Ŋkabare-esit Edi Uduak Nnyin

Uduak eke ofuri edibɔ-ukpep ye edikpep ikɔ-Abasi edi ndinam ŋkabare esit nnyin ɔsɔŋɔ-ada onyuŋ aŋwam nnyin ndikabare ntie nte Jesus Christ. Kentak emi, ini emi nnyin ikotde ikɔ-Abasi, nnyin inenehede ikoot iyom obufa etop; nnyin ikoot iyom ndikabare ndi “mbufa owo” (2 Corinthians 5:17). Emi ɔwɔrɔ ndiberi-idem ye Ete eke Enyɔŋ ye Jesus Christ ndiŋwam nnyin ikpuhɔ esit, ekikere, edinam, ye ata uduɔt-obot nnyin.

Edi oruk edikpep ikɔ-Abasi emi ɔsɔŋɔde mbuɔtidem nnyin onyuŋ adade ekesim utibede-ŋkpɔ eke ŋkabare esit isitibe ofuri-ofuri inikiet. Oro esibe ɔkpɔŋ ubet-ukpep-ŋkpɔ oduk esit mme owo ye ufɔkiduŋ. Oro esiyom ndien-ndien, ofuri usen utom ndifiɔk nyuŋ nam ikɔ-Abasi. Ata erikabare-esit oyom odudu eke Edisana Spirit.

Edisana Spirit ada nnyin usuŋ aka akpanikɔ onyuŋ etiŋ ikɔ ntiense abaŋa akpanikɔ oro (se John 16:13). Enye eyeyama ekikere nnyin onyuŋ anam ifiok nnyin edi obufa onyuŋ otuk esit nnyin oto ke eriyarare eke Abasi, emi edide ntɔŋɔ ofuri akpanikɔ. Edisana Spirit esinam esit nnyin asana. Enye esinɔ nnyin udɔŋ ndidu uwem edinam akpanikɔ onyuŋ eteme nnyin ndinam ntre. Ke akpanikɔ, “Edisana Spirit … eyekpep mbufo kpukpru ŋkpɔ” (John 14:26).

Ke mme ntak emi, ke ukeme nnyin ke ndinam, mbɔ-ukpep, ye ndikpep ikɔ-Abasi, nnyin ke akpa ye ata akpan-ŋkpɔ inyene ndiyom nsaŋa eke Spirit. Uduak emi enyene ndikara ubiere nnyin nyuŋ mkpeme ekikere ye edinam nnyin. Nnyin inyene ndiyom ŋkpɔ ekededi emi adade odudu Spirit edi inyuŋ isin ŋkpɔ ekededi emi ebinde spirit osio—koro nnyin imidiɔŋɔ ete edieke nnyin ikemeke edidot man Edisana Spirit odu, nnyin ŋko imikeme edidot man iduŋ kiso Ete Heaven ye Eyen Esie, Jesus Christ.