Oktak Ej Ad Kōttōpar

Jibadbad eo an aolep ekkatak im katakin ko an gospel in ej n̄an kōkajoorļo̧k oktak eo ad im jipan̄ kōj erom āinwōt Jisōs Kraist. Kōn un in, n̄e jej ekkatak gospel eo, jejjab kappukot wōt meļeļe ko rekāāl, jej kōņaan erom̧ juon “men in kōm̧anm̧an ekāāl” (2 Korint 5:17). Meļeļein menin ej pedped ioon Jemedwōj Ilan̄ im Jisōs Kraist n̄an jipan̄ kōj ukōt būruwōd, ad kalimjōkļo̧k, jerbal ko ad, im lukkuun in piktok ko ad.

Bōtaab kein ekkatak gospel eo im ej kōkajoorļo̧k tōmak eo ad im tōlļo̧k n̄an menin bwilōn̄ kōn oktak tok rejjab bōk jikier ilo juon wōt iien. Ej errerakļo̧k ilo kūlaaj ruum̧ eo n̄an būruwōn kajjojo armej im m̧weeo. Ebōk kijejeto, n̄an meļeļe im mour kake gospel in. Oktak eo em̧ool ej aikuji kareel eo an Jetōb Kwojarjar.

Jetōb Kwojarjar ej tōl kōj n̄an m̧ool eo im ej kwaļo̧k kam̧ool kōn m̧ool in (lale Jon 16:13). Ej kōmeramļo̧k kōļmenļo̧kjeņ ko ad, kōļapļo̧k meļeļe ko ad, im un̄ūr būruwōd kōn revelesōn jān Anij, ej unjen m̧ool otemjej. Jetōb Kwojarjar ej karreoik būruwōd. Ej im̧we kōj kōn juon ikdeelel n̄an mour kōn m̧ool eo, im Ej unoojdikdik n̄an kōj kōn wāween ko n̄an kōm̧m̧ane men in. Ilo m̧ool, “Jetōb Kwōjarjar eo … enaaj katakin [kōj] men otemjej” (Jon 14:26).

Kōn un kein, ilo kijejeto ko ad n̄an mour, ekkatak, im katakin gospel eo, jej aikuj m̧oktata kappukot jemjerā eo an Jetōb. Kōttōbar in ej aikuj tōl kāālet ko ad im tōl ļōmņak ko im jerbal ko ad. Jej aikuj kappukot jabdewōt men eo ej boktok im̧we an Jetōb im joļo̧k jabdewōt men ko me rej kajekdo̧o̧n im̧we in—bwe jejeļā bwe eļan̄n̄e jemaron̄ in erreo n̄an pād im̧aan mejān Jetōb Kwojarjar eo, jemaron̄ barāinwōt erreo n̄an mour im̧aan mejān Jemedwōj Ilan̄ im eo Nejin, Jisōs Kraist.