Ko te Whakatahuritanga Tō Tātou Whāinga

Ko te whāinga o ngā akoranga rongopai katoa, arā, ko te whakahōhonu ake i tō tātou whakatahuritanga me te āwhina i a tātou kia rite rawa ki a Ihu Karaiti. Mō tēnei take, i a tātou e rangahau ana i te rongopai, ehara i te mea kei te kimi kōrero hou noa iho tātou; kei te hiahia tātou kia meinga ai hei “mea hou” (2 Koriniti 5:17). Ko te tikanga o tēnei he whakawhirinaki ki tā te Matua i te Rangi rāua ko Ihu Karaiti āwhina kia panoni i ō tātou ngākau, ō tātou tirohanga, ā tātou mahinga, me ō tātou ake āhuatanga pū anō.

Engari ko te momo o te akoranga rongopai mā konā whakakahangia ai tō tātou whakapono, ā, mā konā puta ai te merekara o te whakatahuritanga, nā, ehara i te mea ka puta mai ērā mea i te wā kotahi. Ka torona atu ki tua noa atu i te akomanga ki roto i te ngākau o te tangata me tōna kāinga. E tika ana kia ū tonu, ia te rā, ia te rā kia mārama, ā, kia whakatinanahia te rongopai. Mā te reo o te Wairua Tapu e puta ai te whakatahuritanga tūturu.

Ka ārahi te Wairua Tapu i a tātou ki te mea pono, ā, ka whakaaturia mai e pā ana ki taua mea pono (tirohia Hoani 16:13). Māna ō tātou hinengaro e whakamārama ake, e whakapūrangiaho i ō tātou māramatanga, ā, e whakapā atu ana ki ō tātou ngākau i runga i te whakakitenga mai i te Atua, te puna o ngā mea pono katoa. Ka whakatapua ō tātou ngākau e te Wairua Tapu. Māna ō tātou ngākau e whakahihiko kia ū ki te pono, ā, Māna e kōhimuhimu ki a tātou ngā huarahi e pēnei ai. E pono ana, “mā te Wairua Tapu … [tātou] e whakaako ki ngā mea katoa” (Hoani 14:26).

Nā ēnei take, i roto i ā tātou mahinga kia ū, kia ako, ā, kia whakaako i te rongopai, me whai tuatahi tātou i te piringa tahitanga o te Wairua. Mā tēnei whāinga e whakahaere ai ā tātou kōwhiringa, ā, e ārahi hoki i ō tātou whakaaro me ā tātou mahinga. Me whai atu tātou i ngā mea katoa e tono mai ana i te mauri o te Wairua, me te whakaparahako atu i ngā mea katoa e āia atu ai taua mauri—nā te mea kei te mōhio tātou mehemea e taea ana e tātou te mahi tika e piri mai ai te Wairua Tapu, ka taea hoki e tātou te mahi tika kia noho tahi ai i te aroaro o te Matua i te Rangi rāua ko Tana Tama, a Ihu Karaiti.