Tokāteline mo e Ngaahi Fuakava 98–101

Ko e niʻihi ʻo ʻetau ngaahi faingataʻa ʻi he moʻuí ʻoku tupu ia mei heʻetau ngaahi filí. ‘Oku tupu ha ngaahi meʻa kehe mei he ngaahi fili ʻa e niʻihi kehé. Pea taimi ʻe niʻihi ʻoku hoko ha ngaahi meʻa ko e konga pē ia ʻo e moʻui fakamatelié. Neongo pe ko e hā e tupuʻangá, ka ʻe lava ke tokoni e faingataʻá ke fakahoko e ngaahi taumuʻa fakalangí ʻi heʻetau tafoki ki he ʻOtuá.

Naʻe hoko moʻoni ʻeni ki he Kāingalotu ʻi Mīsulí ʻi he 1833, pea ʻoku hoko moʻoni ia kiate kitautolu he ʻahó ni. ʻI hoʻo lau e meʻa naʻe fakahā ʻe he ʻEikí ki he Kāingalotú ʻi he Tokāteline mo e Ngaahi Fuakava 98 mo e 101, fakalaulauloto ki he founga ʻoku kaunga ai ʻEne pōpoakí ki he ngaahi ʻahiʻahi pe faingataʻa kehekehe te ke ala maʻú. Ko ha ngaahi fehuʻi ʻeni mo e ngaahi maʻuʻanga tokoni ke tokoni atu.

Kapau ko e faingataʻá ko ha ola ia ʻo e:

• Ngaahi fili fakatāutahá: Ko e hā ha faleʻi—mo ha ngaahi talaʻofa—ʻokú ke maʻu ʻi he Tokāteline mo e Ngaahi Fuakava 98:11–12; 101:1–9? Ko e hā ʻokú ke ako mei he ngaahi veesi ko ʻení kau ki he Tamai Hēvaní mo Sīsū Kalaisí? ʻOkú ke ongoʻi ko e hā naʻe mei finangalo ʻa e ʻOtuá ke ke fakahokó?

• Ko e ngaahi fili ʻa e niʻihi kehé: Ko e hā ha fakafiemālie ʻokú ke maʻu ʻi he Tokāteline mo e Ngaahi Fuakava 98:1–3, 22; 101:10–16, 22? Ko e hā ʻa e founga ʻoku finangalo ʻa e ʻEikí ke tau tali ʻaki ki he ngaohikoviá, houtamakí, pe fakatangá? (Vakai, Tokoni ʻo e Moʻuí, “Ngaohikovia,” Gospel Library; Ngaahi Tefitó mo e Ngaahi Fehuʻí, “Ngaohikoviá,” Gospel Library.) Ko e hā ʻoku akoʻi mai ʻe he ngaahi veesi ko ʻení fekauʻaki mo e founga ke ke falala ai ki he ʻEikí?

• Ko e ngaahi faingataʻa ʻo e moʻui fakamatelié: Ko e hā ha fakakaukau ʻokú ke maʻu mei he Tokāteline mo e Ngaahi Fuakava 98:1–3; 101:22–31, 36? Ko e hā ʻokú ke ako mei hoʻo ngaahi faingataʻá? Ko e hā ʻokú ke fai ke fakaafeʻi ai e tokoni ʻa e ʻOtuá? ʻOkú Ne tokoniʻi fēfē koe?

Ke ako lahi ange ki he founga ʻe lava ai ʻe he ʻOtuá ʻo ngaohi ke “fengāueʻaki fakataha ʻa e ngaahi meʻa kotoa pē ʻa ia kuo fakamamahiʻi ʻaki [koé] koeʻuhi ko [hoʻo] leleí” (Tokāteline mo e Ngaahi Fuakava 98:3), fakakaukau ke ako e pōpoaki ʻa ʻEletā ʻAnitoni D. Pākiní ko e “Manatuʻi ʻa Hoʻo Kāingalotu ʻOku Mamahiʻiá, ʻE Homau ʻOtua” (Liahona, Nōvema 2021, 103–5). Te ke lava ʻo kumi ha potufolofola ʻi heʻene pōpoakí ʻe tokoni ke mahino kiate koe ʻa e founga ʻoku fakaafeʻi ai koe ʻe he Fakamoʻuí ke ke vakai ki hoʻo ngaahi faingataʻaʻiá. Ko e hā ha ngaahi founga kuo ngāue fakataha ai ho ngaahi ʻahiʻahí ki hoʻo leleí pe fakahoko e ngaahi taumuʻa ʻa e ʻOtuá?

Vakai foki, Loma 8:28; 2 Nīfai 2:2; Tokāteline mo e Ngaahi Fuakava 90:24; D. Todd Christofferson, “Haʻu ki Saione,” Liahona, Nōvema 2008, 37–40; “Trial of Adversity,” “Feeling the Lord’s Love and Goodness in Trials,” “The Refiner’s Fire” (vitiō), ChurchofJesusChrist.org.

6:47

2:51

4:21

5:0

Naʻe akonaki ʻa Palesiteni Lāsolo M. Nalesoni ʻo pehē: “ʻOku totonu ke fokotuʻu ʻe he kau muimui ʻo Sīsū Kalaisí ʻa e sīpinga ke muimui kotoa ki ai ʻa e māmaní. ʻOku ou kōlenga atu ke mou fai ʻa e meʻa kotoa ʻe malavá ke fakangata ai ʻa e ngaahi fekeʻikeʻi fakataautaha ʻoku lolotonga hoko ʻi homou lotó mo hoʻomou moʻuí” (“Ko e Mālohi ʻo e Ivi Fakalaumālié,” Liahona, Mē 2022, 97).

Neongo he ʻikai kaunga e meʻa kotoa pē ʻi he Tokāteline mo e Ngaahi Fuakava 98:23–48 ki hoʻo fengāueʻaki fakataautaha mo e niʻihi kehé, ka ko e hā ha ngaahi tefitoʻi moʻoni ʻokú ke maʻu te ne lava ʻo tataki koe ke fakangata ʻa e ngaahi fekeʻikeʻi fakatāutaha ʻi hoʻo moʻuí? Te ke lava ʻo maʻu ha toe moʻoni lahi ange ʻi ha hiva fekauʻaki mo e melinó pe fakamolemolé, ʻo hangē ko e “ʻOku Aata ʻa e Moʻoní” (Ngaahi Himí, fika 170).

Naʻe foaki ʻa e ngaahi fakahā ʻi he vahe 99 mo e 100 ki he kakai naʻa nau maʻu ha ngaahi fatongia mahuʻinga ʻi he Siasí ka naʻa nau toe hohaʻa foki ki honau ngaahi fāmilí. Ko e hā ha meʻa ʻokú ke maʻu ʻi he ngaahi fakahā ko ʻení ʻe ala tokoni kiate kinautolu? Ko e hā ha pōpoaki ʻa e ʻEikí maʻau ʻi he ngaahi fakahā ko ʻení?

Vakai foki, “John Murdock’s Missions to Missouri” in “‘I Quit Other Business’: Early Missionaries” mo e “A Mission to Canada,” ʻi he Revelations in Context, 87–89, 202–7.

ʻOku fakamatalaʻi ʻe he talanoa fakatātā ʻi he Tokāteline mo e Ngaahi Fuakava 101:43–62 ʻa e ʻuhinga naʻe fakaʻatā ai ʻe he ʻEikí ke tuli e Kāingalotú mei Saioné. ‘I hoʻo lau e ngaahi veesi ko ʻení, ʻokú ke vakai nai ki ha faʻahinga founga ʻokú ke tatau ai mo e kau tamaioʻeiki ʻi he talanoa fakatātaá? Te ke fakahaaʻi fēfē nai ki he ʻOtuá ʻokú ke “loto ke fakahinohinoʻi [koe] ʻi ha hala totonu mo lelei koeʻuhí ko [ho] fakamoʻuí”? (vakai, veesi 63–65).

• Te ke lava ʻo kamataʻi ha fealēleaʻaki ʻaki haʻo fehuʻi ki hoʻo fānaú fekauʻaki mo ha niʻihi ʻo e ngaahi faingataʻa ʻoku fehangahangai mo e fānau ʻi honau toʻú. Te mou lava leva ʻo lau fakataha ʻa e Tokāteline mo e Ngaahi Fuakava 98:1–3 pea talanoa fekauʻaki mo e founga ʻe lava ke liliu ai ʻe Sīsū Kalaisi ʻa e ngaahi faingataʻá ki he ngaahi tāpuakí. Te ke lava ʻo vahevahe mo hoʻo fānaú ha ngaahi sīpinga ʻo e founga kuó Ne liliu ai ho ngaahi faingataʻaʻiá ke hoko ko ha ngaahi tāpuakí.

Fakatokangaʻi ange: ʻI hoʻo akoʻi ki hoʻo fānaú ʻa e mahuʻinga ʻo e fakamolemolé, fakapapauʻi ʻoku mahino foki kiate kinautolu kapau ʻe fakamamahiʻi kinautolu ʻe ha taha, ʻoku totonu ke nau talaange maʻu pē ki ha tokotaha lahi falalaʻanga.

• ʻE lava ke tokoni atu ʻa e vahe 34 mo e 35 ʻi he Ngaahi Talanoa ʻo e Tokāteline mo e Ngaahi Fuakavá (128–34) ke ke akoʻi fekauʻaki mo e anga naʻe fakahoko ki he Kāingalotu ʻi Mīsulí ʻi he 1833. Te ke lava mo hoʻo fānaú ʻo talanoa fekauʻaki mo e ongo naʻe mei maʻu ʻe he Kāingalotu ko ʻení. Te mou lava leva ʻo lau fakataha ʻa e Tokāteline mo e Ngaahi Fuakava 98:23, 39–40 ke ʻiloʻi pe ko e hā ne finangalo e ʻEikí ke nau fakahokó. Te ke lava mo hoʻo fānaú ʻo talanoa ki he ngaahi taimi naʻe fiemaʻu ai ke ke fakamolemoleʻi ha taha pea mo e founga naʻe tokoniʻi ai koe ʻe he Fakamoʻuí.

• Te ke lava foki ʻo fakaʻaliʻali ki hoʻo fānaú ha ʻū fakatātā ʻo ha fofonga fiefia mo ha fofonga mamahi. alanoa fekauʻaki mo ha ngaahi tūkunga ʻoku taʻeʻofa ai ha taha, pea fokotuʻu mai ha ngaahi founga ke tali ʻaki. Tokoniʻi hoʻo fānaú ke nau fili pe ʻe ʻai ʻe he tali takitaha ke nau fiefia pe mamahi ʻaki ʻenau tuhu ki he fofonga totonú. Ko e hā ʻoku fiemaʻu ai ʻe Sīsū ke tau fakamolemoleʻi e kakaí, naʻa mo kinautolu ʻoku ʻikai fai lelei kiate kitautolú?

2:42

2:10

• Hili hono lau ʻa e Tokāteline mo e Ngaahi Fuakava 101:16, tokoni ke ʻiloʻi ʻe hoʻo fānaú ʻa e ngaahi ongo nonga ʻoku maʻu ʻi he taimi ʻoku tau tangutu maʻu ai ʻo fakakaukau kia Sīsuú—hangē ko ʻení, ʻi heʻetau lotu pe maʻu ʻa e sākalamēnití. Te mou lava foki ʻo hivaʻi fakataha ha foʻi hiva fekauʻaki mo e loto-ʻapasiá, hangē ko e “Loto ʻApasia” pe “To Think about Jesus” (Tohi Hiva ʻa e Fānaú, 11, 71). Te tau ongoʻi fēfē ʻEne melinó ʻi hotau ʻapí?

• Mahalo naʻa mahuʻingaʻia hoʻo fānaú ʻi he ako fekauʻaki mo e fōtunga ʻo e moʻuí ʻi he toe hāʻele mai ai ʻa Sīsū Kalaisí. Lau fakataha ʻa e Tokāteline mo e Ngaahi Fuakava 101:23–32, pea talanoa ki he ngaahi meʻa ʻoku nau maʻu ʻi he ngaahi veesi ko ʻení te ne ʻomi kiate kitautolu ʻa e fiefiá ʻi Heʻene hāʻele maí. Ko e hā ʻoku ʻaonga ai ke tau ʻilo fekauʻaki mo e ngaahi meʻá ni ʻi he taimi ʻoku tau faingataʻaʻia aí?