Aea Feito, Tapweto Mwiri—Ren Imw me Mwichefen

Feito, Tapweto Mwiri an meinisin ion mi mochen an epwe kaeo seni ekkewe pukefel—ren emon, usun eu famini, me non klasin Mwichefen. Ika kesamo kakaeo ekkewe pukefel iteitan me akkom, ei pekin aninis a tongeni anisuk om kopwe poputa. Ika a fen wor om oreni mi och ne kaeo ekkewe pukefel, ei pekin aninis a tongeni anisuk an epwe wor om pwan ekkoch auchean kakaeo.

Ewe neni mi murino ne kaeo ewe kapas allim ina non ewe imw. Noum kewe sense non fan ra tongeni anisuk, me en ka tongeni angei pesepes seni ekkoch chon ewe wart. Nge ren om kopwe manau non pekin ngun, en me om famini a namot ngeni kemi aninis iteiten ran seni “ewe kapas mi och an Kot” (Moronai 6:4; nengeni pwan Russell M. Nelson, “Opening Remarks,” Liahona, Nov. 2018, 6–8).

Aea ei pekin aninis non och napanap mi aninisoch ngonuk. Ewe etettenin ei mak ra affata ekkoch ennet esemuch ra pwa non ewe Testamen Noom. Ra pwan pesei ekkoch ekiek me mwokutukut repwe anisi om anamon ne kaeo kewe pukefel, fiti om famini, ika fiti chiechiom. Nupwen ka kaeo, tapweno mwirin emwenin ewe Ngun om kopwe kutta ennet esemuch ekkewe mi auchea ngonuk. Kutta an Kot porous fan itom, me tapweno mwirin ekkewe ourour ka angei.

Feito, Tapweto Mwiri—Ren Imw me Mwichefen ina ewe minen kaeo ren klasin Raninfel non Primary, Sunday School ren serafo me mi mwukono, klasin Young Women, me mwichen Aaronik Pristut. Ika ka osukun non eu ekkei neni, ka pesepes ne aea ewe etetten mi makketiw non ei pekin aninis ren pwisin om kaeo me nupwen ka monneta ne osukun. Poputa ren om pwisin awora om fansoun non ekkewe pukefel. Om akkauchean amonneta epwe fis nupwen ka kutta masowen ekkewe pukefel me kutta ourouren ewe Ngun mi Fel. Kutta ennet esemuch mi anisuk ne winiti usun Samach non Nang me Jises Kraist. Feito, Tapweto Mwiri a tongeni anisuk ne kutta ekkoch ekkei ennet me weweiti masowan ekkewe pukefel.

Chechemeni pwe kaeo ewe kapas allim, non murinon, non imw me Mwichefen mi anisi. Non ekkoch kapas, wesewesen wisom kopwe anisi ekkewe aramas ka aitir non ar achocho ne kaeo me manaueni ewe kapas allim non imw. Kosap ekieki usun an epwe ew chok tapin sokkun masowan om kopwe awora fan iter non klas. Nge, kopwe ngenir tufich ne aporousa met mi fis ngenir, ar ekiek, me kapaseis usun porousen pukefel ra fen anneani non imw. Tingorer repwe aporousa ekkewe ennet esemuch ra fen kuna. Ei mi kon auchea nap seni om kopwe ounusa och ukukun ewe nesen.

Eu popunapen sia chufengen non klasin Sunday School pwe sipwe anisi me pesei emon me emon nupwen sia achocho ne tapweno mwirin Jises Kraist. Eu mecheresin ach sipwe fori ei sipwe eis eu kapaseis usun “Met ewe Ngun mi Fel a aituk non ei wiik nupwen ka kaeo ekkewe pukefel?” Ponuwen ei kapaseis a tongeni emwen ngeni auchean aporous fengen minne mi amari nuku non Jises Kraist me An kapas allim.

Mwirin ka tongeni etiwa eu aporous fengen anongonong won ewe kokkoten kaeo non Feito, Tapweto Mwiri. Ren awewe, eu kokkoten kaeo epwe tongeni ota ne anneani Isaiah 53, ne kutta ekkoch kapas mi awewei an ewe Chon Amanau misin. ka tongeni eisini chon ewe klas ne aporousa och ekiek ika memmef minne ekkei kapas ra ouroura ngenir. Ika ka tongeni awora ekkoch fansoun ne kutta ekkei kapas usun eu klas.

Nupwen mwichen Aaronik Pristut me klasin Young Women ra mwich non Raninfel, ar popun mi ekis sokkono seni eu klasin Sunday School. Ren kapachetan ne aninis fengen ne kaeo ewe kapas allimen Jises Kraist, ekkei mwicheich ra pwan mwich ne ourour fengen usun kawesanon ewe angangen amanau me manau tekia (nengeni Pukenapen Emwen, 1.2). Ra fori ei fiti ewe emwenin klas me mwichen presetensi.

Ren ei popun, eu me eu mwichen mwicheich ika klas repwe poputa ren emon chon ewe mwicheich ika presetensin klas epwe emweni eu aporous usun ekkewe achocho, ren awewe, ne manaueni ewe kapas allim, iamwiri aramas mi osupwang, afanafana ewe kapas allim, ika fiti angangen tempel mei uruon famini.

Mwirin ei fansoun ren ourour fengen, emon chok osukun a emweni ewe klas ika mwicheich ne kaeo fengen ewe kapas allim. Souemwen mi mwokono ika chon ewe klas ika mwicheich ra tongeni ewis ngeni ar repwe osukun. Ewe presetensin klas ika mwicheich, ourour fengen me souemwen mi mwokono, ra fori ekkei wis.

Aramas mi ewis ar repwe osukun repwe monneta ren ar aea ekkewe kokkotun kaeo non ewe etettenin ei wiik ren Feito, Tapweto Mwiri. Non eu me eu ekkei etetten mi makketiw, ei esisin a pwarata eu urumot mi wesewesen och ngeni serafo. Nge inamo, och me nein ekkewe mi kawor non ewe etetten en mi tongeni aea usun eu mwokutukutun kaeo fan iten serafo.

Ren eu mecheresin tetenin masowen mwich ren eu mwicheich me mwichen klas, nengeni appendix D.

Om amonnata om kopwe osukuna Primary a poputa nupwen ka kaeo ekkewe pukefel anamon me ren om famini. Nupwen ka fori, kopwe tipemecheres ngeni amemefin ewe ngun me weweoch seni ewe Ngun mi Fel usun ekkewe semirit non om we Primary klas. Kopwe ikiotek, me ewe Ngun a tongeni ourourok ren ekiek ne anisir repwe kaeo ewe kapas allimen Jises Kraist.

Nupwen ka monneta ne osukun, kopwe tongeni angei pwan ekkoch ourour ren om katon ekkewe kokkoten osukun non Feito, Tapweto Mwiri—Ren Imw me Mwichefen. Eu me eu etetten non ei pekin aninis a wor eu kinikinin itenapan “Ekkoch ekiek ren Osukuna Semirit.” Ekieki usun ekkei ekiek pwe ir ekkoch ekiek repwe poputani om ourour. En mi sinei ekkewe semirit non om we klasin Primary—me kopwe sineiochureno nupwen ka nonnom rer non klas. Kot mi pwan sisiner, me I epwe pesek ren ewe murinon anen om kopwe aitir me efeiochur.

Mi tufich pwe semirit non om we klas ra fen fori ekkoch ekkei mwokutukut non Feito, Tapweto Mwiri ren ar kewe famini. Mi chok Och. Enniwin mi och. Ekieki om kopwe etiwa ekkewe semirit ar repwe aporousa fengeni met ra kaeo non imw—nge kopwe pwan ota ekkoch anen an ekkewe semirit repwe pachenong inamo ika rese kaeo non imw. Semirit ra kaeo kewe ennetin kapas allim non murinon nupwen ekkei ennet ra enniwin ne kait non sokkpaten mwokutukut. Ika ka kuna pwe eu mwokutukutun kaeo mi och ngeni ekkewe semirit, ekieki om kopwe enniwini, akkaewin ika ka osukuna kukkun semirit. Ka pwan tongeni mina sefani eu urumot seni eu nesen akkom.

Non ekkewe maram mi wor nimu Raninfel, sensen Primary ra pesepes ar repwe siwini ewe kokkotun Feito, Tapweto Mwiri mi makkeitw non ewe enimuen Raninfel ngei eu ika ekkoch ekkewe mwokutukutun kaeo non “Appendix B: For Primary—Preparing Children for a Lifetime on God’s Covenant Path.”