Siwin Ina Ach Kokkot Sipwe Ekita

Ewe afotan kaeon unusen kapas allim me osukunan pwe epwe anonnonu ach siwin me anisi kich ne winiti usun Jises Kraist. Ren ei popun, nupwen sia kaeo ewe kapas allim, sise chok kukutta minafon porous; sia mochen winiti “emon mi sofo” (2 Corinth 5:17). Ei wewen sipwe anongonong won Samach non Nang me Jises Kraist epwe anisi kich ne siwini netipach, ach ekiek, ach foffor, me wesewesen napanapach.

Nge ewe sokkun kaeon kapas allim mi apochokuna ach nuku me emweni kich ngeni ewe manamanen siwin esap chok fis fan eu. Mi soposopono pekinon ewe rumwen kaeo ngeni non netipan emon me non imw. Ei a namot epwe fifis, achocho iteiten ran ne weweiti me manaueni ewe kapas allim. Ennetin siwin mi namot epwe wor ewe amemmefin ewe Ngun mi Fel.

Ewe Ngun mi Fel a emweni kich ngeni ewe enneti me pwarata usun ewe ennet (nengeni John 16:13). I a asarama ach ekiek, amwitiri ach weweiti, me atapa netipach ren pwarata seni Kot, ewe popun unusen ennet. Ewe Ngun mi Fel a animenimochu netipach. I a pesei non kich eu mochen sipwe manaueni ren ennet, me A mongungunong non kich ekkoch anen ach sipwe fori ei. Ennetin “ewe Ngun mi Fel … epwe aiti [kich] mettoch meinisin” (John 14: 26).

Ren ekkoch popun, non ach achocho ne manau, kaeo, me afanafana ewe kapas allim, sipwe akkom me akkaewin kutta chiechien ewe Ngun. Ei kokkot sipwe ekita epwe nemenano ach finata me emweni ach ekiek me foffor. Sipwe kutta mwirin met chok mi etiwa ewe pochokunen ewe Ngun me sisap etiwa met chok me asueno ena pochokun—pun kich mi sinei pwe ika sipwe tongeni nimenimoch ngeni me mwen mesen ewe Ngun mi Fel, sia pwan tongeni nimenimoch ne nonnom fan mesen Samach non Nang me Noun we, Jises Kraist.