Thiliyeg Rogoy E ngad Nameged

Fan niybe fil e gospel nge machib e nge mon’ognag dad me aywegdad ngad boeded boech Yesus Kristus. Ya ireray fan, ni nap’on nigdad rafil e gospel, gathi kemus nigdad be sap nag boech ban’en nib be’ech; gadad ba’adag ningad manged “ban’en nib be’ech” (2 Korinths 5:17). Be yipfan ningad paged ngak e Chitamngiy nu Tharmiy nge Yesus Kristus ngar aywegew dad ngad thilyeged gum’ircha’dad, rogon nigdad be guy, ngonglen dad, nge gafarig rodad.

Machene fare rogon i fil e gospel nima gel nag e mich rodad nge pow’iy i yan ko fare ma’ang’ang ko thilyegey e darma buch nit’ab biyay. Kuma un koyan nga wuru’ e classroom ngalan gurm’ircha’ey nge tabinaew. Rib t’uf, nigubin e rran mangan gay rogon ngan nangfan min fol ko gospel. Thilyegey nib Riyul’ e rib t’uf fare Kan Thothup riy.

Fare Kan Thothup e be pow’iy dad kotin riyul’ me yoeg nirib riyul’ (muguy ko John 16:13). Be tomilangngeg lanyan’ dad, papoy nag e manangfan rodad, me math nga gum’ircha’ dad ko thin nibe yib rok Got, nitin riyul’ e mayib rok. Fare Kan Thothup e ma be’ech nag gum’ircha’ dad. Be yoeg ngodad ningad pired u fithik e tin riyul’, mabe kathkath nag rogon ngodad ningad rinn’ed. Ribriyul’, “Fare Kan Thothup … era fil [ngodad] gubin ban’en” (John 14:26).

Ya iraray fan, ni gay rogon ningan par, min fil ban’en, min fil e gospel ngak be’, somm’on e thingarda feked e Kan Thothup nge un ngodad. Re nameg ney e thangri pow’iy e pin’en nigdad be mel’eg nge gagiyog nag e lem nge ngongol rodad. Thingarda feked e pin’en nima pining e Kan Thothup min pag e pin’en nima palog nag—ya gadad manang ni fa’an rayog ningad be’ech gad ngad pired u po’owchen e Kan Thothup, ma rayog ningad be’ech gad ngad pired nga po’owchen e Chitmangdad nu Tharmiy nge Yesus Kristus, Ni Fak.