“15–21 Disemba: ‘‘Famli Hem I Stamba blong Plan blong Krieta’: Famli: Wan Ofisol Toktok I Go long Wol,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Famli: Wan Ofisol Toktok I Go long Wol,” Kam Folem Mi—Blong Hom mo Jos: 2025
15–21 Disemba: “Famli Hem I Stamba blong Plan blong Krieta”
Famli: Wan Ofisol Toktok I Go long Wol
Bifo yumi bon i kam long wol ia, yumi bin pat blong wan famli—famli blong papa mo mama blong yumi long Heven. Paten ia, i stap gohed long wol ia. Ol famli long ples ia, oli mekem bes blong olgeta blong stap gud, blong i semmak stret olsem long paten long heven.
Yes, i no minim se, evriwan long ol famli long wol ia, bae oli stret evriwan, o oli save wok aot gud. Be, olsem we Presiden Henry B. Eyring i bin tijim: ol famli oli “givim, long ol pikinini blong God, bes janis blong oli welkamem olgeta long wol ia wetem wan lav ia nomo long wol ia we i kolosap long hemia we yumi bin filim taem we yumi bin stap long heven—we i lav blong wan papa mo mama” (“Karem I Kam Tugeta Famli blong God,” Liahona, Mei 2017, 20). From se Hem i save se ol famli oli no stret evriwan mo bae oli fesem ol atak blong enemi, God i bin sendem Pikinini blong Hem we Hem i lavem tumas, blong i pemaot yumi mo i hilim ol famli blong yumi. Mo Hem i sendem ol lata-dei profet wetem wan ofisol toktok blong difendem mo mekem ol famli oli kam strong moa. Sapos yumi folem ol profet mo putum fet blong yumi long Sevya, iven we ol famli long wol ia oli no kasem nating stamba tingting blong heven, i gat hop i stap blong ol famli—long wol ia mo long heven.
Ol aedia blong Stap Lanem Samting long Hom mo long Jos
“Famli hem i stamba blong plan blong Krieta.”
“Famli: Wan Ofisol Toktok I Go Long Wol” i klia se hem i abaot ol famli. Be tu, hem i abaot plan ia blong God blong fasin blong sevem man. Wan wei blong stadi long ofisol toktok, hem i blong raetem ol toktok ia laef bifo laef long wol ia, laef long wol ia, mo laef afta long laef long wol ia long wan pis blong pepa mo mekem lis blong wanem ofisol toktok i stap tij abaot wanwan long olgeta topik ia. ?Wanem nao yu lanem taem yu stadi long ofisol toktok long wei ia? ?Olsem wanem nao hemia i helpem yu blong andastanem from wanem mared mo famli, oli impoten long plan blong God? ?Long wanem wei nao, ol trutok insaed long ofisol toktok i jenisim ol joes blong yu?
I gat plante pipol we, from ol defdefren risen, maet oli fraet tumas long mared o blong stap lukaot ol pikinini. Sapos wan fren i talem long yu, “Mi neva wantem blong mared o gat wan famli,” ?wanem nao bae yu talem? Maet yu save lukaot wan samting insaed long ofisol toktok we i save helpem fren blong yu blong gat hop long plan ia blong God.
Wan narafala kwestin we yu save askem—o we yu save askem long yuwan—i wan olsem hemia: “?Wanem bae i hapen sapos situesen blong famli blong mi i no go stret wetem wanem we ofisol toktok i tokbaot?” Hemia tu ples we yu save lukaotem kaonsel blong profet: seksen ia “A Mighty Change” long mesej blong Elda Dieter F. Uchtdorf “Jisas Kraes I Paoa blong Ol Papa mo Mama” (Liahona, Mei 2023, 55–59) mo las fofala paragraf blong mesej blong Elda D. Todd Christofferson “Why Marriage, Why Family” (Liahona, Mei 2015, 52).
?Wanem nao yu filim insperesen blong mekem, from wanem we yu bin stadi long hem?
Luk tu long Dallin H. Oaks, “The Plan and the Proclamation,” Liahona, Nov. 2017, 28–31; Topics and Questions, “Family,” Gospel Laebri.
“Wanwan [man o woman] i wan pikinini boe o gel blong papa mo mama long heven.”
Oltaem yumi stap tingting se famli Ofisol Toktok i wan gaed blong famli laef. Be hem i tijim tu ol impoten trutok abaot famli blong yumi long heven mo aedentiti blong yumi we i no save finis. ?From wanem i impoten long yu blong save se, yumi evriwan i pat blong famli ia? ?Long wanem wei nao ol trutok ia oli save mekem jenis long ol joes we yu mekem?
Luk tu long “Mi Pikinini blong God,” Singsing Tabu mo Singsing blong Ol Pikinini, pej 58.
“Hapines insaed long famli laef i gat gudfala janis blong kamtru sapos laef insaed long famli i stanap long ol tijing blong Lod Jisas Kraes.”
Tingting long ol paragraf 6 mo 7 blong famli ofisol toktok olsem wan paten blong “hapines insaed long famli laef.” Taem yu stap ridim tufala paragraf ia, faenemaot olgeta prinsipol blong “ol mared mo famli we oli gat sakses.” Maet yu save tingbaot ol eksampol blong ol prinsipol ia, we yu bin luk insaed long famli blong yuwan o ol narafala famli. ?Long wanem wei nao ol prinsipol ia oli help blong mekem Jisas Kraes, i fandesen blong famli laef?
Afta, maet yu save tingting long wan famli rilesensip we yu wantem blong mekem i kam strong. Mekem wan plan, wetem help blong Sevya, blong tekem aksen folem ol filing mo tingting we yu kasem.
Luk tu long L. Whitney Clayton, “The Finest Homes,” Liahona, Mei 2020, 107–9.
Ol papa mo mama oli sapos blong lukaotem ol pikinini blong olgeta wetem lav mo stret mo gud fasin.
“Mifala i askem strong long ol sitisen … blong holemtaet mo mekem famli i kam strong moa.”
Long lat paragraf blong famli ofisol toktok i gat tu, wan singaot blong tekem aksen. Taem yu stap tingting long olsem wanem bae yu ansa long singaot ia, taetol blong ofisol toktok bae i save help taem yu stadi long hem. Eksampol. ?Wanem i wan ofisol toktok? ?Wanem nao toktok ia i poenemaot long yu abaot mesej insaed long pepa? ?Wanem nao i mekem se Fas Presidensi mo Kworom blong Olgeta Twelef Aposol oli kwalifae blong putumaot wan ofisol toktok i go long wol abaot ol famli? Mo tu, yu save mekem wan lis blong wanem we yu ting se, oli ol stamba mesej blong ofisol toktok. ?Long wanem wei nao yu save sapotem ol mesej ia long laef blong yu, insaed long hom blong yu mo long komuniti blong yu?
Luk tu long Bonnie L. Oscarson, “Defenders of the Family Proclamation,” Liahona, Mei 2015, 14–17; “Defenders of the Faith” (vidio), Gospel Laebri.
Defenders of the Faith
Blong kasem moa aedia, luk long magasin blong manis ia Liahona mo ol Blong Ol Yut Oli Kam Strong magasin.
Sam Aedia blong Tijim Ol Pikinini
Ol famli oli impoten insaed long plan blong Papa long Heven.
-
Helpem ol pikinini blong yu blong tingbaot sam samting we i impoten tumas we oli wantem blong talemaot long evriwan abaot ol samting ia. Soem long ol pikinini wan kopi blong “Famli: Wan Ofisol Toktok I Go long Wol,” mo eksplenem se ol profet mo ol aposol oli bin raetem toktok ia blong talemaot long yumi evriwan, hamas ol famli oli impoten long Papa long Heven. ?From wanem ol famli oli impoten tumas long Hem? (luk tu long vidio ia, “What Is the Purpose of Family?” [ChurchofJesusChrist.org]).
1:19What Is the Purpose of Family?
-
Serem wan samting wetem ol pikinini blong yu aot long ofisol toktok we yu filim se yumi evriwan i nid blong save. Invaetem ol pikinini blong serem ol filing blong olgeta abaot ol trutok ia. ?Long wanem wei nao, ol laef blong yumi bae oli defren, sapos yumi no bin save olgeta samting ia? Maet, tugeta, yufala i save singsing wan singsing we i go wetem ol trutok we i stap insaed long ofisol toktok, olsem “I Will Follow God’s Plan” (Children’s Songbook, 164–65).
-
Insaed long seksen IV blong mesej blong hem “The Plan and the Proclamation” (Liahona, Nov. 2017, 30), Presiden Dallin H. Oaks i tokbaot olsem wanem famli ofisol toktok oli bin raetem. Maet yu mo ol pikinini blong yu, tugeta, yufala i save gotru long wanem we hem i tokbaot abaot, from wanem yu talem tangkyu we Lod i givim insperesen long ol wokman blong Hem, blong tijim ol trutok ia abaot ol famli.
-
Mo tu, yu save soem long ol pikinini blong yu, ol pikja (o invaetem olgeta blong droem sam we oli soemaot ol trutok we oli stap long famli ofisol toktok. Hemia i save ol pikja blong wan tempol, wan famli we i stap prea o pleiplei tugeta, o wan kapol we bae i mared. Afta, ol pikinini blong yu oli save faenem ol sentens, insaed long famli ofisol toktok we i go wetem ol pikja ia. ?Wanem nao Lod i tijim long yumi abaot ol samting ia insaed long ofisol toktok?
Papa long Heven i wantem ol famli blong stap hapi.
Gat tingting mo filing long narawan. Taem yu stap tijim ol trutok insaed long famli ofisol toktok, plis, yu mas save se plante pikinini oli stap laef insaed long ol famli we oli no go stret wetem ol gud samting we oli tokbaot insaed long ofisol toktok ia. Tingting long olsem wanem yu save leftemap tingting mo givim insperesen long olgeta.
Mi mi wan “spirit boe o wan spirit gel blong papa mo mama long heven.”
-
Taem yufala i singsing tugeta “Mi Pikinini blong God,” STSP, pej 58” (Singsing “Mi Pikinini blong God.” (STSP, 58), 2–3),yu save sakem wan balong i go long wan pikinini taem yu talem, “mi save wan pikinini blong God we nem blong hem i [nem blong pikinini].” Afta, pikinini ia i save sakem balong i go long wan narawan, mo stap talem semmak toktok mo putum insaed nem blong man o woman ia. Helpem ol pikinini blong yu blong faenem ol toktok ia “spirit pikinini boe o gel blong papa mo mama long heven” insaed long famli ofisol toktok, mo serem testemoni blong yu abaot trutok ia.
Ol famli oli moa hapi taem oli folem Jisas Kraes.
-
Blong statem wan storian blong toktok raon abaot stap mekem famli blong yu i kam strong moa, yu mo ol pikinini blong yu i save tokbaot wanem blong mekem blong mekem ol nara samting oli kam strong—olsem, ol tut blong yumi, ol bodi blong yu o wan bilding. Afta, yu save komperem hemia wetem fasin blong stap bildim wan strong famli. Helpem ol pikinini blong yu, blong faenem ol prinsipol blong ol fasin olsem hemia blong Kraes, we oli stap lidim yumi i from hapines insaed long famli laef, we yumi oli save faenem insaed paragraf 7 blong famli ofisol toktok (luk tu long aktiviti pejblong wik ia).
Blong kasem moa aedia, luk long magasin blong Fren long manis ia.