Eklac Pa Finsrak Lasr Uh

Srihpac luhn lutlut ke wosasuc ac luti nuhkwewa pa in ahkweye forlah lasr ac kahsre kuht in eklac oacna Jisus Kraist. Ke srihpac se inge, ke kuht luti ke wosasuc, kuht tiac suk muhkwena ma sasuc in etweyuck; kuht luhngse eklac sie “ma oreklac sasuc” (2 Corinthians 5:17). Kalmac pac epacl nuh sin Pahpah Inkuhsrao ac Jisus Kraist in kahsre kuht ekuhllah insiacsr, liye lasr uh, orekma lasr uh, ac ma na pwacye kacsr.

Tuhsruhk ohiyen lutlut ke wosasuc ma ahkfokokoye luhlahlfongi lasr ac kol nuhke ma usrnguck ke forlah tiac sikyak pacl sefanna. El som ahluhkwelah klahs rum nuhke insiacn kais sie ac lohm ah. El enenuh in tiac tui, srihke lwen nuhkwewa in etuh ac moulkihn wosasuc. Forlah pwacye enenuh kuh luhn Nguhn Muhtahl.

Nguhn Muhtahl el kol kuht nuhke ma pwacye ac fahkwack luhlahlfongi ke ma pwacye sac (liye John 16:13). El sang kahlwem nuhke nuhnak lasr, ahkpihsrpihsrye etuh lasr, ac kahlyac insiacsr ke fwackyuck sin God, mwe kahsruh ke ma pwacye nuhkwewa. Nguhn Muhtahl el ahknwacsnwacsye insiacsr. El mokle kuht ke kena se in moulkihn ma pwacye, ac El mahmah in kuht inkacnek in oruh ma inge. Pwacyena, “Nguhn Muhtahl … fah luti [kuht] ma nuhkwewa” (John 14:26).

Ke srihpac inge, ke srihke lasr in moul, lutlut, ac luti ke wosasuc, kuht enenuh ma se met liki nuhkwewa in suk asruoki luhn Nguhn. Mwe finsrak se inge enenuh in karihngihn sulaclah lasr ac kol nuhnak ac orekma lasr uh. Kuht enenuh in suk oacna sie ma suli kuh luhn Nguhn ac sislah kuhtwena ma suc luhslah kuh sac—tuh kuht etuh lah kuht fin kuh in nwacsnwacs ye muhtuhn Nguhn Muhtahl, kuht kuh pac in nwacsnwacs in muhta ye muhtuhn Pahpah Inkuhsrao ac Wen Nahtuhl, Jisus Kraist.