Doadoahngki Kohdo, Idawehn Ie—Ong Nan Ihmw oh Mwomwohdiso

Kohdo, Idawehn Ie iei ong sohte lipilipil me men kasukuhl sang nan pwuhk sarawi kan—emen emen, de ehu peneinei, oh Nan kilahs akan en Mwomwohdiso. Ma ke saikinte onopiki pwuhk sarawi kan mwowe, mehn sawas wet kak sewesei iuk en tapihada. Ma ke ahnikiher ahpid mwahu en onopiki pwuhk sarawi kan, mehn sawas wet kak sewese iuk ahniki ekspihriens tohto kan me katapan.

Wasa keieun mwahu en esehla rongamwahuo iei nan imwen kousoan. Ahmw sounpadahk kan Nan mwomwohdiso kak utung uhk, oh ke pil kak ale kangoang sang tohn ward teikan. Ahpw pwehn kak mourla ni palingehn, kowe oh ahmw peneinei anahne Kakehlepen paliwar en ehu ehu rahn sang “apwalih kin irail mahsen en Koht mwahuo” (Moronai 6:4; pil kilang Russell M. Nelson, “Opening Remarks,” Liahona, Nohpempe 2018, 6–8).

Doadoahngki mehn sawas akan ni mwohmw ehu me kak sewesei iuk. Audlain akan kasalehda ekei mehlel soutik me dierekehr Nan Kadehde Mering. Irail pil sawaski madamadau kan oh kemwekid kan pwehn sewese iuk pein onopiki pwuhk sarawi kan, oh iang ahmw peneinei, de kempoakepahmw akan. Ni ahmw pahn onop, idawehn kaweidpen Ngehno pwehn diar mehlel soutik kan me kesempwal ong uhk. Rapahki sapwellimen Koht padahk kan ong uhk, oh idawehn pepehm kan ke kin alehdi.

Kohdo, Idawehn Ie—Ong Nan Ihmw oh Mwomowhdiso iei pwuken kasukuhl ong kilahs en Rahn Sarawi kan Nan Praimeri, me pwulopwul kan oh me laud kan, kilahs en Peinakapw Akan, oh mihting kan en Prihsduhd en Aron. Ma ke kin padahk nan ehu wasa pwukat, ke anahne doadoahngki audlain pwukat nan mehn sawas wet ong pein ahmw onop oh ahmw kaunopieng padahk. Tepikihda sang ahniki pein ahmw ekspihriens kan nan pwuhk sarawi kan. Ahmw kaunopada keiou kesempwal pahn wiawi ni ahmw pahn onopiki pwuhk sarawi kan oh rapahki kamarainpen Ngehn Sarawio. Rapahki mehlel soutik kan me kin sewese iuk en duwehla Sahm Nanleng oh Sises Krais. Kohdo, Idawehn Ie kak sewese iuk kilangada ekei mehlel pwukat oh wehwehki irair akan en pwuhk sarawi kan.

Tamataman me kaskasukuhlki rongamwahu wet, me keiou mwahu, pahn tepsang nan imwomw oh Mwomwohdisoh utungada. Ni mehlel, keioun ahmw pwukoah iei en utung aramas akan ke kin padahkih nan arail songosong en esehla oh momouriki rongamwahuo nan imwarail kan. Dehr kediropwki ken wiahda lesen keiou kaselel ong irail nan kilahs. Ahpw, kihong irail ansou mwahu kan en ehukihda arail ekspihriens kan, lamalam kan, oh kalelapak kan duwen iren pwuhk sarawi kan me irail wadekadahr ni imwarail kan. Lukei irail en ehukihda mehlel soutik kan irail diaradahr. Met kesempwalsang padahngkihla wen wehiou mehn kasukuhlo.

Ehu kahrepe keiou kitail kin kohpene nan kilahs en Santi Sukuhl iei en utung oh kangoange emen emen ni atail nanantihong idawehn Sises Krais. Ehu Wiepe mengei ken kak wia met iei en wia ehu kalelapak duwehte “Dahme Ngehn Sarawi padahkihong uhkehr nan wihk et ni ahmw onopiki pwuhk sarawi kan?” Pasapeng kan ong kalelapak wet kak elehda ehpenehn madamadau kan me kak kakehlaka pwoson Sises Krais oh Sapwellime rongamwahu.

Eri ke kak luke koasoakoasoaipene ong mehn onop akan nan Kohdo, Idawehn Ie. Ni karasepe, ehu mehn onop kak inda rapahki Aiseia 53, kilikilang lokaia kan me koasoaia en Sounkomouro misin. Ke kak idek rehn tohn kilahs akan en ehukihda madamadau de pepehm akan me lokaia pwukat kamarain kin iraildahr. De kumwail kak ehupene kihong ekis ansou en rapahkihda lepin lokaia pwukat.

Ni ansou me kohrumw en prihsduhd en Aron oh kilahs en Peinakapw Akan tuhpene ni Rahn Sarawi kan, arail poahsoan ekis weksang kilahs en Santi Sukuhl. Pwehn kapatahieng sawsawaspene pwehn esehla rongamwahu en Sises Krais, pwihn pwukat pil kin tuhpene pwehn kaweid pene duwen wiahda doadoahk en komour oh kesepwilda (kilang Pwuken Kaweid Doadoahk, 1.2). Irail kin wia met sang kaweid en Presedensi en kilahs oh kohrumw.

Pwehki kahrepe wet, ehu ehu mihting en kohrumw de kilahs anahne tepikihda emen tohn kohrumw de kilahs presedensi kawkaweid ehupenehn lamalam akan me pid soahng kan re nanantihong, ni karasepe, momouriki rongamwahu, sewese aramas me ahniki anahn, ehukihwei rongamwahu, de towehda doadoahk en tehnpas sarawi oh poadepen peneinei.

Mwurin ansou wet ong kawkaweid pene, emen sounpadahk pahn kaweid kilahs de kohrumwo Nan kasukuhlpene en rongamwahu. Sounkaweid laud akan de towe kan ong ehu kilang de kohrumw kak kileliong en padahk. Presedensi en kilahs de kohrumw, ni ahr ale kaweid sang sounkaweid laud akan, pahn wiahda asaimen pwukat.

Aramas me kieleldien padahk anahne kaunopada sang ni doadoahngki mehn sawas en kasukuhl kan nan audlain en wihk kan nan Kohdo, Idawehn Ie. Nan ehu ehu audlain, kilel wet kin kasalehda ehu kemwekid me kesempwal ong me pwulopwul. Ahpw, sohte lipilipil mehn sawas akan nan audlain kak wia ehu kemwekid en kasukuhl ong me pwulopwul.

Ong ehu karasepen atenda Ong mihting kan en kohrumw de kilahs, kilang apendiks D.

Ahmw kaunopieng kasukuhlih Praimeri pahn tepida ni ahmw pein onopiki pwuhk sarawi kan oh onopieng ahmw peneinei. Ni ahmw pahn wia, kin alehda kapehm kan en palingehno oh kaweid sang Ngehn Sarawio duwen seri kan nan ahmw kilahs en Praimerio. Kin kapakap, oh Ngehno kak kamarainih kin uhk madamadau kan mehn sewese irail esehla rongamwahu en Sises Krais wet.

Ni ahmw kaunopieng padahk, ke kak pil alehdi kamarain laud sang ni kilkilang wiepen kasukuhl kan nan Kohdo, Idawehn Ie—Ong Nan Ihmw oh Mwomwohdiso. Ehu ehu audlain nan mehn sawas wet mie ehu pali me kahdaniki “Madamadau kan ong Kasukuhlih Seri kan.” Medewe me madamadau pwukat wia mehn sawas ekei ong wiahda ekei madamadau. Ke ese seri kan Nan ahmw perehn Praimeri—oh ke pahn eseirailla ni ahmw pahn ehuong irail Nan amwail perehn kasukuhl. Koht pil ketin mwahngih irail, oh E pahn kamarainih kinuhk mwohmw keiou mwahu kan ong kasukuhlih oh kapai irailda.

Ekei seri kan kakete wiahier ekei kemwekid kan nan Kohdo, Idawehn Ie rehn arail peneinei kan. E mwahute. Kapwkapwurehiong mwahu. Song lukehiong seri kan en ehukihong emen emen dahme irail esehlahr nan imwarail kan—ke pil kak pilahnehda soangen mwohmw akan me seri kan kak iang towehda menda ma irail sohte kaskasukuhl nan imwarail kan. Seri kan kin esehla mwahu mehlel akan en rongamwahu ansou me mehlel pwukat kopwkopwurupwuriong sang ni kemwekid tohto kan. Ma ke diar me ehu kemwekid en kasukuhl mwahu ong seri kan, ke kak kapwurehiong, mehlel ma ke kasukuhlih seri tikitik kan. Ke pil kak pwurehng kilang ehu kemwekid sang ehu lesen en mwowe.

Nan sounpwung kan me mie Rahn Sarawi limau, sounpadahk en Praimeri kan pahn weliankiihdi audlain en Kohdo Idawehn Ie me sketuwel iongehr Kelimau en Rahn Sarawi ki ehu kemwekid en kasukuhl de tohtohsang Nan “ Appendiks B: Ong Praimeri—Kaukaunop Seri kan ong Erein mour pohn sapwellimen Koht Elen Inouo.”