Tokāteline mo e Ngaahi Fuakava 85–87

Fakatokangaʻi ange ʻa e meʻa naʻe finangalo ʻa e ʻEikí ke fakakau ʻi he “hisitōlia” ne fakamatalaʻi ʻi he Tokāteline mo e Ngaahi Fuakava 85:1–2. ʻOkú ke pehē ko e hā ʻokú Ne finangalo ai ke tauhi ʻe Hono Kāingalotú ha hisitōliá? Ko e hā te ke lava ʻo lekooti fekauʻaki mo e “anga [hoʻo] moʻuí, mo [hoʻo] tuí mo e ngaahi ngāué” ʻa ia ʻe lava ke hoko ko ha tāpuaki kiate koe mo e ngaahi toʻu tangata ʻi he kahaʻú? ʻE tokoni fēfē hono tauhi ha hisitōlia fakatāutahá ke ke haʻu ai kia Kalaisi?

Vakai foki, “Ngaahi Tohinoá: ‘Mahulu Hake Honau Mahuʻingá he Koulá,’” Ngaahi Akonaki ʻa e Kau Palesiteni ʻo e Siasí: Uilifooti Utalafi (2011), 141–49; “Turning Hearts” (vitiō), ChurchofJesusChrist.org.

3:6

Fakalaulauloto ki he ngaahi lea naʻe fakaʻaongaʻi ʻe Siosefa Sāmita ke fakamatalaʻi ʻaki e Laumālié ʻi he Tokāteline mo e Ngaahi Fuakava 85:6. Ko e hā ha founga ʻoku “kihiʻi” mo “siʻi” ai e leʻo ʻo e Laumālié? Fakakaukau ki he toe ngaahi fakamatala ko ʻeni naʻe ʻomi ʻia Siosefa Sāmitá: Tokāteline mo e Ngaahi Fuakava 6:22–24; 8:2–3; 9:7–9; 11:12–13; 128:1. ʻOku folofola fēfē ʻa e Laumālié kiate koé?

Vakai foki, Luke 24:32; Mōsaia 5:2; ʻAlamā 32:28; Hilamani 5:30; Tokāteline mo e Ngaahi Fuakava 6:22–23; 11:12–13.

5:2

ʻOku ʻi he Tokāteline mo e Ngaahi Fuakava 86 ha fakaʻuhinga ʻo e talanoa fakatātā ʻo e uité mo e teá, ʻoku maʻu ʻi he Mātiu 13:24–30, 37–43. ʻI hoʻo ako fekauʻaki mo e ʻuhinga ʻo e talanoa fakatātā ko ʻení, fakakaukau ke fakafonu ha tēpile hangē ko ʻení:

Ko ha toe ngaahi fehuʻi ʻeni ke fakakaukau ki ai:

• Hili hono fakaʻuhingaʻi e talanoa fakatātaá, naʻe folofola ʻa e ʻEikí kau ki he lakanga fakataulaʻeikí, fakafoki mai ʻo e ongoongoleleí, mo e fakamoʻui ʻa Hono kakaí (vakai, veesi 8–11). Ko e hā ha ngaahi fehokotaki ʻokú ke vakai ki ai ʻi he ngaahi kaveingá ni pea mo e talanoa fakatātā ʻo e uité mo e teá?

• Ko e hā ho fatongia ʻi he hoko ko ha “maama ki he kau Senitailé” mo “ha fakamoʻui ki [he] kakai [ʻa e ʻEikí]”? (veesi 11).

ʻOku fakatokanga mai ʻa e kikite ʻi he vahe 87 fekauʻaki mo e ngaahi fakatuʻutāmaki fakatuʻasino ʻoku fekauʻaki mo e taú ʻi he ngaahi ʻaho fakaʻosí. Ka ʻoku toe kaunga foki ʻa e faleʻi ʻi he fakahā ko ʻení ki he ngaahi fakatuʻutāmaki fakalaumālié. Fakalaulauloto ki ha ngaahi fehuʻi hangē ko ʻení:

• Ko e kikité ko ha fakahā ia mei he ʻOtuá ki ha palōfita, ʻo faʻa fekauʻaki mo e kahaʻú. Ko e hā ha ngaahi sīpinga ʻo e ngaahi kikite kuo ʻomi ʻe he kau palōfita ʻo e kuonga muʻá mo onopōní? (vakai, Sione 3:14; Mōsaia 3:5; Hilamani 14:2–6). Naʻe fakahoko fēfē ia? (vakai, Luke 23:33; Mātiu 15:30–31; 3 Nīfai 1:15–21).

• Ko e hā ʻa e ngaahi tāpuaki ʻo hono tali e ngaahi kikite ʻa e kau palōfita ʻa e ʻOtuá?

ʻI he fakakaukau ko iá, lau ʻa e vahe 87. (Mahalo te ke fie lau ʻa e talateu ki he fokotuʻutuʻu ko ʻení ki ha ngaahi puipuituʻa fakahisitōlia.) Ko e hā ʻokú ke ako fekauʻaki mo e kikité mei he fakahā ko ʻení mo e founga naʻe fakahoko ai iá? Ko e hā te ke talaange ki ha taha ʻoku veiveiua ʻi ha kikite koeʻuhí ʻoku ʻikai fakahoko ia he taimi pē ko iá?

Ko e hā e faleʻi ʻoku ʻomi ʻe he ʻEikí ʻi he veesi 8? Ko e hā hoʻo “ngaahi potu toputapu” ʻokú ke maʻu ai e nongá mo e malú? Ko e hā ʻokú ne ʻai ha feituʻu ke toputapú? Makehe mei he ngaahi feituʻu fakatuʻasinó, mahalo ʻoku ʻi ai ha ngaahi taimi toputapu, founga toputapu, pe ngaahi fakakaukau toputapu te ne lava ʻo ʻomi ʻa e nongá. Hangē ko ʻení, ʻe lava fēfē ke hoko e ngaahi lea ʻa e kau palōfita ʻa e ʻOtuá ko ha potu toputapu kiate koe? ʻOku ʻuhinga ki he hā ke “tuʻu” pea “ʻoua ʻe hiki” mei he ngaahi feituʻú ni?

Vakai foki, “Feituʻu ʻOku ʻI ai ʻa e ʻOfá,” Tohi Hiva ʻa e Fānaú, 76–77; Kau Māʻoniʻoní, 1:177–78; “Peace and War,” ʻi he Revelations in Context, 158–64.

• Ko e hā ʻe lea ʻaki ʻe hoʻo fānaú kapau ʻe fehuʻi ange ʻe ha taha pe ʻoku nau ʻiloʻi fēfē ʻa e taimi ʻoku folofola ange ai e Laumālie Māʻoniʻoní kiate kinautolú? Fakaafeʻi kinautolu ke nau laukonga fekauʻaki mo ha founga ʻe taha ne fakamatalaʻi ʻaki ʻe Siosefa Sāmita e leʻo ʻo e Laumālié ʻi he Tokāteline mo e Ngaahi Fuakava 85:6. Te nau lava leva ʻo ako ke fanongo mo lea ʻi ha kihiʻi leʻo siʻi. Te ke lava foki ʻo vahevahe ha ngaahi aʻusia ʻi he taimi naʻe folofola atu ai ʻa e Laumālié ʻi ha kihiʻi leʻo siʻí.

• Ke tokoni ke mahino ki hoʻo fānaú ʻa e kupuʻi lea ko e “kihiʻi leʻo siʻí,” te ke lava ʻo tā leʻo siʻi ha foʻi hiva ʻa e fānaú, hangē ko e “Ko e Laumālie Māʻoniʻoní” (Tohi Hiva ʻa e Fānaú, 56). Kole ki ha taha ʻi he fānaú ke ne mateʻi mai pe ko e hā e foʻi hiva ko iá kae longoaʻa e toenga ʻo e fānaú. Hili iá te ke lava leva ʻo toe tā ʻa e foʻi hivá kae ʻikai toe fai ha longoaʻa. Ko e hā ha ngaahi meʻa ʻoku longoaʻa te tau lava ʻo toʻo mei heʻetau moʻuí ke tau ongoʻi lahi ange ai ʻa e Laumālié?

• Ke tokoni ke mahino ki hoʻo fānaú ʻa e talanoa fakatātā ʻoku fakamatalaʻi ʻi he vahe 86, te ke lava ʻo teuteuʻi ha fanga kiʻi tā pe tā fakatātā ʻo e uité pea fufuuʻi takai ia ʻi he lokí. Fakamatalaʻi ange ki hoʻo fānaú ʻa e talanoa fakatātā ʻo e uité mo e teá (vakai, Mātiu 13:24–30), pea lau fakataha e folofola ʻa e ʻEikí ʻi he Tokāteline mo e Ngaahi Fuakava 86:1–7. ʻE lava leva hoʻo fānaú ʻo tānaki e ʻū fakatātā ʻo e uité naʻe fufūʻí pea tohiʻi ai ha hingoa ʻo ha taha te nau lava ʻo “tānaki” kia Sīsū Kalaisi. ʻOku ʻuhinga ki he hā ke tānaki e kakaí kia Sīsū Kalaisi? Ko e hā ha ngaahi founga te tau lava ʻo fai ai ʻeni?

• Ko ha ngaahi fehuʻi ʻeni te ke lava ʻo ʻeke ki hoʻo fānaú ʻi hoʻomou aleaʻi ʻa e Tokāteline mo e Ngaahi Fuakava 86:11: ʻOku faitāpuekina fēfē kitautolu ʻe he māmá? ʻOku fēfē ʻa e taimi ʻoku ʻikai ke tau maʻu ai ha māmá? ʻE founga fēfē ʻetau hoko ko ha maama ki he kakai kehé? Tokoniʻi hoʻo fānaú ke nau fakakaukau ki ha ngaahi founga te tau lava ai ʻo “fai atu ʻi [he] angalelei [ʻa Sīsuú]” pea vahevahe ia mo e niʻihi kehé.

• Lau fakataha ʻa e Tokāteline mo e Ngaahi Fuakava 87:6 ke ʻilo ki he ngaahi meʻa naʻe folofola e ʻEikí ʻe hoko ʻi he ngaahi ʻaho kimui ní. Hili iá te mou lava ʻo talanoa feauʻaki mo ha niʻihi ʻo e ngaahi faingataʻa ʻokú ke fehangahangai mo ia mo hoʻo fānaú. Ko e hā naʻe folofola ʻaki ʻe he ʻEikí ʻi he verse 8, te tau lava ʻo fai lolotonga e ngaahi taimi faingataʻá?

• Tokoniʻi hoʻo fānaú ke nau faʻu ha lisi ʻo e ngaahi potu toputapú, ngaahi fakakaukau mo e ngaahi angafai māʻoniʻoni ʻe lava ʻo tokoni ke nau fehangahangai mo e ngaahi fakatuʻutāmaki fakalaumālié. Ke maʻu ha ngaahi fakakaukau, vakai ki he ongo vitiō “Standing in Holy Places” mo e “Tuʻu ʻi he Ngaahi Potu Toputapú—Tupu ʻi Homou Tōʻangá” (Gospel Library).

  

  5:36

  

  4:36