Kōjerbal Itok, Ļoor Eō—N̄an M̧weeo im Kabun̄ in

Itok, Ļoor Eō ej n̄an jabdewōt eo ekōņaan ekkatak jān jeje ko rekwojarjar—ippāer make, ak āinwōt juon baam̧le, im ilo kūlaaj ko ilo Kabun̄ in. Eļan̄n̄e kwojjan̄in kar emakijkij ekkatak jeje ko rekwojarjar m̧okta, bok in katak in emaron̄ jipan̄ eok jinoe. Eļan̄n̄e em̧ōj an wōr kadede am̧ juon iminene em̧m̧an n̄an ekkatak jeje ko rekwojarjar, bok in emaron̄ jipan̄ eok kōm̧m̧an bwe en ļapļo̧k am̧ meļeļe en̄jake ko am̧.

Jikin eo em̧m̧an n̄an katak gospel in ej ilo m̧weeo. Rūkaki ro am̧ ilo m̧ōnjar eo remaron̄ jipan̄ eok, im kwomaron̄ bōk kōketak jān ward membōr ro jet. Ak n̄an mour ilo jetōb, kwe im baam̧le eo am̧ aikuj naajdik kajjojo raan jān, “em̧m̧an eo an naan in Anij” (Moronai 6:4; bar lale Russell M. Nelson, “Naan in Kōppeļļo̧k ko,” Liaona, Nob. 2018, 6–8).

Kōjerbal bok in ekkatak in ilo jabdewōt wāween me ejipan̄ eok. Unin tōl in ej kōmejajaik jet iaan m̧ool ko an indeeo rej waļo̧k ilo Kallim̧ur M̧okta. Rej barāinwōt kwaļok ļōmņak ko im m̧akūtkūt ko n̄an jipan̄ eok ekkatak jeje ko rekwojarjar ippāer make, ippān ro uwaan baam̧le eo, ak ippān ro m̧ōttam̧. Ilo am̧ ekkatak, ļoor im̧we eo an Jetōb n̄an lo m̧ool ko indeeo me ewōr tokjeer n̄an eok. Pukot ennaan ko an Anij n̄an eok, im ļoor im̧we ko kwoj būki.

Itok, Ļoor Eō—N̄an M̧weeo im Kabun̄ in ej juon elmakot n̄an kūlaaj in Jabōt ko ilo Būraimere, Jabōt Jikuuļ ko an jodikdik ro im rūtto ro, kūlaaj ko an Jiron̄ ro, im kweilo̧k ko an doulul eo an Priesthood eo an Aron. N̄e kwoj katakin ilo jabdewōt jikin kein, em̧ōj kapilōk eok n̄an kōjerbal unin tōl ko ilo kein jipan̄ in n̄an ekkatak ko am̧ make im ilo am̧ keppopo n̄an katakin. Ijjino ilo am bōk en̄jake ko am̧ make ilo jeje ko rekwojarjar. Kōppopo eo eaorōktata konej kōm̧m̧ane enaaj waļo̧k ilo am̧ riiti jeje ko rekwojarjar im pukot im̧we eo an Jetōb Kwojarjar. Kappukot m̧ool ko an indeeo me remaron̄ jipan̄ eok erom̧ eļapļo̧k āinwōt Jemedwōj Ilan̄ im Jisōs Kraist. Itok, Ļoor Eō emaron̄ jipan̄ eok kalikkar jet iaan m̧ool kein n̄an meļeļe kobban jeje ko rekwojarjar.

Likūt wōt ilo ļōmņak bwe ekkatak gospel in, ilo ijo em̧m̧antata, ej pād ioļapļap in m̧weeo im Kabun̄ in ej rie. Ilo naan ko jet, lukkuun eddo eo am̧ ej n̄an jipan̄ armej ro kwoj katakin kōn kijejeto ko aer n̄an katak im mour kake gospel in ilo m̧weeo. Jab inepata kōn bōk ippam̧ juon katak eoktak n̄an jeere ippāer ilo kūlaaj eo. Ijello̧kin, leļo̧k n̄an er iien ko rem̧m̧an n̄an kwaļo̧k en̄jake eo aer, ļōmņak ko, im kajjitōk ko kōn eoon ko an jeje ko rekwojarjar raar riit kaki ilo m̧weo. Kajjitōk ippāer n̄an kwaļo̧k m̧ool ko indeeo rej loi. En̄in men eo eļap an aorōk jen baj lali katak ko.

Juon un eļap jej kuk ippān doon ilo Jabōt Jikuuļ kūlaaj ko ej n̄an jipan̄ im kōketak doon ilo ad kajjieon̄ in ļoor Jisōs Kraist. Juon wāween epidodo n̄an kōm̧m̧ane menin ej n̄an kajjitōk kajjitōk ko āinwōt “Ta eo Jetōb Kwojarjar eaar katakin eok wiik in ilo am̧ kar ekkatak jeje ko rekwojarjar?” Uwaak ko n̄an kajjitōk in emaron̄ tōlļo̧k n̄an kōnono ko ewōr tokjeer me rej kalōk tōmak ilo Jisōs Kraist im gospel in An.

Innām komi maron̄ kōnono kake pedped ioon elmotkwot in ekkatak ko ilo Itok, Ļoor Eō. N̄an waanjon̄ak, juon ļōm̧ņak in ekkatak emaron̄ kajjitōk n̄an etale Aiseia 53, kappok naan ko me rej kōmeļeļeik mijen eo an Rilo̧mo̧o̧r. Komaron̄ kajjitōk ippān ro uwaan kūlaaj eo n̄an kwaļo̧k bwebwenato ko ak en̄jake ko naan kein raar un̄ūr er. Ak kwomaron̄ joļo̧k jet iien n̄an pukōt eoon kein āinwōt juon kūlaaj.

N̄e Doulul ko an Priethood eo an Aron im kūlaaj ko an Doulul eo an Jiron̄ ro rej ippān doon ilo Jabōt, kōttōbar eo aer eoktak jidik jān Jabōt Jikuuļ kūlaaj eo. N̄an kakkobaba n̄an jipan̄ doon katak kōn gospel eo an Jisōs Kraist, kurup kein remaron̄ bar ippān doon n̄an kapilōk doon n̄an kadedeļo̧k jerbal in lo̧mo̧o̧reo im mour ilo aiboojoj eo eutiejtata (lale Bok in Bōk Meļeļe Eļap, 1.2). Rej kōm̧m̧ane menin ium̧win tōl eo an kūlaaj eo im doulul eo būreejtōnji ro.

Kōn un in, kajjojo kweilo̧k an doulul ak kūlaaj ko raikuj jino jen ippān juon membōr in būreejtōnji eo an doulul ak kūlaaj ko ej tōl ekōnono eo kōn kijejeto ko n̄an, n̄an waanjon̄ak, mour kake gospel in, jerbal in karejar n̄an armej ro rej pād ilo aikuj, kwaļo̧k gospel in, ak bōk kuņaad ilo tampeļ im jerbal in menmenbwij an baam̧le.

Ālkin iien kapilōk in ippān doon, juon rūkaki ej tōl kūlaaj eo ak doulul eo n̄an katak gospel in ippān doon. Ritōl eo erūtto ak membōr ro ilo kūlaaj ak doulul eo maron̄ in jitōn̄e n̄an katakin. Būreejtōnji eo an kūlaaj ak doulul, kōnono ippān ritōl eo erūtto, kōm̧m̧ani ijjitōn̄ ko.

Armej ro kar jitōn̄ er n̄an katakin raikuj kōppopo n̄an kōjerbal elmokwot in ekkatak ko ilo laajrak eo an wiik in ilo Itok, Ļoor Eō. Ilo kajjojo laajrak, pija in ej kwaļo̧k juon m̧akūtkūt me elukkuun jejjet n̄an jodikdik ro. Ijoke, jabdewōt elmokwot ko ilo laajrak in eaikuj jerbal āinwōt juon ekkatak n̄an jodikdik ro.

Kōn juon jon̄ak in laajrak in kweilo̧k eo an doulul im kūlaaj ko, lale appendix D.

Kōppopo eo am̧ n̄an katakin Būraimere ej ijjino ilo am̧ ekkatak jeje ko rekwojarjar ippam make im ippān baam̧le eo am̧. Ilo am̧ kōm̧m̧an āindein, bōk im̧we ko an jetōb im en̄jake ko jān Jetōb Kwojarjar kōn ajri ro ilo kūlaaj in Būraimere eo am̧. Jar wōt, bwe Jetōb en maron̄ lin̄ūr eok kōn ļōmņak ko n̄an jipan̄ er katak kōn gospel eo an Jisōs Kraist.

Ilo am̧ kōppopo n̄an katakin, kwomaron̄ in bōk im̧we ko jet jān am̧ etali laajrak in katak ko ilo Itok, Ļoor Eō—N̄an M̧weeo im Kabun̄ in. Kajjojo unin tōl kein ilo kein jipan̄ in ewōr aer jekjōn etan “Ļōm̧ņak ko n̄an Katakin Ajri ro.” Ļōmņaki ļōmņak kein āinwōt laajrak n̄an jipan̄ eok en̄jake im̧we. Kwojeļā kajjien ajri ro ilo kūlaaj in Būraimere eo am̧—im enaaj em̧m̧anļo̧k am̧ jeļā kajjier ilo am̧ iaio̧ ippāer ilo kūlaaj. Anij ebar jeļā kajjier, im Enaaj un̄ūr eok ilo wāween ko rem̧m̧antata ilo am̧ katakin im kōjeraam̧m̧an er.

Emaron̄ bwe ajri ro ilo kūlaaj eo am̧ em̧ōj aer kar kōm̧m̧ane jet iaan m̧akūtkūt ko ilo Itok, Ļoor Eō ippān baam̧le ko aer. Ej Em̧m̧an Wōt. Āliji em̧m̧an. Ļōmņak in karuwaineneik ajri ro n̄an kwaļo̧k n̄an doon ta eo raar ekkatak ilo m̧weeo—men̄e kwoj aikuj peek wāween ko n̄an an ajri ro bōk kuņaer men̄e raar jab katak ilo m̧weeo. Em̧m̧anļo̧k an ajri ro ekkatak n̄e m̧ool kein rej āliji ilo elōn̄ kain wāween m̧akūtkūt ko. Eļan̄n̄e kwoj loe ke em̧m̧an m̧akūtkūt in ekkatak eo n̄an ajri ro, ļōmņak in bar āliji, eļaptata n̄e kwoj katakin ajri ro reddikļo̧k. Kwomaron̄ bar etale m̧akūtkūt eo an katak eo ļo̧k.

Ilo allōn̄ ko elōn̄ ļalem Jabōt ie, rej rōjan̄ rūkaki ro an Būraimere n̄an jeneji laajrak in jikejuuļ eo an Itok, Ļoor Eō ilo laajrak eo an Jabōt ļalem ippān juon ak elōn̄ ikkure in ekkatak ko ilo “Appendix B: N̄an Būraimere—Kōpooj Ajri ro n̄an Mour Ejjeļo̧k Jemļo̧kin ilo Iaļen Bujen eo an Anij.