Adwenkyerɛ a Obotu Adzesũa Mpon wɔ Fie na wɔ Asɔr

Kyerɛwsɛm no yɛ Nyame n’asɛm, ntsi bisa No hɔ mboa ama edze aatse ase.

Adze nyina gye Christ ho dase (hwɛ 2 Nephi 11:4; Moses 6:63), ntsi hwɛ dɛ ebɛkyerɛw anaa ebɛyɛ ahyɛnsew wɔ nyiyimu horow a ɔgye Agyenkwa no ho dase, ɔma wo dɔ ma No dɔ bun mu, na ɔkyerɛkyerɛ wo mbrɛ ibesi bɛka No do. Ɔtɔfabi a Agyenkwa no na N’asɛmpa nokwar nsɛm no wɔakyerɛw no tsenn, na ɔtɔfabi a wodua mfatoho anaa asɛm bi do. Bisa woho dɛ, “Ebɛn onnyiewiei nokwar nsɛm na wɔkyerɛkyerɛ no wɔ nyiyimu yinom mu?” Ebɛnadze na nokwar yinom kyerɛkyerɛ me fa Agyenkwa no ho?”

Yɛ aso ma w’adwendwen na w’atsenka, mpo sɛ ɔyɛ dɛ ɔmmfa dza erekenkan noho a. Nkenyan yinom no bia obotum ayɛ ndzɛmba noara a wo Ɔsor Egya pɛ dɛ isũa.

Akwan horow wɔ hɔ a ibotum dze akyerɛw nkenyan a ɔba ber a irusũa adze. Mfatoho, bia ibohu nkasafua na kasasin binom wɔ kyerɛwsɛm no mu a okenyan wo; ibotum ayɛ ahyɛnsew wɔ ho na akyerɛw w’adwen wɔ ho dɛ nsɛnsin wɔ wo kyerɛwsɛm mu. Ibotum so akyerɛw wɔ journal mu nsɛm a ɔfa nhumu, atsenka na adwendwen a inya ho.

Erepɛnsapɛnsa nhumu mu fi wankasa w’adzesũa mu no yɛ kwan pa a wɔdze kyerɛkyerɛ binom na ɔboa hyɛ wo ntseasee wɔ dza akenkan no ho dzen. Enye w’ebusua mu mba na anyɛnkofo (a ihyia enyim na enyim anaa internet do) nkyɛ dza irusũa, na to nsa frɛ hɔn ma wɔnyɛ dɛm ara.

Hwɛ mbrɛ nsɛm na nkyerɛkyerɛ a erekenkan no si fa w’abrabɔ ho. Mfatoho, ibotum ebisa woho dɛ, “Ebɛn sũahu ahorow na menya a ɔtse dɛ dza merekenkan yi?”

Ber a isũa kyerɛwsɛm no, nsɛmbisa horow so botum aba w’adwen mu. Nsɛmbisa yinom botum afa dza erekan no ho anaa w’abrabɔ ho nyina. Dwendwen nsɛmbisa yinom ho na hwehwɛ nyiano ber a ekɔ do sũa kyerɛwsɛm no.

Ama eenya ntseasee akã kyerɛwsɛm nyiyimu a ekenkan ho no, fa ase nsɛnsin horow no, Topical Guide, the Bible Dictionary Kyerɛwsɛm no Kwankyerɛ no, na adzesũa mboa binom so dzi dwuma.

Ibotum enya ntseasee nhumu fa kyerɛwsɛm nyiyimu bi ho ber a ehwɛ no ho nsɛm, gyinabew anaa bia a ofi baa no kã ho. Mfatoho, iruhu nkorɔfo a Nyankopɔn kasaa kyerɛɛ hɔn no hɔn nkyir na dza wɔgye dzi no botum aboa wo ma atse Ne nsɛm ne siantsir ase yie.

Kenkan dza nda a odzi ekyir nkɔnhyɛfo na asomafo akyerɛkyerɛ afa fapem a ihu no kyerɛwsɛm mu no ho.

Kyerɛwsɛm adzesũa nnyi dɛ okenyan hɛn nko mbom ɔwɔ dɛ ogya hɛn ma yɛsesa hɛn abrabɔ. Tsie dza Sunsum no kenyan wo dɛ yɛ ber a ekenkan, na nkyii dzi nkenyan yinom no do.

Asɔr ndwom na mbofra ndwom a woesusu no wobohu no wɔ Bra, Bɛka Mo Do mu nyina. Fa ndwom krɔnkrɔn dzi dwuma ma ɔnto nsa mfrɛ Sunsum no na ɔnto hom gyedzi na dasegye mu wɔ asɛmpa nokwar horow ho.

Yi kyerɛwsɛm asɛnsin bi a ohia ma wo, w’ebusua, anaa w’adzesũafo , na wonsi do daa daa nkã anaa wɔmfa adzesũa agordzi bi do, mfa nsũa ngu hɔn tsir mu.

Hwehwɛ ndzɛmba pɔkyee a ɔfa kyerɛwsɛm etsir anaa nyiyimu a wɔrekenkan no ho. Susu mbrɛ adze kor biara si fa nkyerɛkyerɛ a ɔwɔ kyerɛwsɛm mu no ho.

Kenkan nyiyimu kakra, na nkyii dorɔw biribi a ɔfa dza akenkan no ho. Anaa ibotum ahwehwɛ mfonyin bi wɔ Asɛmpa Nsaano Mfonyin Nwoma anaa beebi wɔ Asɛmpa Nwoma Korabea mu. Ibotum so etwa mfonyin a ɔkyerɛ dza hom esũa.

Wɔakenkan asɛm bi ewie no, ma ebusua mu mba no mfa nyɛ ɔyɛkyerɛ. Ekyir no, wɔnkã mbrɛ asɛm no si fa ndzɛmba a wɔrefa mu ho asɛm.

Sɛ ewɔ ebusua mu mba a wɔmmpɛ dɛ wɔdze hɔnho bɛhyɛ ebusua kyerɛwsɛm adzesũa mu a, hwehwɛ akwan binom so a ibotum nye hɔn enya nkabɔmu. Mfatoho, ana ibotum akyɛ onnyiewiei nokwar bi wɔ nkɔmbɔdzi mu ara anaa akyɛ kyerɛwsɛm nkenyan nsɛm bi wɔ kwan a ɔnnyɛ nhyɛdo dodow anaa ɔnnyɛ asɔryɛ kitsii do? Kyerɛwsɛm adzesũa nnyi dɛ ɔyɛ kor wɔ ebusua nyinara mu. Mbofra binom pɛ no yie sɛ enye hɔn sũa kyerɛwsɛm no ankorankor a. Ma mpaabɔ ntum wo na dzi Sunsum no ne nkenyan do.