Weliakapw Iei Atail Koasoandi

Kahrepe koaros en esehla oh kaskasukuhlki rongamwahuo iei en kaloalehla atail weliakapw oh sewesei kitail en duwehla Sises Krais. Pwehki kahrepe wet, ansou kitail onopiki rongamwahu wet, kitail sohte kilikilangete mehkot kapw; kitail men wiahla “aramas kapw” men (2 Korint 5:17). Met wehwehki koapwoaroapwoarki Sahm Nanleng oh Sises Krais en sewesei kitail wekidala atail mohngiong, atail lamalam, atail wiewia, oh pein kitail ni atail wia uduk.

Ahpw mwomwen kaskasukuhlki rongamwahu me kak kakehlaka atail pwoson oh elehiong mwekid kopwuriamwei en weliakapw koaros sohte kin wiawi ansou ehute. E kin doulahsang nan perehn kasukuhl lelahng nan mohngiong en emen oh ah imwen kousoan. E anahne kitail en nananti, rahn koaros en wehwehki oh momouriki rongamwahuo. Weliakapw mehlel anahne kaweidpen Ngehn Sarawi.

Ngehn Sarawi kin kahluwai kitaillahng oh kadehdehki me mehlelo (kilang Sohn 16:13). E kin kamarainda atail lamalam, kamwadanga atail wehwehki, oh sairki atail mohngiong kan kaudiahl sang Koht, me poahsoan en mehlel koaros. Ngehn Sarawi kin kamwakelehda atail mohngiong kan. E kin kamarainih kin kitail ineng en momourki me mehlel, oh E kin mwenginingin kihong kitail ahl akan duwen wia met. Ni mehlel, “Ngehn Sarawi … me pahn kawehwehiong [kumwail] mehkan koaros” (Sohn 14:26).

Ong kahrepe pwukat, nan atail nanantihong momouriki, esehla, oh kasukuhlki rongamwahuo, me keiou kesempwal iei kitail anahne rapahki kaweidpen Ngehno. Koasoandi wet anahne kaunda atail pilipil kan oh kaweid atail lamalam oh wiewia kan. Kitail anahne rapahki soahng kan me kin luke kaweidpen Ngehno oh soikala soahng kan me kin pwakihala—pwe kitail wehwehki me ma kitail kak warohng Ngehn Sarawi en mihmi rehtail, kitail pil kak warohng kousoan rehn Sahm Nanleng oh Sapwellime Pwukat, Sises Krais.