“ວັນທີ 3–9 ເດືອນມີນາ, ‘ຈົ່ງຮຽນຮູ້ຈາກເຮົາ,’ ຄຳສອນ ແລະ ພັນທະສັນຍາ 19,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 19,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ Gethsemane’s Path [ເສັ້ນທາງໃນສວນເຄັດເຊມາເນ], ໂດຍ ສະຕີບ ແມັກກິນຕີ

ວັນທີ 3–9 ເດືອນມີນາ: “ຈົ່ງຮຽນຮູ້ຈາກເຮົາ”

ຄຳສອນ ແລະ ພັນທະສັນຍາ 19

ຕ້ອງໃຊ້ເວລາຫລາຍປີກ່ອນທີ່ມາຕິນ ແລະ ນາງລູສີ ແຮຣິສ ຈະໄດ້ມີໄຮ່ທີ່ດີທີ່ສຸດ ຢູ່ໃນເມືອງພາໄມຣາ, ລັດນິວຢອກ. ແຕ່ໃນປີ 1829 ເຫັນໄດ້ຢ່າງແຈ້ງຊັດວ່າ ພຣະຄຳພີມໍມອນສາມາດຖືກຈັດພິມໄດ້ ພຽງແຕ່ເມື່ອມາຕິນຕ້ອງເອົາໄຮ່ຂອງລາວໄປມັດຈຳ ເພື່ອຈ່າຍຜູ້ພິມເທົ່ານັ້ນ. ມາຕິນມີປະຈັກພະຍານເຖິງພຣະຄຳພີມໍມອນ, ແຕ່ນາງລູສີບໍ່ມີ. ຖ້າຫາກມາຕິນເອົາໄຮ່ໄປມັດຈຳ ແລະ ພຣະຄຳພີມໍມອນຂາຍບໍ່ອອກ, ແລ້ວເຂົາເຈົ້າຈະສູນເສຍໄຮ່ຂອງຕົນໄປ, ເຮັດໃຫ້ການແຕ່ງງານຂອງລາວມີຄວາມສ່ຽງ, ແລະ ເຮັດໃຫ້ເສຍຊື່ສຽງໃນຊຸມຊົນ. ເຖິງແມ່ນວ່າສະຖານະການຂອງເຮົາຈະແຕກຕ່າງຈາກມາຕິນ, ແຕ່ຈະມີເວລາໃດເວລາໜຶ່ງທີ່ເຮົາທຸກຄົນຕ້ອງປະເຊີນກັບຄຳຖາມທີ່ຫຍຸ້ງຍາກທີ່ເໝືອນກັບຄຳຖາມເຫລົ່ານັ້ນທີ່ລາວໄດ້ປະເຊີນມາວ່າ: ພຣະກິດຕິຄຸນຂອງພຣະເຢຊູຄຣິດມີຄ່າຕໍ່ເຮົາຫລາຍປານໃດ? ເຮົາຈະເຕັມໃຈເສຍສະລະຫຍັງແດ່ ເພື່ອຊ່ວຍສ້າງສາອານາຈັກຂອງພຣະເຈົ້າ? ໃນທີ່ສຸດ ມາຕິນ ແຮຣິສ ກໍໄດ້ຕັດສິນໃຈວ່າລາວຈະເອົາໄຮ່ຂອງລາວໄປມັດຈຳເພື່ອ ພຣະຄຳພີຈຳນວນ 5,000 ເຫລັ້ມທຳອິດຈະໄດ້ຖືກຈັດພິມ. ແຕ່ວ່າແມ່ນແຕ່ການເສຍສະລະຄັ້ງນີ້—ແລະ ການເສຍສະລະໃດໆກໍຕາມທີ່ເຮົາໄດ້ເຮັດ—ເປັນສິ່ງທີ່ເລັກນ້ອຍຖ້າປຽບທຽບໃສ່ກັບການເສຍສະລະຂອງພຣະເຢຊູຄຣິດ, “ຜູ້ຍິ່ງໃຫຍ່ທີ່ສຸດ” (ຄຳສອນ ແລະ ພັນທະສັນຍາ 19:18), ຜູ້ທີ່ໂລຫິດໄດ້ໄຫລອອກຈາກທຸກຂຸມຂົນເພື່ອຊ່ວຍກູ້ຜູ້ກັບໃຈ.

ສຳລັບລາຍລະອຽດເພີ່ມເຕີມກ່ຽວກັບການຈັດພິມພຣະຄຳພີມໍມອນ, ໃຫ້ເບິ່ງ Saints, 1:76–84.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 19:1–12

“ເຮົາ, ພຣະເຈົ້າ, ບໍ່ມີທີ່ສິ້ນສຸດ.”

ໂຈເຊັບ ສະມິດ ໄດ້ອະທິບາຍວ່າການເປີດເຜີຍໃນ ພາກທີ 19 ຄື “ພຣະບັນຍັດ … ແກ່ມາຕິນ ແຮຣິສ, ມອບໃຫ້ໂດຍພຣະອົງຜູ້ຊົງນິລັນດອນ” (ຫົວຂໍ້ພາກ). ໃຫ້ຊອກເບິ່ງໃນ ຂໍ້ທີ 1–12 ທີ່ພຣະຜູ້ເປັນເຈົ້າເນັ້ນລັກສະນະນິລັນດອນຂອງພຣະອົງ. ທ່ານຄິດວ່າເປັນຫຍັງມັນຈຶ່ງສຳຄັນທີ່ມາຕິນ ແຮຣິສ ຈະຮູ້ຈັກສິ່ງນີ້ກ່ຽວກັບພຣະຜູ້ເປັນເຈົ້າ? ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້ມັນ?

ທ່ານຄິດວ່າເປັນຫຍັງພຣະເຢຊູຄຣິດ ຈຶ່ງຖືກເອີ້ນວ່າ “ເປັນຕົ້ນ ແລະ ທີ່ສຸດ”? (ຂໍ້ທີ 1).

ຄຳສອນ ແລະ ພັນທະສັນຍາ 19:15–20

ພຣະເຢຊູຄຣິດໄດ້ຮັບທຸກທໍລະມານ ເພື່ອວ່າເຮົາຈະສາມາດກັບໃຈ ແລະ ມາຫາພຣະອົງ.

ພຣະຄຳພີໃໝ່ບັນຍາຍເຖິງການຮັບທຸກທໍລະມານຂອງພຣະຜູ້ຊ່ວຍໃຫ້ລອດ ຢູ່ໃນເຄັດເຊມາເນ ຈາກມຸມມອງຂອງຜູ້ຄົນທີ່ໄດ້ສັງເກດເບິ່ງ. ໃນ ຄຳສອນ ແລະ ພັນທະສັນຍາ 19:15–20, ພຣະເຢຊູຄຣິດໄດ້ບອກເຖິງການຮັບທຸກທໍລະມານຂອງພຣະອົງ ຈາກທັດສະນະຂອງພຣະອົງເອງ. ຂະນະທີ່ທ່ານອ່ານເລື່ອງລາວທີ່ສັກສິດ ແລະ ເປັນສ່ວນຕົວນີ້, ໃຫ້ຊອກຫາວ່າພຣະຜູ້ຊ່ວຍໃຫ້ລອດໄດ້ບັນຍາຍເຖິງການຮັບທຸກທໍລະມານຂອງພຣະອົງແນວໃດ. ໃຫ້ພິຈາລະນາສິ່ງທີ່ແຕ່ລະຄຳ ຫລື ແຕ່ລະວະລີສິດສອນທ່ານຫຍັງແດ່. ເປັນຫຍັງພຣະຜູ້ຊ່ວຍໃຫ້ລອດຈຶ່ງເຕັມພຣະໄທທີ່ຈະຮັບທຸກທໍລະມານ? ທ່ານສາມາດຄົ້ນພົບເພີ່ມເຕີມໄດ້ໃນ ໂຢຮັນ 15:13; ໂມໄຊຢາ 3:7; ແອວມາ 7:11–12; ຄຳສອນ ແລະ ພັນທະສັນຍາ 18:10–13.

ຄວາມຮູ້ສຶກຂອງທ່ານໃນຂະນະທີ່ທ່ານສຶກສາກ່ຽວກັບຄວາມທຸກທໍລະມານຂອງພຣະຜູ້ຊ່ວຍໃຫ້ລອດອາດຈະກະຕຸ້ນທ່ານກ່ຽວກັບຄຳຖາມທີ່ວ່າ: ເປັນຫຍັງພຣະຜູ້ຊ່ວຍໃຫ້ລອດຈຶ່ງຕ້ອງທຸກທໍລະມານເພື່ອບາບຂອງເຮົາ? ເປັນຫຍັງເຮົາຕ້ອງກັບໃຈ ເພື່ອຈະໄດ້ຮັບພອນອັນສົມບູນຂອງການຊົດໃຊ້ຂອງພຣະອົງ? ທ່ານອາດຈະຄົ້ນພົບຄວາມຮູ້ແຈ້ງກ່ຽວກັບຄຳຖາມເຫລົ່ານີ້ ແລະ ອື່ນໆໄດ້ໃນຂ່າວສານຂອງ ແອວເດີ ຢູລິດຊິສ໌ ໂຊອາເຣສ໌ “Jesus Christ: The Caregiver of Our Soul” (Liahona, May 2021, 82–84). ຂະນະທີ່ທ່ານສຶກສາ, ມີຄວາມປະທັບໃຈຫຍັງແດ່ທີ່ເຂົ້າມາສູ່ຈິດໃຈຂອງທ່ານ? ໃຫ້ຄິດທີ່ຈະບັນທຶກຄວາມຮູ້ສຶກຂອງທ່ານກ່ຽວກັບພຣະເຢຊູຄຣິດ ແລະ ການເສຍສະລະຂອງພຣະອົງເພື່ອທ່ານ.

ໃນຖານະສ່ວນໜຶ່ງຂອງການສຶກສາ ແລະ ການນະມັດສະການຂອງທ່ານ, ທ່ານອາດຈະຊອກຫາເພງສວດໃດໜຶ່ງທີ່ທ່ານສາມາດຟັງ ຫລື ຮ້ອງເພງທີ່ສະແດງເຖິງຄວາມກະຕັນຍູຂອງທ່ານທີ່ມີຕໍ່ພຣະຜູ້ຊ່ວຍໃຫ້ລອດສຳລັບການທຸກທໍລະມານຂອງພຣະອົງແທນທ່ານ. “ຂ້າເຝົ້າພິສະຫວົງ” (ເພງສວດ ແລະ ເພງຂອງເດັກນ້ອຍ, 24) ຄືຕົວຢ່າງໜຶ່ງທີ່ດີ.

ທ່ານຮູ້ສຶກວ່າພຣະບິດາເທິງສະຫວັນ ແລະ ພຣະເຢຊູຄຣິດປະສົງຈະໃຫ້ທ່ານເຮັດຫຍັງທີ່ເປັນຜົນມາຈາກສິ່ງທີ່ທ່ານໄດ້ຮູ້ສຶກ ແລະ ສຶກສາ?

ເບິ່ງ “Jesus Christ will help you,” ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (2022), 6–9; Topics and Questions, “Atonement of Jesus Christ,” “Repentance,” Gospel Library; D. Todd Christofferson, “The Divine Gift of Repentance,” Liahona, Nov. 2011, 38–41; “Jesus Suffers in Gethsemane” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 19:23

ຄວາມສະຫງົບມາເຖິງຈາກການຮຽນຮູ້ກ່ຽວກັບພຣະເຢຊູຄຣິດ ແລະ ຈາກການຕິດຕາມພຣະອົງ.

ໃຫ້ພິຈາລະນາຄຳເຊື້ອເຊີນຂອງພຣະຜູ້ຊ່ວຍໃຫ້ລອດ ທີ່ວ່າ: “ຈົ່ງຮຽນຮູ້ຈາກເຮົາ.” ທ່ານຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຢູ່ໃນ ຄຳສອນ ແລະ ພັນທະສັນຍາ 19? ໃຫ້ບັນທຶກຄວາມຄິດຂອງທ່ານ, ແລະ ໄຕ່ຕອງວ່າຄວາມຈິງເຫລົ່ານີ້ກ່ຽວກັບພຣະຜູ້ຊ່ວຍໃຫ້ລອດ ຊ່ວຍທ່ານພົບຄວາມສະຫງົບແນວໃດ. ຄຳວ່າ “ຈົ່ງເດີນໄປໃນຄວາມອ່ອນໂຍນແຫ່ງພຣະວິນຍານ [ຂອງພຣະອົງ]” ມີຄວາມໝາຍແນວໃດຕໍ່ທ່ານ?

ເບິ່ງ Henry B. Eyring, “Finding Personal Peace,” Liahona, May 2023, 29–31; “Peace in Christ” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 19:26–41

ພອນຂອງພຣະເຈົ້າແມ່ນຍິ່ງໃຫຍ່ກວ່າຊັບສົມບັດຂອງແຜ່ນດິນໂລກ.

ພຣະຄຳພີມໍມອນບໍ່ໄດ້ຂາຍດີປານໃດຢູ່ເມືອງພາໄມຣາ. ເພາະດ້ວຍເຫດນີ້, ມາຕິນຈຶ່ງໄດ້ຂາຍທີ່ດິນຕອນໃຫຍ່ຂອງໄຮ່ລາວ ເພື່ອຊຳລະໜີ້ໃຫ້ກັບເຄື່ອງພິມ (ເບິ່ງ “The Contributions of Martin Harris,” ໃນ Revelations in Context, 7–8). ໃຫ້ໄຕ່ຕອງກ່ຽວກັບການເສຍສະລະຂອງມາຕິນ—ແລະ ພອນທີ່ທ່ານໄດ້ຮັບ ເພາະການເສຍສະລະ—ຂະນະທີ່ທ່ານອ່ານຂໍ້ເຫລົ່ານີ້ ຄຳສອນ ແລະ ພັນທະສັນຍາ 19:26–41. ທ່ານກໍຍັງສາມາດຄິດກ່ຽວກັບສິ່ງທີ່ພຣະຜູ້ເປັນເຈົ້າໄດ້ຂໍໃຫ້ທ່ານເສຍສະລະນຳອີກ. ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ດົນໃຈທ່ານໃຫ້ເຮັດການເສຍສະລະເຫລົ່ານີ້ ດ້ວຍ “ຄວາມປິຕິຍິນດີ” ແລະ “ເຊີດຊູໃຈ”? (ເບິ່ງ ຂໍ້ທີ 15–20 ນຳອີກ).

ຮູບແຕ້ມຂອງໄຮ່ໃນເມືອງພາໄມຣາ — ລາຍລະອຽດຈາກ Martin Harris Farm [ໄຮ່ຂອງມາຕິນ ແຮຣິສ], ໂດຍ ອາລ໌ ຣາວສ໌

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 19:16–19

ພຣະເຢຊູຄຣິດໄດ້ຮັບທຸກທໍລະມານເພື່ອເຮົາ.

ທ່ານສາມາດຊ່ວຍລູກໆໃຫ້ຮູ້ສຶກເຖິງຄວາມຄາລະວະ ແລະ ກະຕັນຍູຕໍ່ພຣະຜູ້ຊ່ວຍໃຫ້ລອດໂດຍການອ່ານ ຄຳສອນ ແລະ ພັນທະສັນຍາ 19:16–19 ນຳກັນ ຫລື “ບົດທີ 51: ພຣະເຢຊູຮັບທຸກທໍລະມານຢູ່ໃນສວນເຄັດເຊມາເນ,” ໃນ ເລື່ອງພຣະຄຳພີໃໝ່, 129–32, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ. ໃຫ້ຄິດທີ່ຈະຢຸດບຶດໜຶ່ງເພື່ອໃຫ້ແນ່ໃຈວ່າລູກໆຂອງທ່ານເຂົ້າໃຈ ແລະ ປ່ອຍໃຫ້ພວກເຂົາສະແດງຄວາມຮູ້ສຶກຂອງພວກເຂົາ. ຍົກຕົວຢ່າງ, ໃນ ຂໍ້ທີ 16, “ສິ່ງເຫລົ່ານີ້” ທີ່ພຣະເຢຊູໄດ້ຮັບທຸກທໍລະມານເພື່ອເຮົານັ້ນແມ່ນຫຍັງ? (ເບິ່ງ ໂມໄຊຢາ 3:7; ແອວມາ 7:11–12). ເຮົາຮຽນຮູ້ຫຍັງແດ່ຈາກຄຳອະທິບາຍເຖິງການຮັບທຸກທໍລະມານຂອງພຣະອົງ? ເຮົາຈະສະແດງຄວາມກະຕັນຍູຂອງເຮົາສຳລັບສິ່ງທີ່ພຣະອົງໄດ້ກະທຳເພື່ອເຮົາແນວໃດ?

Chapter 51: Jesus Suffers in the Garden of Gethsemane

ຊ່ວຍເດັກນ້ອຍໃຫ້ຮຽນຮູ້ຈາກພຣະຄຳພີ. ເດັກນ້ອຍບາງຄົນມີບັນຫາໃນການອ່ານພຣະຄຳພີ. ການເນັ້ນພຽງແຕ່ຂໍ້ດຽວ ຫລື ວະລີໃດໜຶ່ງອາດຈະຊ່ວຍເຂົາໄດ້.

ທ່ານ ແລະ ລູກໆຂອງທ່ານສາມາດເບິ່ງໃນ Hymns ຫລື Children’s Songbook ສຳລັບບົດເພງທີ່ຊ່ວຍໃຫ້ທ່ານສະແດງຄວາມຮູ້ສຶກຂອງທ່ານກ່ຽວກັບພຣະເຢຊູຄຣິດ (ເບິ່ງ ຫົວຂໍ້ດັດຊະນີໃນປື້ມເຫລົ່ານີ້).

ຄຳສອນ ແລະ ພັນທະສັນຍາ 19:18–19, 24

ພຣະເຢຊູຄຣິດໄດ້ເຊື່ອຟັງພຣະບິດາເທິງສະຫວັນ, ແມ່ນແຕ່ເມື່ອມັນຍາກກໍຕາມ.

ການທຸກທໍລະມານເພື່ອບາບຂອງເຮົານັ້ນເປັນເລື່ອງທີ່ຍາກຫລາຍ, ແຕ່ວ່າພຣະເຢຊູຄຣິດໄດ້ເຕັມພຣະໄທທີ່ຈະເຮັດມັນເພື່ອເປັນການເຊື່ອຟັງພຣະບິດາຂອງພຣະອົງ ແລະ ເພື່ອສະແດງຄວາມຮັກຂອງພຣະອົງຕໍ່ພຣະບິດາ ແລະ ຕໍ່ເຮົາ. ພວກທ່ານສາມາດເບິ່ງຮູບຂອງພຣະເຢຊູຄຣິດກຳລັງທົນທຸກທໍລະມານໃນສວນເຄັດເຊມາເນນຳກັນ (ເຊັ່ນຮູບເຫລົ່ານັ້ນທີ່ຢູ່ໃນໂຄງຮ່າງນີ້) ແລະ ຂໍໃຫ້ລູກໆຂອງທ່ານເລົ່າໃຫ້ທ່ານຟັງໃນສິ່ງທີ່ພວກເຂົາຮູ້ຈັກກ່ຽວກັບສິ່ງທີ່ເກີດຂຶ້ນໃນຮູບພາບ. ພວກທ່ານອາດຈະອ່ານໃນ ຄຳສອນ ແລະ ພັນທະສັນຍາ 19:18–19, 24 ນຳກັນ ເພື່ອເນັ້ນໜັກວ່າຄວາມທຸກທໍລະມານເພື່ອບາບຂອງເຮົາເປັນສິ່ງທີ່ຍາກທີ່ສຸດເທົ່າທີ່ໃຜເຄີຍໄດ້ເຮັດ, ແຕ່ຍ້ອນວ່າພຣະເຢຊູຊົງຮັກພຣະບິດາຂອງພຣະອົງ ແລະ ເຮົາ, ພຣະອົງຈຶ່ງເຊື່ອຟັງພຣະປະສົງຂອງພຣະເຈົ້າ (ເບິ່ງ ໂມໄຊຢາ 3:7 ນຳອີກ). ມີເລື່ອງຍາກໃດແດ່ທີ່ພຣະເຈົ້າຂໍໃຫ້ເຮົາເຮັດ? ເຮົາຈະສາມາດມີຄວາມກ້າຫານທີ່ຈະເຊື່ອຟັງພຣະອົງໄດ້ແນວໃດ?

ຄຳສອນ ແລະ ພັນທະສັນຍາ 19:23

“ຈົ່ງຮຽນຮູ້ຈາກເຮົາ, ແລະ ຟັງຖ້ອຍຄຳຂອງເຮົາ.”

ທ່ານສາມາດຊ່ວຍລູກໆຂອງທ່ານໃຫ້ຄິດເຖິງການກະທຳແບບລຽບງ່າຍທີ່ສອດຄ່ອງກັບວະລີ ຢູ່ໃນ ຄຳສອນ ແລະ ພັນທະສັນຍາ 19:23. ອ່ານຂໍ້ພຣະຄຳພີນັ້ນຫລາຍໆຄັ້ງໃນຂະນະທີ່ພວກເຂົາສະແດງທ່າທີ. ມີວິທີທາງໃດແດ່ທີ່ເຮົາສາມາດຮຽນຮູ້ກ່ຽວກັບພຣະຄຣິດ ແລະ ຟັງພຣະຄຳຂອງພຣະອົງ?

ຄຳສອນ ແລະ ພັນທະສັນຍາ 19:38

ພອນຂອງພຣະເຈົ້າແມ່ນຍິ່ງໃຫຍ່ກວ່າຊັບສົມບັດຂອງແຜ່ນດິນໂລກ.

ທ່ານ ແລະ ລູກໆຂອງທ່ານສາມາດປ່ຽນຜຽນກັນຖືພຣະຄຳພີມໍມອນ ແລະ ແບ່ງປັນໃນສິ່ງທີ່ພວກທ່ານຮັກກ່ຽວກັບພຣະຄຳພີ. ກ່າວສັ້ນໆກ່ຽວກັບການເສຍສະລະຂອງມາຕິນ ແຮຣິສ ເພື່ອພຣະຄຳພີມໍມອນຈະໄດ້ຖືກຈັດພິມອອກມາ (ເບິ່ງ ເລື່ອງຄຳສອນ ແລະ ພັນທະສັນຍາ, 33). ພຣະຜູ້ເປັນເຈົ້າໄດ້ກ່າວຫຍັງແດ່ກັບມາຕິນຢູ່ໃນ ຄຳສອນ ແລະ ພັນທະສັນຍາ 19:38 ທີ່ອາດຊ່ວຍລາວໃຫ້ຊື່ສັດ ແລະ ເຊື່ອຟັງ? ຊ່ວຍໃຫ້ລູກໆຂອງທ່ານຄິດເຖິງສິ່ງທີ່ພວກເຂົາສາມາດເສຍສະລະເພື່ອເຊື່ອຟັງພຣະເຈົ້າ ຫລື ຊ່ວຍເຫລືອໃນວຽກງານຂອງພຣະອົງ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບແຕ້ມຂອງພຣະເຢຊູໃນສວນເຄັດເຊມາເນ — Christ Praying in the Garden of Gethsemane [ພຣະຄຣິດກຳລັງອະທິຖານຢູ່ໃນສວນເຄັດເຊມາເນ], ໂດຍ ເຮີແມນ ຄະລີເມັ້ນສ໌