. Em i ken lukim ol tingting i stap insait pinis long Kam, Bihainim Mi. Long wanwan autlain, dispela mak i soim ektiviti we i gutpela long ol yut. Tasol, yu ken yusim ol narapela tingting olsem ektiviti bilong ol yut long lainim.

Ajenda bilong ol kibung bilong ol kwarum o klas i stap long apendiks D.

Taim yu laik redim yu yet long skulim ol Praimeri, yu mas ritim tok bilong God yu yet na wantaim famili bilong yu. Taim yu mekim olsem, tingting bilong yu mas op long kisim gutpela tingting long Holi Spirit, long ol pikinini insait long Praimeri klas bilong yu. Yu mas beten, bai Spirit i ken givim yu gutpela tingting, long wanem rot bilong helpim ol lainim gospel bilong Jisas Krais.

Taim yu redi long skulim ol, yu ken kisim ol sampela gutpela tingting i stap insait long Kam, Bihainim Mi—Bilong Hausom na Sios. Wanwan sapta insait long dispela buk i gat ol hap ol i kolim “Sampela Tingting bilong Lainim ol Pikinini.” Ol dispela tingting i ken kirapim tingting bilong yu. Yu save long ol pikinini insait long praimeri klas bilong yu—na yu bai save gut moa long ol taim yu toktok wantaim ol insait long klas. God i save long ol tu, na Em bai givim yu gutpela tingting, long ol gutpela rot bilong skulim na blesim ol.

Ating sampela pikinini long klas bilong yu i mas mekim pinis ol ektiviti insait long Kam, Bihainim Mi wantaim ol famili bilong ol. Em i orait. Em i gutpela long ol mekim gen. Yu ken askim ol pikinini long toktok namel long ol yet wanem samting ol i lainim long haus—tasol yu mas mekim rot bilong ol pikinini husat i no lainim long haus long toktok tu. Ol pikinini bai lainim ol tok tru bilong gutnius moa taim yu mekim ol sampela ektiviti bilong skulim ol dispela tok tru. Sapos wanpela ektiviti i gutpela moa long ol pikinini i lainim, yu ken mekim olgeta taim, taim yu skulim ol pikinini i liklik moa. Yu ken lukim gen ektiviti bilong wanpela leson bilong bipo.

Long ol mun i gat 5-pela Sande, ol tisa bilong Praimeri i mas skulim ol long ol ektiviti i stap long “Apendiks B: Bilong ol Praimeri—Redim Ol Pikinini long Mekim Kontrak wantaim God na Wokabaut long Rot bilong Em Oltaim Long Laip bilong Ol.” Dispela bai kisim ples bilong leson bilong dispela wik insait long Kam, Bihainim Mi.