Ndikama Edi, Etiene Mi—Eke Ufɔkiduŋ ye Ufɔk Abasi

Edi, Etiene Mi edi ɔnɔ owo ekededi emi oyomde ndibɔ ukpep nto ŋwed Abasi—ke owo-ke owo, nte ufɔkemana, ye ke ubet ukpep-ŋkpɔ ke Ufɔk Abasi. Edieke mbufo musukotke ŋwed Abasi ndien-ndien ke ini edem, ŋwed emi ekeme ediŋwam fi nditɔŋɔ. Edieke mbufo amakebem iso enyene eti edu edikot ŋwed Abasi, ŋwed emi ekeme ediŋwam fi ndinyene ediwak nti-ibɔrɔ ifiɔk-ukpep.

Ata akpan ebiet ke edibɔ-ukpep ikɔ-Abasi edi ke ufɔkiduŋ. Mme andikpep mbufo ke ufɔk Abasi ekeme ediŋwam mbufo, ndien mbufo emekeme ndibɔ ɔsɔŋɔ-uko oto mbon efen ke ward. Edi man ɔbɔhɔ ke ŋkpɔ-spirit, mbufo ye ufɔkemana fo emeyom edibɔk ke ofuri usen eto “eti ikɔ Abasi” (Moroni 6:4; se ŋko Russell M. Nelson, “Opening Remarks,” Liahona, Nov. 2018, 6–8).

Ekama ŋwed emi ke usuŋ ekededi emi edisinde uŋwam inɔ mbufo. Se ewetde ke esit owut ubak nsinsi akpanikɔ emi ekutde ke Akani Testament. Mmɔ ŋko enɔ mme ekikere ye edinam ndiŋwam mbufo ndikot ŋwed Abasi ke-owo ke-owo, ye ufɔkemana mbufo, mme ye ufan mbufo. Nte mbufo ekotde, etiene ndausuŋ Spirit man ekut nsinsi akpanikɔ emi ɔwɔrɔde ŋkpɔ ɔnɔ mbufo. Ese eyom etop emi Abasi enyenede ɔnɔ mbufo, ndien etiene mme ntuuk spirit emi mbufo ebɔde.

Edi, Etiene Mi—Eke Ufɔkiduŋ ye Ufɔk Abasi edi otu-ŋwed enɔde mme esop eke mme ubet ukpep Sunday eke Primary, iwaad ye Sunday School eke ikpɔ-owo, mme ubet ukpep eke Ŋkaferi Iban, ye eboho Itie-oku Aaron. Edieke mbufo ekpepde ŋkpɔ ke ndaha ekededi ke otu emi, eteme fi ete akama se ewetde ke ŋwed emi ɔnɔ edikot-ŋwed eke idem fo ye nte mbufo ebeŋede-idem ndikpep-ŋkpɔ. Tɔŋɔ ke edinyene mme ifiɔk-ukpep eke idem fo ke ŋwed Abasi. Ata akpan mbeŋe-idem fo editibe ke nte mbufo oduŋɔde ŋwed Abasi onyuŋ oyom ifiɔk eke Edisana Spirit. Se yom nsinsi akpanikɔ emi aŋwamde fi ndikabare nehede mbiet Ete eke Enyɔŋ ye Jesus Christ. Edi, Etiene Mi ekeme ediŋwam fi okut ubak akpanikɔ emi onyuŋ ɔfiɔk ndaha eke ŋwed Abasi.

Enim ke esit mbufo ke ndibɔ-ukpep ikɔ-Abasi, ke ata eti usuŋ, ɔkɔŋɔ ke ufɔkiduŋ ndien Ufɔk Abasi ediande-uŋwam. Ke mme ikɔ efen, ata akpan ubiɔŋ-utom fo edi ndiŋwam mbonowo emi mbufo ekpepde ke ukeme mmɔ ndibɔ-ukpep nyuŋ nam ikɔ-Abasi ke ufɔkiduŋ. Ekufina idem kabaŋa edinyene asaŋa-asaŋa ŋkpɔ emi esinede ke esit ndinɔ mmɔ ke ubet ukpep. Edi, nnɔ mmɔ nti-ifet ndibuana ifiɔk-ukpep, ekiekere, ye mbume mmɔ kabaŋa mme itie ŋwed Abasi emi mmɔ ekekotde ke ufɔkiduŋ. Kot mmɔ ete ebuana nsinsi akpanikɔ emi mmɔ ekekutde. Emi adi ata akpan-ŋkpɔŋ akan ndikpep ofuri ŋwed ukpep-ŋkpɔ ŋkure.

Akpan ntak kiet emi nnyin ibonode ke mme ubet ukpep Sunday School edi ndiŋwam nyuŋ nteme kiet eken nte nnyin idomode nditiene Jesus Christ. Ndimem usuŋ ndinam emi edi ndibup mbume nte “Nso ŋkpɔ ke Edisana Spirit ekekpep fi ke udua emi nte mbufo okokotde ŋwed Abasi?” Mme ibɔrɔ ke mbume emi ekeme edida ekesim nti nneme emi ɔsɔŋɔde mbuɔtidem ke Jesus Christ ye ke ikɔ-Abasi Esie.

Eke mbufo emekeme nditɔŋɔ nneme abaŋade mme ekikere edikot ke Edi, Etiene Mi. Nte uwutŋkpɔ, ifiɔk edikot ekeme edidi ndiduŋɔre Isaiah 53, nyom mme ikɔ emi owutde iso-utom eke Andinyaŋa. Mbufo emekeme edibup mbon ubet ukpep ete ebuana ekiekere ekededi emi mme ikɔ ekesinde ke esit mmɔ. Mme mbufo emekeme edibiat esisit ini ndiyom mme ikɔ emi nte ofuri owo ke ubet ukpep.

Ini emi mme eboho Itie-oku Aaron ye mme Ubet ukpep eke Ŋkaiferi Iban esobode ke Sunday, ufɔn mmɔ ɔkpuhɔ esisit ɔkpɔŋ ubet ukpep eke Sunday School. Ke edidian ke ndiŋwam kiet eken ndibɔ-ukpep ikɔ-Abasi Jesus Christ, mme eboho emi ŋko esisobo me eneme ɔtɔkiet kabaŋa ndinam utom erinyaŋa ye edimenerede ŋkure (se Ofuri Ŋwed Ndutum, 1.2). Mmɔ enam emi ye ndausuŋ eke mme presidency eke ubet ukpep ye eboho mmɔ.

Ke ntak emi, eboho mme ubet ukpep kiet-kiet enyene editɔŋɔ ye owo presidency eke ubet ukpep mme eboho oro adade usuŋ ke nneme kabaŋa utom eke, nte uwutŋkpɔ, ndinam ikɔ-Abasi, ndiŋwam mbon emi edude ke unana, ndibuana ikɔ-Abasi, mme ndibuana ke utom temple ye eke family history.

Ke ini emi ebede ɔnɔ edineme ɔtɔkiet, ekpep-ŋkpɔ eyeda ubet ukpep mme eboho oro usuŋ ke edikpep ikɔ-Abasi ɔtɔkiet. Ekeme edinɔ mme ikpɔ adausuŋ mme mbon ubet ukpep mme mbon eboho oro ubiɔŋ ndinɔ ukpep-ŋkpɔ. Presidency eke ubet ukpep mme eboho oro, ke enemede ye mme ikpɔ adausuŋ, esinam mme ubiɔŋ edikpep emi.

Mbonowo emi edɔŋde ete ekekpep enyene edibeŋ-idem ke edikama mme ekikere edinɔ ukpep-ŋkpɔ eke udua oro emi ewetde ke Edi, Etiene Mi. Ke se ewetde kiet-kiet, idiɔŋɔ emi owut edinam emi enehede enyene ebuana ye iwaad. Nte ededi, ekeme edikama mme ekikere ekededi ke se ewetde do nte edinam ukpep-ŋkpɔ nnɔ iwaad.

Eke mbiet ŋwed edikama nnɔ mme esop eke eboho mme eke ubet ukpep, se ppendix D.

Mbeŋe-idem fo ke edikpep Primary ɔtɔŋɔ ke nte mbufo okotde ŋwed Abasi ke idem fo ye mbon ufɔkemana fo. Nte mbufo anamde, yak idem fo nnɔ ntuuk spirit ye ifiɔk eketode Edisana Spirit kabaŋa nditɔ-ŋwɔŋ emi edude ke ubet ukpep Primary fo. Bɔŋ-akam, ndien Spirit oro ekeme edinɔ fi mme ekikere ndiŋwam mmɔ ebɔ-ukpep ikɔ-Abasi Jesus Christ.

Nte mbufo ebeŋede-idem ndikpep, mbufo emekeme edinyene ndadiana ifiɔk ke ediduŋɔ mme ekikere edikpep ŋkpɔ ke Edi, Etiene Mi—Eke Ufɔkiduŋ ye Ufɔk Abasi. Mme ŋkpɔ se ewetde kiet-kiet ke ŋwed emi enyene ikpehe emi ibuot edie “Mme Ekikere nnɔ Edikpep Nditɔ-ŋwɔŋ.” Ekere ebaŋa mme ekikere emi nte usuŋ nditɔŋɔ ifiɔk spirit mbufo. Mbufo ɔmɔdiɔŋɔ nditɔ-ŋwɔŋ Primary ubet ukpep fo—ndien mbufo eyedidiɔŋɔ mmɔ ɔfɔn nte mbufo emehede ye mmɔ ke ubet ukpep. Abasi ɔdiɔŋɔ mmɔ ŋko, ndien Enye eyenɔ mbufo ifiɔk ke ata nti usuŋ ndikpep nyuŋ ndiɔŋ mmɔ.

Emem ete ke nditɔ-ŋwɔŋ ke ubet ukpep fo eyebem iso enam ubak mme edinam ekedude ke Edi, Etieme Mi ye mme ufɔkemana mmɔ. Oro edi ntre. Edifiak-nam ɔfɔn. Kere-baŋa ndikot nditɔ-ŋwɔŋ ete ebuana ye kiet eken se mmɔ ekekpep ke ufɔkiduŋ—okposuk ke mbufo ŋko eyeduak mme usuŋ ɔnɔ nditɔ-ŋwɔŋ edibuana kpa edieke mmɔ mibɔhɔ-ukpep ke ufɔkiduŋ. Nditɔ-ŋwɔŋ enehede ekpep mme akpanikɔ eke ikɔ-Abasi kini efiakde ekpep mme akpanikɔ emi eto ke nsio-nsio edinam. Edieke mbufo okutde ete ke edinam edikpep ɔfɔn ye nditɔ-ŋwɔŋ, kere-baŋa edifiak mkpep oro, akpan-akpan edieke mbufo ekpepde mkpri nditɔ-ŋwɔŋ. Mbufo ŋko emekeme edifiak-nse edinam kiet oto ke ukpep-ŋkpɔ andikibe.

Ke mme ɔfiɔŋ emi enyene Sunday ition, eteme mme andikpep ke Primary ete efiak-enam Edi. Etiene Mi emi ekewetde enim ke ɔyɔhɔ Sunday ition ye ukpep-ŋkpɔ kiet mme awakde eke mme edinam edibɔ-ukpep ke “Appendix B: Eke Primary—Ndibeŋe Nditɔ-ŋwɔŋ idem nnɔ Uwem Edisaŋa ke Usuŋ Mbuɔtidem.”