Ol Toktok blong Bilif mo Ol Ofisol Toktok 1 mo 2

Tingting long wei ia blong stap stadi long Ol Toktok blong Bilif: Blong wanwan long ol toktok blong bilif, mekem wan “smol lesen” blong eksplenem wanem yu bilivim. Smol lesen blong yu i save gat tu, wan skripja we i go wetem, wan pikja, wan hym singsing blong ol pikinini o wan eksperiens blong wanwan, abaot stap laef folem wan trutok we toktok blong bilif i stap tijim.

?Wanem ol jenis we ol trutok ia oli mekem insaed long rilesensip blong yu wetem Papa long Heven mo Jisas Kraes? ?Long wanem wei nao Ol Toktok blong Bilif oli bin mekem stadi blong yu abaot gospel i kam moa gud o helpem yu blong serem gospel wetem ol narawan?

Luk tu long Gaed long Ol Skripja, “Ol Toktok blong Bilif,” Gospel Laebri; L. Tom Perry, “The Doctrines and Principles Contained in the Ol Toktok blong Bilif,” Liahona, Nov. 2013, 46–48; “Chapter 38: The Wentworth Letter,” long Teachings of Presidents of the Church: Josef Smith (2011), 435–47.

“Mifala i biliv we bambae [God] i talemaot yet plante bigfala mo impoten samting abaot kingdom blong God” (Ol Toktok blong Bilif 1:9). Wetem prinsipol ia long maen, luklukbak long Ol Ofisol Toktok 1 mo2mo lukaotem ol toktok mo ol sentens we bae oli mekem fet blong yu i kam strong moa wetem revelesen we i stap gohed blong kam. ?Olsem wanem ol revelesen ia oli tajem laef blong yu? ?Long wanem wei nao oli bin helpem wok blong kingdom blong Papa long Heven i progres?

?Wanem pruf nao yu luk we i stap lidim Jos “tru long insperesen blong God we I Gat Olgeta Paoa” tedei? (Ofisol Toktok 1). Maet yu save luklukbak long wan o moa long ol mesej blong konfrens we i jes pas, stap lukaotem olsem wanem nao Lod i stap lidim Jos blong Hem—mo laef blong yu. Mesej we i kam long Presiden blong Jos we i jes pas i no longtaem, i save wan gud ples blong stat.

?Wanem nao yu save mekem, sapos yu o wan we yu lavem, i stap traehad blong andastanem mo akseptem wanem Lod i stap tijim tru long ol profet blong Hem? ?From wanem yu glad blong gat wan profet?

Luk tu long Amos 3:7; 2 Nifae 28:30; Allen D. Haynie, “Wan Profet we I Stap Laef blong Ol Las Dei,” Liahona, Mei 2023, 25–28; Topics and Questions, “Prophets,” Gospel Laebri; “We Thank Thee, O God, for a Prophet,” Hym, namba 19.

Insaed long “Sam Pat blong Tri Toktok we i kam long Presiden Wilfod Wudrof long Saed blong Pablik Anaonsmen” (we i stap long en blong Ofisol Toktok 1), wanem nao ol risen we profet i givim long bihaf blong Lod, blong stopem praktis blong maredem fulap woman? ?Hemia i tijim yu wanem abaot wok blong God?

Blong gat moa infomesen abaot histri bakgraon blong Ofisol Toktok 1, luk long Saints, 2:602–15; “The Messenger and the Manifesto,” long Revelations in Context, 323–31; Topics and Questions, “Plural Marriage and Families in Early Utah,” Gospel Laebri.

Yumi no save from wanem long wan taem, prishud odinesen mo ol odinens blong tempol i no gat i stap blong ol memba blong Jos blong laen blong Afrika. Iven taem oli stap gat ol had kwestin we i no gat wan i ansarem abaot polisi ia, plante long ol Blak Lata-dei Sent, oli bin trastem Lod, (luk long Ol Proveb 3:5) mo stap fetful long Hem truaot long laef blong olgeta. Blong lanem abaot fet mo ol eksperiens blong olgeta, i save stap givim insperesen long yu. Hemia samfala stori blong olgeta, we oli stap long history.ChurchofJesusChrist.org

• “Jane Elizabeth Manning James”

• “In My Father’s House Are Many Mansions” (story of Green Flake)

• “You Have Come at Last” (story of Anthony Obinna)

• “Break the Soil of Bitterness” (story of Julia Mavimbela)

• “I Will Take It in Faith” (story of George Rickford)

• “Long-Promised Day” (story of Josef W. B. Jonson)

Taem yu stap ridim Ofisol Toktok 2, ?Wanem nao yu lanem abaot fasin blong Lod blong stap protektem ol polisi blong Jos blong Hem? Tingting hevi long wanem we yu bin lanem blong trastem Lod iven taem yu no gat wan andastaning we i stret gud evriwan.

Luk tu long 2 Nifae 26:33; “Witnessing the Faithfulness,” long Revelations in Context, 332–41; Topics and Questions, “Race and the Priesthood,” Gospel Laebri; Ahmad Corbitt, “A Personal Essay on Race and the Priesthood,”ol pat 1–4, history.ChurchofJesusChrist.org; BeOne.ChurchofJesusChrist.org.

• Tingting blong stap faenem mo singsing ol hym we oli save helpem ol pikinini blong yu blong andastanem wan o moa long Ol Toktok blong Bilif. Maet oli save helpem yu blong jusum ol hym mo ol singsing. Helpem ol pikinini blong yu blong luk olsem wanem ol singsing ia oli go wetem Ol Toktok blong Bilif.

• Yu mo ol pikinini blong yu i save wok tugeta blong raetem ol kwestin we maet ol pipol oli gat abaot gp blong Jisas Kraes o Jos blong Hem. Afta, tugeta, yufala i save ansarem ol kwestin ia taem yufala i stap yusum Ol Toktok blong Bilif. ?Weaples bakegen yumi save go long hem taem yumi gat ol kwestin abaot gospel?

• Blong helpem ol pikinini blong andastanem nambat naen toktok blong bilif, maet yu save givim wan skripja long olgeta mo wan pikja blong profet we i stap laf (o wan namba blong konfrens we i jes pas Liahona). Askem olgeta blong leftemap ol skripja taem yu stap ridim ol toktok ia “evri toktok we God i bin talemaot finis” mo pikja o magasin taem yu ridim “evri toktok we Hem i stap talemaot naoia” (Ol Toktok blong Bilif 1:9). ?From wanem yumi nidim tugeta, ol profet blong bifo mo ol profet blong tedei?

• Ol pikinini blong yu oli save lanem olsem wanem ol toktok blong ol profet, i stap lidim yumi taem yumi stap folem ol instraksen blong mekem wan samting, olsem wan kaekae o wan pleiplei doli. Yu save komperem hemia wetem ol instraksen we Jisas Kraes i stap givim long yumi tru ol profet. ?Wanem sam samting we Lod i bin tijim long yumi tru ol profet blong Hem we oli stap laef tedei?

• Maet blong stap luk olsem wanem ol skripja blong taem bifo i go wetem ol revelesen blong tedei, i save helpem ol pikinini blong yu blong andastanem Ofisol Toktok. Yu save askem olgeta blong ridim Ol Wok 10:34–35 mo Jekob 2:27–30 mo invaetem olgeta blong faenemaot wijwan skripja i go wetem Ofisol Toktok 1 (we i mekem se i nomo gat fasin blong man i maredem fulap woman) mo wijwan i go wetem Ofisol Toktok 2 (we i anaonsem se prishud odinesen mo ol odinens blong tempol oli i gat i stap blong evri pipol, i nomata wanem kala blong skin blong hem). Talem testemoni blong yu se Lod i talemaot tingting blong Hem long ol profet blong bifo mo ol profet blong tedei.