Mêyi a Dipinguluja

Phebe Woodruff uvua musombela pabuipi ne Nauvoo pakabanga Joseph Smith kulongesha pa mushindu wa kuikala mutambuishibua bua aba bavua ne moyo kala. Wakabifundila muena kuenda, Wilford, uvua usadila bukenji mu Angleterre.

“Muanetu muluma Joseph … wakalonga ku dibuluila ne aba badi mu Ekelezia badi mua kuikala batambuishibua bua bilongu biabu bikadi bifua ne kabiyi bipeta mushindu wa kumvua lumu luimpa elu, nansha bua bana babu, baledi, bana betu baluma ne bakaji, bakâku, ba manseba, ne ba mankanshi. … Padibu batambuishibua bua balunda babu badi balekedibua mu buloko ne badi mua kubakeba mu dibika ku lufu ne kubatuala mu bukalenga bua selestiya—dilongesha didi dipeta bimpa mu ekelezia ne badi baya kumpala mu misumba ya bantu, ndambu udi uya kutambuishibua misangu mivula bu 16 … mu dituku dimua

Wilford Woodruff pashisha wakamba pa nshindamenu ewu: Tshikondu tshingakumvua bualu ebu anyima wanyi wakapeta disanka dinena. … Ngakatungunuka ne kutambuishibua bua malanda anyi onsu amvua mua kuelela meji. … Ngakumvua mua kuamba aleluya pavua dibuluila edi dipatuka ditubuluila ntambu bua bafua. Nankumvua ne tuvua ne tubingila tua kusanka bua mabenesha a Diûlu.

Bumudi Muanetu Mukaji Woodruff, Vilate Kimball wakumvua pa ntambu eyi pavua muena kuenda, Heber, mumbuka muya kulongesha lumu luimpa. Wakamufundila:

Mulombodi Mukulu mmulongesha tshienabualu tshipiatshipia ne tshia butumbi … tshiakatuala ditshionkomoka mu ekelezia. Tshidi, kuikala mutambuishibua bua bafua. Pôlo mmuakula buatshi, mu Kolinto wa ku mudilu shapita 15 kanungu 29. Joseph mmutamba kupeta diumvuija dijima diatshi ku dibuluila. … Bidi diesa bua ekelezia ewu bua kutambuishibua bua binabu bonsu badi bafua kumpala kua lumu luimpa kupatukalu; nansha panyima kubangila ku Nkambua kâku tatu ne mamu. … Mu kuenza nunku, tudi tuenza bu bena mudimu babu; ne tubapesha diesa dia kulua ku dibika ku lufu dia kumpala. Wakamba ne nebapeta Lumu Luimpa lulongesha kudibu … kadi kakuena tshintu bu esthi bu nyuma itambuishibua. Katshia bulongolodi ebu bualongeshibua apa, mâyi akatungunuka ne kukuata mudimu. Munkatshi mua mpungilu kuvua misangu mikuabu Bakulu muanda mukulu mu musulu mu tshikondu tshia kutambuishibua. … Ndi musua kutambuishibua bua mamu wanyi. Ndi ntshintshikila bua kuindila tô ne pawudi ulua kumbelu, kadi musangu mushala Joseph wakakula pa tshiena bualu etshi, wakabela muntu yonsu bua kudibuinka mu kuenza, ne kufila budishikaminyi kudi balunda babu ku lukanu ne lukasa lonsu. Nanku ndi ngela meji bua kuya kumpala lumingu elu, bu mudi ba bungi ba ku mutumba baya. Bamua bakadi batambuishibua misangu mivula. Nunku udi umona ne kudi diakalenga bua bonsu. Etshi tshidi dilongesha dia butumbi

Pakajika muaba wa ditambuisha mu Ntempelo wa Nauvoo, ntambu ya bafua yakenzeka momu pamutu pa ku musulu. Phebe Chase, musombela mu Nauvoo, wakafundila mamuenda pa ntempelo, umvuija muaba wa ditambuisha bu muaba utuvua mua kutambuishibua bua bafua ne kulua bapandishi pa Mukuna wa Siona. Wakatungunuka ne kumvuija ne mu muaba ewu, Ndi mutambuishibua bua tatu wanyi munanga ne bonsu balunda banyi badi bafua bakushala. … Mpindiewu ndi musua bua kumanya dina dia tatu weba ne dia mamu weba bua mbapesha budishikaminyi, bualu ndi musua bua kuambuluisha Bafua. … Mukalenga mmuakula kabidi ne mupingajilula bulongolodi bua kala.

Mu kufundila balunda benda ne dîku dienda pa ntambu bua bidimba bia dîku bikadi bifua diambedi, Sally Randall wakavuluija bua lufu lua muanenda wa baluma George:

O, tshikondu kayi tshikola tshivua tshimfikila ne tshimueneka ne tshiena pabuipi bua kutshipeta kabidi, kadi … tatu wenda uvua mutambuishibua buenda ne tshidi tshintu tshia butumbi tshia kuitabuija ne kupeta tshiwudi tshia lumu luimpa bu mudibi bilongeshibua mpindiewu ne mua kuikala mutambuishibua bua balunda betu bonsu badi bafua ne kubasungila mu mushindu utudi mua kupeta dimanya diabu.

Ndi musua bua umfundila mêna a balela betu bonsu bakadi bafua nansha kula tô ne ba kâku baluma ne ba kâku bakaji mu mulongo onsu. Ndi mujinga bua kuenza monsu bua kusungila balunda banyi ne ngikala ne disanka pikala bamua ba kunudi mua kulua ne kungambuluisha bualu tshidi mudimu mukola bua muntu nkayenda kuwenza. Ndi ntekemena ne nenuela meji ne etshi tshidi dilongesha dipiadipia kadi nenumona ne didi dilelela.