Nsakyeree Nye Hɛn Botae

Asɛmpa no nsuae na nkyerɛkyerɛ nyina no botae nye dɛ ɔbɛma hɛn nsakyeree no mu adɔ, na ɔaboa hɛn ma yɛabɛyɛ tse dɛ Jesus Christ yie. Ɔnam siantsir yi ntsi, sɛ yerusũa asɛmpa no a, nnyɛ nsɛm fofor bi na yɛrohwehwɛ ara; yɛpɛ dɛ yɛbɛyɛ “abɔdze fofor” (2 Corinthfo 5:17). Iyi kyerɛ dɛ yɛrotwer Ɔsor Egya na Jesus Christ ma Wɔaboa hɛn ma yɛasesa hɛn akoma, mbrɛ yesi hu adze, hɛn ndzeyɛɛ, na hɛn su ankasa.

Mbom asɛmpa adzesũa no a ɔhyɛ hɛn gyedzi dzen na ɔdze nsakyer anwanwadze ba no nyina nnsi prɛko pɛr. Ɔtserɛw fi adzesũa dan mu dze hɛn ankorankor no n’akoma mu na fie mu. Ohia daa daa nwɔwdo, mbɔdzembɔ dze atse asɛmpa no ase na yɛdze abɔ bra. Nsakyeree nokwar mu no hia Sunsum Krɔnkrɔn no ne nhyɛdo.

Sunsum Krɔnkrɔn no gya hɛn kɔ nokwar no ho na Ɔgye dɛm nokwar no ho dase (hwɛ John 16:13). Ɔma hɛn adwen mu yɛ kan, Okenyan hɛn ntseasee, na Ɔdze nyikyerɛ a ofi Nyankopɔn, nokwar nyina farbaa no hɔ, no kã hɛn akoma. Sunsum Krɔnkrɔn no tsew hɛn akoma mu. Okenyan pɛ wɔ hɛn mu dɛ yɛdze nokwar bɔbɔ bra, na Ɔwasa kyerɛ hɛn kwan a yɛbɛfa do ayɛ no. Nokwar ara “Sunsum Krɔnkrɔn no … bɛkyerɛkyerɛ [hɛn] ndzɛmba nyina” (John 14:26).

Ɔnam siantsir yinom ntsi, wɔ hɛn mbɔdzembɔ mu dɛ yɛdze asɛmpa no bɔbɔ bra, yebosũa, na yɛakyerɛkyerɛ no, ɔsɛ dɛ tsitsir ara, yedzi kan hwehwɛ Sunsum no n’anyɛnkoyɛ. Botae yi wɔ dɛ odzi hɛn nsanmuyi horow do na ɔma hɛn adwendwen na ndzeyɛɛ ho kwankyerɛ. Adze biara a ɔma Sunsum ne nhyɛdo no ba na ɔsɛ dɛ yɛhwehwɛ na yɛpow adze biara a ɔpam dɛm nhyɛdo no fi hɔ—osiandɛ yenyim dɛ sɛ yebotum afata dɛ Sunsum Krɔnkrɔn no nye hɛn bɛtsena a, yebotum so afata dɛ yɛbɛtsena Ɔsor Egya na Ne Ba, Jesus Christ hɔn enyim.