“Kaum Ob Hlis Ntuj 22–28: ‘Lub Txiaj Ntsim Zoo Tshaj Plaws uas Yog Vajtswv Leej Tub,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2025 (2025)

“Christmas,” Los, Nrog Kuv Mus—Siv hauv Tsev thiab lub Koom Txoos: 2025

Los ntawm Yexus Hnub Yug ntawm Tooj Liab, los ntawm J. Kirk Richards

Kaum Ob Hlis Ntuj 22–28: “Lub Txiaj Ntsim Zoo Tshaj Plaws uas Yog Vajtswv Leej Tub”: Christmas

Christmas

Tus Yaj Saub Joseph Smith tau qhia tias, “Tej ntsiab cai uas ua lub hauv paus ntawm peb txoj kev ntseeg teev yog cov lus tim khawv ntawm cov Thwj Tim thiab cov Yaj Saub, hais txog Yexus Khetos, hais tias Nws tau tuag, raug muab faus, thiab tias Nws tau sawv rov los tom qab peb hnub tiav tas, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg teev ces yog kev txuas ntxiv rau qhov no xwb” (Teachings of Presidents of the Church: Joseph Smith [2011], 49). 160 xyoo tom qab ntawd, zaj lus no tau tshoov Thawj Pawg Thawj Tswj Hwm thiab Pawg Kaum Ob tug Thwj Tim lub siab es lawv tau luam tawm “Tus Khetos uas Muaj txoj Sia Nyob: Cov Thwj Tim tej Lus Tim Khawv” rau hnub 2,000 xyoo uas tus Cawm Seej tau yug los (saib Russell M. Nelson, “Txais Tau Yexus Khetos lub Hwj Chim rau Hauv Peb lub Neej,” Liyahaunas, Tsib Hlis Ntuj 2017, 40).

Vim peb yog Tsoom Haiv Neeg Ntseeg hauv Hnub Nyoog Kawg, peb xyiv fab heev vim peb txais tau txoj koob hmoov uas yog kev tshwm sim dhau los ntawm cov yaj saub thiab cov thwj tim hauv hnub nyoog no. Peb zoo siab rau lawv tej lus ntuas, tej lus ceeb toom, thiab tej lus txhawb nqa. Tiam sis, qhov tseem ceeb, peb tau koob hmoov los ntawm lawv zaj lus tim khawv txog Yexus Khetos—hauv lub caij Christmas thiab txhua xyoo. Tej lus no tsis yog tej lus zoo los ntawm cov kws sau ntawv los sis cov kws txawj hais lus los sis tej lub tswv yim los ntawm cov kws kawm vaj lug kub. Nov yog tej lus los ntawm cov uas Vajtswv tau xaiv, hu thiab tso cai kom ua “cov tim khawv tshwj xeeb rau Khetos lub npe mus thoob plaws lub ntiaj teb” (Lus Qhuab Qhia thiab Kev Khi Lus 107:23).

Tej Tswv Yim Pab Qhia hauv Tsev thiab lub Koom Txoos

“Tsis tau muaj leej twg uas tau pab cov neeg uas nyob hauv ntiaj teb no npaum li Nws tau pab.”

Koj yuav hais li cas kom txhawb nqa tej lus no hais tias “Tsis tau muaj leej twg uas tau pab cov neeg uas nyob hauv ntiaj teb no npaum li Nws tau pab”? Nrhiav tej nqe nyob hauv “Tus Khetos uas Muaj txoj Sia Nyob{” uas ua tim khawv txog tus Cawm Seej lub hwj huam uas loj heev. Nws tau pab koj li cas?

Xav seb tias yog ib tug neeg uas tsis paub Kev Ntseeg Khetos tau nug koj vim li cas koj ua koob tsheej txog Christmas. Koj yuav hais li cas rau nws? Rov qab kawm “Tus Khetos uas Muaj txoj Sia Nyob” nrog zaj lus nug no nyob hauv koj lub siab, thiab xav seb puas sau tej yam xav los sis tej kev tshoov siab uas los rau koj.

Kuj saib “Why We Need a Savior” (vidi-aus), Txoj Moo Zoo cov Ntawv.

“Nws tau sawv hauv lub qhov ntxa los.”

Nyob hauv “Tus Khetos uas Muaj txoj Sia Nyob,” cov Thwj Tim ua tim khawv txog tus Cawm Seej txoj Kev Sawv Rov Los, thiab hais txog peb zaug uas tus Tswv tau tshwm sim rau neeg pom (saib nqe lus 5) Xav seb koj puas yuav nyeem txog tej lub sij hawm no nyob hauv Yauhas 20; 3 Nifais 11; thiab Joseph Smith—Keeb Kwm 1:14–20. Koj kawm dab tsi txog tus Cawm Seej los ntawm Nws tej lus thiab tej yam Nws ua thaum Nws tshwm sim rau lawv pom no?

Tsom ntsoov rau tus Cawm Seej. “Qhov uas nej thov Vajtswv thiab nyeem ‘Tus Khetos uas Muaj txoj Sia Nyob’ yeej zoo ib yam li nej nyeem Mathais, Malakaus, Lukas, Yauhas, thiab cov yaj saub hauv Phau Ntawv Maumoos tej lus tim khawv. Qhov no yuav ua rau nej txoj kev ntseeg tus Cawm Seej loj tuaj thiab pab nej tsom ntsoov rau Nws” (M. Russell Ballard, “Rov Qab Los thiab Txais Tau,” Liyahaunas, Tsib Hlis Ntuj 2017, 65).

“Nws lub pov thawj hwj thiab Nws lub Koom Txoos muaj rov qab los.”

Thaum koj kawm phau Lus Qhuab Qhia thiab Kev Khi Lus xyoo no, koj tau muaj cib fim kawm ntxov txog qhov uas tus Cawm Seej “lub pov thawj hwj thiab Nws lub Koom Txoos muab rov qab los.” Tej yam tseeb los sis tej ntsiab cai twg uas tau muab txum tim rov qab los muaj nqis rau koj? Xav seb koj puas yuav nyeem tej nqe vaj lug kub no uas qhia txog Kev Muab Txoj Moo Zoo Txum Tim Rov Qab Los: Lus Qhuab Qhia thiab Kev Khi Lus 1:17–23; 13; 20:1–12; 65; 110; 112:30–32; 124:39–42; 128:19–21. Xav seb tej lus tseeb txog txoj moo zoo uas tau muab txum tim rov qab los pab koj paub thiab hlub Yexus Khetos li cas.

“Muaj ib hnub twg uas Nws yuav rov qab los nyob hauv ntiaj teb.”

Christmas yog ib lub caij rau peb nco txog hnub uas Yexus Khetos yug los thiab xav txog hnub uas Nws yuav rov qab los. Koj kawm dab tsi txog Nws txoj kev rov los los ntawm nqe ua ntej nqe kawg hauv “Tus Khetos uas Muaj txoj Sia Nyob”? Tej zaum koj yuav xav nyeem, hu nkauj, los sis mloog tej zaj nkauj qhuas Vajtswv txog Christmas uas qhia txog Nws txoj Kev Los Zaum Ob, xws li “Ntiaj Teb Zoo Siab” los sis “Thaum Ib Tag Hmo Zaj Ntawd Tau Los” (Cov Nkauj Qhuas Vajtswv, zaj 88, 207).

“Nws yog qhov kaj, yog txoj sia, thiab kev cia siab rau lub ntiaj teb.”

Nyob hauv nqe lus kawg ntawm “Tus Khetos uas Muaj txoj Sia Nyob,” cia li kawm txog tej cwj pwm thiab tej lub npe ntawm tus Cawm Seej. Xav seb puas teem sij hawm kawm txog tej ntawd. Piv txwv hais tias:

Txoj Kev Kaj: Yexus Khetos zoo li txoj kev kaj li cas rau koj? Tej zaum koj yuav xav kos ib daim duab los sis thaij ib daim duab uas, rau koj, piv txog txoj kev kaj uas Nws tau muab rau koj. Koj txais kev tshoov siab kom uas dab tsi thiaj li qhia tau txog Nws txoj kev kaj? Kuj saib Yauhas 8:12; 3 Nifais 18:24; Lus Qhuab Qhia thiab Kev Khi Lus 50:24.)

Txoj Sia: Koj xav tias vim li cas txoj sia yog ib lo lus uas zoo qhia txog Yexus Khetos? Nws tau muab txoj sia rau koj li cas? Koj lub neej yuav txawv li cas yog tias koj tsis muaj Nws thiab Nws txoj moo zoo? (Kuj saib Yauhas 10:10; 1 Kauleethaus 15:19–23; Lus Qhuab Qhia thiab Kev Khi Lus 66:2.)

Cia Siab: Koj cia siab rau dab tsi vim tias muaj Yexus Khetos thiab Nws txoj moo zoo? Koj puas paub leej twg uas tsis muaj kev cia siab hlo li rau yav tom ntej? Xav seb koj yuav ua li cas qhia tus tib neeg ntawd koj txoj kev cia siab rau Yexus Khetos. (Kuj saib Loos 8:24–25; Ethaws 12:4; Maulaunais 7:41.

Kuj saib Tej lub Ntsiab Lus thiab tej Lus Nug, “Yexus Khetos,” Txoj Moo Zoo cov Ntawv.

“Peb ua Vajtswv tsaug rau [Nws] lub txiaj ntsim zoo tshaj plaws.”

Nyob hauv “Tus Khetos uas Muaj txoj Sia Nyob,” Cov Thwj Tim tau hais tias tus Cawm Seej yog “lub txiaj ntsim” uas los ntawm Leej Txiv Saum Ntuj Ceeb Tsheej los. Raws li koj kawm hauv “Tus Khetos uas Muaj txoj Sia Nyob,” koj yuav sau kab lus no kom tiav li cas: “Los ntawm Yexus Khetos, Vajtswv muab rau kuv tej txiaj ntsim …” Xav seb koj yuav dab tsi kom txais tau tej txiaj ntsim no ntxiv.

Koj txoj kev kawm “Tus Khetos uas Muaj txoj Sia Nyob” tau pab txhawb nqa koj txoj kev ntseeg thiab kev hlub tus Cawm Seej li cas?

Kuj saib Russell M. Nelson, “Plaub lub Txiaj Ntsim uas Yexus Khetos Pub rau Nej” (Thawj Pawg Thawj Tswj Hwm kev sib ntsib hawm Vajtswv hauv lub caij Christmas, Kaum Ob Hlis Ntuj. 2, 2018), Txoj Moo Zoo cov Ntawv; “Excerpts from ‘The Living Christ: The Testimony of the Apostles’” (vidi-aus), ChurchofJesusChrist.org.

Excerpts from "The Living Christ: The Testimony of the Apostles"

Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.

Tej Tswv Yim Pab Qhia cov Me Nyuam

Kuv “ua tim khawv tau” ua koob tsheej txog Yexus txoj kev yug los.

Cia li xav seb koj yuav qhia koj cov me nyuam li cas txog “Tus Khetos uas Muaj txoj Sia Nyob.” Tej zaum koj pab tau lawv taw tes rau lub npe Khetos nyob hauv qhov qhia lub npe thiab Thawj Pawg Thawj Tswj Hwm thiab Pawg Kaum Ob tug Thwj Tim cov npe. Tej zaum koj kuj qhia rau koj cov me nyuam tias no yog lawv txoj tim khawv txog Yexus Khetos uas lawv xav qhia tag nrho lub ntiaj teb.
Koj kuj muab txhua tus me nyuam ib leeg ib nqe ntawm “Tus Khetos uas Muaj txoj Sia Nyob” thiab hais kom lawv nrhiav los sis kos ib daim duab txog qhov nqe ntawd. Ces koj kuj pab lawv nrhiav qhov nqe ntawd nyob hauv “Tus Khetos uas Muaj txoj Sia Nyob.” Tej zaum koj kuj sau ib phau ntawv txog cov duab thiab tej nqe uas lawv sau.
Sib qhia tias nej txais tau nej zaj lus tim khawv txog Yexus Khetos li cas. Tej zaum nej yuav xav muab daim duab txog tus Cawm Seej rau txhua tus pom thiab sib qhia txog ib yam dab tsi uas nej paub txog Nws (siv tej lus ntseeb qhia nyob hauv “Tus Khetos uas Muaj txoj Sia Nyob”).

“Nws mus thoob plaws qhov txhia qhov chaw thiab ua hauj lwm zoo”

Thaum koj thiab koj cov me nyuam nyeem nqe lus thib ob nyob hauv “Tus Khetos uas Muaj txoj Sia Nyob,”qhia lawv txog tej yam uas Yexus tau ua. Nej kuj ntsiab cov duab txog Nws lub neej (saib lub lim tiam no daim ntawv ua si{ thiab hauv Phau Muaj Duab txog Txoj Moo Zoo). Caw koj cov me nyaum tham txog seb tus Cawm Seej ua dab tsi hauv cov duab. Peb pab tau lwm tus ib yam li Nws tau ua li cas? Cov “Light the World” vidi-aus nyob hauv Txoj Moo Zoo cov Ntawv pab tau koj muaj tswv yim.

“Nws yog qhov kaj, yog txoj sia, thiab kev cia siab rau lub ntiaj teb.”

Pab koj cov me nyuam nrhiav tej zaj nkauj qhuas Vajtswv txog Christmas uas qhia txog qhov kaj, txoj sia, thiab kev cia siab uas thaum tus Cawm Seej yug los, tau muab rau lub ntiaj teb, xws li “Au lub Me Zej Zos Npelehees” (Cov Nkauj Qhuas Vajtswv, zaj 94). Hu cov nkauj qhuas Vajtswv ua ke, thiab cia koj cov me nyuam qhia tias Yexus tau muab qhov kaj, txoj sia, thiab kev cia siab rau lawv lub neej li cas.

“Peb ua Vajtswv tsaug rau Nws lub txiaj ntsim zoo tshaj plaws uas yog Nws Leej Tub.”

Peb tau txais tej txiaj ntsim twg vim peb muaj Yexus Khetos? Tej zaum koj thiab koj cov me nyuam nrhiav tau tej txiaj ntsim no nyob hauv “Tus Khetos uas Muaj txoj Sia Nyob” los sis hauv ib zaj nkauj xws li “He Sent His Son” (Children’s Songbook, 34–35). Ces tej zaum lawv qhwv tau ib qhov khoom plig kom piv zoo li cov txiaj ntsim ntawd. Tej zaum koj kuj qhia koj cov me nyuam kom qhib cov khoom plig Hnub Christmas kom pab lawv nco qab txog tus Cawm Seej thiab Nws cov txiaj ntsim rau peb.

Yog xav tau tswv yim ntxiv, saib phau xov xwm Phooj Ywg rau lub hlis no.