“Kaum Ob Hlis Ntuj 15–21: ‘Tsev Neeg Yog lub Ntsiab ntawm tus Tsim lub Tswv Yim’: Tsev Neeg: Ib zaj Lus Tshaj Tawm rau lub Ntiaj Teb,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Tsev Neeg: Ib zaj Lus Tshaj Tawm rau lub Ntiaj Teb,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025
Kaum Ob Hlis Ntuj 15–21: “Tsev Neeg Yog lub Ntsiab ntawm tus Tsim lub Tswv Yim”
Tsev Neeg: Ib zaj Lus Tshaj Tawm rau lub Ntiaj Teb
Ua ntej peb yug los, peb nyob hauv ib tsev neeg—yog tsev neeg ntawm peb niam txiv saum ntuj ceeb tsheej. Tus qauv ntawd yeej muaj nyob hauv lub ntiaj teb. Tej tsev neeg hauv lub ntiaj teb no, thaum lawv ua raws li qhov zoo tshaj, yeej qog tus qauv zoo tag nrho nyob saum ntuj ceeb tsheej.
Ham tsis peb yeej tsis muaj ib tsev neeg hauv lub ntiaj teb uas zoo tag nrho thiab ib txhia tsis muaj ib tsev neeg zoo. Tiam sis zoo li Thawj Tswj Hwm Henry B. Eyring qhia, qhov uas muaj tsev neeg “muab lub cib fim zoo tshaj plaws rau Vajtswv cov me nyuam kom muaj niam muaj txiv hauv lub ntiaj teb no ib yam li lawv muaj saum ntuj ceeb tsheej” (“Coj Vajtswv Tsev Neeg Los Sib Sau Ua Ke,” Liyahaunas, Tsib Hlis Ntuj 2017, 20). Vim Vajtswv paub tias peb tej tsev neeg hauv lub ntiaj teb yuav tsis zoo tag nrho thiab tus yeeb ncuab mam li tawm tsam peb tsev neeg, Vajtswv thiaj li txib Nws Leej Tub uas Nws hlub kom txhiv peb dim thiab kho peb tsev neeg. Thiab Nws tau xa ib zaj lus tshaj tawm rau cov yaj saub hauv hnub nyoog kawg no kom tiv thaiv thiab txhawb nqa tsev neeg. Yog peb ua raws li cov yaj saub thiab muab siab rau ntseeg tus Cawm Seej, ces txawm yog tej tsev neeg hauv lub ntiaj teb tsis zoo npaum li peb tsev neeg nyob saum ntuj, peb tseem muaj kev cia siab rau peb tsev neeg—tsis hais hauv lub ntiaj teb thiab nyob saum ntuj los yog.
Tej Tswv Yim Pab Qhia hauv Tsev thiab lub Koom Txoos
“Tsev neeg yog lub ntsiab ntawm tus Tsim lub tswv yim.”
“Tsev Neeg: Ib zaj Lus Tshaj Tawm rau lub Ntiaj Teb” qhia meej txog tej tsev neeg. Tiam sis zaj lus no yeej qhia txog Vajtswv txoj hau kev cawm seej ib yam thiab. Ib txoj kev kawm zaj lus tshaj tawm yog sau tej kab lus lub neej ua ntej yug los, lub neej no, thiab lub neej tom qab peb tuag rau hauv ntawv thiab txheeb tseg saib zaj lus tshaj tawm qhia dab tsi txog peb lub ntsiab lus no. Koj kawm dab tsi thaum koj kawm txog zaj lus tshaj tawm li no? Qhov no pab koj li cas kom to taub vim li cas kev sib yuav thiab tsev neeg yeej tseem ceeb rau Vajtswv txoj hau kev? Tej qhov tseeb hauv zaj lus tshaj tawm ua li cas txhawb nqa tej yam koj xaiv ua?
Yeej muaj neeg coob uas, vim yog ob peb yam, ntshai yuav poj niam yuav txiv los sis yug me nyuam los tu. Yog tias ib tug phooj ywg hais rau koj hais tias, “Kuv yeej tsis xav yuav poj niam (yuav txiv) los sis muaj me nyuam,” koj yuav hais li cas? Tej zaum koj nrhiav tau hauv zaj lus tshaj tawm ib yam uas yuav pab koj tus phooj ywg muaj kev cia siab rau ntawm Vajtswv txoj hau kev.
Muaj dua ib lo lus nug uas tej zaum lwm tus yuav nug koj—los sis tej zaum koj yuav nug koj tus kheej—uas yog: “Tsam kuv tsev neeg tsis phim tsev neeg uas hais txog hauv zaj lus tshaj tawm txog tsev neeg?” Nov yog ob zaj koj nrhiav tau cov lus ntuas los ntawm cov yaj saub: feem “A Mighty Change” hauv Txwj Laug Dieter F. Uchtdorf’s zaj lus “Yexus Khetos Yog cov Niam Txiv lub Dag Zog” (Liyahaunas, Tsib Hlib Ntuj 2023, 55–59) thiab plaub sob lus tom kawg ntawm Txwj Laug D. Todd Christofferson’s zaj lus “Why Marriage, Why Family” (Liyahaunas, Tsib Hlis Ntuj 2015, 52).
Koj txais kev tshoov siab ua dab tsi vim yog tej yam uas koj kawm?
Kuj saib Dallin H. Oaks, “Txoj Hau Kev thiab txoj Kev Tshaj Tawm,” Liyahaunas, Kaum Ib Hlis Ntuj 2017, 28–31; Tej Ntsiab Lus thiab tej Lus Nug, “Tsev Neeg,” Txoj Moo Zoo cov Ntawv.
“Txhua tus [neeg] yog ib leej tub los sis ib leej ntxhais ntawm niam txiv saum ntuj ceeb tsheej.”
Feem ntau peb xav tias zaj lus tshaj tawm txog tsev neeg yog ib yam uas coj peb tsev neeg lub neej. Tiam sis zaj ntawd kuj qhia tej yam tseeb tseem ceeb txog peb tsev neeg saum ntuj ceeb tsheej thiab saib peb yog leej twg tiag nyob mus ib txhis li. Yog vim li cas thiaj tseem ceeb rau koj paub hais tias peb txhua tus koom tsev neeg no? Qhov tseeb no ua li cas hloov tej yam koj xaiv?
Kuj saib “Kuv Yog Vajtswv Me Nyuam,” Cov Nkauj Qhuas Vajtswv, zaj 142.
“Ib tse neeg twg haj yam yuav ncav tau kev zoo siab hauv lawv lub neej no thaum tus Tswv Yexus Khetos cov lus qhuab qhia ua lawv lub hauv paus.”
Cia li xav txog nqe lus 6 thiab 7 ntawm zaj lus tshaj tawm txog tsev neeg hais tias ob nqe no yog tus txheej txheem rau “ib tsev neeg txoj kev zoo siab.” Thaum koj nyeem ob nqe no, cia li kawm txog tej lub ntsiab cai ntawm “tej kev sib yuav thiab tej tsev neeg uas kav ntev.” Tej zaum koj yuav xav txog tej piv txwv ntawm tej ntsiab cai no uas koj tau pom hauv koj tsev neeg los sis lwm tsev neeg. Tej ntsiab cai no ua li cas pab ua rau Yexus Khetos ua lub hauv paus ntawm tsev neeg?
Ces xav txog ib tug hauv koj tsev neeg uas koj xav haj yam sib raug zoo. Npaj zoo, ua ke nrog tus Cawm Seej kev pab, kom ua raws li tej kev tshoov siab uas koj txais.
Kuj saib L. Whitney Clayton, “The Finest Homes,” Liahona, Tsib Hlis Ntuj 2020, 107–9.
Niam txiv yuav tsum cob nkawd cov me nyuam raws li kev hlub thiab kev ncaj ncees.
“Peb nqua hu kom cov pej xeem zoo … kom yug thiab ntxiv dag zog rau tsev neeg.”
Nqe lus kawg ntawm txoj kev tshaj tawm txog tsev neeg muaj ib lo lus txib. Thaum koj xav txog saib koj yuav ua raws li txoj lus txib ntawd, tej zaum yuav pab koj yog tias koj kawm zaj lus tshaj tawm lub npe. Piv txiv hais tias, ib zaj lus tshaj tawm yog dab tsi? Lo lus tshaj tawm ntawd hais li cas txog daim ntawv no lub ntsiab lus? Yog vim li cas Thawj Pawg Thawj Tswj Hwm thiab Pawg Kaum Ob tug Thwj Tim thiaj muaj cai tshaj tawm rau lub ntiaj teb txog tsev neeg? Tej zaum koj kuj yuav sau tseg tej yam uas koj xav tias yog tej ntsiab lus tseem ceeb ntawm zaj lus tshaj tawm. Koj yuav ua li cas qhia txog tej ntsiab lus no hauv koj lub neej, hauv koj tsev neeg, thiab hauv koj koog zej zog?
Kuj saib Bonnie L. Oscarson, “Cov uas Tiv Thaiv Kev Tshaj Tawm txog Tsev Neeg,” Liyahaunas, Tsib Hlis Ntuj 2015, 14–17; “Defenders of the Faith” (vidi-aus), Txoj Moo Zoo cov Ntawv.
Defenders of the Faith
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Tsev neeg yeej tseem ceeb rau Leej Txiv Saum Ntuj Ceeb Tsheej txoj hau kev.
-
Pab koj cov me nyuam xav txog tej yam uas tseem ceeb heev npaum li tias lawv yuav xav qhia sawv daws txog tej ntawd. Muab “Tsev Neeg: Ib zaj Lus Tshaj Tawm rau lub Ntiaj Teb” rau cov me nyuam saib, thiab piav hais tias cov yaj saub thiab cov thwj tim sau zaj no kom thiaj qhia peb saib tsev neeg tseem ceeb npaum li cas rau Leej Txiv Saum Ntuj Ceeb Tsheej. Vim li cas Vajtswv saib tsev neeg tseem ceeb heev? (kuj saib daim vidi-aus “What Is the Purpose of Family?” [ChurchofJesusChrist.org]).
1:19What Is the Purpose of Family?
-
Qhia koj cov me nyuam txog ib yam los ntawm zaj lus tshaj tawm uas koj xav tias peb txhua tus yuav tsum paub. Caw cov me nyuam los qhia saib lawv xav li cas txog tej qhov tseeb ntawd. Peb lub neej yuav txawv li cas yog tias peb tsis paub txog tej yam no? Tej zaum nej yuav hu ib zaj nkauj ua ke uas hais txog tej qhov tseeb uas nrhiav tau hauv zaj lus tshaj tawm, xws li “I Will Follow God’s Plan” (Children’s Songbook, 164–65).
-
Hauv feem IV ntawm nws zaj lus “Txoj Hau Kev thiab txoj Kev Tshaj Tawm” (Liyahaunas, Kaum Ib Hlis Ntuj 2017, 30), Thawj Tswj Hwm Dallin H. Oaks piav saib tau sau tseg zaj lus tshaj tawm txog tsev neeg li cas. Tej zaum koj thiab koj cov me nyuam yuav tshab xyuas qhov uas nws piav txog ntawd ua ke thiab sib tham saib yog vim li cas nej thiaj ris tus Tswv txiaj uas Nws tshoov Nws cov tub qhe lub siab kom qhia tej qhov tseeb txog tsev neeg no rau peb.
-
Koj kuj muab duab rau koj cov me nyuam saib tau (los sis caw lawv teeb duab) txog tej qhov tseeb uas nrhiav tau hauv zaj lus tshaj tawm txog tsev neeg. Tej duab no yuav yog txog ib lub tuam tsev, ib tsev neeg thov Vajtswv los sis ua si ua ke, los yog ib khub niam txiv sib yuav. Ces koj cov me nyuam mam li nrhiav kom tau tej kab lus hauv zaj lus tshaj tawm txog tsev neeg uas phim cov duab. Tus Tswv qhia peb li cas txog tej yam no hauv zaj lus tshaj tawm?
Leej Txiv Saum Ntuj Ceeb Tsheej xav kom tej tsev neeg zoo siab.
Cia li txawj xav txog lwm tus. Thaum koj qhia tej qhov tseeb hauv zaj lus tshaj tawm rau tsev neeg, thov ua tib zoo xav txog qhov uas ib txhia me nyuam nyob hauv tej tsev neeg uas tsis phim tsev neeg uas piav txog hauv zaj lus tshaj tawm. Xav txog saib koj yuav ua li cas yaum lawv thiab tshoov lawv lub siab.
Kuv yog ib tug “ib tug ntsuj plig tub los sis ntxhais ntawm ib khub niam txiv saum ntuj ceeb.”
-
Thaum nej hu zaj nkauj “Kuv Yog Vajtswv Me Nyuam” (Children’s Songbook, 2–3) ua ke, koj pov tau ib lub pob rau ib tug me nyuam thiab hais tias, “Kuv paub Vajtswv ib tug me nyuam hu ua [tus me nyuam lub npe].” Ces tus me nyuam ntawd yuav pov lub pob rau lwm tus, hais tib co lus thiab hais lwm tus neeg ntawd lub npe. Pab koj cov me nyuam nrhiav kom tau txoj kab lus “ib tug ntsuj plig tub los sis ntxhais ntawm ib khub niam txiv saum ntuj ceeb” hauv zaj lus tshaj tawm txog tsev neeg, thiab ua tim khawv txog qhov tseeb no.
Tsev neeg zoo siab tshaj thaum lawv coj raws li Yexus Khetos
-
Kom pib sib tham txog ntxiv dag zog rau yus tsev neeg, koj thiab koj cov me nyuam yuav tham tau saib peb ua li cas ntxiv dag zog rau lwm yam—xws li peb cov hniav, peb lub cev, los sis ib lub tsev. Ces koj mam li muab lub tsev ntawd piv rau ib tse neeg uas muaj zog. Pab koj cov me nyuam nrhiav tau tej ntsiab cai ntawm Khetos uas coj tsev neeg mus rau kev zoo siab, nyob hauv nqe 7 ntawm zaj lus tshaj tawm txog tsev neeg (kuj saib lub lim tiam no phab ntawv ntxim ua).
Yog xav tau tswv yim ntxiv, saib phau xov xwm Phooj Ywg rau lub hlis no.