Ngaahi Leʻo ʻo e Fakafoki Mai ʻo e Ongoongoleleí

“ʻE lava pē ke fakamatalaʻi ʻa e ngaahi ouau ʻo e fakatapui ko iá, ka he ʻikai ke lava ʻe ha lea fakamatelie ʻo fakamatalaʻi ʻa e ngaahi fakahā fakalangi ʻo e ʻaho fakangalongataʻa ko iá. Naʻe hā ʻa e kau ʻāngeló ki ha niʻihi, pea ongoʻi ʻe he tokotaha kotoa pē naʻe ʻi aí hono nofoʻia fakalangi ʻo e fakatahá, pea naʻe fakafonu ʻa e loto kotoa pē ʻaki ʻa e fiefia taʻefaʻalaua pea mohu nāunauʻia.”

“Ko e taha ʻo ʻeku ngaahi fuofua manatu melié ko e fakatapui ʻo e Temipalé. Naʻe fua hake kimautolu ʻe heʻeku tamaí ki hono fungá pea talamai e ʻuhinga naʻa mau ʻalu aí mo e ʻuhinga ʻo hono fakatapui ha fale ki he ʻOtuá. Pea neongo naʻá ku fuʻu kei siʻi he taimi ko iá, ka ʻoku ou manatuʻi lelei e meʻa naʻe hokó. ʻOku ou lava ʻo manatu ki he ngaahi meʻa he kuohilí mo sio ki heʻeku mamata kia Siosefa ko e Palōfitá he taimi ko iá, ʻokú ne tuʻu ʻo hiki hono ongo nimá ki he langí, naʻe tetea hono fofongá, pea tafe ʻa e loʻimatá mei hono fofongá ʻi heʻene lea ʻi he ʻaho fakangalongataʻa ko iá. Hangē naʻe loʻimataʻia e tokotaha kotoa pē. Naʻe fonu ʻaupito ʻa e falé, ko e tokolahi taha ʻo e fānaú ne nau huki pē ʻi he kakai lalahí; naʻe huki hoku tokouá ʻi he tangataʻeikí, pea ko au ʻi he fineʻeikí. ʻOku ou lava foki ʻo manatuʻi e ngaahi kofu naʻa mau tuí. Naʻe fuʻu kei siʻi ʻeku fakakaukaú he taimi ko iá ke mahino kakato kiate au ʻa hono mahuʻingá, ka ʻi he fakalau atu ʻa e taimí naʻe mahino ange ia kiate au, pea ʻoku ou houngaʻia moʻoni ne u maʻu e faingamālie ke kau ai.”

“ʻI he efiafi naʻá ku fakataha ai mo e kau ʻōfisa ʻo e siasí ʻi he fale ʻo e ʻEikí. Naʻe lilingi hifo ʻa e Laumālié—naʻá ku mamata ki he nāunau ʻo e ʻOtuá, hangē ha konga ʻao lahí, ʻoku ʻalu hifo ʻo nofoʻia e falé, pea fakafonu ʻa e meʻa tatau ʻo hangē ha tuʻoni matangi mālohí. Naʻá ku mamata foki ki he ngaahi ʻelelo mangamanga ʻo hangē ko e afí naʻe ʻi he tokolahi, … ʻi heʻenau lea ʻaki ha ngaahi lea kehekehe mo kikite.”

“[Naʻe] mātā ha ngaahi meʻa-hā-mai lahi. Naʻe mamata ha tokotaha ki ha konga ʻao ne ʻalu hifo ʻi he falé, ne ngingila ʻo tatau mo e ulo ʻa e laʻaá ʻi ha konga ʻao pea huelo koula. Naʻe mamata ha toko ua kehe ki ha toko tolu ne nau tētē holo ʻi he lokí mo ha ngaahi foʻi kī ngingila mo ha sēini ngingila ʻi honau nimá.”

“Naʻe ʻafio ai ʻa e ʻOtuá, ne ʻi ai ʻene kau ʻāngeló, naʻe nofoʻia e Laumālie Māʻoniʻoní ʻi he lotolotonga ʻo e kakaí … pea naʻe fonu mei he tumuʻaki honau ʻulú ki honau laʻivaʻé ʻa e mālohi mo e ueʻi ʻa e Laumālie Māʻoniʻoní.”

“[ʻI he taimi] naʻe ʻosi ai pea fakatapui ʻa e Temipalé … naʻe hoko ia ko e ongo ʻaho fakafiefia taha ʻo ʻeku moʻuí. Ko e himi naʻe faʻú ne feʻunga mo e meʻa naʻe hokó ʻKo e Laumālie ʻo e ʻOtuá.’ Ko e moʻoni naʻe nofoʻia ʻa e fale ko iá ʻe he Ivi Tākiekina Fakalangí. … Naʻá ku ongoʻi ko hēvani ia ʻi he māmaní.”