Mazano oKunatsurudza Kudzidza Kumba uye kuChechi

Magwaro matsvene ishoko raMwari, naizvozvo Vakumbire rubatsiro rwekuanzwisisa.

Zvinhu zvose zvinopupura nezva Kristu (ona 2 Nifai 11:4; Mosesi 6:63), naizvozvo funga pamusoro pokunyora pasi kana kumaka ndima dzinopupura nezve Muponesi, dzinodzamisa rudo rwako kwaAri, uye dzinodzidzisa mateverero okuMuita. Dzimwe nguva zvokwadi pamusoro peMuponesi nevhangeri Rake zvinotaurwa pachena, uye dzimwe nguva zvinorehwa kuburikidza nemuenzaniso kana nyaya. Zvibvunze kuti, “Ndezvipi zvokwadi zvokusingaperi zvinodzidziswa mundima idzi? Zvokwadi izvi zvinondidzidzisa chii pamusoro peMuponesi?”

Teerera kupfungwa dzako nemanzwiro ako, kunyangwe kana dai zvisingaenderani nezvauri kuverenga. Manzwiro aya anogona kunge ari izvo Baba vako Vokudenga zvavanoda kuti iwe udzidze.

Pane nzira dzakawanda dzekunyora pasi nadzo manzwiro anouya apo paunonzvera. Semuenzaniso, unogona kuwana kuti mamwe mashoko nendima zviri mumagwaro matsvene zvinokufadza; unokwanisa kuzvimaka uye wonyora pfungwa dzako senoti mumagwaro matsvene ako. Unokwanisawo kuchengeta jonari renzwisiso, pfungwa, uye manzwiro aunogamuchira.

Kukurukura nzwisiso dzinobva mukunzvera kwako pachako inzira yakanaka yekudzidzisa nayo vamwe, uye kunobatsirawo kusimbisa nzwisiso yako yezvawaverenga. Goverana nenhengo dzemhuri neshamwari zvauri kudzidza (muri panzvimbo imwechete kana paindaneti), uye vakoke kuti vaite zvimwechetezvo.

Funga pamusoro pokuti nyaya nedzidziso zvauri kuverenga zvinoshanda sei muupenyu hwako. Semuenzaniso, unokwanisa kuzvibvunza kuti, “Zviitiko zvipi zvandakava nazvo izvo zvakafanana nezvandiri kuverenga?”

Apo paunonzvera magwaro matsvene, mibvunzo inokwanisa kuuya mupfungwa. Mibvunzo iyi ingangova inoenderana nezvauri kuverenga kana neupenyu hwako hwemazuva ose. Fungisisa mibvunzo iyi uye wotsvaka mhinduro apo paunoenderera mberi nekunzvera magwaro matsvene.

Kuti uwane dzimwe nzwisiso dzendima dzaunoverenga, shandisa manotsi epazasi pepeji, Nhungamiro kuMagwaro Matsvene, uye zvimwe zvibatsiro zvekunzvera.

Unokwanisa kuwana nzwisiso dzakakosha pamusoro pendima yechinyorwa chitsvene apo paunofunga pamusoro pemamiriro ezvinhu ayakaturwa nezvayo, kusanganisira zvinhu zvaiitika kana zvakakonzera kuitika kwazvo. Semuenzaniso, kuziva mamiriro uye tendo dzevanhu avo Mwari vavakataura navo kunokwanisa kukubatsira kuti unzwisise zvirinani vavariro yemashoko Avo.

Verenga izvo zvakadzidziswa nevaporofita nevaapositora vemazuva ekupedzisira pamusoro pemisimboti yaunowana mumagwaro matsvene.

Kunzvera magwaro matsvene hakufaniri kutikurudzira chete asi kunofanirawo kutitungamirira kuti tishandure mararamiro atinoita. Teerera kune izvo zvaunofemerwa neMweya kuti uite apo paunenge uchiverenga, uye zvino woita chimwe chinhu pafemero idzi.

Nziyo nedzimbo dzevana vadiki dzakapuwa dzinowanikwa nemubhuku rose reHuyai, Munditevere. Shandisa mumhanzi unoera kukoka Mweya uye kudzamisa rutendo neuchapupu hwako hwezvokwadi zvevhangeri.

Sarudza ndima yechinyorwa chitsvene yakakosha kwauri, kumhuri yako, kana kukirasi yako, uye moidzidza nemusoro kuburikidza nekuidzokorora zuva nezuva kana kuburikidza nekutamba mutambo wekudzidza zvinhu nemusoro.

Wana zvinhu zvinobatwa zvinoenderana nezvitsauko uye ndima dzauri kuverenga. Funga pamusoro pokuti chinhu choga choga chinoenderana sei nedzidziso dziri mumagwaro matsvene.

Verenga ndima shoma, uye zvino wodhirowa chimwe chinhu chinoenderana nezvawaverenga. Kana kuti unokwananisa kutsvaka mufananidzo muBhuku reMifananidzo yeVhangeri kana kumwewo muRaibhurari yeVhangeri. Unokwanisawo kutora mufananidzo unoratidza zvawakadzidza.

Mushure mokuverenga nyaya, koka mhuri kana nhengo dzekirasi kuti dziite mutambo wayo. Pashure, taurai pamusoro pokuti nyaya yacho inoenderana sei nezvinhu zvamuri kusangana nazvo.

Kana uine nhengo dzemhuri dzisingadi kutora chinhanho mukunzvera magwaro matsvene kwemhuri, tsvaka dzimwe nzira dzekupedza nguva nokutaurirana navo. Somuenzaniso, unokwanisa here kugovera chokwadi chokusingaperi nenzira yemazuva ose muhurukuro dzenyu kana kugovera chinyorwa chitsvene chakakosha nenzira isingairatidziki sokunge iri yokuparidza kana yechisimba? Kunzvera magwaro matsvene hakusi kunofanira kuitwa nenzira imwecheteyo mumhuri dzose. Vamwe vana vangangodavira zvirinani pakunzvera magwaro matsvene nemunhu mumwechete. Namata uye utevere femero dzeMweya.