Wɔdze Bra, Bɛka Mo Do—Dze Ma Fie na Asɔr Ridzi Dwuma

Bra, Bɛka Mo Do yɛ obiara a ɔpɛ dɛ osũa fi kyerɛwsɛm no mu ne dze—dɛ ankorankor, dɛ ebusua, na wɔ Asɔr adzesũa mbea. Mber a abɛsen no sɛ anntaa ennsũa kyerɛwsɛm no daa daa a, mboa nwoma yi botum aboa wo ma ahyɛ ase. Sɛ ewɔ kyerɛwsɛm ho adzesũa ho su pa a, mboa nwoma yi botum aboa wo ma enya sũahu mapã.

Bea a ɔkrɔn a wɔdze sũa asɛmpa no nye fie. W’akyerɛkyerɛfo wɔ asɔr botum ama wo abamba, na ibotum enya nkuranhyɛ efi ward mba binom hɔ. Mbom ama wɔatsena ase sunsum mu no, ɔwo na w’ebusua hia daa daa edziban fi “Nyankopɔn n’asɛmpa mu”(Moroni 6:4; hwɛ Russell M. Nelson, “Opening Remarks,” Liahona, Ɔberɛfɛw 2018, 6–8 so).

Fa mboa nwoma yi dzi dwuma wɔ kwan biara mu a ɔbɛyɛ mboa ama wo. N’apɔwdo n’apɔwdo no da onnyiewiei nokwar binom a ɔwɔ Ahyɛmu Dadaw no mu no edzi. Wosusu adwenkyerɛ na dwumadzi horow so a ɔbɔboa wo ber a isũa kyerɛwsɛm no dɛ ankorankor, enye w’ebusua mu mba, anaa enye anyɛnkofo. Ber a irusũa no, dzi Sunsum no no kwankyerɛ do fa hwehwɛ onnyiewiei nokwar horow a enya ho ntseasee. Hwehwɛ Nyankopɔn ne nsɛm a ɔwɔ ma wo, na dzi nkenyan no a inya no do.

Bra, Bɛka Mo Do—Dze Ma Fie na Asɔr nye nwoma nhyehyɛɛ ma Kwesida adzesũa ahorow wɔ Primary, mbabun na mpanyin Kwesida Skuul, Young Women class ahorow, na Aaron Asɔfodzi quorum nhyiamu horow. Sɛ ekyerɛ adze wɔ gyinabew yinom kor biara mu a, wɔhyɛ wo nkuran dɛ fa n’apɔwdo n’apɔwdo a ɔwɔ mboa nwoma yi mu no yɛ w’ankorankor adzesũa na ber a eyɛ ahoboa dɛ ebɛkyerɛkyerɛ adze no. Fa woara wo sũahu horow a inya no wɔ kyerɛwsɛm mu no hyɛ ase. W’ahoboaboa tsitsir bɛba ber a ehwehwɛ kyerɛwsɛm no mu na ehwehwɛ nkenyan fi Sunsum Krɔnkrɔn no hɔ ma woho. Hwehwɛ onnyiewiei nokwar horow a ɔboa wo ma ebɛyɛ tse dɛ Ɔsor Egya na Jesus Christ yie no. Bra, Bɛka Mo Do botum aboa wo ma ehu nokwar yinom bi na atse kyerɛwsɛm mu nsɛm no ase.

Fa to w’adwen do dɛ asɛmpa adzesũa no, ne mapã no, wɔyɛ no fie na Asɔr ma ho abamba. Anaaso dɛ, w’asodzi tsitsir nye ebɛma nkorɔfo a ekyerɛkyerɛ hɔn adze no abamba wɔ hɔn mbɔdzembɔ mu dɛ wobosũa na wɔdze asɛmpa no abɔ bra wɔ fie. Mma nnhaw wo ho dɛ ibenya biribi soronko a edze bɛma hɔn wɔ adzesũa bea no. Mbom ma hɔn kwan ma wɔnkyɛ hɔn sũahu horow, adwen, na nsɛmbisa wɔ kyerɛwsɛm mu nsɛm a wɔakenkan no fie no ho. To nsa frɛ hɔn ma wɔnkyɛ onnyiewiei nokwar horow no a woehu no. Iyi hia koraa kyɛn erekyerɛ adze fa dza wɔakyerɛw dodow bi ho.

Siantsir tsitsir kor a yehyia mu wɔ Kwesida Skuul adzesũa mbea nye yɛbɛma hɛnho abamba na yɛahyɛ hɛnho nkuran ber a yɛbɔ mbɔdzen dɛ yɛbɛkã Jesus Christ do. Kwan a ɔda famu a edze bɛyɛ iyi nye dɛ ibebisa asɛmbisa dɛ “Ebɛnadze na Sunsum Krɔnkrɔn no akyerɛkyerɛ wo dapɛn yi ber a isũaa kyerɛwsɛm no?’’ Asɛmbisa yi ne nyiano horow no botum dze mpɛnsampɛnsamu ara yie a ɔto gyedzi mu wɔ Jesus Christ na N’asɛmpa mu no aba.

Nkyii ibotum ato nsa afrɛ mpɛnsampɛnsamu a obegyina adzesũa ho adwenkyerɛ a ɔwɔ Bra, Bɛka Mo Do mu do. Mfatoho, adzesũa adwenkyerɛ bi botum esusu dɛ wɔbɔhwehwɛ Isaiah 53 mu, a wɔbɔhwehwɛ nsɛmfua a ɔkã Agyenkwa no somdwuma ho asɛm. Ibotum ebisa adzesũafo ma wɔakyɛ adwen anaa atsenka biara a nsɛmfua yinom dze kenyaan hɔn. Anaa hom botum afa mber kakra dze ahwehwɛ nsɛmfua yinom mu dɛ adzesũafo.

Ber a Aaron Asɔfodzi quorum horow na Young Women class horow hyia mu Kwesida no, hɔn botae bɔson kakra efi Kwesida Skuul adzesũa dze ho. Dza ɔkã wɔroboa hɔnho nkorkor ho ma woesũa Jesus Christ n’asɛmpa no, ekuw yinom so hyia bɔ mu fa apam wɔ mbrɛ wobesi bɛyɛ nkwagye na nkwagye ntowdo ho edwuma (hwɛ General Handbook, 1.2). Wɔyɛ iyi a wɔ class na quorum presidencyfo hɔn kwankyerɛ ase.

Ne siantsir yi ntsi, ɔwɔ dɛ quorum anaa class nhyiamu biara hyɛ ase a quorum anaa class president na n’apamfo mu kor hyɛ mpɛnsapɛnsamu no ase fa hɔn mbɔdzembɔ ho, mfatoho, dɛ wɔdze asɛmpa no bɔbɔ bra, wɔbɔsom nkorɔfo a wohia, wɔkyɛ asɛmpa no, anaa wɔdze hɔnho bɛhyɛ temple na ebusua abakɔsɛm edwuma mu.

Mber yi a wɔdze bɔ mu fa apam ekyir no, nyia ɔkyerɛkyerɛ adze no dzi class anaa quorum no enyim ma wɔbɔ mu sũa asɛmpa no. Mpanyimfo baanodzifo anaa class anaa quorum mba no wobotum ama hɔn dwumadzi ma wɔakyerɛkyerɛ adze. Class anaa quorum president na n’apamfo, wɔnye mpanyimfo baanodzifo no dwen ho no, dze dwuma yinom ma.

Nkorɔfo a wɔama hɔn dwuma dɛ wɔnkyerɛkyerɛ adze no wɔdɛ wɔdze adzesũa ho adwenkyerɛ a ɔwɔ dapɛn dapɛn n’apɔwdo n’apɔwdo mu wɔ Bra, Bɛkã Mo Do mu no yɛ ahoboa. N’apɔwdo n’apɔwdo biara mu no, sɛnkyerɛdze yi kyerɛ dwumadzi bi a oye ankasa ma mbabun. Mbom, esusudze biara a ɔwɔ n’apɔwdo n’apɔwdo biara mu no wobotum dze edzi dwuma dɛ mbabun adzesũa dwumadzi.

Ama eenya quorum anaa class nhyiamu nhwɛdo no, hwɛ abɔekyir D.

W’ahoboa dɛ ebɛkyerɛkyerɛ Primary no hyɛ ase ber a wankasa isũa kyerɛwsɛm no na enye w’ebusua sũa. Ber a eyɛ no, bue w’akoma mu ma sunsum mu nkenyan na nhumu a ofi Sunsum Krɔnkrɔn no hɔ a ɔfa mbofra a wɔwɔ wo Primary adzesũabea no hɔnho. Ma mpaabɔ ntum wo, na Sunsum no botum dze adwenkyerɛ ekenyan wo ma edze aboa hɔn ma woesũa Jesus Christ n’asɛmpa no.

Ber a eyɛ ahoboa dɛ ebɛkyerɛkyerɛ adze no, ibotum enya nkenyan bi akã ho ber a ehwehwɛ nkyerɛkyerɛ ho adwenkyerɛ a ɔwɔ Bra, Bɛka Mo Do—Dze Ma Fie na Asɔr mu no. N’apɔwdo n’apɔwdo biara a ɔwɔ mboa yi mu no wɔ “Adwenkyerɛ horow ma Erekyerɛkyerɛ Mbofra.” Dwendwen adwenkyerɛ yinom ho dɛ nsusui fa pegya wo nkenyan no. Inyim mbofra a wɔwɔ wo Primary adzesũa bea—na ebɛba ebohu hɔn yie mpo ber a enye hɔn nya nkitahodzi wɔ adzesũa bea no. Nyankopɔn so nyim hɔn, na Ɔdze akwan pa a edze bɛkyerɛkyerɛ na ehyira hɔn no bekenyan wo.

Obotum aba no dɛ mbofra a wɔwɔ w’adzesũa bea no edzi kan nye hɔn ebusua ebusua ayɛ dwumadzi no a ɔwɔ Bra, Bɛka Mo Do no mu binom dada. Na ɔno ye. Nsido ye. Susu dɛ ebɔto nsa afrɛ mbofra no ma wɔakyɛ dza wosũae wɔ fie no—mpo so dɛ ebɛyɛ nhyehyɛɛ wɔ akwan a mbofra no dze hɔn ho bɛhyɛ mu sɛ worunnsũa adze wɔ fie mpo a. Mbofra sũa asɛmpa nokwar horow no ara yie ber a nokwar yinom wodua dwumadzi asorɔtow do dze si do kyerɛkyerɛ. Sɛ ihu dɛ adzesũa dwumadzi a wɔdze sũa adze bi rokɔ yie ma mbofra no a, hwɛ dɛ ibesi do ayɛ, nkanka sɛ erekyerɛkyerɛ mbofra nkakramba adze a. Ibotum so asan abobɔ dwumadzi bi do fi adzesũadze dadaw mu.

Abosoom a wɔwɔ Kwesida enum no, Primary akyerɛkyerɛfo no wɔhyɛ hɔn nkuran dɛ wɔnsesa dza wɔahyehyɛ no wɔ Bra, Bɛka Mo Do n’apɔwdo n’apɔwdo ma Kwesida a otsĩa enum no, mfa adzesũa dwumadzi kor anaa no mboree a ɔwɔ “Abɔekyir B: Ma Primary—Irisiesie Mbofra ma Abrabɔ Mber Nyina wɔ Nyankopɔn N’Ahyɛmu Anamɔnkwan no do.”