Madamadau kan Mehn kamwahuihala Kasukuhl en nan Ihmw oh Mwomwohdiso

Pwuhk sarawi kan iei mahsen en Koht, eri peki Reh sawas pwe komwi en wehwehkin irail.

Soahng koaros kadehdehki Krais (kilang 2 Nihpai 11:4; Moses 6:63), eri medewe ntingihdi de kilelehdier ire kan me kadehdehki Sounkomouro, kalaude ahmw limpoak ong Ih, oh kasukuhlki duwen idawehn Ih. Ekei ahnsou me mehlel kan en rongamwahuo (kin kalapw sansal nan kosonned de padahk kan) kin sansal oh inen ah ekei ahnsou kawehweparail kin pwarada nan karasaras de soai. Peidek rehmw, “Soangen me mehlal kan en rongamwahu dah me padahkpe mie nan ire pwukat?“ Dahme mehlel pwukat padahkihong ie me pid Sounkomouro?”

Tehk mwahu ahmw lamalam oh pepehm kan, itarete ma re sohte pahrekiong dahme ke wadwadek. Soangen kapehm pwukat kak dahme Sahm Nanleng ketin kupwurki ken esehla.

Me tohto wiepen intingihedi pepehm kan me kin pwarada ni ahnsoun onop. Ni karasepe, ke kak diar me ekei lokaia oh kahs akan nan pwuhk sarawi kan sair uhk; ke kak kalipwehla oh ntingihedi ahmw madamadau kan en wia nohd nan noumw pwuhk sarawi kan. Ke pil kak kolokol ehu pwuhk en rekohd en ahmw madamadau kan, pepehm kan, oh kamarain kan me kin sair uhk.

Koasoaia irehn kamarain me ke alehdi nan ahmw onop wia ehu wiepe mwahu en kasukuhli mehteikan oh pil kin sewese katehlapiala ahmw wehwehki dahme ke wadekehr. Ehukihong soahng kan komwi kaskasukuhlki ong tohn peneinei oh kempoakepahmw kan (ni ahmw tuhweng irail de nan koampiuhder), oh lukehiong irail en wia soahngohte.

Medewe mwomwen soai kan oh padahk kan me ke wadwadek arail rasehng ahmw mour. Ni karasepe, ke kak pein idek rehmw, “Soangen irair dahkan me I lelohngehr me duwehte dahme I wadwadeket?”

Ni ahmw onopiki iren pwuhk sarawi kan, peidek kan pahn pil pwarada nan ahmw lamalam. Peidek pwukat kak doke dahme ke wadwadek de mehkan me pid ahmw mour. Douloali peidek pwukat oh rapahki pasapengparail ni ahmw doula onohnopiki irehn pwuhk sarawi kan.

Pwehn ale sawas en kamarain ong ireh kan me ke wadwadek, doadoahngki footnote kan, Topical Guide, oh Bible Dictionary, pil Guide to the Scriptures, oh wasahn sawas teikan.

Ke kak diar wehwe mwahu duwen ehu iren pwuhk sarawi ni ahmw pahn medewe ah irair kan, me iangahki palihkan de wasa e kohsang ie. Ni karasepe, ahmw ese mour en aramas me Koht koasoaieng koa oh dahme irail kamehlele kak seweseiuk wehwehki kahrepen Sapwellime mahsen kan.

Wadek dahme soukohp kan oh wahnpoaron kan padahngkiher ki ireh kan me ke diar nan pwuhk sarawi kan.

Onopiki pwuhk sarawi kan kaidehnte kin kamarainih kitail ahpw pil kin elehiong kitail en wekidala mwomwen atail momour. Rong dahme Ngehno kin kapehm kin uhk ni ahmw wadawad, oh eri idawehn kapehm pwukat.

Koul en Sarawi kan oh koul en seri kan kak dierek nan Kohdo, Idawehn Ie. Doadoahngki koul sarawi pwehn Luke Ngehno oh koaloalehla ahmw pwoson oh kadehde ong mehlel akan en rongamwahu wet.

Pilada ehu iren pwuhk sarawi me wehwe mwahu ong uhk, ahmw peneinei, de tohn kilahs, oh wadlikiala ni amwail kin kapwkapwurehiong rahn koaros de wia ehu kamwadong en wadlikih.

Rapahkihda mehkot me pid duwen irelaud kan oh pwuloi kan me ke wadwadek. Medewe mwomwen ehu ehu dipwisou eh doke padahk kan nan pwuhk sarawi kan.

Wadek sin ire depe, oh eri mahlenihda mehkot me doke dahme ke wadekehro. De ke kak rapahkihda ehu kilel nan Gospel Art Book de ekis wasa nan Laipreri en Rongamwahu. Ke pil kak wiahda ehu kilel me kasalehda dahme ke eselahr.

Mwurin wadek ehu soai, luke tohn peneinei de tohn kilahs en kamwomwehda soaio. Mwuri, koasoaia duwen mwomwen soaio eh pidada mehkan me kumwail kin wie lelohng.

Ma mie tohn ahmw peneinei me sohte men iang towehda en peneinei onopen pwuhk sarawi, rapahkihda ekei ahl pwehn kak ehuong irail. Ni karasepe, ke kak ehukihwei mehlel poatoapoat kan ni sansal nan ahmw lokaia kan de ehukihwei ehu iren pwuhk sarawi me ke kesempwalki ni mwohmw ehu me sohte mwomwen padahk de lipwoar? Onopen pwuhk sarawi sohte anahne duwepene nan peneinei koaros. Ekei seri kak alehdi mwahu onopiki pwuhk sarawi kan ni ah kelehpwiki sounpadahko. Kin kapakap oh idawehn kapehm kan en Ngehno.