Tokāteline mo e Ngaahi Fuakava 71–75

ʻE lava ke fakatupu loto-hohaʻa e taimi ʻoku fakaangaʻi pe manukiʻi ai ʻe he kakaí hoʻo tui ki he Fakamoʻuí, ʻEne ongoongoleleí, pe ko Hono Siasí. ʻI he taimi ʻoku hoko ai iá, ko e hā hoʻo meʻa ʻe faí? Naʻe hoko ha meʻa tatau ʻi ʻOhaiō ʻi he 1831 (vakai ki he ʻuluʻi vahe ki he Tokāteline mo e Ngaahi Fuakava 71). Ko e hā naʻe fakahā ʻe he ʻEikí kia Siosefa Sāmita mo Sitenei Likitoni ke fakahokó ʻi he Tokāteline mo e Ngaahi Fuakava 71? Mahalo te ke lava ʻo lisi e ngaahi fakahinohino naʻe ʻoange ʻe he ʻEikí kiate kinauá mo e ngaahi tāpuaki naʻá Ne talaʻofá.

Makehe mei hono ako ʻo e vahe 71, te ke lava foki ʻo vakaiʻi ʻa e founga naʻe tali ʻaki ʻe he Fakamoʻuí ki Hono kau fakaangá lolotonga ʻEne ngāue fakafaifekau ʻi he māmaní. Ko ha ngaahi sīpinga ʻeni: Mātiu 22:15–22; 26:59–64; Sione 10:37–38. Ko e hā ʻokú ke ako meiate Iá? Ko e hā mo ha toe fakakaukau ʻokú ke maʻu mei he Mātiu 18:15; ʻEfesō 4:31–32; 2 Tīmote 3:12; Sēmisi 1:19?

ʻE fakaʻaongaʻi fēfē nai ʻEne faleʻí ki he ngaahi tūkunga ʻokú ke fehangahangai mo ia he ʻaho ní? Mahalo te ke fakakaukauʻi ha ngaahi founga ke fakatonutonu ai ʻi he melino ʻa e loí ʻi hoʻo lea pē ʻaʻau. Hangē ko ʻení, te ke lava ʻo kamata ʻaki haʻo fakahaaʻi hoʻo fakaʻapaʻapaʻi e ngaahi fakakaukau ʻa e tokotaha ko eé, pea te ke lava leva ʻo vahevahe ʻi ha founga fakatōkilalo mo angaʻofa ʻa e meʻa ʻokú ke tui ki ai fekauʻaki mo Sīsū Kalaisi mo ʻEne ngaahi akonakí. Ke teuteu ki he ngaahi meʻa ko ʻení, mahalo te ke lava ʻo ʻahiʻahi fakahoko ʻa e founga ko ʻení mo ho ngaahi kaungāmeʻá pe kau mēmipa ʻo e fāmilí.

Vakai foki, Topics and Questions, “Helping Others with Questions,” Gospel Library; Dallin H. Oaks, “Ko e ʻOfa mo Feohi mo e Niʻihi Kehé Neongo e Faikehekehé,” Liahona, Nōvema 2014, 25–28; Jörg Klebingat, “Tuʻunga Fakaākonga Loto-toʻa ʻi he Ngaahi ʻAho Kimui ní,” Liahona, Mē 2022, 107–10.

‘I he taimi naʻe uiuiʻi ai ʻa Niueli K. Uitenī ke hoko ko ha pīsopé, naʻe kiʻi kehe hono ngaahi fatongiá mei he kau pīsope ko ia ʻi he kuonga ní. Hangē ko ʻení, naʻe tokangaʻi ʻe Pīsope Uitenī e fakatapui ʻo e kelekelé mo e ngofua ke nofo ʻi he fonua ko Saioné ʻi Mīsulí. Ka ʻi hoʻo lau fekauʻaki mo hono uiuiʻí ʻi he Tokāteline mo e Ngaahi Fuakava 72, mahalo te ke fakatokangaʻi ha ngaahi fehokotaki ki he meʻa ʻoku fai ʻe he kau pīsopé ʻi he kuonga ní—ʻi he laumālie honau ngaahi fatongiá, kapau ʻoku ʻikai ko e fakaikiikí.

Hangē ko ʻení, ko e hā ha ngaahi founga ʻokú ke “fai [ai] ha fakamatala” ki hoʻo pīsopé? (veesi 5). ʻI hotau kuongá ni, ʻe lava ke kau ʻi he “fale tukuʻanga koloa ʻo e ʻEikí” ʻa e ngaahi foaki, ngāue tokoni, mo e ngaahi talēniti ʻa e kau mēmipa ʻo e uōtí (vakai, veesi 10, 12). Te ke lava fēfē ʻo tokoni ki he fale tukuʻanga koloa ko iá?

Kuo tāpuekina fēfē koe mo ho fāmilí ʻe he ʻEikí ʻo fakafou ʻi he ngāue ʻa ha pīsope?

Vakai foki, Quentin L. Cook, “Kau Pīsopé—Kau Tauhi Sipi ki he Kotoa ʻo e Tākanga ʻa e ʻEikí,” Liahona, Mē 2021, 56–60.

ʻI he foki ʻa Siosefa Sāmita mo Sitenei Likitoni mei heʻena ngāue fakafaifekaú (vakai, Tokāteline mo e Ngaahi Fuakava 71), naʻe fakahā ange ʻe he ʻEikí ke hokohoko atu ʻena liliu ʻa e Tohi Tapú (vakai, Fakahinohino ki he Ngaahi Folofolá, “Liliu ʻa Siosefa Sāmitá (LSS),” Gospel Library). Ka naʻe ʻikai ʻuhinga ia naʻá Ne loto ke taʻofi ʻena vahevahe ʻa e ongoongoleleí. Ko hono moʻoní, ko ha konga ia ʻo e moʻui ʻa ha ākongá.

ʻI hoʻo lau e Tokāteline mo e Ngaahi Fuakava 73, fakakaukau ki he founga te ke lava ʻo ʻai hono vahevahe ʻa e ongoongoleleí ko ha konga, “ʻaonga ke fai” (veesi 4)—pe moʻoni—ʻo hoʻo moʻuí makehe mei hoʻo ngaahi fatongia kehé.

Naʻe fakataumuʻa e fakahā ʻi he vahe 75 ki he kakai naʻa nau “foaki [honau] hingoá ke ʻalu atu ʻo fakahā [e] ongoongolelei [ʻa e Fakamoʻuí]” (veesi 2). Ko e founga ʻe taha ke ako ai e fakahā ko ʻení ko hono ʻai ha lisi ʻe ua: (1) founga ke vahevahe lelei ai e ongoongoleleí mo e (2) founga hono tāpuekina mo poupouʻi kitautolu ʻe he ʻEikí ʻi heʻetau fai iá.

ʻOkú ke pehē ʻoku ʻuhinga ki he hā ke “tatali” pe “nofo noa” ʻi hono vahevahe ʻo e ongoongoleleí? ʻOku fēfē ʻa e “ngāue ʻaki [ho] tūkuingatá”? (veesi 3).

Vakai foki, “Te U Fai Ho Finangaló,” Ngaahi Himí, fika 171.

• Te ke lava ʻo fakaʻaongaʻi e ʻuluʻi vahe ki he Tokāteline mo e Ngaahi Fuakava 71 pe “Vahe 25: Ko e ʻAlu ʻa Siosefa Sāmita mo Sitenei Likitoni ʻo Ngāue Fakafaifekaú” (ʻi he Ngaahi Talanoa ʻo e Tokāteline mo e Ngaahi Fuakavá, 96, pe ko e vitiō fekauʻaki mo iá ʻi he Gospel Library) ke akoʻi hoʻo fānaú fekauʻaki mo e ngaahi tūkunga naʻá ne tākiekina ʻa e vahe 71. Tokoni leva ke nau ʻiloʻi ʻi he veesi 1 ʻa e meʻa naʻe finangalo ʻa e ʻEikí ke fakahoko ʻe Siosefa mo Sitenei fekauʻaki mo e “loto-taaufehiʻa” ki he Siasí. Ko e hā e founga naʻá Ne folofola te Ne tokoniʻi ai kinauá? Te tau hangē fēfē ko Siosefa mo Siteneí?

  

  0:45

• Te ke lava foki ʻo hivaʻi ha foʻi hiva ʻokú ne ueʻi hoʻo fānaú ke nau tauhi pau ki he Fakamoʻuí, hangē ko e “Tuʻu ʻI he Totonú” (Tohi Hiva ʻa e Fānaú, 81). Tokoni ke fakaangaanga hoʻo fānaú hono vahevahe ʻa e meʻa ʻoku nau ʻilo fekauʻaki mo Sīsū Kalaisí.

• ʻE lava ʻe hono lau fakataha ʻa e Tokāteline mo e Ngaahi Fuakava 72:2 ʻo ʻomi ha faingamālie ke aleaʻi ai e ʻuhinga ʻoku ʻomi ai ʻe he ʻEikí ha kau pīsopé (vakai foki, “Vahe 17: Ko e Ongo ʻUluaki Pīsopé ʻi he Siasí,” ʻi he Ngaahi Talanoa ʻo e Tokāteline mo e Ngaahi Fuakavá, 64–66, pe ko e vitiō fekauʻaki mo iá ʻi he Gospel Library). Te ke lava mo hoʻo fānaú ʻo kumi ha ngaahi fakatātā pe meʻa ʻokú ne fakafofongaʻi e ngaahi fatongia ʻo ha pīsopé. ʻOku ʻoatu ha ngaahi fakakaukau ʻe he fakatātā mo e peesi ʻekitivitī ʻi he ngataʻanga ʻo e fokotuʻutuʻu ko ʻení. Hili iá, te mou lava ʻo talanoa fakataha fekauʻaki mo e kau pīsope kuo mou ʻiló mo e founga kuo tāpuekina ai ʻe he ʻEikí homou fāmilí ʻi heʻenau ngāué.

  

  1:45

• Ke talanoa fekauʻaki mo e faikehekehe ʻo e “nofo noá” mo e “ngāue ʻaki [hotau] tūkuingatá,” mahalo te ke lava ʻo fili ha ngaahi ngāue tokoni pe ngāue fakaʻapi pe fakaafeʻi hoʻo fānaú ke fakatātaaʻi hono fakahoko fakapikopiko iá pea mo e fakahoko ʻaki honau tūkuingatá. ʻI hoʻo lau ʻa e “ʻoua foki ʻe nofo noa” ʻi he Tokāteline mo e Ngaahi Fuakava 75:3, ʻe lava hoʻo fānaú ʻo fakahaaʻi e founga te nau fakahoko fakapikopiko ai e ngaahi ngāué. ʻI hoʻo lau “kae ngāue ʻaki homou tūkuingatá,” te nau lava ʻo fakahaaʻi e founga ʻenau ngāue mālohí. Ko e hā ʻoku mahuʻinga ai ke tau fai ʻa hotau lelei tahá ʻi he taimi ʻoku tau ngāue ai maʻá e ʻEikí?

• ʻI he pōpoaki ʻa Palesiteni Tieta F. ʻUkitofa ko e “Tefitoʻi Moʻoni ʻe Ua ki ha Faʻahinga ʻEkonōmika pē” (Liahona, Nōvema 2009, 55–58), naʻá ne fai ha talanoa ʻe ua fekauʻaki mo e ngāué. Mahalo te ke lava ʻo vahevahe ia mo hoʻo fānaú pea talanoa ki he ongo ʻoku maʻu ʻi heʻetau ʻiloʻi kuo tau ngāue mālohi mo fai hotau lelei tahá.