“ວັນທີ 24–30 ເດືອນມີນາ: ‘ທຸກສິ່ງຈະຕ້ອງຖືກເຮັດໄປຕາມລະບຽບ’: ຄຳສອນ ແລະ ພັນທະສັນຍາ 27–28,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 27–28,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 24–30 ເດືອນມີນາ: “ທຸກສິ່ງຈະຕ້ອງຖືກເຮັດໄປຕາມລະບຽບ”

ຄຳສອນ ແລະ ພັນທະສັນຍາ 27–28

ການເປີດເຜີຍຍັງເປັນຄວາມຄິດໃໝ່ຢູ່ສຳລັບໄພ່ພົນ ຂະນະທີ່ການຟື້ນຟູສືບຕໍ່ເປີດເຜີຍ. ສະມາຊິກຂອງສາດສະໜາຈັກລຸ້ນທຳອິດຮູ້ວ່າ ສາດສະດາໂຈເຊັບ ສະມິດ ສາມາດໄດ້ຮັບການເປີດເຜີຍສຳລັບສາດສະໜາຈັກ. ແຕ່ຄົນອື່ນກໍສາມາດເຮັດໄດ້ບໍ? ຄຳຖາມແບບນີ້ກໍໄດ້ກາຍເປັນຄຳຖາມທີ່ສຳຄັນ ເມື່ອໄຮຣຳ ເພຈ໌, ໜຶ່ງໃນພະຍານແປດຄົນເຖິງແຜ່ນຈາລຶກຄຳ, ກໍໄດ້ເຊື່ອວ່າລາວໄດ້ຮັບການເປີດເຜີຍສຳລັບສາດສະໜາຈັກ. ໄພ່ພົນທີ່ຊື່ສັດຫລາຍຄົນໄດ້ເຊື່ອວ່າ ການເປີດເຜີຍເຫລົ່ານີ້ມາຈາກພຣະເຈົ້າ. ພຣະຜູ້ເປັນເຈົ້າໄດ້ຕອບໂດຍການສິດສອນວ່າ ໃນສາດສະໜາຈັກຂອງພຣະອົງ “ທຸກສິ່ງຈະຕ້ອງຖືກເຮັດໄປຕາມລະບຽບ” (ຄຳສອນ ແລະ ພັນທະສັນຍາ 28:13). ນີ້ກໍໝາຍຄວາມວ່າ ມີແຕ່ຄົນດຽວເທົ່ານັ້ນ ທີ່ “ໄດ້ຮັບການແຕ່ງຕັ້ງໃຫ້ໄດ້ຮັບບັນຍັດ ແລະ ການເປີດເຜີຍ” ສຳລັບຕະຫລອດທັງສາດສະໜາຈັກ (ຄຳສອນ ແລະ ພັນທະສັນຍາ 28:2). ເຖິງຢ່າງໃດກໍຕາມ, ຄົນອື່ນກໍສາມາດໄດ້ຮັບການເປີດເຜີຍສ່ວນຕົວສຳລັບພາກສ່ວນຂອງເຂົາເຈົ້າໃນວຽກງານຂອງພຣະຜູ້ເປັນເຈົ້າ. ຕາມຈິງແລ້ວ, ພຣະຄຳຂອງພຣະຜູ້ເປັນເຈົ້າຕໍ່ອໍລີເວີ ຄາວເດີຣີ ເປັນຄຳເຕືອນໃຫ້ແກ່ເຮົາທຸກຄົນວ່າ: “ມັນຈະຖືກມອບໃຫ້ແກ່ເຈົ້າ … ວ່າເຈົ້າຈະເຮັດສິ່ງໃດ” (ຄຳສອນ ແລະ ພັນທະສັນຍາ 28:15).

ເບິ່ງ “All Things Must Be Done in Order,” ໃນ Revelations in Context, 50–53 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 27:1–4

ເຮົາຮັບສ່ວນສິນລະລຶກເພື່ອລະນຶກເຖິງພຣະເຢຊູຄຣິດ.

ນາງຊາລີ ໄນ້ ແລະ ນາງເອມມາ ສະມິດ ໄດ້ຮັບບັບຕິສະມາ ໃນເດືອນມິຖຸນາ ປີ 1830, ແຕ່ການຢືນຢັນຂອງເຂົາເຈົ້າ ໄດ້ຖືກລົບກວນໂດຍກຸ່ມອັນຕະພານ. ສອງເດືອນຕໍ່ຈາກນັ້ນ, ນາງຊາລີ ແລະ ນິວເອັນ ສາມີຂອງນາງ, ໄດ້ມາຢ້ຽມຢາມນາງເອມມາ ແລະ ໂຈເຊັບ, ແລະ ເຂົາເຈົ້າໄດ້ຕັດສິນໃຈວ່າ ເຂົາເຈົ້າຈະທຳການຢືນຢັນໃນເວລານັ້ນ ແລະ ວ່າທັງຈະໄດ້ຮັບສ່ວນສິນລະລຶກນຳກັນ. ໃນຂະນະທີ່ເພິ່ນໄດ້ອອກໄປຫານ້ຳອະງຸ່ນເພື່ອມາທຳພິທີສິນລະລຶກ, ໂຈເຊັບໄດ້ຖືກຢຸດໂດຍທູດອົງໜຶ່ງ.

ອ່ານ ຄຳສອນ ແລະ ພັນທະສັນຍາ 27:1–4 ເພື່ອພົບເຫັນວ່າ ທູດອົງນັ້ນໄດ້ສິດສອນຫຍັງແດ່ກ່ຽວກັບສິນລະລຶກ. ຂໍ້ເຫລົ່ານີ້ແນະນຳຫຍັງແດ່ກ່ຽວກັບວິທີທີ່ພຣະຜູ້ຊ່ວຍໃຫ້ລອດປະສົງໃຫ້ທ່ານເຂົ້າຫາສິນລະລຶກແນວໃດ? ທ່ານຄິດວ່າ “ການທີ່ເຫັນແກ່ລັດສະໝີພາບ [ຂອງພຣະອົງ] ແຕ່ຢ່າງດຽວ” ໝາຍຄວາມວ່າແນວໃດ? ໃຫ້ໄຕ່ຕອງສິ່ງນີ້—ແລະ ຊອກຫາຄວາມຮູ້ແຈ້ງຢ່າງອື່ນກ່ຽວກັບສິນລະລຶກ—ຂະນະທີ່ທ່ານອ່ານ ລູກາ 22:19–20 ແລະ 3 ນີໄຟ 18:1–11. (ເບິ່ງ ວິດີໂອ “The Last Supper,” “Jesus Christ Blesses Bread in Remembrance of Him,” ແລະ “Jesus Christ Blesses Wine in Remembrance of Him,” ຫ້ອງສະໝຸດພຣະກິດຕິຄຸນ ນຳອີກ).

Jesus Christ Blesses Bread in Remembrance of Him | 3 Nephi 18:1-7

Jesus Christ Blesses Wine in Remembrance of Him | 3 Nephi 18:8-11

ເພື່ອຮຽນຮູ້ກ່ຽວກັບການເຮັດໃຫ້ສິນລະລຶກເປັນປະສົບການແຫ່ງການນະມັດສະການ, ໃຫ້ພິຈາລະນາທີ່ຈະສຶກສາຂ່າວສານຂອງ ແອວເດີ ດີ ທອດ ຄຣິສໂຕເຟີສັນ “The Living Bread Which Came Down from Heaven” (Liahona, Nov. 2017, 36–39). ແອວເດີ ຄຣິສໂຕເຟີສັນ ໄດ້ສິດສອນຫຍັງແດ່ທີ່ສາມາດຊ່ວຍທ່ານໃຫ້ຮູ້ສຶກເຖິງການເຊື່ອມຕໍ່ກັບພຣະຜູ້ຊ່ວຍໃຫ້ລອດຫລາຍຂຶ້ນ ຜ່ານທາງສິນລະລຶກ? ໃຫ້ໄຕ່ຕອງສິ່ງທີ່ທ່ານສາມາດເຮັດເພື່ອຈະກະກຽມດີຂຶ້ນ ທີ່ຈະຮັບສ່ວນສັນຍາລັກຂອງການຊົດໃຊ້ຂອງພຣະຜູ້ຊ່ວຍໃຫ້ລອດ ແລະ ປະຕິບັດສິ່ງເຫລົ່ານັ້ນດ້ວຍຄວາມຄາລະວະ ຫລື ມີຈຸດປະສົງຫລາຍຂຶ້ນ.

ໃຫ້ຄິດທີ່ຈະຮ້ອງເພງ, ຟັງເພງ, ຫລື ອ່ານເພງສວດສິນລະລຶກ, ເຊັ່ນ “ປັນຍາ ແລະ ຄວາມຮັກຍິ່ງໃຫຍ່” (ເພງສວດ ແລະ ເພງຂອງເດັກນ້ອຍ, 20), ແລະ ບັນທຶກຄວາມຮູ້ສຶກຂອງທ່ານກ່ຽວກັບການມີສ່ວນຮ່ວມໃນພິທີການສັກສິດນີ້.

ໃຊ້ເພງ. ເພງສັກສິດຈະເຊື້ອເຊີນພຣະວິນຍານໃຫ້ເປັນພະຍານເຖິງຄວາມຈິງແຫ່ງພຣະກິດຕິຄຸນ. ມັນສາມາດຊ່ວຍທ່ານໃຫ້ເຂົ້າໃຈ ແລະ ຮູ້ສຶກເຖິງຄວາມຈິງເຫລົ່ານີ້ ໃນວິທີທາງທີ່ໜ້າຊົງຈຳ. ເພງຍັງຊ່ວຍເຮັດໃຫ້ການຮຽນຮູ້ເປັນສິ່ງທີ່ໜ້າສົນໃຈຫລາຍຂຶ້ນນຳອີກ.

ເບິ່ງ ຄຳສອນ ແລະ ພັນທະສັນຍາ 20:77, 79; 59:9–13; Topics and Questions, “Sacrament,” ຫ້ອງສະໝຸດພຣະກິດຕິຄຸນ; “Obtaining and Retaining a Remission of Sins through Ordinances,” ຢູ່ໃນ David A. Bednar, “Always Retain a Remission of Your Sins,” Liahona, May 2016, 60–62 ນຳອີກ.

ຄຳສອນ ແລະ ພັນທະສັນຍາ 27:5–14

ພຣະຜູ້ເປັນເຈົ້າມອບຂໍກະແຈຂອງຖານະປະໂລຫິດໃຫ້ແກ່ຜູ້ຮັບໃຊ້ຂອງພຣະອົງ ເພື່ອຊີ້ນຳວຽກງານຂອງພຣະອົງ.

ເຮົາຮູ້ຫຍັງແດ່ກ່ຽວກັບສາດສະດາທີ່ຖືກອ້າງເຖິງຢູ່ໃນຂໍ້ເຫລົ່ານີ້? ທ່ານສາມາດຊອກຫາຂໍ້ມູນກ່ຽວກັບພວກເພິ່ນ ຢູ່ໃນ ຄູ່ມືພຣະຄຳພີ. ມີພອນອັນໃດແດ່ທີ່ໄດ້ຖືກເປີດແກ່ທ່ານ ຜ່ານທາງຂໍກະແຈທີ່ສາດສະດາເຫລົ່ານີ້ດຳລົງຢູ່?

ຄຳສອນ ແລະ ພັນທະສັນຍາ 27:15–18

ຍຸດທະພັນຂອງພຣະເຈົ້າຊ່ວຍເຮົາໃຫ້ຢືນຕໍ່ຕ້ານຄວາມຊົ່ວຮ້າຍ.

ປະທານເອັມ ຣະໂຊ ບາເລີດ ໄດ້ກ່າວວ່າ: “ບໍ່ມີສິ່ງໃດທີ່ເຮົາສາມາດເຮັດ ທີ່ຍິ່ງໃຫຍ່ ແລະ ສຳຄັນຫລາຍໄປກວ່າການສວມຍຸດທະພັນທາງວິນຍານຂອງເຮົາເອງ. ພະລັງທາງວິນຍານທີ່ແທ້ຈິງ ມາຈາກການກະທຳອັນເລັກນ້ອຍຫລາຍໆຢ່າງ ທີ່ຖືກຕ່ຳເຂົ້າກັນເປັນເນື້ອຜ້າທີ່ເປັນພະລັງທາງວິນຍານ ທີ່ປົກປ້ອງ ແລະ ປ້ອງກັນຈາກຄວາມຊົ່ວຮ້າຍທັງປວງ” (“Be Strong in the Lord,” Ensign, July 2004, 8).

ຂະນະທີ່ທ່ານຮຽນຮູ້ກ່ຽວກັບຍຸດທະພັນຂອງພຣະເຈົ້າຢູ່ໃນ ຄຳສອນ ແລະ ພັນທະສັນຍາ 27:15–18, ທ່ານສາມາດເຮັດຕາຕະລາງ ຄືກັນກັບອັນທີ່ຢູ່ຂ້າງລຸ່ມນີ້. ທ່ານກຳລັງເຮັດຫຍັງຢູ່ ເພື່ອສວມໃສ່ແຕ່ລະຊິ້ນສ່ວນຂອງຍຸດທະພັນຂອງພຣະເຈົ້າ?

ຊິ້ນສ່ວນຂອງຍຸດທະພັນ	ພາກສ່ວນຂອງຮ່າງກາຍທີ່ຖືກປົກປ້ອງ	ສິ່ງທີ່ພາກສ່ວນຂອງຮ່າງກາຍເປັນຕົວແທນໃຫ້
ຊິ້ນສ່ວນຂອງຍຸດທະພັນ ແຜ່ນປົກເອິກແຫ່ງຄວາມຊອບທຳ	ພາກສ່ວນຂອງຮ່າງກາຍທີ່ຖືກປົກປ້ອງ ຫົວໃຈ	ສິ່ງທີ່ພາກສ່ວນຂອງຮ່າງກາຍເປັນຕົວແທນໃຫ້ ຄວາມປາດຖະໜາ ແລະ ຄວາມຮັກຂອງເຮົາ
ຊິ້ນສ່ວນຂອງຍຸດທະພັນ ໝວກເຫລັກແຫ່ງຄວາມລອດ	ພາກສ່ວນຂອງຮ່າງກາຍທີ່ຖືກປົກປ້ອງ ຫົວ ຫລື ຄວາມຄິດ	ສິ່ງທີ່ພາກສ່ວນຂອງຮ່າງກາຍເປັນຕົວແທນໃຫ້
ຊິ້ນສ່ວນຂອງຍຸດທະພັນ	ພາກສ່ວນຂອງຮ່າງກາຍທີ່ຖືກປົກປ້ອງ	ສິ່ງທີ່ພາກສ່ວນຂອງຮ່າງກາຍເປັນຕົວແທນໃຫ້
ຊິ້ນສ່ວນຂອງຍຸດທະພັນ	ພາກສ່ວນຂອງຮ່າງກາຍທີ່ຖືກປົກປ້ອງ	ສິ່ງທີ່ພາກສ່ວນຂອງຮ່າງກາຍເປັນຕົວແທນໃຫ້

ເບິ່ງ ເອເຟໂຊ 6:11–18; Jorge F. Zeballos, “Building a Life Resistant to the Adversary,” Liahona, Nov. 2022, 50–52 ນຳອີກ.

ຄຳສອນ ແລະ ພັນທະສັນຍາ 28

ພຣະເຢຊູຄຣິດຊີ້ນຳສາດສະໜາຈັກຂອງພຣະອົງຜ່ານທາງສາດສະດາທີ່ມີຊີວິດຢູ່ຂອງພຣະອົງ.

ໃຫ້ວາດພາບເຫັນວ່າ ມັນຈະເປັນແນວໃດຖ້າຫາກໃຜໆກໍສາມາດໄດ້ຮັບພຣະບັນຍັດ ແລະ ການເປີດເຜີຍສຳລັບຕະຫລອດທັງສາດສະໜາຈັກ. ເມື່ອໄຮຣຳ ເພຈ໌ ໄດ້ປະກາດວ່າລາວໄດ້ຮັບການເປີດເຜີຍເຊັ່ນນັ້ນ, ສະມາຊິກຂອງສາດສະໜາຈັກຫລາຍຄົນກໍໄດ້ມີຄວາມສັບສົນ. ໃນ ຄຳສອນ ແລະ ພັນທະສັນຍາ 28, ພຣະຜູ້ເປັນເຈົ້າໄດ້ເປີດເຜີຍລະບຽບສຳລັບການເປີດເຜີຍຢູ່ໃນສາດສະໜາຈັກຂອງພຣະອົງ. ທ່ານຮຽນຮູ້ຫຍັງແດ່ຈາກພາກນີ້ ກ່ຽວກັບບົດບາດສະເພາະຂອງປະທານຂອງສາດສະໜາຈັກ? ທ່ານຮຽນຮູ້ຫຍັງແດ່ ກ່ຽວກັບວິທີທີ່ພຣະເຈົ້າສາມາດຊີ້ນຳທ່ານ?

ເບິ່ງ Dale G. Renlund, “A Framework for Personal Revelation,” Liahona, Nov. 2022, 16–19 ນຳອີກ.

ຄຳສອນ ແລະ ພັນທະສັນຍາ 28:8–9

ເປັນຫຍັງການໄປເຜີຍແຜ່ຕໍ່ຊາວເລມັນຈຶ່ງສຳຄັນຫລາຍ?

ຈຸດປະສົງຢ່າງໜຶ່ງຂອງພຣະຄຳພີມໍມອນແມ່ນ “ເພື່ອວ່າຊາວເລມັນຈະມີຄວາມຮູ້ເລື່ອງບັນພະບຸລຸດຂອງເຂົາ, ແລະ ເພື່ອວ່າເຂົາຈະຮູ້ກ່ຽວກັບຄຳສັນຍາຂອງພຣະຜູ້ເປັນເຈົ້າ” (ຄຳສອນ ແລະ ພັນທະສັນຍາ 3:20). ສິ່ງນີ້ແມ່ນກົງກັບຄຳສັນຍາທີ່ພຣະຜູ້ເປັນເຈົ້າໄດ້ເຮັດໄວ້ກັບສາດສະດາໃນພຣະຄຳພີມໍມອນຫລາຍທ່ານ (ເບິ່ງ, ຍົກຕົວຢ່າງ, 1 ນີໄຟ 13:34–41; ເອໂນດ 1:11–18; ຮີລາມັນ 15:12–13). ສະມາຊິກຂອງສາດສະໜາຈັກລຸ້ນທຳອິດ ຖືວ່າຊາວອິນເດຍແດງເປັນເຊື້ອສາຍຂອງຜູ້ຄົນຢູ່ໃນພຣະຄຳພີມໍມອນ. (ປະຈຸບັນນີ້ ສາດສະໜາຈັກຮັບຮູ້ຢ່າງເປັນທາງການວ່າ ຊາວເລມັນ “ເປັນບັນພະບຸລຸດຂອງຊາວອິນເດຍແດງ” [ຄຳນຳຕໍ່ພຣະຄຳພີມໍມອນ].)

ເພື່ອຈະອ່ານເພີ່ມເຕີມກ່ຽວກັບການເຜີຍແຜ່ຂອງອໍລີເວີ ຄາວເດີຣີ ຕໍ່ຊາວອິນເດຍແດງທີ່ຢູ່ໃກ້ເຂດນັ້ນ, ໃຫ້ເບິ່ງ, “A Mission to the Lamanites,” Revelations in Context, 45–49. ການເຜີຍແຜ່ນີ້ສິດສອນທ່ານຫຍັງແດ່ກ່ຽວກັບພຣະຜູ້ເປັນເຈົ້າ ແລະ ວຽກງານຂອງພຣະອົງ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 27:1–2

ສິນລະລຶກຊ່ວຍເຮົາໃຫ້ລະນຶກເຖິງພຣະເຢຊູຄຣິດ.

ເດັກນ້ອຍອາດສົງໄສວ່າເປັນຫຍັງເຮົາຈຶ່ງໃຊ້ນ້ຳສຳລັບສິນລະລຶກໃນເມື່ອພຣະເຢຊູໄດ້ໃຊ້ນ້ຳອະງຸ່ນ (ເບິ່ງ ລູກາ 22:19–20; 3 ນີໄຟ 18:1–11). ພວກທ່ານສາມາດອ່ານ ຄຳສອນ ແລະ ພັນທະສັນຍາ 27:1–2 ນຳກັນ ແລະ ສົນທະນາວ່າ ແມ່ນຫຍັງຄືຄວາມໝາຍຂອງການຮັບສ່ວນສິນລະລຶກດ້ວຍ “ການທີ່ເຫັນແກ່ລັດສະໝີພາບ [ຂອງພຣະເຈົ້າ] ແຕ່ຢ່າງດຽວ” (ຂໍ້ທີ 2). ເຮົາສາມາດເຮັດຫຍັງແດ່ ເພື່ອຈະສຸມໃຈໃສ່ພຣະຜູ້ຊ່ວຍໃຫ້ລອດ ໃນຂະນະທີ່ເຮົາຮັບສ່ວນສິນລະລຶກ?
ບາງທີການມີຮູບພາບ, ຂໍ້ພຣະຄຳພີ, ຫລື ເນື້ອເພງກ່ຽວກັບພຣະຜູ້ຊ່ວຍໃຫ້ລອດ ຈະສາມາດຊ່ວຍລູກໆຂອງທ່ານໃຫ້ລະນຶກເຖິງພຣະອົງ ເມື່ອຮັບສ່ວນສິນລະລຶກ. ພວກເຂົາອາດມັກເຮັດປຶ້ມນ້ອຍດ້ວຍຮູບພາບ, ຂໍ້ພຣະຄຳພີ, ແລະ ເນື້ອເພງເຫລົ່ານີ້. ພວກເຂົາສາມາດແຕ້ມຮູບຂອງພວກເຂົາເອງ ຫລື ຊອກຫາຮູບຢູ່ໃນວາລະສານ Friend.

ພຣະຄຣິດກຳລັງຫັກເຂົ້າຈີ່ — ລາຍລະອຽດຈາກ The Last Supper [ເຂົ້າແລງຄາບສຸດທ້າຍ], ໂດຍ ຊາຍມັນ ດູວີ

ຄຳສອນ ແລະ ພັນທະສັນຍາ 27:15–18

ຍຸດທະພັນຂອງພຣະເຈົ້າປົກປ້ອງເຮົາ.

ທ່ານສາມາດສະແດງຮູບຂອງຍຸດທະພັນໃຫ້ລູກໆຂອງທ່ານເຫັນ ທີ່ຄືກັນກັບຮູບທີ່ຢູ່ໃນໂຄງຮ່າງນີ້ ຫລື ຮູບທີ່ຢູ່ໃນ ໜ້າກິດຈະກຳ ຢູ່ໃນໂຄງຮ່າງສຳລັບ ເອເຟໂຊ ຢູ່ໃນ Come, Follow Me—For Primary: New Testament 2023. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 27:15–18, ຊ່ວຍພວກເຂົາໃຫ້ຊອກຫາຍຸດທະພັນແຕ່ລະຊິ້ນສ່ວນຢູ່ໃນຮູບພາບ. ຍຸດທະພັນຂອງພຣະເຈົ້າສາມາດຊ່ວຍເຮົາ “ຕ້ານທານກັບວັນອັນຊົ່ວຮ້າຍ” ໄດ້ແນວໃດ? (ຂໍ້ທີ 15).

ຄຳສອນ ແລະ ພັນທະສັນຍາ 28:2, 6–7

ສາດສະດາໄດ້ຮັບການເປີດເຜີຍສຳລັບສາດສະໜາຈັກ; ເຮົາສາມາດໄດ້ຮັບການເປີດເຜີຍສຳລັບຊີວິດຂອງເຮົາ.

ຖ້າຫາກທ່ານມີລູກຫລາຍຄົນ, ທ່ານອາດເຊື້ອເຊີນພວກເຂົາໃຫ້ຫລິ້ນເກມ “ເຮັດຕາມຜູ້ນຳ,” ແຕ່ຂໍໃຫ້ລູກສອງຄົນ ຫລື ຫລາຍກວ່ານັ້ນເປັນຜູ້ນຳໃນເວລາດຽວກັນ. ແມ່ນຫຍັງຈະເກີດຂຶ້ນເມື່ອມີຜູ້ນຳຫລາຍກວ່າໜຶ່ງຄົນ? ແລ້ວພວກທ່ານສາມາດຮຽນຮູ້ກ່ຽວກັບໄຮຣຳ ເພຈ໌ (ເບິ່ງ “ບົດທີ 14: ສາດສະດາ ແລະ ການເປີດເຜີຍສຳລັບສາດສະໜາຈັກ,” ໃນ ເລື່ອງຄຳສອນ ແລະ ພັນທະສັນຍາ, 56–57, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ; ຫລື ຫົວຂໍ້ພາກສຳລັບ ຄຳສອນ ແລະ ພັນທະສັນຍາ 28). ພຣະບິດາເທິງສະຫວັນໄດ້ແກ້ໄຂຄວາມສັບສົນຂອງສະມາຊິກລຸ້ນທຳອິດຂອງສາດສະໜາຈັກແນວໃດ? ພຣະອົງນຳພາສາດສະໜາຈັກຂອງພຣະອົງແນວໃດໃນທຸກວັນນີ້? (ເບິ່ງ ຄຳສອນ ແລະ ພັນທະສັນຍາ 28:2). ແບ່ງປັນປະຈັກພະຍານຂອງທ່ານວ່າ ສາດສະດາໃນປະຈຸບັນ ຖືກເອີ້ນໂດຍພຣະຜູ້ເປັນເຈົ້າໃຫ້ນຳພາສາດສະໜາຈັກຂອງພຣະອົງໃນວັນເວລາຂອງເຮົາ.

1:21
Chapter 14: The Prophet and Revelations for the Church: September 1830
ໃນຂະນະທີ່ການເປີດເຜີຍສຳລັບສາດສະໜາຈັກຈະຖືກປະທານໃຫ້ຜ່ານທາງສາດສະດາສະເໝີໄປ, ເຮົາທຸກຄົນກໍສາມາດໄດ້ຮັບການຊີ້ນຳໂດຍພຣະວິນຍານບໍລິສຸດ. ທ່ານສາມາດຊ່ວຍລູກໆຂອງທ່ານຄົ້ນຫາຂໍ້ພຣະຄຳພີດັ່ງຕໍ່ໄປນີ້ ແລະ ຂຽນວິທີຕ່າງໆທີ່ພຣະວິນຍານບໍລິສຸດສາມາດຊີ້ນຳພວກເຂົາ: ຄຳສອນ ແລະ ພັນທະສັນຍາ 28:1, 4 , 15; ໂຢຮັນ 14:26; ໂມໂຣໄນ 8:26; 10:4–5. ແບ່ງປັນນຳກັນວ່າພວກທ່ານໄດ້ຖືກນຳພາໂດຍພຣະວິນຍານບໍລິສຸດແນວໃດ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.