Ekkoch ekiek ne emwirinouano Kaeo non Imw me Mwichefen

Ekkewe pukfel ir ewe kapasen Kot, iwe tingorei ren aninis om kopwe weweitir.

Mettoch meinisin ra pwarata usun Kraist (nengeni 2 Nifai 11:4; Moses 6:63), iwe ekieki ne esisina ika makkei uwokisin mi pwarata usun ewe Chon Amanau, anonnonu om tong ngeni I, me aiti ifa usun sipwe tapweno mwirin I. Fan ekkoch kewe ennet usun ewe Chon Amanau me An kapas allim ra affat wenewen, me fan ekkoch ra chok ekis pwa non ew awewe ika tutunap. Eisinuk pwisin, “Met kewe ennet esemuch ra osukuna me non ekkei uwokisin?” Met ekkei ennet ra aitiei usun ewe Chon Amanau?

Tumunoch ngeni om ekiek me memef, ika mwo rese wewe ngeni met ka anneani. Ekkei memef meni ir met Semom non Nang a mochen kopwe kaeo.

Mi chommong aanen om kopwe rekotuni ekkewe memmef ra fis nupwen ka kaeo pukefel. Ren awewe, kopwe kuna pwe ekkoch kapas me porous non ekkewe pukefel ra ourourok; ka tongeni esisiner me rekotuni om ekiek usun eu esinesin non noum kewe pukefel. Ka pwan tongeni annomu ew puken porousen mirit, memmef, me ekiek ka angei.

Om aporousa ekkewe mirit ka angei seni om pwisin kaeo a ew mettoch mi murino ne aiti ekkoch, me a pwan aninis ne apochokuna om weweiti met ka fen anneani. Aporousa met ka fen kaeo ngeni chon om famini me chiechiom (non nenefengen ika won line), me tingorer repwe pwan fori ena.

Ekieki ifa usun ekkewe tutunap me afanafan ka anneanir ra wewe ngeni manauom. Ren awewe, ka tongeni eisinuk, “Met mi fis ngeniei mi nonno ngeni met ua anneani?”

Nupwen ka kaeo ekkewe pukefel, ekkoch kapaseis repwe pichita non om ekiek. Ekkei kapaseis meni repwe wewe ngeni met ka anneani ika ngeni manauom. Ekipwichi ekkei kapaseis me kutta ponuwer nupwen ka sopweno ne kaeo ekkewe pukefel.

Ren om kopwe angei pwan ekkoch mirit usun ekkewe uwokisin ka anneani, aea ekkewe esinesin fan ekkewe peich, ewe Topical Guide, ewe Bible Dictionary, ewe Guide to the Scriptures, me ekkoch aninisin kaeo.

Ka tongeni kuna auchean weweoch usun eu porousen pukefel nupwen ka ekieki masowan, mi pachenong nonnomun kewe ika ewe neni a feito me ie. Ren awewe, om sinei nonnomun me nuku an ekkewe aramas Kot a kapas ngenir a tongeni anisuk ne weweochuti popun An kewe porous.

Anneani met soufosun non fansoun soponon me aposel ra fen aiti kich usun ekkewe nongonong ka kuna me non ekkewe pukefel.

Kaeo pukefel esap chok amwasanga kich nge epwe pwan emweni kich ne siwini napanapen nonomuch. Ausening ngeni met ewe Ngun a amef ngonuk kopwe fori nupwen ka annea, iwe mwirin finata ne fori ekkena pesepes.

Kon mi fen me kon noun semirit ir mi pwa non unusen Feito, Tapweto Mwiri. Nounou kon mi pin ne kori ewe Ngun me ne anonnonueno om nuku me kapasen pwarata usun ennetin kapas allim.

Fini ew kapasen pukefel mi auchea ngonuk, om famini, ika om klas, me oupwe amwochu non ami ekiek ren ami anniwini iteiten ran ika fori ew urumotun chechemeni.

Kutta ekkoch pisek mi wewe ngeni ekkewe sopun me uwokisn minne oua anneani. Ekieki ifa usun eu me eu pisekin kaeo a tongeni wewe ngeni ewe osukun non ekkewe pukefel.

Anneani ekkkoch uwokisin, iwe mwirin chungani och mettoch mi wewe ngeni met ka anneani. Ika ka tongeni kutta echo sasing non ewe Gospel Art Book ika pwan ekis me non Gospel Library. Ka pwan tongeni fichi echo sasing mi pwarano met ka kaeo.

Mwirin ami anneani ew tutunap, tingorei chochon famini ika chon ewe klas repwe pwomweni. Mwirin, kapas won ifa usun ewe tutunap a wewe ngeni ekkewe mettoch ka mefi.

Ika mi wor chon om famini kewe rese mochen fiti an famini kaeo ekkewe pukefel, kutta ekkoch pwan anen ami oupwe chu ngeir. Ren awewe, en mi tongeni aporousa ennet esemuch non ami aporous ika annea ngenir eu uwokisin mi auchea ngonuk non eu napanap ese usun nge ka afanafan ika opuromau? Kaeo ekkewe pukefel ese namot epwe nonno ngeni meinisin famini. Ekkoch semirit menin repwe ponuweniochu ne kaeo ekkewe pukefel ren akkanamon ngeni chon aiti. Kopwe ikiotek me tapweno mwirin amefien ewe Ngun.