“ວັນທີ 31 ເດືອນມີນາ–ວັນທີ 6 ເດືອນເມສາ: ‘ພຣະເຢຊູຄຣິດຈະເຕົ້າໂຮມຜູ້ຄົນຂອງພຣະອົງ’: ຄຳສອນ ແລະ ພັນທະສັນຍາ 29,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 29,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ວັນທີ 31 ເດືອນມີນາ–ວັນທີ 6 ເດືອນເມສາ: “ພຣະເຢຊູຄຣິດຈະເຕົ້າໂຮມຜູ້ຄົນຂອງພຣະອົງ”
ຄຳສອນ ແລະ ພັນທະສັນຍາ 29
ເຖິງແມ່ນວ່າສາດສະໜາຈັກຂອງພຣະເຢຊູຄຣິດໄດ້ຖືກຈັດຕັ້ງຂຶ້ນໃນປີ 1830, ແຕ່ຄວາມຈິງຂອງພຣະກິດຕິຄຸນຫລາຍຢ່າງ ຍັງບໍ່ໄດ້ຖືກເປີດເຜີຍເທື່ອ, ແລະ ສະມາຊິກຂອງສາດສະໜາຈັກລຸ້ນທຳອິດຫລາຍຄົນມີຄຳຖາມ. ເຂົາເຈົ້າໄດ້ອ່ານການທຳນາຍຢູ່ໃນພຣະຄຳພີມໍມອນກ່ຽວກັບການເຕົ້າໂຮມອິດສະຣາເອນ ແລະ ການສ້າງສາຊີໂອນ (ເບິ່ງ 3 ນີໄຟ 21). ສິ່ງນັ້ນຈະເກີດຂຶ້ນໄດ້ແນວໃດ? ການເປີດເຜີຍທີ່ໄຮຣຳ ເພຈ໌ ໄດ້ອ້າງວ່າ ຕົວເອງໄດ້ຮັບການຄາດເດົາເລື່ອງນີ້, ຊຶ່ງພຽງແຕ່ເຮັດໃຫ້ສະມາຊິກຢາກຮູ້ຢາກເຫັນຫລາຍຂຶ້ນກວ່າເກົ່າ (ເບິ່ງ ຄຳສອນ ແລະ ພັນທະສັນຍາ 28). ຜູ້ຄົນອື່ນໆກໍຢາກຮູ້ກ່ຽວກັບການຕົກຂອງອາດາມ ແລະ ເອວາ ແລະ ຄວາມຕາຍທາງວິນຍານ. ພຣະຜູ້ເປັນເຈົ້າໄດ້ຕ້ອນຮັບຄຳຖາມເຫລົ່ານີ້ໃນປີ 1830, ແລະ ພຣະອົງກໍຕ້ອນຮັບຄຳຖາມຂອງເຮົາໃນທຸກວັນນີ້. “ສິ່ງໃດກໍຕາມທີ່ພວກເຈົ້າຈະທູນຂໍດ້ວຍສັດທາ,” ພຣະອົງໄດ້ບອກໄພ່ພົນ, “ໂດຍການຮ່ວມກັນໃນຄຳອະທິຖານຕາມຄຳບັນຊາຂອງເຮົາ, ແລ້ວພວກເຈົ້າຈະໄດ້ຮັບ” (ຄຳສອນ ແລະ ພັນທະສັນຍາ 29:6). ຕາມຈິງແລ້ວ, ດັ່ງທີ່ການເປີດເຜີຍທີ່ເຕັມໄປດ້ວຍຄຳສອນ ຢູ່ໃນ ຄຳສອນ ແລະ ພັນທະສັນຍາ 29 ສະແດງໃຫ້ເຫັນ, ບາງເທື່ອພຣະຜູ້ເປັນເຈົ້າໄດ້ຕອບຄຳຖາມຂອງເຮົາໂດຍການມອບຄວາມຈິງ ແລະ ຄວາມຮູ້ໃຫ້ເຮົາ ເກີນກວ່າສິ່ງທີ່ເຮົາໄດ້ທູນຂໍຢູ່ແລ້ວ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະບິດາເທິງສະຫວັນມີແຜນສຳລັບຄວາມລອດຂອງລູກໆຂອງພຣະອົງ.
ຄຳສອນ ແລະ ພັນທະສັນຍາ 29 ສິດສອນຄວາມຈິງຫລາຍຢ່າງກ່ຽວກັບແຜນຂອງພຣະເຈົ້າສຳລັບທ່ານ. ຂະນະທີ່ທ່ານອ່ານ, ໃຫ້ຊອກຫາຄວາມຈິງທີ່ທ່ານຮຽນຮູ້ກ່ຽວກັບແຕ່ລະພາກສ່ວນຂອງແຜນຂອງພຣະອົງ ດັ່ງຕໍ່ໄປນີ້:
-
ຊີວິດກ່ອນໂລກມະຕະ (ເບິ່ງ ຂໍ້ທີ 36–37)
-
ການສ້າງ (ເບິ່ງ ຂໍ້ທີ 31–33)
-
ການຕົກຂອງອາດາມ ແລະ ເອວາ (ເບິ່ງ ຂໍ້ທີ 40–41)
-
ການຊົດໃຊ້ຂອງພຣະເຢຊູຄຣິດ (ເບິ່ງ ຂໍ້ທີ 1, 42–43, 46–50)
-
ການພິພາກສາຄັ້ງສຸດທ້າຍ (ເບິ່ງ ຂໍ້ທີ 12–13, 27–30)
ທ່ານໄດ້ຮັບຄວາມຮູ້ແຈ້ງຢ່າງໃດແດ່? ຖ້າຫາກມັນຈະເປັນປະໂຫຍດ, ທ່ານສາມາດຂຽນມັນໃສ່ຊ່ອງວ່າງທີ່ມີຮູບ ຢູ່ທ້າຍສຸດຂອງໂຄງຮ່າງນີ້. ຄວາມຈິງເຫລົ່ານີ້ມີອິດທິພົນຕໍ່ຊີວິດຂອງທ່ານແນວໃດ?
ເບິ່ງ Topics and Questions, “Plan of Salvation,” ຫ້ອງສະໝຸດພຣະກິດຕິຄຸນ ນຳອີກ.
ລາຍລະອຽດຈາກ Come Unto Me [ຈົ່ງມາຫາເຮົາ], ໂດຍ ເຈັນນະດີ ເພຈ໌
ຄຳສອນ ແລະ ພັນທະສັນຍາ 29:1–28
ພຣະເຢຊູຄຣິດເຊື້ອເຊີນເຮົາໃຫ້ຊ່ວຍເຕົ້າໂຮມຜູ້ຄົນຂອງພຣະອົງກ່ອນການສະເດັດມາຄັ້ງທີສອງຂອງພຣະອົງ.
ພຣະເຢຊູຄຣິດກ່າວເຖິງການເຕົ້າໂຮມຜູ້ຄົນຂອງພຣະອົງ “ດັ່ງແມ່ໄກ່ເຕົ້າໂຮມລູກຂອງມັນໄວ້ໃຕ້ປີກຂອງມັນ” (ຄຳສອນ ແລະ ພັນທະສັນຍາ 29:2). ການປຽບທຽບນີ້ສິດສອນທ່ານຫຍັງແດ່ກ່ຽວກັບພຣະເຢຊູຄຣິດ? ມີຄວາມຄິດ ຫລື ຄວາມປະທັບໃຈເພີ່ມເຕີມໃດແດ່ມາສູ່ທ່ານ ຂະນະທີ່ທ່ານສຶກສາການປຽບທຽບຂອງແມ່ໄກ່ ແລະ ລູກໄກ່ ຢູ່ໃນໂຄງຮ່າງນີ້? ໃຫ້ຄິດກ່ຽວກັບວ່າທ່ານໄດ້ຮູ້ສຶກແນວໃດກ່ຽວກັບການທີ່ພຣະເຢຊູຄຣິດຈະເຕົ້າໂຮມ ແລະ ປົກປ້ອງທ່ານ.
ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 29:1–11, ໃຫ້ຊອກຫາຄວາມຮູ້ກ່ຽວກັບ:
-
ໃຜຈະຖືກເຕົ້າໂຮມ.
-
ການ “ເຕົ້າໂຮມ” ເຂົ້າກັບພຣະຄຣິດໝາຍຄວາມວ່າແນວໃດ.
-
ເປັນຫຍັງເຮົາຈຶ່ງເຕົ້າໂຮມເຂົ້າກັບພຣະອົງ.
ໃຫ້ໄຕ່ຕອງວ່າເປັນຫຍັງທ່ານຈຶ່ງຢາກໃຫ້ຄົນອື່ນເຕົ້າໂຮມເຂົ້າກັບພຣະເຢຊູຄຣິດ. ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ເພື່ອຊ່ວຍເຫລືອ?
ທ່ານສາມາດຖາມຕົວເອງຄຳຖາມອັນດຽວກັນນີ້ ໃນຂະນະທີ່ທ່ານເບິ່ງວິດີໂອ “A Witness of God” (ຫ້ອງສະໝຸດພຣະກິດຕິຄຸນ) ຫລື ອ່ານ ຫລື ຟັງເພງສວດກ່ຽວກັບການເຕົ້າໂຮມ, ເຊັ່ນ “ມາເຖີດ, ທ່ານລູກຫລານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 4). ທ່ານຮູ້ສຶກວ່າພຣະຜູ້ເປັນເຈົ້າກຳລັງພະຍາຍາມສິດສອນຫຍັງໃຫ້ທ່ານ ກ່ຽວກັບວຽກງານແຫ່ງການເຕົ້າໂຮມຂອງພຣະອົງ?
A Witness of God
ປະທານຣະໂຊ ເອັມ ແນວສັນ ໄດ້ກ່າວວ່າ: “ໃນເວລານີ້ ການເຕົ້າໂຮມເກີດຂຶ້ນຢູ່ໃນແຕ່ລະປະເທດ. ພຣະຜູ້ເປັນເຈົ້າໄດ້ອອກຄຳສັ່ງໃຫ້ສະຖາປະນາຊີໂອນຂຶ້ນ ໃນແຕ່ລະຂອບເຂດທີ່ພຣະອົງໄດ້ປະທານການເກີດ ແລະ ສັນຊາດໃຫ້ໄພ່ພົນຂອງພຣະອົງ” (“The Gathering of Scattered Israel,” Liahona, Nov. 2006, 81). ການເຕົ້າໂຮມໃນວິທີທາງນີ້ ຊ່ວຍເຮົາ “ໃຫ້ຕຽມໃນທຸກສິ່ງ” ສຳລັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດແນວໃດ? (ຂໍ້ທີ 8; ເບິ່ງ ຂໍ້ທີ 14–28 ນຳອີກ).
ເບິ່ງ Russell M. Nelson and Wendy W. Nelson, “Hope of Israel” (ກອງປະຊຸມໃຫ້ຄຳດົນໃຈທົ່ວໂລກສຳລັບຊາວໜຸ່ມ, ວັນທີ 3 ເດືອນມິຖຸນາ, 2018), ຫ້ອງສະໝຸດພຣະກິດຕິຄຸນ; D. Todd Christofferson, “The Doctrine of Belonging,” Liahona, Nov. 2022, 53–56; Topics and Questions, “Gathering of Israel,” ຫ້ອງສະໝຸດພຣະກິດຕິຄຸນ.
ຄຳສອນ ແລະ ພັນທະສັນຍາ 29:31–35
“ສຳລັບເຮົາທຸກສິ່ງເປັນທາງຝ່າຍວິນຍານ.”
ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 29:31–35, ໃຫ້ຖາມຕົວເອງວ່າ, “ໃນຄວາມໝາຍໃດທີ່ພຣະບັນຍັດທຸກຂໍ້ເປັນທາງຝ່າຍວິນຍານ?” ທ່ານສາມາດຂຽນພຣະບັນຍັດສອງສາມຂໍ້ ແລະ ພິຈາລະນາຄວາມຈິງທາງຝ່າຍວິນຍານທີ່ກ່ຽວພັນກັບແຕ່ລະຂໍ້. ການທົບທວນ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ ສາມາດເປັນປະໂຫຍດໄດ້—ມັນສິດສອນຄວາມຈິງນິລັນດອນບາງຢ່າງຢູ່ເບື້ອງຫລັງພຣະບັນຍັດຫລາຍຂໍ້ຂອງພຣະເຈົ້າ.
ການທີ່ຮູ້ວ່າ “ທຸກສິ່ງ … ເປັນທາງຝ່າຍວິນຍານ” ມີຜົນກະທົບຕໍ່ວິທີທີ່ທ່ານເຫັນພຣະບັນຍັດຂອງພຣະເຈົ້າແນວໃດ? ໃຫ້ຄິດທີ່ຈະຊອກຫາຄວາມໝາຍ ຫລື ຈຸດປະສົງທາງຝ່າຍວິນຍານໃນດ້ານອື່ນໆໃນຊີວິດຂອງທ່ານນຳອີກ.
ເບິ່ງ 2 ນີໄຟ 9:39 ນຳອີກ.
ສຸມໃຈໃສ່ພຣະເຢຊູຄຣິດ. “ຫົວຂໍ້ພຣະກິດຕິຄຸນທຸກຂໍ້ [ເປັນ] ໂອກາດທີ່ຈະສິດສອນ ແລະ ຮຽນຮູ້ກ່ຽວກັບພຣະເຢຊູຄຣິດ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 6). ທ່ານຮຽນຮູ້ຫຍັງແດ່ກ່ຽວກັບຄຸນລັກສະນະຂອງພຣະອົງ, ບົດບາດຂອງພຣະອົງ, ແລະ ຕົວຢ່າງຂອງພຣະອົງ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 29?
ຄຳສອນ ແລະ ພັນທະສັນຍາ 29:36–50
ພຣະເຢຊູຄຣິດໄຖ່ເຮົາຈາກການຕົກ.
ທ່ານຈະໃຊ້ ຄຳສອນ ແລະ ພັນທະສັນຍາ 29:36–50 ເພື່ອອະທິບາຍວ່າເປັນຫຍັງເຮົາຈຶ່ງຕ້ອງການການໄຖ່ ຜ່ານທາງພຣະເຢຊູຄຣິດແນວໃດ?
ການຕົກຂອງອາດາມ ແລະ ເອວາ ໄດ້ນຳຄວາມຕາຍ ແລະ ບາບເຂົ້າມາສູ່ໂລກ, ແຕ່ມັນກໍຍັງໄດ້ກຽມເສັ້ນທາງສຳລັບການໄຖ່ ແລະ ຄວາມຊື່ນຊົມ ຜ່ານທາງພຣະຄຣິດນຳອີກ. ໂດຍທີ່ມີຄວາມຄິດນັ້ນຢູ່ໃນໃຈ, ໃຫ້ອ່ານ ຂໍ້ທີ 39–43 ແລະ ໃຫ້ສັງເກດເບິ່ງຖ້ອຍຄຳ ແລະ ວະລີທີ່ນຳຄວາມຊື່ນຊົມນັ້ນມາໃຫ້ທ່ານ. ແມ່ນຫຍັງປະທັບໃຈທ່ານກ່ຽວກັບສິ່ງທີ່ອາດາມ ແລະ ເອວາໄດ້ກ່າວກ່ຽວກັບການຕົກນັ້ນໃນ ໂມເຊ 5:10–12?
ເບິ່ງ “Why We Need a Savior” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
Why We Need a Savior
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະບິດາເທິງສະຫວັນມີແຜນສຳລັບຄວາມລອດຂອງລູກໆຂອງພຣະອົງ.
-
ເພື່ອເລີ່ມຕົ້ນການສົນທະນາກ່ຽວກັບແຜນຂອງພຣະບິດາເທິງສະຫວັນສຳລັບພວກທ່ານ, ທ່ານ ແລະ ລູກໆຂອງທ່ານສາມາດເວົ້າລົມກ່ຽວກັບເວລາເມື່ອທ່ານໄດ້ວາງແຜນ, ເຊັ່ນສຳລັບການທ່ຽວເດີນທາງ ຫລື ສຳລັບການສຳເລັດວຽກງານ. ທ່ານຍັງສາມາດແບ່ງປັນຕົວຢ່າງຂອງແຜນ, ເຊັ່ນປະຕິທິນພ້ອມທີ່ມີກິດຈະກຳຕ່າງໆຂຽນລົງໄວ້ ຫລື ຂັ້ນຕອນແນະນຳການເຮັດອັນໃດບາງສິ່ງ. ເປັນຫຍັງແຜນຈຶ່ງມີປະໂຫຍດ? ແລ້ວທ່ານສາມາດເວົ້າລົມກ່ຽວກັບສິ່ງໃດທີ່ພຣະບິດາເທິງສະຫວັນຕ້ອງການໃຫ້ເຮັດສຳເລັດ ແລະ ວ່າແຜນຂອງພຣະອົງຊ່ວຍເຮົາໃຫ້ສຳເລັດມັນແນວໃດ.
-
ທ່ານສາມາດໃຊ້ຮູບພາບຢູ່ທີ່ທ້າຍໂຄງຮ່າງນີ້ ເພື່ອຊ່ວຍລູກໆຂອງທ່ານຊອກຫາຂໍ້ເຫລົ່ານີ້ຢູ່ໃນ ຄຳສອນ ແລະ ພັນທະສັນຍາ 29 ທີ່ສິດສອນພາກສ່ວນຕ່າງໆຂອງແຜນຂອງພຣະບິດາເທິງສະຫວັນ. ທ່ານຍັງສາມາດຕັດຮູບພາບອອກ ແລະ ໃຫ້ລູກໆຂອງທ່ານຈັດຮູບເຫລົ່ານັ້ນຕາມລຳດັບທີ່ຖືກຕ້ອງນຳອີກ. ເປັນຫຍັງເຮົາຈຶ່ງຂອບພຣະຄຸນທີ່ໄດ້ຮູ້ວ່າ ພຣະບິດາເທິງສະຫວັນມີແຜນສຳລັບເຮົາ? ການຮູ້ຈັກກ່ຽວກັບມັນ ເຮັດໃຫ້ມັນມີອິດທິພົນໃນຊີວິດປະຈຳວັນຂອງເຮົາແນວໃດ?
ຄຳສອນ ແລະ ພັນທະສັນຍາ 29:1–2, 7–8
ພຣະເຢຊູຄຣິດກຳລັງເຕົ້າໂຮມຜູ້ຄົນຂອງພຣະອົງກ່ອນທີ່ພຣະອົງຈະສະເດັດມາອີກຄັ້ງ.
-
ຮູບແຕ້ມຂອງແມ່ໄກ່ທີ່ເຕົ້າໂຮມລູກຂອງມັນຢູ່ຂ້າງລຸ່ມ ຫລື ວິດີໂອ “Chicks and Hen” (ChurchofJesusChrist.org) ສາມາດຊ່ວຍລູກໆຂອງທ່ານໃຫ້ວາດພາບເຫັນການປຽບທຽບທີ່ມີຢູ່ໃນ ຄຳສອນ ແລະ ພັນທະສັນຍາ 29:1–2. ແລ້ວພວກທ່ານສາມາດອ່ານຂໍ້ເຫລົ່ານີ້ນຳກັນ ແລະ ເວົ້າລົມກ່ຽວກັບວ່າ ແມ່ໄກ່ປົກປ້ອງລູກຂອງມັນແນວໃດ ແລະ ວ່າມັນຄ້າຍຄືກັນກັບສິ່ງທີ່ພຣະຜູ້ຊ່ວຍໃຫ້ລອດສາມາດເຮັດເພື່ອເຮົາແນວໃດ.
1:24Chicks and Hens
I Would Gather Thee [ເຮົາຈະເຕົ້າໂຮມເຈົ້າ], ໂດຍ ລີສ໌ ລີມັນ ສະວິນໂດ
-
ແມ່ນຫຍັງຈະດົນໃຈລູກໆຂອງທ່ານໃຫ້ຢາກຊ່ວຍພຣະຜູ້ຊ່ວຍໃຫ້ລອດເຕົ້າໂຮມຜູ້ຄົນຂອງພຣະອົງ? ບາງທີພວກເຂົາຢາກໄດ້ຍິນປະສົບການຂອງບາງຄົນທີ່ “ໄດ້ເຕົ້າໂຮມ” ເຂົ້າກັບພຣະອົງໂດຍການເຂົ້າຮ່ວມສາດສະໜາຈັກຂອງພຣະອົງ. ຍົກຕົວຢ່າງ, ໃຜເປັນຄົນທີ່ໄດ້ແນະນຳທ່ານໃຫ້ມາຮູ້ຈັກສາດສະໜາຈັກ? ເຮົາໄດ້ຮັບພອນໂດຍການຮັບເອົາການເອີ້ນຂອງພຣະຜູ້ຊ່ວຍໃຫ້ລອດທີ່ໃຫ້ເຕົ້າໂຮມເຂົ້າກັບພຣະອົງແນວໃດ? ເຮົາຈະສາມາດຊ່ວຍຄົນອື່ນໃຫ້ເຕົ້າໂຮມເຂົ້າກັບພຣະອົງໄດ້ແນວໃດ? (ເບິ່ງ “A Message for Children from President Russell M. Nelson” [ວິດີໂອ], ChurchofJesusChrist.org.)
3:30Video: A Message for Children from President Russell M. Nelson
ຄຳສອນ ແລະ ພັນທະສັນຍາ 29:11
ພຣະເຢຊູຄຣິດຈະສະເດັດມາອີກຄັ້ງ.
-
ຮູບພາບຂອງການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ (ເຊັ່ນ ປຶ້ມຮູບພຣະກິດຕິຄຸນ, ເລກທີ. 66) ຫລື ເພງໜຶ່ງກ່ຽວກັບການສະເດັດມາ (ເຊັ່ນ “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30) ສາມາດຊ່ວຍທ່ານ ແລະ ລູກໆຂອງທ່ານສົນທະນາ ຄຳສອນ ແລະ ພັນທະສັນຍາ 29:11. ຊ່ວຍລູກໆຂອງທ່ານໃຫ້ສັງເກດເຫັນວະລີໃນຂໍ້ພຣະຄຳພີທີ່ກ່ຽວພັນກັບບາງສິ່ງທີ່ຢູ່ໃນຮູບພາບ ຫລື ໃນເພງ. ແບ່ງປັນນຳກັນແລະກັນວ່າ ພວກທ່ານຮູ້ສຶກແນວໃດກ່ຽວກັບການທີ່ພຣະເຢຊູຄຣິດຈະສະເດັດມາອີກຄັ້ງ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.