Nkyerɛkyerɛ na Ahyɛmudzi 41–44

Afe 1831 ahyɛse no, nna Ahotseweefo no rehyɛ ase aboa ano wɔ Ohio. Nna hɔn enyi da kwan kɛse dɛ wobɛgye mbra no a Nyame bɔɔ ho anohoba dɛ Obeyi akyerɛ wɔ hɔ no (hwɛ Nkyerɛkyerɛ na Ahyɛmudzi 38:32). Mbom odzi kan, Ɔkyerɛkyerɛɛ N’esuafo no mbrɛ wobesi bɛyɛ ahoboa agye Ne mbra. Ebɛn nkyerɛkyerɛ na ihu no wɔ Nkyerɛkyerɛ na Ahyɛmudzi 41:1–6 mu a nkyɛ ɔbɔboa Ahotseweefo no ma wɔagye Nyankopɔn ne mbra? Obesi dɛn na nkyerɛkyerɛ yinom bɔboa wo ma agye ahyɛdze efi No hɔ?

Hwɛ “A Bishop unto the Church,” wɔ Revelations in Context, 77–83 so.

Ahotseweefo no susuu dɛ nyikyerɛ a wohu no wɔ Nkyerɛkyerɛ na Ahyɛmudzi 42:1–72 no kã dza no ho hia ankasa mu kor ho. Ɔkã nyikyerɛ a wodzii kan dze pue guado no ho. Mfe pii mu no, Ahotseweefo no frɛɛ no “mbra no” ara. Ewuradze ne mbrasɛm anaa mbra ne nyinara nnyi ɔfã no mu, naaso ɔfata dɛ yɛdwendwen siantsir a nkyerɛkyerɛ yinom no ho hiaa Asɔr no a wɔdze asan ananmu aba fofor no dodow no. Dɛn ntsi na wohia ma ndɛ?

Osiandɛ ɔfã 42 ɔwar kakra ntsi, ibotum esusu esũa no nkakrakakra, tse dɛ ma odzi do no. Hwehwɛ nkyerɛkyerɛ biara a wɔkyerɛ wɔ kor biara mu, na susu mbrɛ mbra yinom yi yɛ sɛnkyerɛdze dɛ Ewuradze dɔ No nkorɔfo.

• Nyiyimu 4–9, 11–17, 56–58

• Nyiyimu 18–29

• Nyiyimu 30–31

• Nyiyimu 40–42

• Nyiyimu 43–52

Dɛn ntsi na Ewuradze ma hɛn mbra na mbrasɛm? Ebɛn akwan na inyim mbrasɛm no na iridzi do no ehyira wo?

Dɛ ɔkã mbra a woyii kyerɛɛ wɔ ɔfã 42 ho no, Ewuradze kyerɛkyerɛɛ N’esũafo no mbrɛ wobesi botum, tse dɛ tsetse Christ akãdofo, enya “hɔn ndzɛmba nyina kwasafodze” (Ndwuma 2:44; 4 Nephi 1:3), a “ohyianyi biara nnyi hɔn mu” (Moses 7:18). Ebɛnadze na isũa fi Nkyerɛkyerɛ na Ahyɛmudzi 42:30–42 mu a ɔfa mbrɛ Ahotseweefo no dze etuhoakyɛ mbra no bɔbɔ bra? (Etuhoakyɛ kyerɛ dɛ etu biribi si nkyɛn ma botae krɔnkrɔn bi.)

Yennyi “ndzɛmba nyina kwasafodze” ndɛ, naaso Latter-day Saintfo dzi ahyɛmu wɔ temple mu dɛ wɔdze etuhoakyɛ mbra no bɔbɔ bra. Ibesi dɛn botu dza Nyankopɔn dze ama wo no esi hɔ ehyira nkorɔfo a wohia? Bia erotow ndwom tse dɛ “Because I Have Been Given Much” (Hymns, nkanee 219) no botum ama wo adwenkyerɛ.

Hwɛ Sharon Eubank, “I Pray He’ll Use Us,” Liahona, Ɔberɛfɛw 2021, 53–56; “The Law,” wɔ Revelations in Context, 93–95 so.

Susu dɛ enye asɔrba ɔfofornyi a ɔyɛ no enyigye kɛse dɛ oehu dɛ Asɔr yi nyikyerɛ na ɔma no kwankyerɛ ridzi nkɔmbɔ. Ibesi dɛn dze Nkyerɛkyerɛ na Ahyɛmudzi 43:1–16 aboa no ma oesũa Ewuradze no nhwɛdo a wɔdze dua No nkɔnhyɛnyi do dze ma N’Asɔr kwankyerɛ? Ibesi dɛn dze Nkyerɛkyerɛ na Ahyɛmudzi 42:61, 65–68 akyerɛkyerɛ irinya ankorankor nyikyerɛ ho asɛm?

“Ebɛn somdwee ndzɛmba” na enyigyedze na edua No Sunsum mu enya efi Ewuradze hɔ?

Ama eedze esũa mbrɛ Asɔr baanodzifo esi atse Ewuradze ne ndze ho asɛm no, ibotum ahwɛ video horow no kor wɔ “Hear Him” video mboano a ɔwɔ Asɛmpa Nwoma Korabea no. Susu dɛ ibɛyɛ wankasa wo video, dze akyerɛkyerɛmu mbrɛ Ewuradze si nye wo kasa.

Hwɛ Russell M. Nelson, “Revelation for the Church, Revelation for Our Lives,” Liahona, Esusow Aketseaba 2018, 93–96; “All Things Must Be Done in Order,” Revelations in Context, 50–53.

• Ama wɔaaboa wo mbofra ma wɔaatse ereyɛ Jesus Christ osũanyi ase no, ibotum akyerɛw Nkyerɛkyerɛ na Ahyɛmudzi 41:5 wɔ krataasin do, a eregyigya bea kasafua osũanyi wɔdɛ ɔhyɛ no pan. Nkyii hom botum ahwɛ nyiyimu 5 dze ehu kasafua a onnyi hɔ no. Dɛ mbrɛ nyiyimu mu yi kyerɛ no, ereyɛ Jesus Christ osũanyi n’asekyerɛ nye dɛn? Yerisi dɛn abɔ mbɔdzen abɛyɛ Christ esuafo ara yie?

• Wo mbofra hɔn enyi bɛgye ber a wodzi agor a ɔhwehwɛ dɛ wotsie ahwɛyie mu na wodzi ahyɛdze horow do. Hom botum dze agor yi akasa afa “hom nyɛ aso na hom ntsie na hom ndzi” Ewuradze ne mbra do n’asekyerɛ (Nkyerɛkyerɛ na Ahyɛmudzi 42:2). Ebɛn ahyɛdze na Ɔdze ama hɛn? Wosi dɛn hyira hɛn ber a yedzi Ne mbra na mbrasɛm do?

• Bia enye wo mbofra bɛyɛ dapɛn yi dwumadzi krataafa no. Hom botum so atow ndwom a ɔfa ireyɛ setsie ama Nyame ne mbra, tse dɛ “I Want to LIve the Gospel” (Children’s Songbook, 148). Susu dɛ wɔnye hɔnho bɛkyɛ mbrɛ woridzi Nyame ne mbra do dze enyigye abrɛ hom.

  

• Hom abɔ mu akenkaan Nkyerɛkyerɛ na Ahyɛmudzi 42:38 ewie no, boa wo mbofra ma wɔndwen akwan ahorow a wobotum asom nkaafo dze asom Jesus. Wobotum ehu adwenkyerɛ binom efi video “Pass It On” (ChurchofJesusChrist.org). Wobotum so ahwɛ Agyenkwa no mfonyin a Ɔroboa nkaafo, resa ayarfo yarba, anaa ɔreyɛ ayamuyie ma mbofra (hwɛ Gospel Art Book, nkanee 42, 47).

  

  2:18

  

• Bia ibotum edze Tithing and Other Offering krataasin no akyerɛ wo mbofra na wɔakasa afa mbrɛ wobesi dze edzi dwuma dze ama dza yɛwɔ dze ehyira binom (hwɛ Tithing and Donations Online” so).

• To nsa frɛ wo mbofra no dɛ wonsusu obi a ɔsoɛr gyina wɔ dasegye nhyiamu ase na ɔkã kyerɛ wardfo no dɛ woenya nyikyerɛ ama Asɔr tɔw ne nyina (mfatoho, nyikyerɛ dɛ mma yenndzi carrot bio anaa ɔsɛ dɛ yɛdze mirikye hohor hɛn nsaho kyɛn nsu.) Ɔkã dɛ ɔsɛ dɛ yetsie dza ɔkã no kyɛn nkɔnhyɛnyi no. Ebɛnadze na obomuo wɔ dɛm ho? Nkyii hom botum abɔ mu esũa Nkyerɛkyerɛ na Ahyɛmudzi 43:1–7 dze ehu mbrɛ Ewuradze si ma N’Asɔr mbrasɛm.

• Ibotum so edze nkɔnhyɛnyi ɔtseasefo no mfonyin akyerɛ na ato nsa afrɛ wo mbofra ma wɔakyɛ biribi a ndaansa yi ɔkyerɛkyerɛe. Sɛ wohia mboa a, kyɛ video mfonyin anaa ndaasa yi wiadze mfɛndzanan ehyiadzi mu nsɛm bi. Dɛn ntsi na ɔyɛ nhyira dɛ yebenya nkɔnhyɛnyi ɔtseasefo ndɛ yi?