Rogon ningan Fanay e Moey, Ngam Lakeg—Fan ko Tabinaew nge Galasia

Moey, Ngam Lakeg efan ngak e gidii’ ni gubin ni ba’adaag ninge fil fapi chep nib thothup—ni go’ir rok, fa yadu tabinaew, nge fapi klass ko Galasia. Fa’anra dawriyag ni ngam fil fapi chep nib thothup, bineye ayuw e rayog ni nge ayuwegnem ngam tabab ngay. Fa’anra gurbe’ nigama fil e chep nib thothup ni gubin ngiyal’, ma bineye ayuw erayog ninge ayuwegnem nge gelnag etin ni gabe fil boch.

Gin nth’abi fel’ ningan fil fare gospel riy e lane tabinaew. Sensey rom erayog ni ngar pi’ed e ayuw ngom, nge boch e member ko ward nrayog ni ngar pi’ed e athamgil ngom. Machane fa’anra ngamu mon’og kotin nib thothup ban’en, ma fare tabinaew rom erib t’uf ni ngar duruwi’iyrad ko “fare thin rok Got nib mangil” (Moroni 6:4; Ngkum guy ko mulwol rok Russell M. Nelson, “Opening Remarks,” Liahona, Nov. 2018, 6–8).

Mu fanay e biney e ayuw ko rogon nibt’uf ngom. Fapi highlight nibay riy e bogi ban’en nib riyul’ mab manechubog nikan pir’eg ulan fare bin Kakrom e M’ag. Ma kabay boch etin nikan pi’ riy nge boche activites nrayog ni nge ayuwegem ngam fil ni go’gur, filed e tabinaew rom utabaang, fa filed fapi tafagar rom. Napan e baymu fil e pin’ey, murin’ etin nibe powi’iy fare Kan nii Thothup ngom ni bogi ban’en nib riyul’ mab manechubog nrayib anggin ngom. Musap nag e pin’en nibe mulwol nag Got ngom, mag rin’ niwod rogon ni yibe thogthog nag ngom.

Moey, Ngam Lakeg—Fan ko Tabinaew nge Galasia e bogi ban’en ni yima fil ulan e klass ko Primary, Sunday School ko pil’aal nge fal’yangren, fapi klass ko Young Women, nge lane mo’olung ko Aaronic Priesthood quorum. Fa’anra gurbe’ ni gama sensey nagreb fapi klass, bat’uf ningam fanay etin nibay ko fare ayuw nikan outline nag ninge ayuwegnem ko tin ngam fil nge tin ningam machib nag. Mu tabab kotin ni bayi buch rom ko napon ni gabe fil fapi chep nib thothup. Gelengin fane fel’rogon erayib ko napan ni gabe gay mornga’agen fapi chep nib thothup ma gabe gay etin nibe thogthognag e Kan ni Thothup ngom. Musapnag etin ba’aray eriyul’ nib manechubog nra ayuwegnem ngam bod e Chitamangiy nu Tharmiy nge Yesus Kristus. Moey, Ngam Lakeg erayog ninge ayuwegnem ngam guy e pin’ey nib riyul’ mab manechubog mara ayuwegnem ngam nangfan en’en nibe yoeg fapi chep nib thothup.

Mutayu wun’um nifile gospel, ya fa’anra ngan rin’ ni th’abi mangil rogon, e ngan rin’ u tabinaew ma Galasia ebayi pi’ e ayuw riy. Woed ni, muruwel rom e ngamu ayuweg fapi gidii’ ni gabe sensey nag ni ngayog ningar athamgil gad kotin ni yadbe fil miyad fol ko gospel ulan e tabinaew rorad. Dabi langan’um ko tin ni ya’an ban’an nibthil ni ngamu dag ya’an ngorad u klass. Ya, ngamu pi’ ngorad ba klass ni ngayog nra weliyed e tin nike buch rorad, pi tafney rorad, nge pi duwer nibeyib ngorad ko rogon e pin’en nikar filed ko fapi chep nib thothup nga lane tabinaew rorad. Mu piningrad ni ngar weliyed epin’en nikar pir’eged nib riyul’ mab manechubog kotin nikar be’eged. Ireray en’en nth’abi ga’fan ko tin ba’aray ban’en ni ngan weliy nikan yoloey.

Rebi fan ni gadadma gak ko fapi klass ko Sunday School e bochane ngad pi’ed e ayuw nogadad magdad gay rogon ningad laked wo’en Yesus Kristus. Rebe kanawo’en irin’ e biney e ngan fith e duwer niwod e “Mange kefil fare Kan ni Thothup ngom ko napon ni gabe fil fapi chep nib thothup ko biney ewik? Fulweg tabane biney e duwer erayog ninge powi’iy etin ni yibe weliy mornga’agen ninge gelnag e mich ngak Yesus Kristus.

Ngemu’ mafin aram erayog ni ngamu pining e gidii’ ningar weliyed e tin nikan pi’ ulan fare Moey, Ngam Lakeg. Woed ni, rebe ban’en nrayog ni ngan fil e beyib ko Isaiah 53, lni yibe sapnag fapi thin nibe weliy mornga’agen e muruwel rok fare Tathapeg. Ma krayog ni ngamu fith ngak fapi gidii’ nibay ulan fare klass ningar weliyed e tafney rorad fa thamtham rorad kon’en nibe yupfan epi thinney nifarad. Fa krayog ni ngamu sapg niged e tin ba’araye thin ulan e klass.

Napan nrayibi mada’ fapi klass ko ulung ko Aaronic Priesthood nge fapi Young Women ko fare Madnom, ma fan e biney ebathil rogon ko klass ko Sunday School. Nikab mu’un e fil fare gospel ku Yesus Kristus ngay utabaang, gali ulung ney e yowra mada’ ni ngayog nra machibgad utabaang ko mornga’agen e muruwel ko wo’en e thap nge n’uf nigey ngalang ko falfalaen’ (muguy ko General Handbook, 1.2). Yima rin’ e biney nibay rebe ulung ko presidencies riy nibe gagiyegnag rogon.

Bochan e biney, rareb fare ulung fa reb fare mo’olung ko klass ma susun nibayreb e ulung fare presidency riy ninge powi’iy epin’en ningan weliy mornga’agen ni wod mronga’agen e athamgil, ko, fol ko gospel, pigpig ngak e gidii’ nib t’uf e ayuw rok, ser nag e gospel, fa un ko muruwel nifan e tempel nge muruwel nifan e chepin e tabinaew.

Ma tomuren nikan machib utabaang, mareb fare sensey ko fare klass fa reb reb fare quorum e bayi tababnag fare klass ningan fil fare gospel utabaang. Tiyugang’ nib il’aal fa reb e member ko fare klass fa rebe quorum e rayog ni ngan duugliy ninge sensey nag fare klass. Fare klass fa fare quarum presidencies, niyadbe gopuruy’ ngak fapi tiyugang’, era duugliy rogon e pi muruwel ney ko klass.

Gidii’ nikan duugliy ninge sensey nag e klass e susun ni ngar fanayed etin nikan pi’ ulan e biney e outline nifane biney ewik ko fare Moey, Ngam Lakeg. Rarebe outline, ma bay ya’an e biney e ikon riy nibe yipfan nibay e activity riy nifan ngak e fal’yangren. Machane, demuturug ko pin’ey nikan pi’ erayog ni ngan fanay ko fan etin nibe fil e fal’yangren.

Woed e agenda nifan fapi mu’ulung ko quorum nge fapi klass, e rayo gni ngam guy ko appendix D.

Rogom ningam fal’ag rogom ko machibnag e Primary e ratabab rom kane abinaew rom ni gamed be fil fapi chep nib thothup. Napan e baymu rin’ ebiney, ma thingarmu bing e tafiney rom ko tin ni bayi thogthog nag e Kan ni Thothup ngom ko mornga’agen fapi bitir nibay ulane klass rom ko Primary. Meybil nag, ma fare Thothup era thogthog nagngom rogon ningam ayuwegrad ngar filed fare gospel ku Yesus Kristus.

Napan ne gabe fal’ag rogom ni ngam senseynag, ma rayog ningan thogthog nag boch ban’en nibay ulan fare Moey, Ngam Lakeg—Fan ko Tabinaew nge Galasia. Rereb fapi outline ko biney e ayuw mabay bang riy nibe yoeg fithingan “Boech Rogon ningan Machibnag e Bitir.” Mu tafneynag epin’en ni gowod bogi ban’en ninge pi’ e ayuw ngom ko thapeg e thogthog ko rogon ningam rin’. I Gure gamanang mornga’agen fapi bitir nibay ulan e klass ko Primary rom—ma gara nagrad nibgel ni fa’an gara un ngorad ko pin’en niyadbe fil rogon. I Got e manangrad, mara thogthog nag ngom kanawo’en nirib mangil ningam sensey nagrad mag tawa’ath nagrad.

Bay nisana boch fapi bitir ulan e klass rom e kemu’ irin’ boeche pi activity ko tabinaew rorad nibay ulan e Moey, Ngam Lakeg . Machane ba OK e biney. Sulu dakean ni bo’or yay erib mangil. Rayog ni ngamu fith ngak fapi bitir ko mange kar filed utabinaew rorad—machane susun ni gubin ngiyal’ ma ngamu fal’ag rogon kanawo’en ningeyog ni un e bitir ko tin niyibe fil demturug rogon ko yadbe fil epin’ey utabinaew fa dangay. Moem ko bitir ninge fil mornga’agen e gospel nib riyul’ nibay e activity riy nib thilthil ma yibe sulu dakean ni bo’or yay. Fa’anra bayreb e activity nikam guy ni ba’adag fapi bitir mabe ayuwegrad, marayog ni ngam sul bayayu dakean, fa’anra kab bitir fapi bitir marib mangil e biney. Ma krayog ni ngamu sulu dakean fapi activity nikan mu’ irin’ ko tinni tomure lesson.

Ko pul nibay laale Madnom riy, fapi sensey e ngar thilyeged fare skedual kotin nikan outline nag ulan fare Moey, Ngam Lakeg ko activities nifan fare laale Madnom nibay ko“Appendix B: Fan ko Primary—Fal’ag Rogon e Bitir ko fare Wo’en e M’ag rok Got nib Manechubog”