Ngā Whakaaro Hei Whakapiki Ake i te Ako i te Kāinga me te Hāhi

Ko ngā karaipiture te kupu a te Atua, nō reira me ui atu ki a Ia hei āwhina kia mārama ai koe.

Kei te whakaatu ngā mea katoa mō te Karaiti (tirohia 2 Nīwhai 11:4; Mohi 6:63), nō reira me tuhi iho, me māka rānei ngā whiti e whakaatu ana mō te Kaiwhakaora, e whakahōhonu hoki i tō aroha Mōna, me te whakaako me pēhea e whai atu i a Ia. I ētahi wā ka tōtika te whakahua i ngā mea pono mō te Kaiwhakaora me Tana rongopai, ā, i ētahi wā ka whakahuahia ake i roto i tētahi tauira, tētahi pakiwaitara rānei. Uia ki a koe anō, “He aha ngā mea pono mau tonu e whakaakona ana i roto i ēnei whiti? He aha ngā akoranga e puta mai ana ki ahau i roto i ēnei whiti mō te Kaiwhakaora?”

Me aro ki ō whakaaro me ō kare ā-roto, ahakoa mēnā kāore e hāngai ana ki tāu e pānui nei. Tērā pea ko ēnei kare ā-roto ngā mea e hiahia ana tō Matua i te Rangi kia ako koe.

He maha ngā huarahi hei hopu i ngā kare ā-roto e puta mai ai i a koe e rangahau ana. Hei tauira, tērā pea ka kitea e koe he nui te mauri i roto i ētahi kupu i ngā karaipiture; māu ērā e māka, ā, tuhia hoki ō whakaaro hei taipito kōrero i āu karaipiture. Māu rānei tētahi pukapuka whakaaro, e mau ana ngā tirohanga, kare ā-roto me ngā ranga wairua e pā ai ki a koe.

He mahi pai te kōrero tahi e pā ana ki ngā tirohanga i kitea ai i tō ake rangahau hei whakaako i ētahi atu, ā, e āwhina ana anō hoki kia pakari ake tō māramatanga ki ngā mea i pānuitia ai e koe. Tohaina tāu e ako nei ki ngā mema o te whānau me ō hoa (kanohi ki te kanohi, ā hangarau rānei), kātahi ka tonoa rātou kia pērā anō.

Me huri ō whakaaro ki te hāngaitanga o ngā paki kōrero me ngā akoranga ki tō oranga. Hei tauira, ka uia ki a koe anō, “He aha ngā āhuatanga kua pā mai ki ahau e rite ana ki ngā mea e pānui ana ahau?”

I a koe e rangahau ana i ngā karaipiture, ka toko ake pea ngā pātai i tō hinengaro. Ka hāngai pea ēnei pātai ki tāu e pānui nei, ki tō oranga whānui rānei. Kia whakaarohia ake ēnei pātai kātahi ka kimihia ngā whakautu i a koe e rangahau tonu ana i ngā karaipiture.

Whakamahia ngā kīwae hei rapu i ētahi atu tirohanga i roto i ngā whiti e pānuitia ai e koe, arā, ko te Kaupapa Aratohu, te Papakupu Paipera, te Kupu Aratohu ki ngā Karaipiture, me ērā atu mea rangahau.

Ka rapua ngā tirohanga whai tikanga mō tētahi karaipiture i a koe e aro ana ki tōna horopaki, tae atu ana ki ngā āhuatanga i te wā i puta ake ai tēnā. Hei tauira, nā tō mōhio ki te hītori, ki te whakapono hoki o te iwi i kōrerotia ai e te Atua e pai ake ai tō mārama ki te wairua o Ana kupu.

Pānuitia ngā mea i whakaakona ai e ngā poropiti i ngā rā o muri nei me ngā āpotoro e pā ana ki ngā tikanga e kitea ai e koe i roto i ngā karaipiture.

Ehara i te mea me whakahihiko anake tātou e ngā karaipiture, engari mā ērā hoki tātou e ārahi kia panoni te āhua o ō tātou oranga. Me whakarongo ki tā te Wairua e akiaki ana i a koe e pānui ana, kātahi ka mahi hāngai ki ēnei ākinga.

Ka kitea ngā hīmene me ngā waiata tamariki i roto i Haere Mai, Whai Mai i Ahau. Meatia ngā waiata tapu hei pōhiri mai i te Wairua kia whakahōhonu ake i tō whakapono me tō whakaaturanga mō ngā mea pono o te rongopai.

Kōwhiria tētahi karaipiture e whai tikanga ana ki a koe, ki tō whānau, ki te akomanga rānei, kātahi ka whakamaharatia tēnā mā te toai ia te rā, ia te rā, mā te tākaro i tētahi kemu maumahara rānei.

Rapua ngā mea ā-ringa e hāngai ana ki ngā upoko me ngā whiti e pānuitia ana. Me huri ō whakaaro ki te hāngai o tēnā mea, o tēnā mea ki ngā akoranga i roto i ngā karaipiture.

Pānuitia ētahi whiti ruarua, kātahi ka tā i tētahi mea e hāngai atu ana ki tāu i pānui ai. Rapua rānei tētahi whakaahua i te Gospel Art Book i tētahi atu wāhi rānei i te Wharepukapuka Rongopai. Māu anō e hopu whakaahua e hāngai atu ana ki tāu i ako ai.

Whai muri iho i te pānui kōrero, tonoa ngā mema o te whānau, o te akomanga rānei kia whakaaria ake taua kōrero. Nō muri iho, kōrerohia ngātahitia e pā ana ki te hāngaitanga o ngā mea i pānuitia ai ki ngā āhuatanga e pā ana ki a koe.

Ki te kore ētahi mema o te whānau e hiahia ana ki te pānui karaipiture, kimi huarahi kē atu ki te whakahono ki a rātou. Hei tauira, māu rānei tētahi mea pono mau tonu e tuku i a koutou e noho tahi ana ki te kōrero, e tuku rānei i tētahi karaipiture whai tikanga i runga i tētahi āhuatanga kauhau kore? Ehara i te mea me ōrite te rangahau karaipiture i tēnā whānau ki tā tēnā whānau. Ka pai ētahi tamariki ki te rangahau takirua kōrua tahi i ngā karaipiture. Me inoi, ā, me whai i ngā ākinga o te Wairua.