სახლში და ეკლესიაში სწავლის გაუმჯობესების იდეები

წმინდა წერილები ღვთის სიტყვაა, ამიტომ სთხოვეთ მას, ამ სიტყვების გააზრებაში დაგეხმაროთ.

ყველაფერი მოწმობს ქრისტეს შესახებ (იხილეთ 2 ნეფი 11:4; მოსე 6:63), ამიტომ დაიმახსოვრეთ ან მოინიშნეთ ნაწყვეტები, რომლებიც მოწმობს მხსნელის შესახებ, აღრმავებს თქვენს სიყვარულს მის მიმართ და ასწავლის, როგორ მიჰყვეთ მას. ზოგჯერ მხსნელისა და მისი სახარების ჭეშმარიტებები პირდაპირაა გაცხადებული, ზოგჯერ კი მაგალითის ან ამბის სახით არის მოცემული. ჰკითხეთ საკუთარ თავს: „ამ მუხლებში რომელი მარადიული ჭეშმარიტება ისწავლება? ეს ჭეშმარიტებები რას მასწავლის მხსნელის შესახებ?“

მიაქციეთ ყურადღება თქვენს აზრებსა და გრძნობებს, თუნდაც ისინი არ იყოს დაკავშირებული იმასთან, რასაც კითხულობთ. შესაძლოა, ზეციერ მამას სურდეს, რომ სწორედ ეს შთაბეჭდილებები ისწავლოთ.

არსებობს უამრავი ხერხი იმისთვის, რომ ჩაიწეროთ შთაბეჭდილებები, რომლებიც სწავლის დროს გებადებათ. მაგალითად, შეიძლება აღმოაჩინოთ, რომ წმინდა წერილში მოცემული გარკვეული სიტყვები და ფრაზები თქვენზე შთაბეჭდილებას ახდენს; მოინიშნეთ ისინი და ჩაიწერეთ თქვენი აზრები შენიშვნის სახით წმინდა წერილში. თქვენ ასევე შეგიძლიათ, აწარმოოთ დღიური იმ შთაგონებების, გრძნობებისა და შთაბეჭდილებების შესახებ, რომლებიც გებადებათ.

თქვენი პირადი სწავლისას მიღებული შთაგონების განხილვა კარგი გზაა სხვების სწავლებისთვის და ასევე იმისთვის, რომ წაკითხული უკეთესად გაიაზროთ. გაუზიარეთ ოჯახის წევრებსა და მეგობრებს (პირადად ან ონლაინ), რას სწავლობთ და სთხოვეთ, იგივე მოიმოქმედონ.

გაითვალისწინეთ, როგორ ვრცელდება თქვენ მიერ წაკითხული სწავლებები და ამბები თქვენს ცხოვრებაზე? მაგალითად, საკუთარ თავს ჰკითხეთ: „რომელი ჩემი გამოცდილება ჰგავს წაკითხულს?“

წმინდა წერილის შესწავლისას შეიძლება კითხვები გაგიჩნდეთ. ეს შეკითხვები შეიძლება ეხებოდეს იმას, რასაც კითხულობთ ან ზოგადად, თქვენს ცხოვრებას. დაფიქრდით ამ კითხვებზე და ეძიეთ პასუხები წმინდა წერილის შესწავლის პროცესში.

წაკითხული მუხლების მიმართ დამატებითი შთაგონების მისაღებად გამოიყენეთ სქოლიო, წმინდა წერილების გზამკვლევი, Bible Dictionary, Guide to the Scriptures, და სხვა სასწავლო დამხმარეები.

ასევე შეგიძლიათ იპოვოთ მნიშვნელოვანი შთაგონება წმინდა წერილის ნაწყვეტების შესახებ, როდესაც მის კონტექსტს განიხილავთ, მათ შორის, გარემოებებს ან ვითარებას, საიდანაც ის მომდინარეობს. მაგალითად, როცა გეცოდინებათ იმ ხალხის მრწამსი და ისტორია, რომელსაც ღმერთმა მიმართა, უკეთ გაიგებთ მისი სიტყვების აზრს.

წაიკითხეთ, რას ასწავლიდნენ უკანასკნელ დღეთა წინასწარმეტყველები და მოციქულები იმ პრინციპების შესახებ, რომლებსაც წმინდა წერილებში პოულობთ.

წმინდა წერილის შესწავლამ შთაგონებასთან ერთად უნდა დაგვანახოს ჩვენი ცხოვრების შეცვლის გზა. უსმინეთ სულიწმინდის კარნახს კითხვის დროს და შემდეგ იმოქმედეთ ამ კარნახის მიხედვით.

შემოთავაზებული საგალობლებისა და საბავშვო სიმღერების პოვნა შესაძლებელია მოდი და გამომყევიში. სულიწმინდის მოსაწვევად და თქვენი რწმენისა და სახარების ჭეშმარიტებების მოწმობის გასაღრმავებლად გამოიყენეთ წმინდა მუსიკა.

შეარჩიეთ თქვენთვის, თქვენი ოჯახისა ან კლასისთვის მნიშვნელოვანი მონაკვეთი წმინდა წერილიდან და ყოველდღიური გამეორებით ან დამახსოვრების თამაშის საშუალებით დაიზეპირეთ იგი.

იპოვეთ საგნები, რომლებიც უკავშირდება იმ თავს და მუხლებს, რომლებსაც კითხულობთ. იფიქრეთ, როგორ უკავშირდება თითოეული საგანი წმინდა წერილის სწავლებებს.

წაიკითხეთ რამდენიმე მუხლი და შემდეგ გააკეთეთ ჩანახატი ამის შესახებ. ასევე შეგიძლიათ მოიძიოთ სურათი წიგნში Gospel Art Book ან ნებისმიერ სხვა ადგილას სახარების ბიბლიოთეკაში. გადაიღეთ ისეთი სურათი, რომ ნასწავლი გამოსახოს.

ამბის წაკითხვის შემდეგ მოიწვიეთ ოჯახის წევრები ან კლასი, რათა გაითამაშოთ იგი როლებში. ამის შემდეგ, ისაუბრეთ იმაზე, თუ როგორ უკავშირდება ეს ამბავი გამოცდილებას, რომელსაც ამჟამად იღებთ.

თუ გყავთ ოჯახის წევრი, რომელსაც არ სურს წმინდა წერილის შესწავლაში მონაწილეობის მიღება, მოიფიქრეთ მასთან ურთიერთობის სხვა გზები. მაგალითად, შეგიძლიათ ბუნებრივად გაუზიაროთ მარადიული ჭეშმარიტება თქვენს საუბრებში ან გაუზიაროთ მნიშვნელოვანი წმინდა წერილი ისე, რომ არ ჰგავდეს ქადაგებას ან ბრძანებას? წმინდა წერილის შესწავლა ყველა ოჯახში განსხვავდება. ზოგიერთი ბავშვი წმინდა წერილს უკეთ სწავლობს ინდივიდუალურად. მუდმივად ილოცეთ და მიჰყევით სულიწმინდის კარნახს.